1. Bimbe bikééhene gw’a ba ndék ngéda?

 DI NIÑIL i ngéda i tôbôtôbô! A yii ndik ndék wee Yésu a nlo i kéés bôt bobasôna. Kiki a bé pôdôl ngéda i bikééhene, Yésu a bi ti banigil bé yimbne i i bé lama yis bo le a yé ha, ni le di yé i ‘mamélél ma nkoñ ’isi unu.’ (Matéô 24:3) Di nléba i mbañ i i kaat Matéô pes 24 ni 25 i Markô pes 13 ni i Lukas pes 21.

2. Kii di ga tehe munu yigil ini, lelaa hala a ga bane bés nseñ?

² Yésu a bi gwélél dihéga diaa inyu béhe bés. Hihéga hi bisu hi yé hihéga hi mintômba ni minya mi kembee, hi nyônôs hiba hi yé hihéga hi bingond bi ngi yi munlôm bi bi bééna pék ni bi bi bé bijôñ, ni hi nyônôs hiaa, hihéga hi talént. Hiki hihéga mu hi ñunda maada ma yé ipôla maboñok ma ngim mut ni bikééhene bi bi mbem nye. Mu kiki di nwan dihéga dini, di tehe biniigana di nla ôt ni lelaa di nla bii gwo i bibôñol. Hihéga hi bisu di ga pôdôl hi yé hihéga hi mintômba ni minya mi kembee.

MINTÔMBA NI MINYA MI KEMBEE

3. Imbe ngéda Yésu a ga kéés bôt?

³ Munu hihéga hi mintômba ni minya mi kembee, Yésu a mpôdôl bikééhene bi bôt ba mbana pôla i leege ñañ nlam ni i nit minhook. (Matéô 25:​31-46) I “njiiha ikeñi,” ni ndék ngéda ilole Armagédôn a mbôdôl nyen Yésu a ga pémés i mbagi i. (Matéô 24:21) Ndik kiki ntééda mintômba a mbagal mintômba ni minya mi kembee, Yésu a ga bagal ba ba nit minhook ni ñem wap wonsôna ni ba ba mboñ bé hala.

4. Inoñnaga ni Yésaya 11:​3, 4, inyuki di nla ba nkwoog nkaa le mbagi i Yésu i ga ba loñge? (Béñge yak titii i .)

 ⁴ Mbañ i Bibel i ñunda le nkéés Yéhôva a ntéé, le Yésu, a ga kéés bôt ni telepsép. (Añ Yésaya 11:​3, 4.) A mbéñge maboñok, libak ni bipôdôl bi bôt, ni lelaa ba nyoñ minhook mi bikristen. (Matéô 12:​36, 37; 25:40) Yésu a ga yi bonjee ba bi nit minhook mu nson wap. a Njel yada i i nlôôha mahee di nla gwélél inyu nit lôkisañ i Kristô i yé le, di hôla bo i nson likalô. Ba bobasôna ba nyoñ ngaba mu nson u ba ga kéla le ba “téé sép,” ba bana ki botñem i “niñ boga” hana ’isi. (Matéô 25:46; Masoola 7:​16, 17) Kinje bom i mbuma ñañ inyu i bet b’a téñbe! Ba ga bana môl map ntilga i “kaat niñ” inyule ba bi téñbe ni Nyambe i njiiha ikeñi ni i mbus ha.​—Masoola 20:15.

5. Bimbe biniigana di ñôt mu hihéga hi mintômba ni minya mi kembee, bonjee hihéga hini hi mbéñge?

⁵ Téñbe ni Nyambe, u ba ki maliga. Hihéga hi mintômba ni minya mi kembee hi mbéñge ndugi i bet ba gwé botñem i niñ hana ’isi. Ba ñunda hémle yap mu kiki ba nit lôk kéé Kristô i nson likalô, ba neebege le nkol u maliga ni u pék Yésu a bi téé won u éga bo. (Matéô 24:45) Ndi yak i bet ba gwé botñem i niñ i ngii ba nlama neebe mabéhna ma mpémél mu hihéga hi. Inyuki? Inyule Yésu a mbéñge maboñok map, libak jap, ni bipôdôl gwap. Yak bo ba nlama téñbe ni Djob. Yésu a bi ti dihéga diba dipe di di gwé mabéhna ma tôbôtôbô inyu minhook. Di nléba ki dihéga dini i Matéô pes 25. Nano di pôdôl hihéga hi bingond bi ngi yi munlôm bi bi bééna pék ni bi bi bé bijôñ.

