1. Kii ba bi niiga we inyu Nhek?

IBALE u bi nañ lihaa li Mbôgi Yéhôva, wee ba bi niiga we ngandak mam inyu Yéhôva i ngéda u bé u ngi yii mañge. Ba bi niiga we le a yé Nhek, le a gwé bilem bilam kiyaga, ni le sômbôl yé i yé le bôt ba binam ba niñ hana ’isi ngéda hi ga yila paradis.​—Bibôdle 1:1; Minson mi baôma 17:24-27.

2. Lelaa ngim bôt i ntehe i bet ba nhémle le Nhek a yé?

² Ngandak i nhémle bé le Djob a yé, ni le nyen a bi hek mam momasôna. Maselna ni hala, ba nhoñol le i gwom bi niñ bi bi nyek ndigi hala, ndi bi kahal hol, hol ni hol. Ikété bôt ba nhoñol hala, bahogi ba bi boñ bisuklu bikeñi. Ba nkal le njoñ yi i ñunda le Bibel i nlembe ni le i bet ba nkal le Djob a yé, ba yé bôt ba bi boñ bé suklu, tole bidum bi bôt.

3. Inyuki di nlama lédés hémle yés?

³ Baa i mam bañga bôt ba nkoñ ’isi unu ba nkal inyu Nhek wés Yéhôva, i yé i tinde bés i pééna le Nhek a yé? Ndimbhe i nla ba le ñ, ibale di nyi bé inyuki di nhémle le Yéhôva a yé Nhek, tole heni, ibale bésbomede di bi yoñ ngéda i wan biniigana bi bi nkwés bés nkaa le a yé toi Nhek. (1 Korintô 3:12-15) To ibale nano a yé ntandaa ngéda le di yé Mbôgi Yéhôva, tole di ntip jôp maliga, bésbobasôna di gwé ngôñ i ke ni bisu i lédés hémle yés. Mu kii di mboñ hala, “pék i bôt lôñni biyôglô bi malôga” bôt ba niiga bi ga yumus bé bés. (Kôlôsé 2:8; Lôk Héber 11:6) I yigil ini i ga hôla bés i yi (1) inyuki ngandak bôt i nhémle bé le Nhek a yé, (2) lelaa di nla lédés hémle di gwé le Yéhôva a yé Nhek, ni (3) lelaa di nla ke ni bisu i lédés i hémle i.

4. Inoñnaga ni kaat i Lôk Héber 11:1, kii i yé hikuu hi bañga hémle?

⁴ Ngim bôt i nhoñol le i hémle ngim jam i nkobla le, di neebe ndik jo hala ibabé wan. Ndi inoñnaga ni i yom di nigil ikété Bibel, bañga hémle bé i. (Añ Lôk Héber 11:1, ni buk isi lipep.) Bibel i ñunda le hémle i umne i mam ma nkwés bés nkaa. Jon to ibale di ntehe bé Yéhôva, Yésu to Ane, ngandak mam i nkwés bés nkaa le ba yé. (Lôk Héber 11:3) Mut njoñ yi wada nu a bi yila Mbôgi Yéhôva a nkal le: “Bés Mbôgi Yéhôva di nhémle ndik bé inyu hémle, ndi ngim mam i yak bôt ba njoñ yi ba nkal i nkwés bés nkaa ni mam di nhémle.”

5. Inyuki ngandak bôt i nhoñol le Nhek a ta bé?

⁵ Di nla badba le, ‘Ibale ngandak mam i nkwés bés nkaa le Nhek a yé, inyuki ngandak bôt i nhoñol le Nyambe a bi hek bé yom to yada?’ Inyule ngandak bôt ikété yap i mah ngi yoñ ngéda i wan i mam ma. I jam li jon li bi pémél Robert nu a yé Mbôgi Yéhôva i len ini, a nkal le: “Kiki ba bi niiga bé bés i suklu le mam ma bi héga, me bé hoñol le mbale bé i. I ngéda me bi bolna 22 nwii, me bi kwel ni Mbôgi Yéhôva i i bi kwés me nkaa ni Bibel le Nyambe a bi hek mam momasôna.” *​—Béñge minkéñék mi matila le “ Nwin inyu bagwal.”

