1. Bonjee ba bi bot likoda li Filipi?

NGÉDA ñôma Paul, Lukas, Silas ni Timôtéô ba bi bol i tison i Filipi i i bé isi énél i loñ Rôma, ngandak bôt i bi leege nwin u Ane. I lôk kéé ina i, i bi bot ngim likoda ha homa nu, i nene le banigil ba bobasôna ba bé kodba yak muda wada le Lidia, nu a bééna lem i leege bakén.​—Minson mi baôma 16:40.

2. Imbe ngolba likoda li li bi boma?

² Likoda ba bi tip bot, li bi boma mandutu. Satan a bi tinde baoo i kolba nson u bañga bikristen. Ba bi gwel Paul bo Silas, ba bude bo, ba ha ki bo mok. Ngéda ba bi pam i mok, ba bi yuuga lôk kéé inyu ti bo makénd. Ha nyen Paul, Silas, ni Timôtéô ba bi nyodi i Filipi, ndi i mpôôna le Lukas a bi yégle nyoo. I lôk kéé ini i i bi tip yila bikristen i bé lama boñ lelaa? Mbuu u Yéhôva u bi hôla bo i kena nson wap ni bisu. (Filipi 2:12) Jon Paul a bé a kôli kônôl bo maséé!

3. Kiki kaat Filipi 1:9-11 i nkal, inyu mambe mam Paul a bi soohe?

³ Jam kiki bo jôm li nwii mbus, Paul a tilna likoda li Filipi. Mu kiki u mba u ñañ i kaat i, w’a nôgda i gwéha Paul a bééna inyu lôktata yé. A kal bo le: “Me gwé ngôñ i tehe bébobasôna, ni le i gwéha me gwé inyu nan i yé kiki i Kristô Yésu.” (Filipi 1:8, MN.) A tilna bo le a bé soohe inyu yap. A bi soohe  Yéhôva le gwéha yap i kônde keñep, le ba wan mam ma nlôôha ba nseñ, le ba ba nginsohi, le ba bane bañ bôt bape ngok baagene, ni le ba kee ni bisu i ba nyonok ni litam li telepsép. Ibabé pééna, yak bés i len ini, di nla ôt nseñ mu bibañga bi Paul. Jon i mbéda le di añ i mam Paul a tilna bikristen bi Filipi. (Añ Filipi 1:9-11.) Di wan ni mam a bi pôdôl, di tehe ki lelaa di nla bii hiki jada mu bisélél.

4. (a) Inoñnaga ni kaat 1 Yôhanes 4:9, 10, lelaa Yéhôva a unda bés gwéha? (b) Ipam limbe likala di nlama gwés Djob?

⁴ Yéhôva a bi unda bés gwéha i nlôôha ngéda a om Man wé le a wo inyu yés. (Añ 1 Yôhanes 4:9, 10.) Kiki Yéhôva a ngwés bés i nya i mbuma ñañ, hala a ntinde yak bés i gwés nye. (Rôma 5:8) Ipam limbe likala di nlama gwés Djob? Yésu a timbhe i mbadga i, ngéda a kal Farisai yada le: “U gwéhék [Yéhôva] Nyambe woñ ni ñem woñ wonsôna, ni nom yoñ yosôna, ni mahoñol moñ momasôna.” (Matéô 22:36, 37) Di nlama gwés Djob ni ñem wés wonsôna. Di kéñbaha ki gwéha yés inyu yé hiki kel. Paul a kal lôk kéé i Filipi le gwéha yap “i kônde keñep, keñep ni keñep.” Lelaa di nla kéñbaha gwéha yés inyu Djob?

