1-2. Umbe nseñ di ñôt inyule Nyambe a bi hek bés ni ngap i ba maséé i ngéda di nti, iloo i ngéda di nkôhna?

 YÉHÔVA a bi hek bôt ba binam ni ngap i ba maséé i ngéda ba nti iloo i ngéda ba nkôhna. (Minson mi baôma 20:35) Baa hala a nkobla le di gwé bé maséé mo ki mo i ngéda di nkôhna? To jam. Bésbobasôna di nyi le di yé di ba maséé i ngéda ba nti bés ngim jam. Ndi, maséé més ma nlôôha ba makeñi i ngéda bés bon di nti. Ni maliga, hala a yé loñge jam le Yéhôva a bi hek bés hala. Inyuki?

² Kiki Yéhôva a bi hek bés ni libak li, hala a nti bés pôla i kônde kéñbaha maséé més. Di nla kéñbaha maséé més i ngéda di nyéñ manjel i ti. Kinje hélha jam le Yéhôva a bi hek bés hala!​—Tjémbi 139:14.

3. Inyuki di nla kal le Yéhôva a yé “Nyambe nu maséé”?

³ Bitilna bi ñunda le ti i nlona maséé, jon hala a nhélés bé bés le Bibel i nsébél Yéhôva le “Nyambe nu maséé.” (1 Timôtéô 1:11) Inyu lem i ti, nyen a yé mbôk ni nsôk. Kiki ñôma Paul a kal, ni njel yé nyen “di gwé niñ, di nyiñgha, di héga ki.” (Minson mi baôma 17:28) Ñ, “hiki likébla lilam ni hiki likébla li yé peles,” li nlôl ni Yéhôva.​—Yakôbô 1:17.

4. Kii i ga hôla bés i kônde nôgda maséé?

⁴ Bebek le bésbobasôna di gwé ngôñ i kônde nok maséé ma nlôl i ngéda di nkap. Di nla boñ hala i ngéda di nigle lem i likap i Yéhôva. (Éfésô 5:1) I ngéda di mba di  nwan i jam li, di ga tehe ndémbél ilam i Yéhôva, di nigil ki kii di nla boñ ibale di nôgda le bôt bape ba nti bé bés mayéga inyu mam di mbôñôl bo. Hala a ga hôla bés i tééda ni i kéñbaha maséé més i ngéda di nti.

DI KÔNA LEM I LIKAP I YÉHÔVA

5. Mambe mam Yéhôva a nti bés?

⁵ Kii Yéhôva a mboñ inyu unda lem likap? Di wan le ndék dihéga. Yéhôva a nti bés mam ma mbéda bés. Hiki ngéda bé nyen a nti bés mam ma nhee diye, ndi Yéhôva a yoñ bitelbene le i mam ma mbéda bés ma nhéñél bañ bés kekikel. Kiki hihéga, a nhôla bés i bana mambot, bijek ni ndap. (Tjémbi 4:8; Matéô 6:​31-33; 1 Timôtéô 6:​6-8) Baa Yéhôva a mbôñôl bés i mam ma inyule a yé nyégsaga? Heni! Inyuki Yéhôva a mbôñôl ni bés mo?

6. Bimbe biniigana di ñôt i kaat Matéô 6:​25, 26?

⁶ Yéhôva a nti bés mam ma mbéda bés inyule a ngwés bés. Di nwan le bibañga bi Yésu di nléba i kaat Matéô 6:​25, 26. (Añ.) Mu bipes bi, Yésu a ngwélél dihéga di ngim bihégél. Inyu pôdôl dinuni, Yésu a kal le: “Di nwes bé mbôô to bumbul, to kot bijek ikété mandugi.” A kônde le: “Isoñ nan nu a yé i ngii a njés tjo.” I mbus a bat ki le: “Baa ni gwé bé mahee iloo tjo?” Kii a bé sômbôl niiga bés? I mis ma Yéhôva, bagwélél bé ba gwé mahee iloo binuga. Jon ibale Yéhôva a nyoñ ndun ni binuga, di nla ba nkwoog nkaa le a ga ti bés i ni i i mbéda bés! Kiki isañ nu a ngwés bon bé, Yéhôva a nti bés i mam ma mbéda bés inyule a ngwés bés.​—Tjémbi 145:16; Matéô 6:32.

