1. Umbe nsima di gwé?

KINJE nsima di gwé i ba i ntôñ u Yéhôva! Di yé ikété lihaa li li niñ ikété nsañ ni maséé. Imbe bôlô u gwé ikété ntôñ u Yéhôva?

2. Himbe hihéga ñôma Paul a bi gwélél mu libim li bikaat gwé?

² Hihéga hiada ñôma Paul a bi yoñ mu bikaat gwé hi nhôla bés i nok i jam lini. Paul a bi hégha likoda ni nyuu i mut binam. A hégha bôt ba likoda ni bijô bi nyuu.​—Rôma 12:4-8; 1 Korintô 12:12-27; Éfésô 4:16.

3. Mambe mam maa di ga tehe munu yigil ini?

³ Munu yigil ini, di ga tehe mam maa di nigil mu hihéga Paul a bi yoñ. Pog, di ga tehe le hiki mut i likoda a yé nseñ. * Iba, di ga tehe kii di nla boñ ibale di nhoñol le di ta bé nseñ. Aa, di ga tehe lelaa di nla sal i nya i yôni ikété ntôñ Djob.

4. Kii kaat Rôma 12:4, 5 i niiga bés?

⁴ Jam li bisu hihéga hi Paul hi niiga bés li yé le, hiki wada wés a yé nseñ i likoda. Paul a bôdôl hihéga hié ni bini bibuk le: “Inyule ndik kiki  nyuu i gwé ngandak bijô, ndi bijô gwobisôna bi gwé bé nlélém nson, hala nyen yak bés, to hala kiki di yé ngandak, di yé nyuu yada lôñni Kristô, ndi bés bobasôna di yé bijô bi bi gwé adna gwo ni gwo.” (Rôma 12:4, 5) Kii Paul a bé sômbôl kal? Le di nsal bé nlélém bôlô i likoda, ndi bés bobasôna di yé nseñ.

5. Mambe “makébla” Yéhôva a bi ti likoda?

⁵ Ngéda ba mpôdôl i bet ba yé nseñ i likoda, di mpala hoñol i bet ba nkena mam. (1 Tésalônika 5:12; Lôk Héber 13:17) I yé maliga le Yéhôva a bi ti likoda “bôt kiki makébla” ni njel Kristô. (Éfésô 4:8) Mu nsoñgi u, di nla sima bilôk bikéé bi yé i Juu li bakena ntôñ, bahôla bap, bilôk bikéé bi ñéga dikuu di biloñ, bagwélél ba makiiña, i bet ba niiga i bisuklu bi ntôñ, mimañ, ni bahôla nson. I lôk kéé ini yosôna i bi tééba ni njel mbuu mpubi inyu tééda mintômba mi Yéhôva ni lédés likoda.​—1 Pétrô 5:2, 3.

6. Inoñnaga ni kaat 1 Tésalônika 2:6-8, kii lôk kéé i i ñéga bés i nliya i boñ?

⁶ Mbuu mpubi won u ntéé bilôk bikéé inyu yônôs ngim minson. Kiki bijô bi nyuu bihogi, bo makôô, bo moo, bi nsal inyu nyuu yosôna, hala nyen lôk kéé i i nkena likoda i nsélél likoda jolisôna. Ba nyéñ bé kôs lipém. Njômbi yap i yé le, ba lédés lôk kéé i bôda ni i bôlôm. (Añ 1 Tésalônika 2:6-8.) Di nti Yéhôva mayéga inyu lôk kéé ini i i ntôñ bôt bape!

7. Kii Yéhôva a nti basañal?

⁷ Ntôñ u yé le u om ngim lôk kéé i sal kiki basañal biloñ bipe, basañal ba tôbôtôbô, tole basañal ba ngéda yosôna. Ngim lôk kéé i bôda ni i bôlôm i nkoñ ’isi wonsôna i bi kit le niñ yap yosôna i yé ndik i téé likalô ni i yilha bôt banigil. Ba nhôla ki ngandak bôt i yila banigil ba Kristô Yésu. To hala kiki bilôk bikéé bini bi gwé bé bigwel moo bañga, Yéhôva a nkôp bo ngandak bisai. (Markô 10:29, 30) Di nlôôha diihe i lôk kéé i bôda ni i bôlôm ini, di nti ki bo mayéga inyu nson ba ngwel i likoda!   