5. Lelaa di nla kéñbaha gwéha yés inyu Djob?

⁵ Di nla bé gwés Djob ibale di nyi bé nye. Bibel i nkal le: “Mut a ngwéhna bé a nyi bé Nyambe, inyule Nyambe a yé gwéha.” (1 Yôhanes 4:8) Ñôma Paul a bi unda le ibale di gwé ‘bañga yi ni nogna i yôni’ i Djob, gwéha yés inyu Yé y’a kônde keñep. (Filipi 1:9) Ngéda di bi tip bôdôl nigil Bibel, di bi kahal gwés Djob to hala kiki di bé ngi yi nye loñge. Ni le kiki di bé ke ni bisu i yi Yéhôva, hala nyen yak gwéha yés inyu yé i bé kônde keñep. Jon i yé nseñ le di nigil Bibel hiki ngéda, di soñda ki mam di nigil!​—Filipi 2:16.

6. Inoñnaga ni kaat i 1 Yôhanes 4:11, 20, 21, lelaa di nla kéñbaha gwéha yés?

⁶ Gwéha ikeñi Djob a ñunda bés i ntinde bés i gwés lôk kéé yés. (Añ 1 Yôhanes 4:11, 20, 21.) Di yé le di hoñol le hala a yé jam li ntomb i gwés lôk kéé yés, inyule di ngwélél Yéhôva, di boñok ki biliya i kôna bilem gwé, di noñ ndémbél i Yésu nu a bi gwés bés i nya i mbuma ñañ kayéle a ti niñ yé inyu yés. Ndi ngim mangéda, di nla bana ndutu i nôgôl i mbén ini le: Di gwéhna. Di béñge i jam li bi tagbe likoda li Filipi.

7. Kii maéba Paul a ti Éwôdia bo Sintiké ma niiga bés?

⁷ Éwôdia bo Sintiké ba bé lôk kéé i bôda i i bi sal ni makénd “lôñ yada” ni ñôma Paul. Ndi i nene le mindañ mi bi gwéé ipôla bo iba. Mu i kaat Paul a tilna likoda jap, a bi sima môl map, a ti ki bo maéba le ba bana “hoñol yada.” (Filipi 4:2, 3) Paul a bé nyégsaga i tilna likoda jolisôna le: “Boña ni mam momasôna ibabé minhuñbe, to [momol].” (Filipi 2:14) Ibabé nkaa, maéba mana ma  bi hôla ndik bé bisita biba bini. Ma bi hôla yak likoda jolisôna i gwéhna.

8. Kii i nla kéñ bés njel i gwés lôk kéé yés, lelaa di nla yémbél i ndutu i?

⁸ Kiki Éwôdia bo Sintiké, ngim jam i nla kéñ bés njel i gwés lôk kéé yés: Ngéda di nhéléé i béñge bibomb gwap. Bés bobasôna di nhôs hiki kel. Ibale di mbok mis bibomb bi lôk kéé yés, gwéha yés inyu yap i ga hoi. Kiki hihéga, di nla unup ibale mankéé wés wada a nhôya sas ndap Ane. Ibale di nkahal soñgol mahôha mé momasôna, ki di nkônde unbene nye, gwéha yés inyu yé ki i ga hoi. Ibale nlélém jam u mpémél we, i nla ba loñge i bigda le: Yéhôva a ntehe dihôha tjés ni di mankéé wés. Ndi iloole a héléé i béñge dihôha dini, a nke ni bisu i gwés bés bobasôna. Inyu hala nyen di nlama kôna gwéha i Yéhôva, di bok ki mis bilem bilam bi lôk kéé yés. Ngéda di mboñ biliya i gwés bo, di nlédés adna yés.​—Filipi 2:1, 2.

9. Mambe ‘mam ma nlôôha ba nseñ’ Paul a pôdôl mu kaat a tilna lôk kéé i Filipi?

⁹ Mbuu mpubi u bi tinde Paul i tilna lôk kéé i Filipi, yak ni bikristen gwobisôna le, ‘ni wan mam ma nlôôha ba nseñ.’ (Filipi 1:10) Mam ma yé nseñ mo mana: Jôl li Yéhôva li pubhana, bitééne gwé bi yon, nsañ ni adna bi ba ipôla bikristen. (Matéô 6:9, 10; Yôhanes 13:35) Ibale i mam ma mon ma yé nseñ i niñ yés, wee di ngwés Yéhôva.