7. Lelaa di nla kôna lem i likap i Yéhôva? (Béñge yak titii.)

⁷ Kiki Yéhôva, yak bés di nla ti bôt bape inyule di ngwés bo. Kiki hihéga, baa di nyi mankéé nu muda tole nu munlôm nu a gwé ngôñ ni bijek tole mambot? Yéhôva a nla gwélél we inyu lôl nye mahôla. Bagwélél ba Yéhôva ba nyiba kiki bôt ba nhôla bôt bape, téntén i ngéda bikuu bi nkwo. Kiki hihéga, i ngéda himala hi COVID-19 hi bi kwo, lôk kéé i bôda ni i bôlôm i bi ti bôt ba  ba bééna ngôñ ni mahôla mambot, bijek ni gwom bipe. Ngandak i bi ti yak makébla inyu nit nson u ñañ nlam ni nkoñ ’isi wonsôna. Makébla ma ma bi hôla i nit i bet bikuu bi bi kwél. I lôk kéé ini, i noñ bibañga bi kaat Lôk Héber 13:16 bi bi nkal le: “Ni hôya bañ i boñ loñge, ni kabak i mam ni gwé ni bôt bape, inyule i nya bisesema ini yon i nlémél Nyambe.”

8. Lelaa di ñôt nseñ ni ngui Yéhôva a nti bés? (Filipi 2:13)

⁸ Yéhôva a nti bés ngui. Ngui i Yéhôva i gwé bé minwaa, a yé ki maséé i ti yo bagwélél bé. (Añ Filipi 2:13.) Baa u ma soohe Yéhôva le a ti we ngui i yémbél manoodana, tole a ti we ngui i hônba ngolba? Bebek le u ma soohe nye le a ti we ngui i boñ mam moñ ma hiki kel. I ngéda Yéhôva a bi ti we ngui kiki u bi bat nye, u bi nôgda i yom ñôma Paul a bi tila le: “Inyu mam momasôna, me gwé ngui ni njel nu a nti me lipémba.”​—Filipi 4:13.

9. Lelaa di nla kôna Yéhôva i ngéda di ngwélél ngui yés inyu hôla bôt bape? (Béñge yak titii.)

⁹ Di gwé bé ngui kiki Yéhôva, di nla bé to ti bôt bape ngui yés kiki nye a mboñ. Ndi di nla kôna nye i ngéda di ngwélél ngui yés inyu hôla bôt bape. Kiki hihéga, di nla hôla ñunuk kristen tole nu a yé bôk i bôñgôl ndap yé, tole i ke i sômbôl nye gwom. Ibale di nla, di hôla i pubus ndap Ane tole i bôñgôl yo. Ibale di mboñ hala, di mbôñôl bagwélél ba Yéhôva bape loñge.

10. Lelaa bibañga gwés bi nla lédés bôt bape?

¹⁰ Di hôya bañ le bibuk gwés bi gwé ngui. Baa u nhoñol ngim mut u nla bégés? Baa u nyi ngim mut u nla lédés ni bibuk gwoñ? Ibale hala, boñ hala ibabé le a bat we. U nla yuuga nye, u nla sébél nye i téléfôn, tole u nla ômle nye léta tole nwin ni njel internet. U lôôha bañ tôñ inyu i yom u ga kal, ndék bibuk bi gwéha bi nla ba i yom mankéé a gwé ngôñ inyu téñbe ni Nyambe tole inyu témbna mahoñol malam.​—Bingéngén 12:25; Éfésô 4:29.

11. Lelaa Yéhôva a ngwélél pék yé?

¹¹ Yéhôva a nti bés pék. Yakôbô a bi tila le: “Ibale mut ikété nan a nhañ pék, a kee ni bisu i bat yo Nyambe, inyule a nkébél bôt bobasôna i nya i nloo hihéga ibabé i ôm bo nsohi.” (Yakôbô 1:5; matila isi lipep.) Kiki bibuk bini bi ñunda,  Yéhôva a nim bé bôt pék yé. A nkap yo ni loñgeñem. Yimbe ki le i ngéda Yéhôva a nti pék, a mboñ hala “ibabé i yahal,” tole “ibabé i ôm nsohi.” A gwé bé ngôñ le di kon woñi i bat nye pék. Maselna ni hala, a nti bés makénd i yéñ yo.​—Bingéngén 2:​1-6.