8. Inyuki hiki ntéé likalô a yé nseñ i mis ma Yéhôva?

⁸ Baa ndik lôk kéé i i ñéga bés ni basañal bon ba yé nseñ i likoda? Heni! Hiki ntéé likalô a yé nseñ inyu Djob ni likoda. (Rôma 10:15; 1 Korintô 3:6-9) Ngo bôlô i bisu i likoda i yé i yilha bôt banigil ba Nwet wés Yésu Kristô. (Matéô 28:19, 20; 1 Timôtéô 2:4) Bilôk bikéé gwobisôna bi bi yé nsôblege ni bi bi ta bé nsôblege, bi mboñ biliya i bugus nson likalô i niñ yap.​—Matéô 24:14.

9. Inyuki di ndiihe lôk kéé yés i bôda?

⁹ Inyu Yéhôva, bilôk bikéé bi bôda bi yé nseñ ngandak ikété likoda. Yéhôva a ndiihe bôda ba yé mbiibaga, banyañ ba bon, biyik bi bôda, ni bôda ba ta bé mbiibaga ba ba ngwélél nye ni ñem wonsôna. Bibel i mpôdôl ngandak bôda i hémle i i bi lémél Djob. Ba  bi yigle bés ndémbél ilam i pék, i hémle, i makénd, i ñem ngui, i likap, ni i minson minlam. (Lukas 8:2, 3; Minson mi baôma 16:14, 15; Rôma 16:3, 6; Filipi 4:3; Lôk Héber 11:11, 31, 35) Di nti Yéhôva mayéga ngandak inyu lôk kéé yés i bôda mu makoda més i i nhôlôs minlélém mi bilem bilam!

10. Inyuki di ndiihe mimañ mi bôt?

¹⁰ Di yé ki maséé ni mimañ mi bôt mi mi yé mu makoda més. Ngim makoda i gwé mimañ mi bôt mi mi ntégbaha niñ yap yosôna i nson u Yéhôva. Bape ba ntip jôp i ntôñ. Mu mimañ mi bôt mi, ngandak i nkon inyule i ñun. Makon ma, ma nla kéñ bo i gwel ngim minson ni i téé likalô kiki ba ngwés. Ndi hala a nsôña bé bo i boñ i yom ba nla i nson likalô, ni i gwélél ngui yap yosôna inyu lédés ni niiga lôk kéé ipe! Ñ, di ñôt toi nseñ ni yi yap. Ba yé toi ntut lipém inyu Yéhôva ni inyu yés.​—Bingéngén 16:31.

11-12. Lelaa ndémbél i boñge ba wanda ba likoda joñ i ma ti we makénd?

¹¹ Di nhôya bé boñge ba wanda ba ba yé mu makoda més. Ba mboma ngandak mandutu munu nkoñ ’isi u Satan Nsohop u u yé nyonok ni pék i bôt ba binam. (1 Yôhanes 5:19) Ndi hala a ntina makénd i tehe bo ba ntimbhe i makoda, ba añlak ñañ nlam, ba kalak ki bôt le ba yé bagwélél ba Yéhôva ibabé i kon woñi. Ñ, a boñge ba wanda, ni yé nseñ i ntôñ u Yéhôva!​—Tjémbi 8:3.

¹² Ndi ngim lôk kéé i bôda ni i bôlôm i nhoñol le i ta bé nseñ i ntôñ u Yéhôva. Kii i nla hôla bés i nôgda le di yé toi nseñ? Di pôdôl le jam li.

13-14. Inyuki ngim bôt i yé le i hoñol le i ta bé nseñ?

