1. Kii ngandak lôk kéé i mboñ inyu kéñbaha nson wap?

 DI GWÉ ngandak mam i boñ mu kiki lisuk li hiai hini li yé bebee. (Matéô 24:14; Lukas 10:2; 1 Pétrô 5:2) Bésbobasôna di gwé ngôñ i gwélél Yéhôva i nya yôni. Ngandak lôk kéé i ntehe nseñ i kéñbaha nson wap likalô. Ipe i gwé ngôñ i sal kiki basañal. Ipe ki i gwé ngôñ i sal i Bétel tole maoñ ma ntôñ. Ngandak lôk kéé i bôlôm i nsal ni ngui inyu yila bahôla nson tole mimañ. (1 Timôtéô 3:1, 8) Kinje maséé Yéhôva a nôgda i ngéda a ntehe i mam bagwélél bé ba yé bebee i boñ i nson wé.​—Tjémbi 110:3; Yésaya 6:8.

2. Kii di nla nôgda i ngéda di ntehe le di nla ha bé gwel ngim minson di bi téé le di nyônôs?

² Hala a nla tômbôs bés ibale ngandak nwii i ntagbe kayéle di nla ha bé boñ i mam di bi téé le di nyônôs. I nla ba le nwii nwés tole mam mape ma nti ha bé bés pôla i gwel minson mi. (Bingéngén 13:12) I jam li jon li bi pémél Mélissa. * A bé sômbôl sal i Bétel tole i ke i suklu baañal ñañ nlam u Ane. A nkal le: “Me ntagbe nwii inyu gwel minson mi. Nano minson mi, me ñemel ndik nwo ñemlak. Ngim mangéda hala a yé a tômbôs me ngandak.”

3. Mambe mam bilôk bikéé bihogi bi nlama boñ inyu kôs minson mi tôbôtôbô?

³ Bilôk bikéé bihogi bi yé njohok bi bak mbôô kiki mañ hiônde, ndi ba nlama hôlôl, ba sal ngim bilem bilam inyu kôs minson mi tôbôtôbô mimpe. I nla ba le  ba nyi jam ngandak, ba gwéhék bôlô, ndi ba nlama nigil i hônba bôt bape ni ti bo lipém. Mu kii u mba u nsal ni ngui inyu bana bilem bi mbéda, ba nla ti we nson u tôbôtôbô umpe. I jam li jon li bi pémél mankéé Nick. A nkal le: “Ngéda me bééna 20 ma nwii, hala a bi tééñga me ngandak i yi le ba ntéé bé me nhôla nson. Me bé hoñol le ngim jam i nke bé i meeni.” Ndi mankéé Nick a bi tomb bé. A bi yoñ makidik i gwel minson a bééna ha ngéda i likoda ni i téé likalô i nya i yôni. I len ini, a yé wada ikété baéga hikuu hi loñ.

4. Kii di ga tehe munu yigil ini?

⁴ Baa u nimis makénd inyule u yé ngi yônôs ngim jam u bi téé le u ga boñ i pes mbuu? Ibale hala, yible Yéhôva ñem ikété masoohe. (Tjémbi 37:5-7) Mbus, u nla bat minhôôlak mi bilôk bikéé le mi kal we i yom u nla ki sal inyu hol, u bii ki maéba map bisélél. Ibale u mboñ biliya bi, bebek w’a pam i yônôs i njômbi i. Tole kiki sita Mélissa nu di mbôk sima, i nla ba le u nla bé kôs nson u nano. Kii u nla boñ inyu ke ni bisu i ba maséé? Inyu hôla bés i timbhe i mbadga i, di ga tehe mam maa munu yigil ini (1) kii i nla ti we maséé, (2) kii u nla boñ inyu kéñbaha maséé moñ, ni (3) mambe mam u nla téé le u ga yônôs ma ma nla kéñbaha maséé moñ.

5. Inyu ba maséé, hee di nlama bok mahoñol més? (Ñañal 6:9, MN.)

⁵ Kaat Ñañal 6:9 MN, i ñunda bés i jam di nla boñ inyu ba maséé. (Añ.) I mut a mbok mahoñol mé i “mam mis mé ma ntehe” a nkon maséé ni libak jé nano. Maselna ni nye, mut a nkahal “yéñ mam a nla bé bana,” a ga ba bé maséé kekikel. Kii hala a niiga bés? Inyu ba maséé, di nlama bok mahoñol més i mam di gwé, he bé i mam di nsômbôl bana.