12. Mambe manjel di gwé i kap pék yés ni bôt bape?

¹² Mam ma yé lelaa inyu yés? Baa kiki Yéhôva, di nla gwélél pék di gwé inyu hôla bôt bape? (Tjémbi 32:8) Bagwélél ba Yéhôva ba nla gwélél ngandak manjel inyu kap i yom ba nyi ni bôt bape. Kiki hihéga, di mbéna hôla i bet ba ntip bôdôl téé likalô. Mimañ mi nyoñ ngéda i hôla bahôla nson ni lôk kéé i bôlôm i i yé nsôblege i nigil lelaa ba nla tibil gwel ngim minson. Yak lôk kéé i i gwé likeñge inyu bôlô i maoñ ni inyu bôñgôl mandap ma ntôñ, ba ñungus ini lôk kéé ipe.

13. Lelaa di nla kôna Yéhôva i ngéda di ñungus bôt bape?

¹³ I bet ba ñungus bôt bape, ba mboñ biliya i kôna Yéhôva. Bigda le, ni loñgeñem Yéhôva a nti bôt bape pék yé. Jon di gwé ngôñ i kap i yom di nyi ni bôt bape ibabé bo i saa. Di nsôô bé bo yom yo ki yo, di nkon bé to woñi le bon ba nkahal gwel minson di gwelek. Di nhoñol bé ki to kiki bôt bape ba ba nkal le: ‘Mut nye ki nye a bi niiga bé me, yak nye a heñek.’ I nya mahoñol i i nlama bé ba ikété ntôñ u Yéhôva. Maselna ni hala, di yé maséé i kabna i yom di nyi ni i bôt di niiga, ni i ‘ti bo biniñ gwés.’ (1 Tésalônika 2:8) Di gwé ngôñ le yak bo ba “bana ngap i nya i kôli inyu niiga bape.” (2 Timôtéô 2:​1, 2) Ibale bésbobasôna di mboñ hala, bés ni bôt bape di ga sôk di bana pék, di ba ki maséé.

IBALE BÔT BA NTI BÉ BÉS MAYÉGA

14. Kii libim li bôt li mboñ i ngéda di mbôñôl bo ngim jam?

¹⁴ I ngéda di mbôñôl bôt loñge, téntén bilôk bikéé bi bôda ni bi bôlôm, ba mbéna ti bés mayéga. I nla pam le inyu ti bés mayéga, ba tilna bés tole ba gwélél njel ipe. (Kôlôsé 3:15) Kinje maséé di nôgda ha ngéda i!

15. To ibale bôt bahogi ba nti bé bés mayéga, kii di nlama bé hôya?

¹⁵ Ndi, ngim mangéda bôt bahogi ba nti bé bés mayéga inyu mam di mbôñôl bo. I nla pam le di gwélél ngéda yés, ngui yés ni bigwel gwés bi moo, ndi i mut di nhôla a boñ yaga wee di mboñ bé to yom. Ibale i nya jam i i mpémél bés, kii i nla boñ le di nimis bañ maséé més tole di unup bañ? Di bigda i yom nlôñ kaat u u ñéga i yigil ini u nkal, Minson mi baôma 20:35. I nlôñ kaat u u ñunda le maséé ma nlôl i ti di nti, he bé inyule ba nti bés mayéga tole heni. Di nla ke ni bisu i kéñbaha maséé més i ti, to ibale bôt bape ba nti bé bés mayéga. Kii i nla hôla bés i boñ hala? Di wan le ndék mam.

16. Kii i nla hôla bés i ke ni bisu i ti ni maséé?

¹⁶ I ngéda di nti, di nkôna Yéhôva. A nti bôt biloñge bi mam ibabé i béñge too ba nti mayéga tole heni. (Matéô 5:​43-48) Yéhôva a mbôn bés le i ngéda di nti ‘ibabé i bem jam jo ki jo i mbus, bibom gwés bi ga ba bikeñi.’ (Lukas 6:35)  I ngéda Bibel i nkal le “jam jo ki jo,” yak mayéga ma yé mu. Too ba nti bés mayéga tole heni, Yéhôva a ga saa bés inyu loñge di mbôñôl bôt bape inyule di “nti ni ñem maséé.”​—Bingéngén 19:17; 2 Korintô 9:7.