¹³ Paul a niiga bés jam lipe mu hihéga hié. A mpôdôl ngim ndutu i ngandak bôt i mboma i len ini, ba nhoñol le ba ta bé nseñ. A tila le: “Ibale kôô u bak le u kal le: ‘Hala kiki me ta bé woo, wee me ta bé jô nyuu,’ hala a nkobla bé le kôô u ta bé jô nyuu. Ibale ôô u bak le u kal le: ‘Hala kiki me ta bé jis, wee me ta bé me jô nyuu,’ hala a nkobla bé le ôô u ta bé jô nyuu.” (1 Korintô 12:15, 16) Kii Paul a bé sômbôl kal?

¹⁴ Ibale u nkahal hégha wemede ni lôk kéé ipe i likoda, u nla hoñol le u ta bé nseñ. Ngim lôk kéé i niiga loñge, ipe i nyi tjek mam, tole i nyi lédés lôk kéé. Bebek u nhoñol le u ta bé le u boñ kiki bo. Hala a ñunda le u yé suhulnyuu u ban-ga ñem nsôhga. (Filipi 2:3) Ndi yoñ yihe. Ibale u mbéna hégha wemede ni lôk kéé i i gwé makeñge ma tôbôtôbô, u yé le u nimis makénd. Kiki Paul a bi kal, u nla yak hoñol le u ta bé nseñ. Kii i nla hôla bés i jôs i nya mahoñol i?

15. Inoñnaga ni kaat 1 Korintô 12:4-11, kii di nlama yi inyu makébla di gwé?

¹⁵ Bigda le: I hiai hi bisu, Yéhôva a bi ti ngim bikristen ngui i boñ bihélha bi mam, ndi a bi ti bé bikristen gwobisôna nlélém likébla. (Añ 1 Korintô 12:4-11.) Yéhôva a bi ti bo ngap ni makébla bi bi bé bé nlélém, ndi bobasôna ba bé nseñ. I len ini, Yéhôva a nti bé bés ngui i boñ bihélha bi mam. Ndi mam ma ngi yii kiki i hiai hi bisu. Di gwé bé nlélém ngap, ndi bés bobasôna di yé nseñ i mis ma Yéhôva.

16. Mambe maéba ma ñôma Paul di nlama noñ?

 ¹⁶ Iloole di hégha bésbomede ni lôk kéé yés, di noñ mana maéba ma ñôma Paul: “Hiki mut a wan minson nwé nyemede, ha nyen a’ bana njom i kon maséé inyu minson nwé nyetama, ndi ha inyu bé le a nhégha nyemede ni mut numpe.”​—Galatia 6:4.

17. Kii di ga kôs ibale di noñ maéba ma Paul?

¹⁷ Ibale di noñ maéba ma Paul ndi di tibil wan minson nwés, di yé le di léba le di gwé ngim ngap tole likébla li tôbôtôbô bôt bape ba gwé bé. Kiki hihéga, i nla ba le mañ u gwé bé makeñge momasôna inyu niiga i hikôma, ndi a ba ntéé likalô nu likeñge. Tole, bebek a nyi bé tjek mam kiki mini mimañ mimpe i likoda, ndi bilôk bikéé gwobisôna bi nkwo nye nyuu, bi yé ki bebee i bat nye maéba inyule a yé minyaô, a ñunda ki bo gwéha. Tole, a nyiba kiki mut a nleege bakénd. (Lôk Héber 13:2, 16) I ngéda di mbok mis mu ngap yés ni makébla més, hala a ga tinde bés i kon maséé ni nson di nsal i likoda. Di ga kil bé lôk kéé i i gwé bé minlélém mi makébla kiki bés njôñ.

18. Lelaa di nla lémés nson wés ni ngap yés?

¹⁸ To umbe nson di nsal i likoda, bés bobasôna di nlama yéñ i kônde lémés nson wés ni ngap yés. Inyu hôla bés, Yéhôva a nkôôbana bés ngandak bisuklu ni njel ntôñ wé. Kiki hihéga, i makoda més ma ñem sonde, di nigil lelaa di yé le di kônde lémés nson wés likalô. Baa u ngwélél biniigana u nkôs mu makoda ma i nya i yôni?