6. Himbe hihéga di ga tehe nano, kii di nigil mu?

⁶ Baa mut a nla toi kon maséé ni i mam a gwé? Inyu ngandak bôt, hala a nla bé bôña, inyule di ngwés di nigil mam ma mondo hiki ngéda. Ndi maliga ma yé le, eem bé i. Di nla toi kon maséé ni mam ‘mis més ma ntehe.’ Lelaa? Inyu yi lelaa hala a nla bôña, di wan hihéga hi talént Yésu a bi ti i kaat Matéô 25:14-30. Mu kii di ga nigil hihéga hi, di ga tehe lelaa hi nla hôla bés i ba maséé ni bisai di gwé nano, ni lelaa di nla kéñbaha maséé ma.

7. I sem kwep, añle bés i yom Yésu a bi kal mu hihéga hi talént.

⁷ Mu hihéga hi, Yésu a nkal le mut wada a bé sômbôl ke liké. Ndi ilole a nke, a bi sébél minkol nwé, a ti hiki wada mu talént inyu boñ nyuñga. * Kiki a bé yi le minkol nwé mi gwé bé nlélém ngap, a bi ti nkol bisu talént itan, a ti u nyônôs iba talént iba, a ti u nyônôs aa talént yada. Minkol ima mi bisu mi bi sal ni ngui inyu bulus talént i nwet wap. Ndi nkol u nyônôs aa, u bi boñ bé yom yo ki yo, u bi tjél sal inyu bulus yo, jon nwet wé a héya nye i bôlô.

8. Inyuki nkol u bisu u bé le u ba maséé?

⁸ Nkol u bisu u bé maséé ngandak inyule nwet wé a nti nye letee ni talént  itan. A bi ti nye ngandak moni, hala a bé unda i bôdôl a bé a gwééne nye! Ndi kii nkol u nyônôs iba u bé le u hoñol? A bé le a kal le: Inyuki ba nti ndik me talént iba, ki le ba nti nu bisu letee ni itan? Ndi kii a bi boñ?

9. Mu hihéga Yésu a bi ti, kii nkol u nyônôs iba u bi boñ bé? (Matéô 25:22, 23)

⁹ Añ Matéô 25:22, 23. Yésu a bi unda le nkol u nyônôs iba u bi unup bé, u bi tééda bé to nkol u bisu pii ñem inyule ba nti nye letee ni talént itan. Mu hihéga hi, ba nkal bé to le nkol u u bi lôôha tjelel, u kalak le: ‘Inyuki ba nti ndigi me talént iba? Ki le yak me me nsal ni ngui kiki nye? Ibale nwet wem a mbôdôl bé me ñem, nseñ me jô nkus wé, me ke i boñ mam mem, ilole me tégbaha ngéda i sal inyu yé.’

10. Kii nkol u nyônôs iba u bi boñ ni talént yé iba?

¹⁰ Kiki nkol u bisu, u nyônôs iba u bi sal ni ngui inyu bulus nkus u nwet wé, kayéle ngéda malét wé a bi témb, a koba le u héya iba a bi kôs, a mbulus ki iba ipe. Malét wé a bi kônôl nye maséé, a kônde ki nye minson mimpe!

11. Lelaa u nla kéñbaha maséé moñ?

¹¹ Nlélém kiki nkol u, di nla kéñbaha maséé més ibale di mboñ kii yosôna di nla inyu yônôs nson di gwé nano. “Gwélél ngéda yoñ yosôna” i nson likalô, u sal ki ni ngui minson mi likoda. (Minson mi baôma 18:5; Lôk Héber 10:24, 25) Kee makoda momasôna, u  kôôba ki i ti mandimbhe malam. Tibil kôôba hiki nkwel ba nti we likoda li ñem sonde. Ibale ba mbat we le u gwel ngim nson ikété likoda, u tjélék bañ, gwel ki wo loñge. U yan bañ nson wo ki wo ba nti we. Sal ni ngui inyu lémés likeñge joñ li bôlô. (Bingéngén 22:29) Kiki w’a ke ni bisu i sal ni ngui inyu gwel minson nwoñ, hala nyen maada moñ ni Yéhôva m’a kônde let, maséé moñ ki m’a keñep. (Galatia 6:4) Ni i njel i, hala a ga ba we jam li ntomb i kon maséé ni lôk kéé ipe i i nkôs nson u gwé ngôñ i gwel.​—Rôma 12:15; Galatia 5:26.