10. Kii di nla boñ inyu ba nginsohi?

¹⁰ Paul a kal ki le di nlama “ba nginsohi.” Hala a nkobla bé le di nlama ba peles. Di ta bé le di ba nginsohi kiki Yéhôva Nyambe. Ndi Yéhôva a ntehe le di yé nginsohi ngéda di mboñ kii yosôna di nla, inyu kéñbaha gwéha yés inyu yé ni i boñ mam ma nlôôha ba nseñ. Di ñunda gwéha yés ngéda di mboñ biliya gwobisôna inyu boñ le di bane bañ lôk kéé yés ngok baagene.

11. Inyuki di nlama bé bane bôt bape ngok baagene?

¹¹ Maéba mana le di bane bañ bôt bape ngok baagene ma ta bé minjôha. Lelaa di nla bane mut numpe ngok baagene? Di nla boñ hala ni njel mintuk di mpohol; mbot di nhaba, tole bôlô di nsal. Bebek le inyu yés, i yom di mboñ i ta bé béba. Ndi ibale mam di mboñ ma ntééñga kiññem i mut numpe, ndi a baage, hala a ta bé jam ba yan. Yésu a kal le ibale u mboñ le man wé ntomba wada a baage, i ga ba loñge le ba ha we soso ngok kôgôl i joo ba leñ we i tuye!​—Matéô 18:6.

12. Kii ndémbél i basañal bana i niiga bés?

¹² Di béñge lelaa babiina, ba ba yé basañal, ba bi noñ maéba ma Yésu. Ba bé likoda jada ni babiina bape ba ba bé ba ma tip sôblana, ba lôlak i homa bikila bi bé ngandak. Babiina ba, ba bé hoñol le bikristen bi nlama bé ke i sinima​—to inyu béñge bititii bilam. Jon hala a bi tééñga bo ngéda ba bi yi le basañal bana ba bi ke i sinima. Ngéda basañal ba ba bi yi  hala, ba waa ke i sinima letee i bet ba bi tip sôblana ba let i pes mbuu. (Lôk Héber 5:14) I makidik basañal bana ba bi yoñ ma bi unda le ba bé gwés lôk kéé yap, ha ndik bipôdôl bé, ndi yak maboñok.​—Rôma 14:19-21; 1 Yôhanes 3:18.

13. Lelaa di nla tinde mankéé i boñ béba?

¹³ Di nla ki bane mankéé ngok baagene ngéda di ntinde nye i boñ béba. Lelaa? Di yoñ hihéga. I nla pam le nnigil Bibel wada a nwas nyôba i mbus ngandak biliya. A kit ki le a nlama ha bé nyo, tjagda. A pala hol i pes mbuu, a sôblana ki. Mbus ngéda, mankéé wada a naña nye i ngand, a ti nye moog, a kal nye le: “Nano u yé kristen; u gwé mbuu u Yéhôva. Hôtnyuu i yé lem yada mu litam li mbuu. Ibale u gwé yo, w’a nyo ni héga.” Di hégda i jam li yé le li bôña ibale mankéé nu a noñ minkoda mi maéba mini!

14. Lelaa makoda ma nhôla bés i noñ maéba ma mpémél i kaat Filipi 1:10?

¹⁴ Makoda ma ñunda bés ngandak manjel di nla gwélél inyu noñ maéba ma kaat Filipi 1:10. Pog, bijek bi mbuu bi nhôla bés i yi mam ma nlôôha ba nseñ i mis ma Yéhôva. Iba, di ntehe ki lelaa di nla gwélél yom di nigil inyu ba nginsohi. Aa, hiki wada wés a ntinde numpe i “gwéha ni minson minlam.”  (Lôk Héber 10:24, 25) Kiki lôk kéé yés i nti bés mankénd, hala nyen gwéha yés inyu Yéhôva ni inyu yap i nkônde keñep. Ngéda di ngwés Djob, di gwéhék lôk kéé yés ni ñem wés wonsôna, di ga boñ kii yosôna di nla inyu boñ le ba baage bañ.

