1-2. Inyuki bagwélél ba Nyambe ba yé maséé? (Yakôbô 1:​22-25)

 YÉHÔVA bo Man wé nu gwéha ba ngwés le di ba maséé. Ntôp tjémbi a nkal i kaat Tjémbi 119:2 le: “I bôt ba ntééda mabéhna mé ba yé maséé, ba ba nyéñ nye ni ñem wap wonsôna.” Yésu a kal le: “Maséé ni bôt ba ñemble bañga i Nyambe, ba téédaga ki yo!”​—Lukas 11:28.

² Bagwélél ba Yéhôva ba yé maséé. Inyuki? Di gwé ngandak manjom i ba maséé, ndi i i nlôôha ba mahee i yé le di ñañ Bibel hiki ngéda, di boñok ki biliya i bii i yom di nigil i bisélél.​—Añ Yakôbô 1:​22-25.

3. Bimbe bisai di nkôs i ngéda di mbii i mam di ñañ i Bañga i Djob i bisélél?

³ Di gwé ngandak bisai i ngéda di ‘nyila banôgôl bañga.’ Gwada bi yé le, di nyi le di nlémél Yéhôva. Hala a mboñ le di ba maséé. (Ñañal 12:13) I ngéda di mbii mam di nigil i Bibel i bisélél, di nlédés maada di gwé ni bôt bés ba lihaa, yak ni lôk kéé i likoda. Bebek le yak we u bi tehe hala i niñ yoñ. Jam lipe li yé le, di nkeñgle mandutu ma nkwél i bet ba noñ bé manjel ma Yéhôva. Jon di yé kiñ yada ni i jam Kiñe David a kal. I mbus le a bi pôdôl mbén, mabéhna, ni matéak ma Yéhôva i hiémbi hiada a bi tôp, David a bi sugus le: “Bom ikeñi i mbem nu a ntééda mo.”​—Tjémbi 19:​7-11.

4. Inyuki i ta bé jam li ntomb i bii i yom di ñañ i Bañga i Nyambe i bisélél?

 ⁴ I maliga, i ta bé jam li ntomb i añ bañga i Djob ni i bii yo i bisélél. Tolakii di pégi ngandak, di nlama somb ngéda inyu añ ni i nigil bañga i Djob inyu nok kii Yéhôva a mbémél bés. Di tehe ngim maéba i i nla hôla bés i añ Bibel hiki kel. Di ga wan ki kii i nla hôla bés i ôt pék mu yom di ñañ, ni lelaa di nla bii i yom di nigil i bisélél.

YÉÑ NGÉDA I AÑ BAÑGA I NYAMBE

5. Mambe mam ma nlôôha yoñ bés ngéda?

⁵ Bagwélél ba Yéhôva ba pégi ngandak. Di ntégbaha ngandak ngéda i yoñ ngaba i mam ma mbuu. Kiki hihéga, ngandak ikété yés i nlama sal inyu yoñ ndun ni bomede yak ni mahaa map. (1 Timôtéô 5:8) Ngandak lôk kéé i ntééda bakokon ni miñunuk mi bôt. Ni ki le, di nlama yoñ ndun ni mbôô wés, hala a mbat ngéda. U héya i mam mana, di gwé yak minson mi likoda. Jam jada mu li li nlôôha ba mahee li yé le, di boñ kii yosôna di nla inyu añal ñañ nlam. Ni i pagda i yosôna, kii u nla boñ inyu léba ngéda i añ Bibel hiki ngéda, i ôt pék mu jam u ñañ ni i bii jo i bisélél?

6. Kii nla hôla we i añ Bibel hiki ngéda? (Béñge yak titii.)

⁶ Lisoñgol li Bibel li yé jam jada ikété “mam ma nlôôha ba nseñ,” jon di nlama boñ kii yosôna di nla inyu añ yo. (Filipi 1:10) I ngéda ntôp tjémbi a bé pôdôl mut nu a yé maséé, a kal le: “A ngwés mbén i Yéhôva iloo hihéga, a ñañ ki mbén yé, a ôdôk pék mu juu ni njamuha.” (Tjémbi 1:​1, 2) Hala a nkobla le di nlama somb ngéda inyu añ Bibel. Imbe ngéda i nlôôha ba ilam inyu añ Bibel? Hiki wada wés a nla pohol ngéda i nlémél nye. Jam li nlôôha ba nseñ li yé le, di pohol ngim ngéda di  nyi le di nla añ Bibel hiki kel. Mankéé wada le Victor a nkal le: “Me ngwés me ñañ Bibel kegla. Tolakii me ngwés bé me ntelep kegla tutu, me bi yimbe le ha ngeñ i, homa a yé nwee, liyôgbe li ta bé, yak mahoñol mem ma yé nwee, me yé péé mu lisoñgol jem.” Baa hala a yé nlélém jam inyu yoñ? Badba le: ‘Imbe ngéda i nlôôha ba ilam inyu yem i añ Bibel?