12. Kii i bi hôla Mélissa ni Nick i kéñbaha maséé map?

¹² Baa ni ngi hoñlak Mélissa nu di mpôdôl liben li nyônôs 2, nu a bééna ngôñ i ke sal i Bétel tole i ke i Suklu baañal ñañ nlam u Ane? Tolakii a bé la bé yônôs ngôñ yé, a nkal le: “Me bé gwel nson wem nsañal i nya i yôni, me gwéélak manjel momasôna ntôñ u niiga bés. Hala a bi ti me maséé ngandak.” Ndi kii mankéé Nick a bi boñ ngéda a bé sômbôl yila nhôla nson, ndi a kôs bé nson u? A nkal le: “Me bi gwélél i pôla me bééna inyu yoñ ngaba i nson likalô i nya i yôni, ni i ti mandimbhe malam i makoda. Me bi yônôs yak lipep inyu jôp i Bétel, kayéle i nwii u bé noñ ha, ba sébél me.”

13. Mam ma ga sôk lelaa ibale u pégi mu minson u gwé? (Ñañal 2:24)

¹³ Ibale u mpagap mu minson u gwé, baa u yé le u kôs minson mimpe i mbus ngéda? I jam li jon li bi pémél Nick. Yak bés hala a nla pémél bés. Ndi kiki Mélissa, to ibale hala a mbôña bé, di ga tééda maséé més, di ga ba ki maséé i yi le di mboñ sômbôl i Yéhôva. (Añ Ñañal 2:24.) Ibabé nkaa, w’a ba ki maséé i yi le, biliya gwoñ bi nlémél Nwet wés Yésu Kristô.

14. Kii di nlama bé hôya mu kii di ntéé mam di ga yônôs i nson u Yéhôva?

¹⁴ Ibale di mboñ kii yosôna di nla inyu yônôs minson di gwé nano, baa hala a nkobla le di nlama ha bé boñ biliya i kéñbaha nson wés? Heni! Di nlama ke ni bisu i téé mam di ga yônôs ma ma nla hôla bés i hol i pes mbuu. Di nla pam i yônôs i njômbi i ibale mahoñol més momasôna ma yé le di hôla lôk kéé yés i bôda ni i bôlôm ilole di tôñ bésbomede.​—Bingéngén 11:2; Minson mi baôma 20:35.

15. Sima ngim mam u nla boñ i i nla kéñbaha maséé moñ.

¹⁵ Mambe mam u nla téé le u ga boñ? Bat Yéhôva le a hôla we i téé ngim mam u nla toi yônôs. (Bingéngén 16:3; Yakôbô 1:5) Kiki di ntehe  liben li bisu li yigil ini, bebek u nla yoñ bitelbene i yila nsañal nu pes ngéda tole nsañal nu ngéda yosôna, i sal i Bétel tole i nson maoñ. Tole bebek u nla nigil hilémb hi mondo inyu tjam ñañ nlam tole inyu ke i sal libôga lipe. U nla kôs biniigana bi bi nla hôla we i yoñ makidik ma, i kaat ni hop Pulasi le Organisés pour faire la volonté de Jéhovah, i pes 10, u kwel ki ni mimañ mi likoda joñ. * Mu kiki u ga sal  ni ngui inyu yônôs i njômbi i, bôt bobasôna ba ga tehe mahol moñ, w’a ba ki maséé iloo hihéga.

16. Kii u nla boñ ibale u nôgda le u nla bé bana ngim nson u tôbôtôbô u gwéhék?

¹⁶ Ndi kii u nla boñ ibale u nôgda le u nla bé bana ngim nson u tôbôtôbô di nsima munu yigil ini? Ha ngéda i, yéñ jam lipe li li nla tômbôô we i yônôs. Di yoñ ndék dihéga di mam di nla boñ.

