1. Kii i yé sômbôl i hiki wada wés?

SITA Paulina * a nkal le: “Ngéda me bi yi maliga, ngôñ yem i bé le bôt bem ba lihaa bobasôna ba ba ni me i Paradis. Ndi téntén, me bé sômbôl le nlô wem Wayne ni lok yés, ba gwélél Yéhôva.” Baa u gwé bôt ba lihaa ba ba ta bé maliga? Kiki Paulina, bebek le yak we u gwé ngôñ le ba gwélél Yéhôva.

2. Mambe mambadga d’a wan munu yigil ini?

² Di nla bé nyégsa bôt bés ba lihaa i leege ñañ nlam, ndi di nla ti bo ngôñ i emble nwin u Bibel ni i gwés wo. (2 Timôtéô 3:14, 15) Inyuki di nlama añle bôt bés ba lihaa ñañ nlam? Inyuki di nlama yéñ yi i yom ba nôgda? Kii di nla boñ inyu hôla bôt bés ba lihaa i gwés Yéhôva kiki yak bés di ngwés nye? Lelaa lôk kéé i likoda i nla nit bés mu biliya di mboñ?

3. Inoñnaga ni kaat 2 Pétrô 3:9, inyuki di nlama añle bôt bés ba lihaa ñañ nlam?

³ Ndék ngéda wee Yéhôva a ntjé i béba nkoñ ’isi ini. Ndik i bet ba gwé “libak lilam inyu kôhna niñ boga” bon ba ga pei. (Minson mi baôma 13:48) Di nlôôs ngandak ngéda, ni ngui yés yosôna i añle bôt ba libôga jés ñañ nlam, di nlama bana nlélém ngôñ inyu bôt bés ba lihaa. Yéhôva, Tata wés nu gwéha, “a ngwés bé  le to mut wada a nimil, ndigi le bobasôna ba pam homa ba nhiel miñem.”​—Añ 2 Pétrô 3:9.

4. Himbe hihôha di nla boñ ngéda di ñañle bôt bés ba lihaa ñañ nlam?

⁴ Manjel ma yé ima inyu tjam nwin u tohi, ilam ni ibe. Ngéda di ñañle bôt bape ñañ nlam, di yé di boñ biliya le di babaa bañ bo, ndi ni bôt bés ba lihaa, di yé di nyai.

5. Kii di nlama bé hôya ngéda di ñañle bôt bés ba lihaa ñañ nlam?

⁵ Ngim mangéda, bésbomede di yé di tam ngéda di mbigda lelaa di bi pôdôs mut wés lihaa ngeñ di bé añle nye ñañ nlam. Ñôma Paul a bi ti lôk kéé maéba le: “Minkwel minan mi ba [minlam] ngéda yosôna, nnéhak ni bas, ndi ni yi kiki ni nlama timbhe hiki mut.” (Kôlôsé 4:5, 6) I yé bés loñge i bigda maéba mana ngeñ di nkwélés mut wés lihaa. Di tiga unbaha bo iloole di tinde bo i emble bés.

6-7. Ti hihéga hi hi ñunda inyuki i yé nseñ i tôñ sobiina nu a ta bé maliga.

⁶ Yéñ nôgda i yom ba nôgda. Paulina nu di mbôk sima a nkal le: “Bibôdle, ndik minkwel mi Bibel nwon me bé kwélés nlô wem. Di bééna bé minkwel mimpe.” Nlôm Paulina a bé yi bé bañga jam inyu Bibel, a bé nok bé ki to i jam nwaa a bé kal nye. Inyu yé, i bé nene wee mam ma base ndigi mon ma bééne nwaa nseñ. A bé ki ñunbak inyule a bé hoñol le nwaa a njôp i base makañ.

⁷ Paulina nyemede a nkal le a bé lôôs ngandak ngéda ni lôk kéé kôkôa ni mamélél ma sonde; makoda, likalô,  ni i tégbaha loñge ngéda. A nkônde le: “Ngim mangéda Wayne a bé a huu ndap a ada bé mut nye ki nye, a bé nôgda binyuu.” Wayne a bé a kôli tjelel inyule a bé tehe ha bé nwaa to lok yé, i bé pôôna nye wee mawanda ma mondo ma Paulina ma bééne nye nseñ iloo nye nlôm. Wayne a bé sômbôl bos Paulina. Baa u nyi manjel mape Paulina a bé le a gwélél inyu unda le a ntôñ nlôm?