ÔT PÉK MU YOM U ÑAÑ

7-8. Kii i nla kéñ bés i tibil ôt nseñ ni i yom di ñañ i Bibel? Toñol.

⁷ Maliga ma yé le di nla añ ngandak bipes bi Bibel ibabé i tééda bañga jam. Baa hala a ma pémél we le u añ ngim yom, i mbus ndék ngéda ndigi, u laa ha bé bigda i yom u ñañ? Hala a ma pémél bésbobasôna. Ngoo le, hala a nla pémél bés i ngéda di ñañ Bibel. Bebek le di ntéé nsoñgi u bipes bi Bibel di nlama añ hiki kel. Kinje loñge jam! Di nlama téé ngim mam di ga boñ, di boñ ki biliya bi ngui i yônôs yo. (1 Korintô 9:26) Lisoñgol li Bibel li yé ndik bibôdle. Di nlama boñ iloo ha ibale di nsômbôl ôt nseñ ni lisoñgol jés.

⁸ Di ôt pék munu hihéga hini: Malép ma nop ma mbéna ba nseñ i niñ yés. Ndi ibale nop a no iloo hihéga, a ga lôôha yôôs hisi, malép ma ga tegep homa nyensôna. I ngéda hala a mbôña, bibebela bi nla bé ôt nseñ ni nop. Nlélém inyu yés, di nlama bé añ Bibel bihôô bihôô kayéle di bana bé ngéda i ôt pék, i bigda ni i bii i bibôñôl i yom di ñañ.​—Yakôbô 1:24.

9. Kii u nlama boñ ibale u gwé lem i añ Bibel bihôô bihôô?

⁹ Baa u nyimbe le ngim mangéda u yé u mpala añ Bibel? Kii u nlama boñ? Kee mbeñee mbeñee. Boñ biliya i ôt pék mu jam u yé añ tole li u mal añ. Hala a nlama bé kônha we woñi. I buk ini le i soñda i kônha bañ we woñi, i nkobla ndigi le i ôt pék mu jam u ñañ. U nla  kônde nômôs yigil yoñ ndék inyu bana ngéda i ôt pék mu jam u nigil. U nla pohol i añ ndigi ndék minlôñ mi Bibel, u gwélél ngéda i yii i ôt pék mu jam u ñañ. Victor nu di mbôk di pôdôl a nkal le: “Me nômôs bé lisoñgol jem li Bibel, me mbéna añ ndigi pes yada inyule me mpule añ Bibel kegla hala a mboñ le me nla ôt pék mu jam me ñañ kel yosôna.” U nla soñgol Bibel kiki u ngwés, ndi jam li nlôôha ba nseñ li yé le u soñgol mbeñee mbeñee kayéle u laa ôt pék mu jam u nsoñgol.​—Tjémbi 119:97; béñge minkéñék mi matila mi mi gwé ño le: “ Mambadga di nlama badba.”

10. Ti hihéga hi hi ñunda lelaa u nla bii i mam u nigil i bisélél. (1 Tésalônika 5:​17, 18)

¹⁰ To imbe ngéda u ñañ Bibel, to ngeñ yañen u ñañ yo, boñ biliya le u bii i jam u ñañ i bisélél. Kiki u mba u ñañ, badba le: ‘Lelaa me nla bii i jam me yé añ i bisélél nano tole i dilo di nlo?’ Kiki hihéga, di hégda le u yé i soñgol 1 Tésalônika 5:​17, 18. (Añ.) I mbus minlôñ ima mini, u nla telep u ôt pék inyu tehe lelaa u nla lémés masoohe moñ. U nla ki ôt pék mu mam malam Yéhôva a ma bôñôl we, bebek u kit le u nti Yéhôva mayéga inyu mam ma tôbôtôbô maa. Ibale u nyoñ ngéda i ôt pék, to inyu ndék manut ndigi mu biniigana bi Bibel, hala a ga hôla we i nok ni i bii bañga i Nyambe i bisélél. Ibale hiki kel u mbii i mam u nigil i bisélél, kiki ngéda i ntagbe u ga yila bañga ngwélél Yéhôva. Ndi kii u ga boñ ibale u nôgda le u gwé ngandak mam i sal?

