BAA u gwé ngôñ i gwel ngim nson i likoda u u nla bé sal hanano? U nla ba nson mut numpe a ngwel. Tole bebek u yé ngim nson tole nsima u bi bôk u kôs. Ndi biuni, kon, liyep, tole mbegee i lihaa joñ bi mboñ le u nla ha bé gwel wo. I nla ki ba le u nlama nwas ngim nson u nsal ibôdôl behee, inyule ntôñ u nlona ngim mahéñha. To kii leñek, u nla nôgda wee u ta bé i boñ kii yosôna u sômblak i nson u Djob. Ha i ngéda i, hala a nla tééñga we ngim mangéda. Ndi to hala, kii i nla boñ le u tomb bañ, le njôô i gwel bañ we, ni le u téédana bañ bôt hiun? Lelaa u nla tééda maséé moñ?

Inyu ke ni bisu i ba maséé, di nla ôt biniigana mu ndémbél i Yôhanes Nsôble. Yôhanes a bé maséé ni nson u tôbôtôbô a bééna, ndi i nene le a bé yi bé le mam ma bé lama héñha i mbus ngéda. A bé hégda bé le a bé lama tégbaha ngandak ngéda i mok iloo i nson wé likalô. To hala, Yôhanes a bi ke ni bisu i ba maséé, letee ni i nyemb. Kii i bi hôla nye? Lelaa di nla tééda maséé més yak ngéda mam ma mbôña bé kiki di ngwés?

Bebee le i sôñ Matôp, i nwii 29 N.Y., Yôhanes a bôdôl nson wé, u u bé i kôôba malo ma Mésia, a kalak le: “Bé hiela miñem, inyule Ane ngii i gwé ni moo.” (Matéô 3:2; Lukas 1:12-17) Ngandak i bi neebe likalô jé. Limut li bôt li bé lôl bahoma bahoma inyu tam bibéba gwap ni inyu kôs sôble. Yôhanes a bi béhe ki baéga base ba ngéda yé, a kal bo i jam li bé bem bo ibale ba nhéñha bé. (Matéô 3:5-12) Nson wé u bi pam likala li tôbôtôbô i sôñ Biôôm i nwii 29 N.Y., ngeñ a bi sôble Yésu. Ibôdôl ha ngéda i, Yôhanes a bé om bôt i noñ Yésu, nu a bé Mésia Nyambe a bi bôn.​—Yôhanes 1:32-37.

Mu kiki a bé pôdôl nson u tôbôtôbô Yôhanes a bé gwel, Yésu a kal le: “Ikété bôt ba ngwéé ni bôda, mut a nloo Yôhanes Nsôble a nen-ge bé.” (Matéô 11:11) Ibabé pééna, Yôhanes a bi kon maséé ni bisai a  bi kôs. Kiki nye, ngandak lôk kéé i len ini i nkôhna bisai mu nson wap. Di yoñ hihéga hi mankéé Terry. Terry bo nwaa Sandra ba ma tégbaha iloo 50 ma nwii i nson nsañal. Terry a nkal le: “Me bi bana nsima i gwel ngandak minson minlam. Me bi ba nsañal, me sal i Bétel, me ba nsañal nu tôbôtôbô, ngwélél makiiña, me ba ki ngwélél nu a nyuuga bagwélél ba makiiña, i len ini me yé nsañal nu tôbôtôbô.” Hala a yé jam li maséé i gwel minson mi ntôñ, ndi kiki ndémbél i Yôhanes i ñunda, i mbéda biliya inyu ke ni bisu i ba maséé, to ngéda mam ma nhéñha i niñ yés.

I jam li bé boñ le Yôhanes Nsôble a tééda maséé mé li yé le a bé béna ti mayéga inyu minsima a bééna. Di yoñ hihéga hiada. I mbus sôble i Yésu, nson likalô u Yôhanes u bi kahal sôs ngui, ki le u Yésu u bi kahal hol. Inyu hala nyen banigil ba Yôhanes ba bi kôôge nye bebee, ba kal nye le: “Nun-ki, a nsôble, bôt bobasôna ki ba nke nyeni.” (Yôhanes 3:26) Yôhanes a timbhe bo le: “Nu a gwé mbom nyen a yé mbii. Ndi liwanda li mbii, li li téé li emblege nye, li nkon maséé ngandak inyu kiñ mbii. Jon maséé mem mana ma yé bayon-ga.” (Yôhanes 3:29) I lôl bé Yôhanes kekikel mahoñol le a jôp i pémsan ni Yésu, a bi hoñol bé to le nson u Yésu u u bé lôôha ba mahee u bi lo i lém wé. Maselna ni hala, Yôhanes a bi tééda maséé mé inyule a bé diihe nsima a bééna i ba “liwanda li mbii.”

Libak li Yôhanes li bi hôla nye i tééda maséé mé to hala kiki nson wé u bé bat nye ngandak bisesema. Kiki hihéga, a bé Nazir ibôdôl nu a bi gwéé, hala wee a bé lama bé nyo moog. (Lukas 1:15) Jon ngéda Yésu a bé pôdôl i nya niñ Yôhanes a bééna, a kal le: “Yôhanes a bi lo, a je bé, a nyo bé.” Jam lipe ki le, Yésu ni banigil bé ba bééna bé bikila bi, ba bé niñ kiki bôt bobasôna. (Matéô 11:18, 19) To hala kiki Yôhanes a bé boñ bé bihélha bi mam, a bé yi le banigil ba Yésu ba bi kôhna i ngui i, yak ba ba bé ndugi banigil bé ngéda bisu. (Matéô 10:1; Yôhanes 10:41) Iloole a bok mahoñol maselna ma bé ipôla nye ni Yésu, Yôhanes a bé a pégi i gwel nson Yéhôva a bi ti nye ni makénd momasôna.