17. Imbe jom i tôbôtôbô i ntinde bés i ti? (Lukas 14:​12-14)

¹⁷ Jam lipe di nla boñ inyu kôna Yéhôva i ngéda di nti li yé le di noñ litiñ di nléba i kaat Lukas 14:​12-14. (Añ.) I ta bé béba i bôñôl i bôt ba nla timbhe bés i loñge di mbôñôl bo. Ndi kii di nlama boñ ibale di nyimbe le di nkébél ndik i bet ba nla timbhe bés i mam di mbôñôl bo? I ga ba loñge le di noode noñ maéba Yésu a bi ti. Di kébél i mut di nyi le a nla bé timbhe bés i yom di mbôñôl nye. Hala a ga boñ le di ba maséé, di yik le di nkôna Yéhôva. I bana mahoñol ma i ga hôla bés i tééda maséé més ibale ba nti bé bés mayéga.

18. Kii i ga boñ le di nihbe bôt bape to ibale ba nti bé bés mayéga?

¹⁸ U kéés bañ bôt bape. (1 Korintô 13:7) Ibale bôt bape ba nti bé bés mayéga, di nla badba le: ‘Baa ba nyi bé ti mayéga tole ba yé ba hôya ndigi?’ Bebek ngim manjom i mboñ le ba nti bé bés mayéga kiki bés di bemek. Inyu bôt bahogi, to ibale i yom u mbôñôl bo i ntihba bo ngandak, ba nyi bé lelaa ba unda we hala. Bebek le hala a nla yak tééñga bo le ba nti bo mahôla, téntén ibale bon ba bé ti bôt bape mahôla. To kii i leñek, gwéha di gwé inyu lôk kéé yés i ga tinde bés i nihbe bo, ni i ke ni bisu i ti ni ñem maséé.​—Éfésô 4:2.

19-20. Inyuki hônba i yé nseñ i ngéda di nti bôt bape? (Béñge yak titii.)

¹⁹ Hônba. Inyu jam li likap, Kiñe Salômô a tila le: “Leñ bret yoñ i malép, inyule i mbus ngandak dilo w’a témb u léba yo.” (Ñañal 11:1) Bibañga bini bi  ñunda le bôt bape ba nla nti bés mayéga “i mbus ngandak dilo.” Di tehe hihéga hiada hi hi ñunda i jam li.

²⁰ Hala a yé ngandak nwii nano le nwaa ngwélél makiiña wada a bi tilna sita yada i i bi tip sôblana inyu ti nye makénd i téñbe ni Yéhôva. I mbus nwii juem nyen i sita i i bi timbhe kaat yé, i bé kal le: “Me bééna toi ngôñ i tilna we, inyu kal we le u nla bé hégda lelaa i kaat u bi tilna me i bi hôla me mu nwii mini nwominsôna. Bibuk gwoñ bi bi tihba me ngandak, téntén i nlôñ kaat u bi gwélél.” a I sita i i bi añle nye mandutu i bi boma, i mbus i kal le: “I bé i pam ngim mangéda le me bana ngôñ i tjôô maliga. Ndi nlôñ u kaat u bi tilna me u bé u ti me makénd i ke ni bisu. Yom ipe i nhôla bé me mu i nwii juem mi ntip tagbe kiki kaat yoñ.” Di nla nôgda maséé i nwaa ngwélél makiiña nu a bi nôgda i ngéda a bi kôs i kaat i “i mbus ngandak dilo”! I nla pam le yak bés mut a ti bés mayéga i mbus ntandaa ngéda le di bi hôla nye.

21. Inyuki di nlama ke ni bisu i kôna lem i likap i Yéhôva?

²¹ Kiki di ntehe, Yéhôva a bi hek bés ni ngap i tôbôtôbô. Tolakii di yé di ba maséé i ngéda ba nti bés, maséé més ma nyamb mayoo i ngéda bés bon di nti. Di nok loñge i ngéda di mpam i hôla lôk kéé yés, di yé yak maséé i ngéda ba nti bés mayéga. Ndi to ba nti bés mayéga tole heni, di yé maséé inyule di mboñ jam lilam. U hôya bañ kekikel le to kii u nti, “Yéhôva a nla ti we iloo hala.” (2 Miñañ 25:9) W’a pam bé i ti bôt bape kiki Yéhôva a nla ti we! Maséé mo ki mo ma nloo bé ma di nôgda i ngéda Yéhôva nyemede nyen a nsaa bés. Di yoñ makidik i ke ni bisu i kôna lem i likap i Tata wés nungingii.