17. Inoñnaga ni kaat 1 Timôtéô 4:13, 15, kii mankéé nu munlôm a nla boñ inyu yila loñge nniiga?

¹⁷ Añ 1 Timôtéô 4:13, 15. Ibale u yé nsôblege mankéé nu munlôm, u nla sal ni ngui inyu yila bañga nti nkwel ni loñge nniiga. Inyuki? Inyule ibale u mboñ biliya i yi soñgol, i ba bañga nti nkwel, ni i yi niiga, u ga pam i hôla i bet ba ñemble we. Boñ biliya le u nigil hiki yigil munu man kaat nunu le Kônde boñ biliya i lisoñgol ni i niiga, u ha ki yo bisélél. Nigil yigil yada mbus yada, u bii i mam u nigil bisélél i mbai yoñ, u mboñ ki nlélém i ngéda u nti minkwel. U nla yak kwel ni mañ u yé nti maéba inyu boñ le a hôla we, tole u nla tehe mimañ mi mi “ntumbba ni nson i añal ni i niiga.” * (1 Timôtéô 5:17) Ngéda u niiga, njômbi yoñ i nlama ndik bé ba le u bii bibôñôl i yom u nigil munu man kaat nunu le Niiga, ndi u nlama ki lédés hémle i bet ba ñemble we, u hôla ki bo i bii yom ba nigil bisélél. Ibale u mboñ hala, w’a kéñbaha maséé moñ, u hôla ki i bet ba ñemble we i ba maséé.

18. Kii i nla hôla bés i lémés nson wés likalô?

¹⁸ Bésbobasôna di nlama téé likalô, di  yilha ki bôt banigil. (Matéô 28:19, 20; Rôma 10:14) Baa u gwé ngôñ i kônde lémés makeñge moñ mu nson u? Ibale hala, u nlama téé ngim mam u ga boñ mu kii u nigil i man kaat nunu le Niiga, u bii ki mam u nigil mu bibôñôl. U nla ki léba maéba mape mu minkwel ni bividéô bi mpam hiki sonde i man kaat nunu le Niñ yés ni nson wés bikristen​—Kaat likoda li ñem sonde. Gwélél maéba momasôna u nkôs inyu boñ le u tehe ma ma nhôla bôt ba libôga joñ i neebe ñañ nlam. Ibale u noñ maéba ma momasôna, u ga yila loñge ntéé likalô ni loñge nniiga, hala a ga kéñbaha ki maséé moñ mu nson u.​—2 Timôtéô 4:5.

19. Lelaa u nla hôlôs bilem bi mbuu?

¹⁹ Ikété mam momasôna u ntéé le u ga yônôs dilo di nlo, yéñ bilem bi mbuu u gwé ngôñ i hôlôs. (Galatia 5:22, 23; Kôlôsé 3:12; 2 Pétrô 1:5-8) Lelaa w’a pam i boñ hala? Di yoñ hihéga le, u gwé ngôñ i bana hémle i ngui, u nla yéñ gwigil mu bikaat bi ntôñ bi bi nhôla we i lédés hémle yoñ. U nla ki ôt nseñ ni bividéô bi JW Nkuu Biliñgeliñge bi bi ñunda bilôk bikéé bi bôda ni bi bôlôm bi bi bi unda hémle i ngui mu kii ba bé boma manoodana. Mbus, u noode tehe lelaa u nla kôna hémle yap.

20. To ibale hala a ntééñga we le u yé ngi kôs ngim nson, lelaa u nla kéñbaha maséé moñ?

²⁰ Ibabé nkaa, bésbobasôna di gwé ngôñ i kéñbaha nson wés. I mbok yondo, di ga pam i gwélél Yéhôva i nya i yôni. Ilole di mpam ha ngéda i, ibôdôl nano di boñ kii yosôna di nla mu minson di gwé, ni i njel i, di ga kéñbaha maséé més, hala a ga boñ ki le di lôôha bañ tôñ inyu mam di nla bé boñ nano. Iloo ki hala Yéhôva, “Nyambe nu maséé,” a’ kôhna lipém ni bibégés. (1 Timôtéô 1:11) Jon, di kon maséé ni minson di gwé nano!