BINGOND BI NGI YI MUNLÔM BI BI BÉÉNA PÉK NI BI BI BÉ BIJÔÑ

6. Lelaa bingond bitan bi ngi yi bôlôm bi bi unda le bi gwé pék? (Matéô 25:​6-10)

⁶ Mu hihéga hi bingond bi ngi yi munlôm, Yésu a mpôdôl bingond bi bi yé konji bi bi bi pam inyu boma mbiimuda. (Matéô 25:​1-4) Bobasôna ba bé sômbôl éga mbiimuda i ngand yé libii. Yésu a nkal le bitan bi bééna “pék,” bitan bi bak “bijôñ.” Bi bi bééna pék bi bé nkôôbaga bi bak péé. Bi bé bebee i bem mbiimuda to ibale a lo i ñem mau. Bi bi lona bilambe inyu béyés ndap ni juu. Bi lona yak môô mape i ha mu bilambe gwap ibale môô ma mal, inyule mbiimuda a ntiñha lo. Jon bilambe gwap bi bé bé le bi lém. (Añ Matéô 25:​6-10.) I ngéda mbiimuda a bi lo, bingond bi bi yé konji, bi bi bééna pék, bi jôp ni nye i ngand libii. Nlélém ni minhook mi bikristen, mi mi bi unda le mi yé péé, mi bak maliga letee ni i malo ma Kristô, mi ga ba ni Yésu mbiimuda i Ane Djob i ngii. b (Masoola 7:​1-3) Mam m’a ba lelaa inyu bigond bi bi yé konji, bi bak bijôñ?

7. Kii i bi pémél bijôñ bi bingond bitan bi bi yé konji, inyuki?

⁷ Maselna ni bingond bi bi yé konji bi  bi ban-ga pék, bingond bi bi yé konji bi bak bi bijôñ, bi bé bé nkôôbaga ngéda mbiimuda a bi lo. Bilambe gwap bi bé bebee ni lém, ndi ba bi lona bé môô mape. I ngéda ba bi nok le mbiimuda a yé njel, ba hoñol le ba nlama ke i somb môô. Ba bé ngi témb i ngéda mbiimuda a bi lo. Ha ngéda i, “bingond bi ngi yi munlôm bi bi bé nkôôbaga, bi jôp lôñni nye i ngand libii. I mbus, ba yip likôga.” (Matéô 25:10) I mbus ngéda, ngeñ bingond bi bé bijôñ bi bi lo, bi yéñ le bi njôp, mbiimuda a kal bo le: “Me nyi bé bé.” (Matéô 25:​11, 12) Bingond bi ngi yi bôlôm bini bi bé bé nkôôbaga i bem mbiimuda to imbe ngéda a nlo. Bimbe biniigana minhook mi nla ôt munu hihéga hini?

8-9. Bimbe biniigana minhook mi nla ôt munu hihéga hi bingond bi ngi yi munlôm? (Béñge yak titii.)

⁸ Ba nkôôbaga u bak ki péé. Yésu a bé gwés bé kal le minhook mi ga ba mintén ima, mi mi ga ba nkôôbaga letee ni lisuk li nkoñ ’isi, ni mi mi ga ba bé nkôôbaga. Ndi a bé pôdôl i jam li yé le li pémél minhook ibale mi ta bé nkôôbaga i hônba letee ni lisuk. Ibale mi ta bé nkôôbaga, mi ga kôhna bé bom yap. (Yôhanes 14:​3, 4) I jam li li ta bé minjôha! Too di gwé botñem i niñ i ngii tole hana ’isi, bésbobasôna di nlama diihe mabéhna ma Yésu ma ma yé mu hihéga hi bingond bi ngi yi munlôm. Hiki wada wés a nlama ba péé, a bak nkôôbaga, bebee i hônba letee ni lisuk.​—Matéô 24:13.

⁹ I mbus le Yésu a bi pôdôl hihéga hi bingond bi ngi yi munlôm inyu unda nseñ i ba nkôôbaga ni i ba péé, a bi yik pôdôl hihéga hi talént. Hihéga hi hi ñunda nseñ i ba bôt ba nsal ngandak.