8. Inoñnaga ni kaat 1 Pétrô 3:1, 2, kii i nlôôha tihba bôt bés ba lihaa?

⁸ Bana bihiumul bilam. Ntiik maboñok més ma ntihba bijô gwés bi lihaa ngandak iloo bipôdôl gwés. (Añ 1 Pétrô 3:1, 2.) Paulina a bi yik nok le hala a yé maliga. A nkal le: “Me bé yi le Wayne a bé gwés bés, ni le a bé sômbôl toi bé bos. Ndi maboñok mé ma bi nôgha me le, ngeñ i nkola i noñ maéba ma Yéhôva inyu libii. Iloole me héléé i ngandak hop, me bé lama bana bihiumul bilam.” Paulina a bi waa loñ nlôm maôô ni minkwel mi Bibel, ba kahal pôdôl mam mape. Wayne a bi tehe le nwaa a nyila muda nsañ, a yimbe yak le lok yap i bé ha bé ndok. (Bingéngén 31:18, 27, 28) Ngéda Wayne a bi tehe kiki Bibel i bi héñha lihaa jé, a kahal gwés Bañga i Djob.​—1 Korintô 7:12-14, 16.

9. Inyuki di nlama téñbe i hôla bôt bés ba lihaa?

⁹ Téñbe i hôla bôt boñ ba lihaa. Yéhôva a nti bés ndémbél ilam mu jam li. A nwaa bé ti bôt pôla i nok  ñañ nlam inyu boñ le ba kôs niñ boga. (Yérémia 44:4) Yak ñôma Paul a kal Timôtéô le a téñbe i hôla bôt bape. Inyuki? Inyule ni i njel i, a bé lama tohol nyemede, ni i bet ba ñemble nye. (1 Timôtéô 4:16) Di ngwés bôt bés ba lihaa, jon di nhôla bo i yi maliga ma mpémél i Bibel. Maboñok ma Paulina ni bipôdôl gwé bi bi sôk lémés lihaa jé. I len ini, a yé maséé inyule bo nlôm ba ngwélél Yéhôva. Boba ba yé basañal, nlôm a yé yak mañ u likoda.

10. Inyuki di nlama hônba?

¹⁰ Hônba. Ngéda di nyoñ makidik i noñ mambén ma Djob, niñ yés i yé i héñha, ha ngéda i, i yé i bane bôt bés ba lihaa ndutu i neebe mahéñha ma. Ngim mangéda, jam li bisu ba yé ba yimbe li yé le di nyoñ ha bé ngaba mangand ma base ni bo, to i mam ma m’bô. Bibôdle, ngim bôt mu lihaa jés i nla unbene bés. (Matéô 10:35, 36) Ndi di nlama bé tomb. Ibale di waa añle bo ñañ nlam, i ga nene wee di yé kal le ba kôli bé ni niñ boga. Yéhôva a nti bé bés kunde i kéés bôt, ndi a ti yo Yésu. (Yôhanes 5:22) Ibale di nhônba, bebek le kel yada bijô gwés bi lihaa bi nla emble ñañ nlam.​—Béñge minkéñék mi matila ni ño le “ Gwélél site yés inyu niiga.”

11-13. Kii ndémbél i Alice i niiga bé?

¹¹ Ôm siñ, ndi u gwéélak bibuk bilam. (Bingéngén 15:2) Di yoñ hihéga hi Alice. A bi yi maliga ngéda a bé ha bé ipañ bagwal bé, ba ba bé hémle bé le djob a yé, ba bak sum sum i mam ma m’bô. A bi nôgda le, a nlama hoo añle bo i mam malam a bé nigil. Alice a nkal le: “Ibale u ntiñha añle bo mam ma mondo u nigil, ni inyuki u mboñ mahéñha i niñ yoñ, hala a’ tééñga lihaa joñ ngandak.” A bi tilna bagwal bé, a bat bo kii ba bé hoñol inyu ngim minkwel a bé hégda le i ga lémél bo, kiki bo gwéha. (1 Korintô 13:1-13) A bé ti bo mayéga inyu biliya ba bi boñ inyu néñés nye, a éblege bo makébla. Ngéda a bi ke i pôdôs bo, a bi boñ kii yosôna a bé la inyu hôla nyañ i sal bibôlô bi ndap. I bibôdle, bagwal bé ba bi unup ngéda a bi kahal añle bo i mam a bé nigil.

¹² Ngéda Alice a bé yuuga bagwal bé, a bé ke ni bisu i añ Bibel hiki kel. A nkal le: “Hala a bi hôla m’ma i nok ipam limbe likala Bibel i yéne me nseñ.” I nlélém ngéda, isañ Alice a bi bôdôl wan Bibel inyu nok inyuki ngond yé i bi héñha, ni inyu yéñ manjel i kolba biniigana bi Bibel. Alice a nkônde le: “Me bi ti nye Bibel, me tilna nye mukété.” Mam ma bi sôk lelaa? Iloole isañ Alice a léba ngim njom inyu kolba biniigana bi Bibel, mam a bi añ mukété ma bi lôôha tihba nye.