19. Lelaa u yé u pam i yônôs matode inyu ke i suklu i baañal ñañ nlam u Ane?

¹⁹ Njel ipe Yéhôva a ngwélél inyu niiga bés i yé suklu i baañal ñañ nlam u Ane. I suklu ini, i yé inyu bilôk bikéé bi bôda ni bi bôlôm bi bi yé basañal ba ngéda yosôna, ba ban-ga ipôla 23 nwii ni 65 nwii. U yé le u hoñol le w’a la bé ke mu suklu i. Ndi iloole u hoñol mam ma yé le ma kéñ we i ke mu, hoñol mam ma yé le ma ti we ngôñ i ke mu. Tjek ki mam moñ inyu boñ le u laa yônôs matode inyu ke mu suklu i. Ni mahôla ma Yéhôva ni biliya bi ngui, u yé le u pam i boñ jam u hoñlak le w’a la bé boñ.

20. Bimbe biniigana di nla ôt mu i kaat Rôma 12:6-8?

²⁰ Jam li yônôs aa hihéga hi Paul hi niiga bés, li mpémél i kaat Rôma 12:6-8. (Añ.) Munu minlôñ mini, Paul a nkônde kal le bikristen bi gwé bé minlélém mi makébla. Ndi a nyigye ki le, di nlama gwélél makébla momasôna di gwé inyu lédés likoda.

21-22. Bimbe biniigana di ñôt mu ndémbél i Robert bo Félice?

²¹ Di yoñ hihéga i mankéé wada nu di ga sébél le Robert. A bi sal ngandak i loñ ipe, ndi i mbus ngéda ba bi om nye i loñ yé i sal i Bétel. To hala kiki lôk kéé i bi kal nye le ba nhéñha bé nye nson inyule a mboñ jam libe, a nkal le: “Me bé hoñol  le me nhôs, hala a bi boñ le me tégbaha ngandak sôñ ikété nduña. I bé i pam ngim mangéda le me bana ngôñ i téé nson wem i Bétel.” Kii i bi boñ le a témbna maséé mé? Mañ umpe u bi toñle nye le Yéhôva a niiga bés mu nson di ngwel, inyu boñ le di pam i gwel minson mimpe di nke kôs. Robert a bi nok le a nlama hôya nlômbi wé nson, a bok mahoñol mé i nson wé mondo.

²² Mankéé Félice Épiscopo a bi boma nlélém ndutu. Bo nwaa wé ba bi boñ suklu Giléad i nwii 1956, i mbus ba ep nye kiki ngwélél makiiña i loñ Bôlivia. I nwii 1964 nwaa a gwal. Félice a nkal le: “Di bi nok ndutu i nwas nson wés di bé gwés. I pot mbale, me bi tégbaha ngim nwii i tjelel. Ndi ni mahôla ma Yéhôva, me bi yoñ ngui, me bok mahoñol i nson wem u mondo u isañ man.” Baa yak we u nôgda nlélém jam kiki Robert bo Félice? Baa hala a ntééñga we le ba nhéñha we nson u gwéhék? Ibale hala, u yé le u ba maséé ibale u mbok mis mu mam u nla boñ nano inyu Yéhôva ni lôk kéé yoñ. Gwélél ngéda yoñ, makébla moñ ni ngap yoñ inyu hôla bôt bape. Kiki u mba u nlédés likoda, hala nyen w’a ba maséé.

23. Kii di nlama boñ, kii di ga tehe i yigil i noñ?

²³ Hiki wada wés a yé nseñ i mis ma Yéhôva. A nsômbôl le di ba ikété lihaa jé. Ibale di nyéñ manjel i lédés lôk kéé yés i bôda ni i bôlôm, ndi di boñ kii yosôna di nla inyu lédés bo, hala a nla boñ le di hoñol bañ le di ta bé nseñ i likoda! Ndi lelaa di ntehe bôt bape i likoda? Lelaa di nla unda bo gwéha? Di ga pôdôl i jam li i yigil i noñ.