6. Inyuki ngim bôt i ntjél hémle le Nhek a yé?

⁶ Bôt bahogi ba nhémle bé le Nhek a yé inyule ba nkal le, ba nhémle ndik i yom ba ntehe. Ndi ki le ba nhémle ngui i i mboñ le bihégél bi yé ngii bi nkwo bé, i ba  nsébél ni Pulasi le gravitation. I hémle Bibel i mpôdôl i umne i “mam ma yé toi, to ibale ma nene bé i mis.” (Lôk Héber 11:1) I mbéda ngéda ni ngui inyu nigil i mam ma nla kwés bés nkaa, ngandak bôt i ta bé bebee i boñ i nya biliya i. I mut a nigil bé i mam ma a nla hoñol le, Nyambe a ta bé.

7. Baa bôt bobasôna ba ba bi ke bisuklu bikeñi bon ba ntjél neebe le Nyambe a bi hek mam momasôna? Toñol.

⁷ I ngéda ngim bôt i njoñ yi i bi nigil mam ma bi kwés bo nkaa, ba bi sôk neebe le Nyambe nyen a bi hek mam momasôna. * Bôt bape kiki bo Robert, ba bé neebe bé le Nhek a yé, inyule ba bi  nigil bé hala mu bisuklu gwap bikeñi. Ndi ngandak bôt i njoñ yi i bi pam i yi ni i gwés Yéhôva. Kiki i bôt ba njoñ yi bana, bésbobasôna di nlama boñ biliya i lédés hémle yés to di bi boñ imbe suklu. Mut numpe nye ki nye a nla bé boñ hala inyu yés.

8-9. (a) Imbe mbadga di ga timbhe nano? (b) Lelaa i nigil bihégél i nla bane we nseñ?

⁸ Lelaa u nla lédés hémle yoñ le Nhek a yé? Di tehe manjel di nla gwélél.

⁹ Nigil i mam Djob a bi hek. U nla lédés hémle yoñ le Nhek a yé i ngéda u nyoñ ngéda i memle binuga, bibebela, ni tjôdôt. (Tjémbi 19:2; Yésaya 40:26) Mu kii w’a ke ni bisu i nigil i mam Djob a bi hek, hala nyen w’a ba nkwoog nkaa le Yéhôva a yé Nhek. Bikaat gwés bi yé nyonok ni biniigana bi bi mpôdôl bihégél. U waa bañ nigil gwo to ibale hala a nlédél we i nok i mam u nigil. Nigil gwo letee. U héya bikaat bi, u hôya bañ béñge bividéô bilam bi bi mpôdôl i mam Djob a bi hek, bividéô bi bi ntagbe makoda ma ndôn nwii mini.

10. Ti hihéga hi hégél yada i i ñunda le Nhek a yé toi. (Rôma 1:20)

¹⁰ I ngéda u nigil i mam Nyambe a bi hek, yoñ ngéda i yimbe kii hala a niiga we inyu Nhek wés. (Añ Rôma 1:20.) Kiki hihéga, mapubi ma hiañgaa ni lék gwon bi mboñ le di niñ hana ’isi, ndi ibale mapubi momasôna ma hiañgaa ma ntihba bés, ma nla tééñga bés. Jon di gwé ngôñ ni ngim yom i i nsuhus ngui yé inyu boñ le ma tééñga bañ bés. Ndi kii i? Nyambe a bi hek ngim mbebi i tôbôtôbô i i nhô bés kiki ngañgô, ba nsébél yo ni Pulasi le couche d’ozone, yon i nseghe mapubi ma hiañgaa, hala wee i ngwel mapubi ma hiañgaa ma ma nla tééñga bés. I ngéda mapubi ma hiañgaa mana le rayons ultraviolets ma mbôl, yak i mbebi i tôbôtôbô ini le couche d’ozone i mbôl inyu gwel mo. Baa hala a ñunda bé le ngim mut i i nyi jam ngandak, i ngwéhék bés, yon i bi hek i gwom bi?

11. Hee u nla léba biniigana bi bi nla lédés hémle yoñ le Nhek a yé? (Béñge minkéñék mi matila le “ Biniigana bi bi nkwés we nkaa le Nhek a yé.”)