¹³ Di nlama ba siñ, ndi di gwéélak bibuk bilam, to di mboma ndééñga. (1 Korintô 4:12b) Kiki hihéga, Alice a bi hônba ngolba i nyañ. A nkal le: “Ngéda me bi kôs sôble, m’ma yem a sébél me le ‘béba mañge.’” Kii Alice a bi boñ? A nkal le: “Iloole me kee mandutu ngwéé, ni suhulnyuu yosôna, me bi toñle m’ma le me nyoñ makidik i ba Mbôgi Yéhôva niñ yem yosôna. Me bi noode unda m’ma le me bé gwés toi nye. Bés boba di bi  ee, i mbus me lémbél nye bijek bilam. Ibôdôl ha, m’ma yem a bi yimbe le Bibel i bé yilha me loñge mañge.”

14. Inyuki di nlama bé tomb ngéda lihaa jés li ntinde bés i boñ jam li li téé bé?

¹⁴ I mbéda ngéda inyu boñ le bijô gwés bi lihaa bi tibil nok le maada més ni Yéhôva ma yéne bés nseñ. Kiki hihéga, ngéda Alice a bi pohol i yila nsañal iloole a sal i bôlô bagwal bé ba bé gwés, nyañ a bi témb a bôdôl maéa. Ndi Alice a yén siñ. A nkal le: “Ibale u ntomb ngéda lihaa joñ li ntinde we i boñ jam li li téé bé, i nla pam le ba kee ni bisu i boñ nlélém inyu mam mape. Ndi ibale u yé minyaô ni bôt boñ ba lihaa ndi u ômôk siñ, bahogi ikété yap ba yé le ba emble we.” Hala a bi pémél Alice. Nano, bagwal bé bo iba ba yé basañal, isañ a yé yak mañ u likoda.

15. Inoñnaga ni Matéô 5:14-16 ni 1 Pétrô 2:12, lelaa ‘minson minlam’ mi bôt bape mi nla hôla bôt bés ba lihaa?

¹⁵ Yéhôva a ñôt bôt ipañ yé ni njel ‘minson minlam’ mi bagwélél bé. (Añ Matéô 5:14-16; 1 Pétrô 2:12.) Ibale sobiina woñ a ta bé Mbôgi Yéhôva, baa a ma kwel ni bilôk bikéé bi likoda joñ? Paulina nu di mbôk pôdôl, a bi naña bilôk bikéé i mbai yé, inyu boñ le nlô wé Wayne a yi bo. Nlôm a mbigda lelaa mankéé wada a bi hôla nye i yi bonjee ba yé Mbôgi Yéhôva, a nkal le: “A bi yoñ noi inyu hilo  hiada i homa wé bôlô inyu béñge bol ni me. Ha nyen me bi nôgda le, ba yé toi bôt ba binam kiki bés!’”

16. Inyuki di nlama naña bôt bés ba lihaa makoda?

¹⁶ Loñge njel yada di nla gwélél inyu hôla bôt bés ba lihaa i yé i naña bo makoda. (1 Korintô 14:24, 25) Likoda li bisu Wayne a bi ke, li bé Bilôp bi Nwet, inyule a bé lôl i bôlô, ni le li bé nom bé. A nkal le: “Me bi nok bé nkwel u loñge, ndi i yom i bi tihba me i bé le, bôt ba bé minyaô. Ba bi leege me loñge kiyaga, ba sambla yak me. Me bi nôgda le ba bé boñ hala ni ñem wap wonsôna.” Ngim babiina i bi lôôha ba minyaô ni Paulina, ba bé hôla nye ni lok yé i ke makoda ni likalô. Jon ngéda Wayne a bi sôk yoñ makidik i nigil i mam ma mondo nwaa a bé hémle, a bat babiina ba le ba nigil Bibel ni nye, téntén munlôm.

17. Inyuki njom i ta bé yés ibale bôt bés ba lihaa ba ntjél emble bés, ndi inyuki di nlama bé waa kwélés bo?

¹⁷ Sômbôl yés i yé le bôt bés ba lihaa bobasôna ba gwélél Yéhôva. Ndi, to di mboñ biliya lelaa inyu hôla bo, i nla pam le ba tjél gwélél Djob. Ibale hala a mpémél bés, njom i ta bé yés. Maliga ma yé le, di nla bé nyégsa mut i neebe biniigana gwés. Ndi to hala, ibale bôt boñ ba lihaa ba ntehe kiki u yé maséé i gwélél Yéhôva, hala a nla tihba bo ngandak. Soohe inyu yap. U babaa bañ bo ngéda u mpôdôs bo. U waa bañ kwélés bo! (Minson mi baôma 20:20) Ba nkwoog nkaa le Yéhôva a’ sayap biliya gwoñ. Ibale bôt boñ ba lihaa ba ñemble we, b’a tohlana!