I kaat 1 Korintô 15:8, Paul a nkal le: “Sôk i nsôk, a pémél yak me wengoñle a mpémél man nu a ngwéé ngéda ngi kola.” Di bé kal ndugi ikété bikaat gwés le, i nene le Paul a bé pôdôl i ngéda a bi tehe ngim yiinda i het Yésu a bé ikété lipémba jé jolisôna nyoo ngii. A bé ndigi wengoñle a bi kôs nsima i gwéé, tole i tuge inyu ke i ngii ngéda ngi kola, ngandak nwii ilole bôt ba mbôdôl tuge inyu ke i ngii. Ndi, i ngéda di nkônde nigil i nlôñ Bibel unu, di nléba le di nlama toñol wo nya ipe.

Ñ, Paul a mpôdôl nga i jam li bi tagbe i ngéda a bi yila kristen. Ndi kii a bé sômbôl kal i ngéda a bi kal le “a ngwéé ngéda ngi kola”? Manjom ma nla ba ngandak.

Ngéda a bi yila kristen, hala a bi puhe ngandak bôt, hala a bi tihba ki nye ngandak. Ngeñ man a ngwéé ngéda ngi kola, ligwéé jé li yé li puhe bôt. Ngéda Saulô (nu a bi yik yila Paul) a bé ke i Damaskô inyu tééñga bikristen, a bé hégda bé le a yé le a tehe Yésu ikété yiinda. Ngéda Paul a bi yila kristen, hala a bi hélés nyemede, hala a hélés yak bikristen bi a bé ke i tééñga. Yom ipe i yé le, i jam li, li bi lôôha tihba nye letee a kwo yak ndim inyu ngim ngéda.​—Minson mi baôma 9:1-9, 17-19.

A bi yila kristen i “béba ngéda.” I buk i Grikia ini i nkobla hana le “man nu a ngwéé ngéda ngi kola” i nla ki kobla le “man nu a ngwéé i béba ngéda.” La Bible de Jérusalem i nkal ha homa nu le: “A bé ndik wengoñle me bi gwéé ngeñ to mut a bé hégda bé le me ngwéé.” Ngéda Paul a bi yila kristen, Yésu a bé a ma témb i ngii. Nwaa le Yésu a mbet i ngii, Paul a bi tehe bé nye; ndi ki le i bôt a mpôdôl i minlôñ mi bisu mu pes kaat i, ba bi tehe nye. (1 Korintô 15:4-8) Ngéda Yésu a bi puhe Paul, a pémél nye, hala a bi yible Paul njel i tehe Yésu, tolakii i bé nene wee hala a bé i “béba ngéda.”

A bé yéñ éba le a kôli bé. Bayimam bahogi ba nkal le, bibuk Paul a ngwélél hana bi ñunda le a bé yan nyemede. Ibale hala nyen i yé, wee a bé sômbôl unda le a kôli bé ba ñôma. Nyemede a bi kal le: “Me yé ñôma nuntitigi ikété baôma, me kôli bé to sébla le ñôma inyule me bi tééñga likoda li Nyambe. Ndi ni njel konangoo i mbuma ñañ i Nyambe, me yé i yom me yé.”​—1 Korintô 15:9, 10.

Jo ni jon, i mpôna le Paul a bé sômbôl unda le Yésu a bi puhe nye i ngéda a bi pémél nye, le a bi yila kristen i ngéda mut a bé bé le a hégda, tole a bé bé a kôli kôs nsima i tehe Yésu ikété yiinda. Ndi to i ba lelaa, Paul a bé maséé ni bisai bi. I yiinda i, i bi kwés nye nkaa le Yésu a bi tuge toi. Inyu hala nyen a bé béna pôdôl i jam li i ngéda a bé pôdôl bitugne bi Yésu i likalô.​—Minson mi baôma 22:6-11; 26:13-18.