Ibale yak bés di ndiihe nson di ngwel hanano, di nla tééda maséé més. Terry nu di mbôk sima a nkal le: “Hiki ngéda ba bé ba ti me nson u mondo, me bé bok mahoñol mu.” Ngéda a nhoñol nwii nwominsôna a bi tégbaha nson nsañal, a nkal le: “Me ntam bé me yom yo ki yo, ndik mam malam mon me mbigda.”

Di nla kéñbaha maséé més i nson u Djob ibale di mbigda yom i mboñ le nson wés u ba tôbôtôbô. Di gwé nsima nkeñi i ba “bagwelnson lôñ yada ni Nyambe.” (1 Korintô 3:9) Kiki tik yom di gwé behee i ngi bayak inyule di ntééda yo loñge, i yoñ ngéda i soñda nsima di gwé i gwélél Nyambe i nhôla bés i tééda maséé més. Di nlama bé hégha bisesema di mboñ ni bi lôk kéé ipe. Di hoñol bañ ki to le minson mi tôbôtôbô bape ba nkôs mi nlôôha ba nseñ iloo nwés.​—Galatia 6:4.

Yôhanes a bé yi le nson wé u bé lama mal, ndi a bé hégda bé le u ga hoo mal hala. (Yôhanes 3:30) I nwii 30 N.Y., jam kiki bo sôñ isamal i mbus sôble i Yésu, Kiñe Hérôdé a bi ha Yôhanes i mok. To hala, Yôhanes a bi boñ kii yosôna a bé la inyu ke ni bisu i niiga. (Markô 6:17-20) Kii i bi hôla nye i tééda maséé mé mu mandutu ma? A bi bok mahoñol mé i mam ma mbuu.

Ngéda Yôhanes a bé i mok, ba bi añle nye lelaa nson likalô u Yésu u bé hol. (Matéô 11:2; Lukas 7:18) Yôhanes a bé yi le Yésu a bé Mésia, ndi a bé badba lelaa a ga yônôs mbañ yosôna Mésia a bé lama yônôs kiki Bitilna bi bé kal. Mu kiki Mésia a bé lama ane, baa ane i Yésu i bé lama hoo  bôdôl? Baa i bé lama kobol Yôhanes i mok? Kiki a bééna ngôñ i tibil nok i yom Yésu a bé lama boñ, a bi om banigil bé iba i bat Yésu le: “Baa wen u yé Nu a nlo, too di bemek numpe?” (Lukas 7:19) Ngéda ba bi témb, Yôhanes a bi lama emble bo loñge ngéda ba bé añle nye kiki Yésu a bé mbuubaha bôt i nya i yé hélha, a om ki bo i kal Yôhanes le: “Bandim ba ntehna, bibôk bi hiômôk, bakonlô ba pubhaga, bandok ba nogga, bawoga ba tugge, miñañ minlam mi ñañlana diyeyeba.”​—Lukas 7:20-22.

Ibabé pééna, i mam Yôhanes a bi nok ma bi lédés nye. Ma bé kwés nye nkaa le Yésu a bé yônôs toi mbañ yôsona i bé lama yônôl Mésia. To hala kiki Yésu a pémés bé Yôhanes i mok, Yôhanes a bé yi le nson wé u bé bé yañga. Ñ, tolakii a bé i mok, a bééna bañga njom i ba maséé.

Kiki Yôhanes, ibale di mbok mahoñol i mam ma mbuu, i ga ba jam li ntomb i hônba ni maséé, yak ni wongut. (Kôlôsé 1:9-11) Di nla pam i boñ hala ibale di nsoñgol Bibel, di soñdaga yo, di bigdaga le nson di ngwel inyu Djob u ta bé yañga. (1 Korintô 15:58) Sandra a nkal le: “I añ pes yada i Bibel hiki kel i bi hôla me i kôôge bebee ni Yéhôva. Hala a mboñ ki le, me nlôôha bé hoñol memede ndik Yéhôva.” Di nla ki béñge i mam momasôna bilôk bikéé bi mboñ inyu Yéhôva i nkoñ ’isi wonsôna. Hala a ga boñ le di lôôs bañ ngéda i tjelel inyu mam ma mpémél bés, ndi i mam Yéhôva a mboñ. Sandra a nkal le: “JW Nkuu Biliñgeliñge nu a mpam hiki sôñ a nhôla bés i nôgda le bés ni lôk kéé i nkoñ ’isi di yé ntôñ, a nhôla ki bés i tééda maséé mu nson di ngwel.”

Yôhanes Nsôble a bi yônôs nson wé ni “mbuu ni lipémba li Élia,” ni le kiki Élia, Yôhanes a bé “mut binam kiki bés.” (Lukas 1:17; Yakôbô 5:17) Kiki Yôhanes, ibale di mbok mahoñol i mam ma mbuu, yak bés di ga tééda maséé més mu nson Ane di ngwel, to kii mbôña.