15. I ‘ba nyonok ni litam li telepsép’ wee kii?

¹⁵ Paul a bi yemhe Djob le lôk kéé i Filipi i ‘ba nyonok ni litam li telepsép.’ (Filipi 1:11) I yé ntiik le, inyu bana “litam li telepsép” lini, ba bé lama gwés Yéhôva ni lôk kéé yap. Ba bé lama ki añle bôt bape le ba nhémle Yésu, ba pôdôl ki inyu botñem yap i i mbuma ñañ. Kaat i Filipi 2:15 i ngwélél ki hihéga hini, ‘ni bai kiki mapubi ikété nkoñ ’isi.’ Hihéga hi, hi kôli inyule yak Yésu a sébél banigil bé le: “Mapubi ma nkoñ ’isi.” (Matéô 5:14-16) A bi ti ki banigil oda le ba ‘yilha bôt banigil,’ a kônde le b’a “ba ki mbôgi . . . letee ni masuk ma ’isi.” (Matéô 28:18-20; Minson mi baôma 1:8) Di ñunda le di yé nyonok ni ‘litam li telepsép’ ngéda di ngwel nson unu ni makénd momasôna.

16. Lelaa kaat Filipi 1:12-14 i ñunda le di nla bai kiki mapubi to ngéda di ntégbaha mangéda mabe? (Béñge titii i lipep li bisu.)

¹⁶ To imbe ndutu di mboma, di nla béyés mapubi. Hok ngéda, jam li nene wengoñle li nla kéñ bés njel i añal ñañ nlam, jon li nla yible bés pôla. Kiki hihéga, ñôma Paul a bé i mok i Rôma ngéda a tilna lôk kéé i Filipi. Ndi hala a bi sôña bé nye i añle batat ndap mok, ni  i bet ba bé lo i yuuga nye ñañ nlam. To hala kiki a bé tégbaha mangéda mabe, Paul a bi téé likalô ni makénd, ndémbél yé i bi lédés lôk kéé, i ti ki bo makénd i “añal bañga i Nyambe ibabé woñi.”​—Añ Filipi 1:12-14; 4:22.

17. Lelaa lôk kéé ihogi i mpam i kena nson wap likalô ni bisu ngéda ba nsôña likalô?

¹⁷ Ngandak lôk kéé i bôlôm ni i bôda i nla kôna ñem ngui u Paul. Ba niñ biloñ i het i ta bé kunde i añal ñañ nlam mandap ni mandap tole i mbamba, jon ba nlama yéñ manjel mape. (Matéô 10:16-20) I loñ yada mu, ngwélél makiiña wada a bi ti mahoñol le hiki ntéé likalô a nla kwélés bôt bé ba lihaa, bôt bé ba libôga, solôñ yé i suklu ni i bôlô, ni bôt bape a nyi. Nwii ima mbus, nsoñgi u makoda mu likiiña li u bi hol. Bebek di niñ i het i yé kunde i téé likalô. Ndi di nla ôt biniigana bi mahee mu makeñge lôk kéé yés i bôlôm ni i bôda i ngwélél: Yéñ manjel i téé likalô i nya i yôni, ni botñem le Yéhôva a ga ti we ngui i yémbél to imbe ndutu.​—Filipi 2:13.

18. Mambe makidik di nlama yoñ?

¹⁸ Ngéda ini nano le di kee ni bisu i noñ maéba Paul a bi tilna lôk kéé i Filipi. Di wan mam ma nlôôha ba nseñ, di ba nginsohi, di bane bañ bôt bape ngok baagene, di ba ki nyonok ni litam li telepsép. Ibale di mboñ hala, gwéha yés i ga ke ni bisu i keñep, di ga kônha yak Tata wés le Yéhôva, maséé.