¹¹ U nla léba ngandak biniigana bi mpôdôl i mam Nyambe a bi hek i Index des publications des Témoins de Jéhovah, tole i jw.org. U nla yak béñge bividéô ni minkwel i jw.org isi homa le “Hasard ou conception.” Minkwel mi yé mu mi nlôôha kidik, mi mpôdôl mam ma hélha ma mbéñge binuga ni bibebela. Mi ñunda yak lelaa bôt ba njoñ yi ba bi nigil bihégél bihélha bi inyu bañ ngim gwom.

12. I ngéda di nigil Bibel, mambe mam di nlama yimbe?

¹² Nigil Bibel. I mut njoñ yi di mpôdôl liben 4, a bé hémle bé le Nhek a yé. Ndi i mbus ngéda, a bi sôk hémle hala. A nkal le: “Hémle yem i bé lôl ndik bé i mam ma njoñ yi me bi nigil, ndi inyule me bi yoñ ngéda i nigil Bibel.” Bebek u gwé bañga yi i Bibel ibôdôl behee, ndi to hala, u nla lédés hémle yoñ le Nhek a yé ibale u nyoñ ngéda i nigil Bañga i Djob. (Yôsua 1:8; Tjémbi 119:97) I ngéda u nigil, yimbe lelaa Bibel i mpôdôl miñañ mi kôba letee ni disii di mam. Hoñol i mam momasôna Bibel i bi legel bisu bi ngéda, ma yon ki, u bigda ki le tolakii batila Bibel ba bé ngandak, kaat to yada i nkolba bé bini bipe. Ibale u nigil Bibel hala, w’a  kônde ba nkwoog nkaa le Nhek a yé, le a ngwés bés, ni le nyen a bi ti bôt ba binam mbuu mpubi inyu tila Bibel. *​—2 Timôtéô 3:14; 2 Pétrô 1:21.

13. Ti hihéga hiada hi hi ñunda pék i maéba ma ma nlôl i Bibel?

¹³ I ngéda u nigil Bañga i Djob, noode tehe lelaa maéba mé ma nla hôla we. Kiki hihéga, Bibel i bi béhe bés ibôdôl behee le i gwés moni i nlona “ngandak njôghe” ni manoodana. (1 Timôtéô 6:9, 10; Bingéngén 28:20; Matéô 6:24) Baa hala a ngi yii maliga i len ini? I kaat i Ngisi ini le The Narcissism Epidemic i nkal le: “I bôt ba ngwés nkus, ba ta bé maséé, ba yé ki nyonok ni nduña, yak i bet ba nsômbôl yila ngwañ, ba ta bé maséé, ba nla yak makon.” Jon maéba ma Bibel mana le, di gwés bañ moni, ma yé malam kiyaga! Baa u nyi matiñ ma Bibel mape ma ma bi hôla we? I ngéda di nke ni bisu i gwés maéba ma Bibel, hala nyen di ga waa bé bôdôl pék i Nhek wés nu gwéha ñem. (Yakôbô 1:5) Ni i njel i, di ga bana niñ ilam kiyaga.​—Yésaya 48:17, 18.

14. Kii yigil i Bibel i ga niiga we inyu Yéhôva?

¹⁴ I ngéda u nigil Bibel, njômbi yoñ i nlama ba le u tibil yi njee a yé Yéhôva. (Yôhanes 17:3) I yigil i, i ga hôla we i yimbe bilem bi Nyambe, minlélém mi bilem u ntehe i ngéda u memle bihégél. Hala a ga kwés we nkaa le ngim mut i yé toi i i bi hek i gwom bi gwobisôna, bi bi nyek bé hala gwotama. (Manyodi 34:6, 7; Tjémbi 145:8, 9) Mu kii w’a ke ni bisu i yi Yéhôva loñge loñge, gwéha yoñ ipañ yé y’a kônde keñep, ni ga yila ki bañga mawanda.

15. Umbe nseñ u ñôt i ngéda u ñañle bôt bape i mam u nigil?

¹⁵ Añle bôt bape i mam u nigil inyu Djob. Hala a ga lédés hémle yoñ. Kii u nla boñ ibale u nyi bé lelaa u timbhe mut u ntééne likalô, ibale a nkal we le a ta bé nkwoog nkaa le Nyambe a yé? Yéñ kaat ntôñ yada i i mpôdôl i jam li, ni kwélél mu. (1 Pétrô 3:15) U nla bat nhôôlak mankéé le u hôla we i timbhe i mbadga i. Too i mut nu a neebe ndimbhe i Bibel, too a neebe bé, we w’a ôt nseñ ngandak ni nyiña u mboñ. Ñ, hémle yoñ y’a kônde let. Hala a ga boñ ki le biniigana bi bitembee bi bôt ba nkadba le ba mboñ bisuklu bikeñi bi nyumus bé we.