TALÉNT

10. Lelaa minkol ima mi bi unda le mi yé maliga? (Matéô 25:​19-23)

¹⁰ Mu hihéga hi talént, Yésu a bi  pôdôl minkol ima mi mi bé maliga ni nwet wap, ni nkol umpe u u bé bé maliga. (Matéô 25:​14-18) Minkol ima mini mi bi unda le mi bé maliga inyule mi bi sal ni ngui inyu bulus moni mi nwet wap. Ilole a nke liké, a bi ti bo talént, ngandak moni. Minkol ima mu, mi bé bôt ba nsal ni ngui, inyu hala nyen mi bi gwélél i moni mi ni pék. Mam ma bi sôk lelaa? I ngéda nwet wap a bi témb, a bi koba le ba mbulus i moni a bi ti bo, ngélé iba. Jon a bi bégés bo, ba ‘kon maséé ni nwet wap.’ (Añ Matéô 25:​19-23.) Kii di nla kal inyu nkol u nyônôs iaa? Kii a bi boñ ni moni nwet wé a bi ti nye?

11. Kii i bi pémél nkol u u “nyeñgep,” inyuki?

¹¹ Nkol u nyônôs iaa u bi kôhna talént yada, ndi u bé mut ‘yeñgi.’ Nwet wé a hoñol le yak nye a’ gwélél talént yé ni pék. Ndi a bi tém ’isi, a sôô yo. I ngéda nwet a bi témb, a bi timbhe nye nlélém talént a bi ti nye. Nkol unu u bééna bé mahoñol malam. Iloole a bat nwet wé nwéhél le a nla bé bulus moni a bi ti nye, a bi sébél nye le, a “mut nledek ñem.” Nkol unu u bi kôs bé bibégés bi nwet wé. U héya hala, nwet wé a bi yoñ yak nkus a bi ti nye, a leñ nye i mbégdé.​—Matéô 25:​24, 26-30.

12. I len ini bonjee ba yé minkol ima mi mi bi ba maliga?

¹² I minkol ima mi bé maliga, mi yé minhook mi bikristen mi mi tiñi ni Djob. Malét Yésu a naña bo i ‘kon maséé ni nwet wap.’ Ba nkôs bom yap i ngii, yon Bibel i nsébél le bitugne bi bisu. (Matéô 25:​21, 23; Masoola 20:5b) Ndi ndémbél i nkol u u nyeñgep i yé mabéhna inyu minhook. Lelaa hala?

13-14. Kii hihéga hi talént hi niiga minhook? (Béñge yak titii.)

¹³ Ba mut bôlô. Kiki di ntehe hihéga hi bingond bi ngi yi munlôm, yak hihéga  hi talént, Yésu a bé sômbôl bé kal le minhook mi ga ba bôt ba yeñgi. Ndi a bé toñol kii i bé lama bôña ibale ba nimis makénd map. Ha ngéda i, ki ba bé le ba unda le ba mboñ bé biliya ‘le nsébla wap ni nteba wap u ba yaga ntiik inyu yap,’ ba bé bé to le ba jôp i Ane i ngii.​—2 Pétrô 1:10.

¹⁴ Hihéga hi bingond bi ngi yi munlôm ni hi talént, di ntibil unda le minhook mi nlama ba nkôôbaga, mi bak péé, mi bak ki bôt ba bôlô. Ndi baa Yésu a bi kal ki jam lipe li li nla ba mabéhna inyu minhook? Ñ. I jam Yésu a nkal i kaat Matéô 24:​40, 41 li gwé ki maada lôñni bikééhene bi nsôk bi minhook.

NJEE A GA ‘YÔÑA’?

15-16. Lelaa kaat Matéô 24:​40, 41 i nyigye nseñ minhook mi gwé i yén péé?

¹⁵ Ilole a nti dihéga diaa di ntip tehe, Yésu a bi pôdôl bikééhene bi nsôk inyu minhook, bi bi ga unda njee a nlémél toi Djob. A bi pôdôl bôlôm iba ba ba nsal i wom, ni bôda iba ba ba nkok i ngok kôgôl. Inyu hiki hihéga, i bôt ba mpôdôl mu ba nsal nlélém bôlô, ndi Yésu a nkal le: “B’a yoñ wada, ba tjôô nuu numpe.” (Añ Matéô 24:​40, 41.) Yésu a nkal i bôt ba bé emble nye le: “Jon yéna péé ibabé waa inyule ni nyi bé imbe kel Nwet nan a nlo.” (Matéô 24:42) Yésu a bi bôk a kal nlélém jam i hihéga hi bingond bi ngi yi munlôm. (Matéô 25:13) Baa maada ma yé ipôla dihéga dini tjodiba? I nene le ñ. Ndik minhook mi mi yé toi nhook, mi bak mi tiñi ni Nyambe nwon mi ga ‘yôña,’ Yésu a ga leege nwo i Ane i ngii.​—Yôhanes 14:3.