TÉÉ MAM U NLA YÔNÔS

11. Ngim mangéda inyuki u nla nôgda le i mam u nlama boñ ma nkahal yuu we? Ti hihéga.

¹¹ I ngéda u ñañ Bibel u yéñék le u bii i mam u nigil i bibôñôl, ngim mangéda hala a nla lédél we. Hégda le i jam lini: Len, lisoñgol joñ li Bibel li mpôdôl lem i todol bôt. (Yakôbô 2:​1-8) U ntehe mahéñha u nlama lona mu maada moñ ni bôt bape, u yoñ ki makidik i boñ hala. Kinje loñge jam! Yani u ñañ pes kaat ipe i i ñunda nseñ i yoñ yihe ni hilémb hioñ. (Yakôbô 3:​1-12) U nyimbe le ngim mangéda u yé u bana bipôdôl bibe. Nano u nyoñ makidik le u nlama bana bipôdôl bilam ni bi bi nhôlôs. Hilo hi nyônôs hiaa, lisoñgol joñ li  Bibel li mbéhe we le u ba bañ liwanda ni nkoñ ’isi. (Yakôbô 4:​4-12) U nyimbe le u nlama tibil pohol i mam u ñañ, ma u mbéñge ni ma u ñemble. I hilo hi yônôs hina, u nla nôgda wengoñle i mam momasôna u nlama sal ma nyuu we.

12. Inyuki hala a nlama bé tômbôs we ibale lisoñgol joñ li Bibel li nyeelene we le u nlama lona ngim mahéñha i niñ yoñ? (Béñge yak matila isi lipep.)

¹² Ibale u nlama lona ngandak mahéñha i niñ yoñ, u tomb bañ. Hala a ñunda le u gwé libak lilam. I mut a yé suhulnyuu, a bak maliga, a ñañ Bibel ni njômbi le a tehe mam a nlama lémés i niñ yé. a Bigda ki le, i “haba mut yondo” i yé jam li mbôña ndék ni ndék. (Kôlôsé 3:10) Kii i ga hôla bés i ke ni bisu i ba banôgôl bañga i Djob?

13. Lelaa u nla téé ndék mam u nla yônôs? (Béñge yak titii.)

¹³ Iloole u yéñ bii mam momasôna u nigil i bisélél ngélé yada, pohol ndugi ndék mam u nla yônôs. (Bingéngén 11:2) U nla noode likeñge lini: Tila mam u nlama yônôs, u pohol jada tole ima ma u ga yônôs ndugi, mana mam mape u ga yônôs mo i mbus ngéda. W’a bôdôl ni kii?

14. U ga bôdôl ni kii?

¹⁴ U nla bôdôl ni jam li li ntômbôl we i yônôs. Tole u nla bôdôl i het u nôgda le i mbéda we ngandak mahéñha i boñ. I ngéda u ga yimbe kii u nlama yônôs, boñ nyiña ikété bikaat bi ntôñ, bebek u nla gwélél Index des publications Watchtower tole Ñéga inyu nyiña u bikaat bi Mbôgi Yéhôva. Soohe inyu  i jam u nlama yônôs, bat Yéhôva “ngôñ lôñni ngui i boñ mam.” (Filipi 2:13) Bii mam u nigil i bisélél. I ngéda u ga yimbe mahol mu jam li bisu u nkit le u nyônôs, hala a ga ti we makénd i tagbe i jam lipe. Maliga ma yé le, i ngéda u ga pam i yônôs jam jada i niñ yoñ, tole i ngéda w’a pam i sal lem ilam yada, hala a ga ti we makénd i tagbe i mam mape.

NWAS LE BAÑGA I NYAMBE ‘I SAL IKÉTÉ YOÑ’

15. Mambe mahéñha ma yé ipôla bagwélél ba Yéhôva ni bôt bape ba ba ñañ Bibel? (1 Tésalônika 2:13)

¹⁵ Ngandak bôt i nkal le i ma añ Bibel ngandak ngélé. Ndi baa ba nhémle toi Bibel? Baa ba mbii yo i bibôñôl, tole ba nwas le i éga biniñ gwap? To. Hala a yé maselna ni bagwélél ba Yéhôva! Kiki bikristen bi hiai hi bisu, di nyoñ Bibel “kiki i yé toi, hala wee bañga i Nyambe.” Jam lipe li yé le, di mboñ biliya i noñ maéba mé i niñ yés.​—Añ 1 Tésalônika 2:13.

16. Kii i nla hôla bés i ba banôgôl bañga?

¹⁶ Hala a ta bé jam li ntomb i añ ni i bii bañga i Nyambe i bisélél. Bebek le di njo sañ inyu léba ngéda i añ Bibel. Di nla añ bihôô bihôô kayéle di tééda bé i yom di ñañ. Tole mahéñha di nlama lona ma nla ba ngandak kayéle ma kahal yuu bés. To imbe ndutu di mboma, di nyi le di nla pamba ni mahôla ma Yéhôva. Di neebe mahôla mé. Di ba bañ bôt ba ñemble ndi ba hôya, ndi di ba banôgôl bañga. Ibabé pééna kiki di nke ni bisu i añ bañga i Nyambe, di biiak yo i bisélél, di ga ba maséé.​—Yakôbô 1:25.