16. Kii i nla bôña ibale di nke bé ni bisu i lédés hémle yés?

¹⁶ Too nano a yé ngandak nwii le di ngwélél Yéhôva, tole di ntip bôdôl, bésbobasôna di nlama ke ni bisu i lédés hémle yés. Inyuki? Inyule ibale di nyoñ bé yihe, hémle yés i nla tomb. U hôya bañ le hémle i yé i ba nkwoog nkaa ni mam ma nene bé i mis. Ndi hala a ntomb i hôya ngim jam di ntehe bé. Jon Paul a bi sébél ngitophémle le ‘béba i i mpala kwés bés i hiandi.’ (Lôk Héber 12:1) Lelaa di nla keñgle i hiandi hi?​—2 Tésalônika 1:3.

17. Mambe mahôla di gwé ngôñ inyu ke ni bisu i lédés hémle yés?

¹⁷ Pog, bana lem i bat Yéhôva mbuu wé mpubi ni njel masoohe. Inyuki? Inyule hémle i yé lem yada i litam li mbuu. (Galatia 5:22, 23) Di nla bé pam i lédés hémle yés le Nhek a yé, to ke ni bisu i  lédés yo ibale mbuu mpubi u nhôla bé bés. Ibale di nyemhe Yéhôva le a ti bés mbuu wé, a ga ti bés wo. (Lukas 11:13) Ñ, di nla yak soohe le: “Kônde bés hémle.”​—Lukas 17:5.

18. Inoñnaga ni Tjémbi 1:2, 3, umbe nsima di gwé?

¹⁸ U héya masoohe, bana lem i nigil Bañga i Djob. (Añ Tjémbi 1:2, 3.) I ngéda ba bi tila i hiémbi hini, ndék bon i Lôk Israel ndigi yon i bééna mbén Nyambe. Kiñe ni biprisi ba bé le ba bana yo, ndi bana bôt bape hala wee “bôlôm ni bôda ni bon batitigi, yak ni yoyo” (bakén ba bôt) ba bé ndik le ba emble lisoñgol jé i mamélél ma hiki nwii minsaambok. (Ndiimba Mbén 31:10-12) Dilo di Yésu, ndik ndék bôt yon i bééna Bitilna, mut a bé ndik le a soñgol gwo mandap ma mitin, inyule nyoo nyen ba bé tééda minhôôk mi bikaat. Maselna ni hala, i len ini, libim li bôt tole bebee le bôt bobasôna ba nla bana Bibel, ba añ ki yo. Kinje nsima! Lelaa di nla unda le di ndiihe nsima u?

19. Kii di nlama boñ inyu ke ni bisu i lédés hémle yés?

¹⁹ Di ñunda le di yé maséé i bana Bañga i Djob i ngéda di ñañ yo hiki ngéda. Jon di nlama bana ntjega inyu soñgol Bibel ni nigil yo, i nene bañ wee di ñañ ndigi yo i ngeñ di gwé ngéda. Ibale di nigil yo hiki ngéda, d’a ke ni bisu i lédés hémle yés.

20. Kii di nlama boñ?

²⁰ Maselna ni “bôt ba pék ni bayikaat” ba nkoñ ’isi unu, hémle yés i umne i mam di nigil i Bibel. (Matéô 11:25, 26) Kiki di nigil yo, di nyi inyuki hisi hi nke ndigi ni bisu i ôbi, ni i yom Yéhôva a ga boñ inyu tibil hio. Jon di boñ kii yosôna di nla inyu lédés hémle yés, ni hôla ngandak bôt i hémle le Nhek a yé. (1 Timôtéô 2:3, 4) Di nyamnda ni ngôñ i niñ i ngéda i bôt bobasôna ba ga niñ hana ’isi ba ga bégés Yéhôva ni bini bibuk di nléba i kaat Masoola 4:11, bi bi nkal le: “A Yéhôva Nyambe wés, wen u kôli kôhna lipém . . . inyule u bi hek mam mamasôna.”