¹⁶ Ba péé. Hiki nhook u u nyén bé péé i pes mbuu, u ga ba bé bebee i ngéda b’a kot “mimpohlak.” (Matéô 24:31) Bagwélél ba Djob bobasôna, too ba gwé botñem i niñ i ngii tole hana ’isi, ba nlama yoñ bipôdôl bi Yésu kiki mabéhna ma ngui, le ba yén péé, ba bak ba tiñi ni Nyambe.

17. Inyuki hala a nlama bé tééñga bés i tehe le Yéhôva a ngi pohlak bôt inyu yila minhook i ngéda yés?

¹⁷ Di nigil i yi Yéhôva loñge, jon di mbôdôl bikééhene gwé ñem. Hala a ntééñga bé bés ibale Yéhôva a ntehe nseñ i hoo ngim lôk kéé i i tiñi ni nye masañ mana. c Di bigda i yom Yésu a kal inyu bôt ba bôlô ba ba bi lo i sal i wom u minkôô mi wai i ngeñ itan i kôkôa. (Matéô 20:​1-16) Mu hihéga hié, i bet ba bi sal i ngeñ nsôk ba bi kôs nlélém nsaa ni i bet ba bi bôdôl sal bikegla. Nlélém, to imbe ngéda Yéhôva a mpohol mut inyu ba nhook, a ga kôhna bom yé i ngii, ibale a ntéñbe ni nye letee ni lisuk.

NÔGÔL MABÉHNA

18-19. Bimbe biniigana ni mambe mabéhna di nkôs munu yigil ini?

¹⁸ Kii di ntehe munu yigil ini? Inyu i bet ba gwé botñem i niñ hana ’isi i boga ni boga, hihéga hi mintômba ni minya mi kembee hi ñunda bo nseñ i ba maliga ni i téñbe ni Yéhôva letee ni i njiiha ikeñi. Ha ngéda i, Yésu a ga kit le i bôt ba ntéñbe ni Nyambe  ba kôli “kôhna niñ boga.”​—Matéô 25:46.

¹⁹ Di ntehe yak dihéga diba di di nti minhook mabéhna. Hihéga hi Yésu hi hi mpôdôl bingond bi ngi yi munlôm, bitan bi bééna pék. Bi bé nkôôbaga, bi bak péé, bebee i bem mbiimuda to imbe ngéda a nlo. Ndi bini bingond bitan bipe bi bi bé bijôñ, bi bé bé nkôôbaga. Jon mbiimuda a bi neebe bé le ba jôp i ngand yé libii. Yak bés di nlama ba bebee i bem le Yésu a lona lisuk li nkoñ ’isi unu, to ibale hala a nom lelaa. Yak mu hihéga hi talént di mpôdôl minkol ima, mi mi bé bôt ba bôlô. Mi bi sal ni ngui inyu bulus nkus u nwet wap, jon a bi kônôl bo maséé. Ndi a bi luhul nkol u u bé yeñgep. Biniigana: Di nlama pagap ni nson u Yéhôva letee ni lisuk. Sôk i nsôk, di ntehe le minhook mi nlama ke ni bisu i yén péé inyu boñ le Yésu a “yoñ” nwo nyoo i ngii. Minhook mi, mi nyamnda ni ngôñ i “kodba lôñni” Yésu nyoo i ngii. I mbus gwét bi Armagédôn, mi ga ba kiki mbom u Yésu i libii li Man ntômba.​—2 Tésalônika 2:1; Masoola 19:9.

20. Kii Yéhôva a ga boñ ni i bet ba nôgôl mabéhna mé?

²⁰ Tolakii ngéda i bikééhene i gwé ni moo, di gwé bé njom yo ki yo i kon woñi. Ibale di nke ni bisu i téñbe ni Tata wés nungingii, a ga ti bés “lipémba li li nloo li mut binam,” le di “pam i . . . telep . . . bisu bi Man mut.” (2 Korintô 4:7; Lukas 21:36) Too di gwé botñem i niñ i ngii tole hana ’isi, di ga lémél Tata wés ibale di nôgôl mabéhna ma ma mpémél i dihéga di Yésu. Di mbot ñem le ni konangoo i mbuma ñañ i Yéhôva, môl més ma ga ba ‘ntilga ikété kaat’ i niñ.​—Daniel 12:1; Masoola 3:5.