1. Kii ngandak boñge ba wanda i ma boñ?

 HIKI nwii, ngandak boñge ba wanda i nsôblana. Baa yak we u yé mu lôñ i? Ibale u yé mu, yi le lôk kéé yoñ i nkônôl we maséé, yak Yéhôva! (Bingéngén 27:11) Hoñol ki mam momasôna u ma boñ. Bebek le u bi nigil Bibel nwii ndi nwii. U bi nok mu yigil yoñ le Bibel i yé Bañga i Djob. U bi yi Yéhôva, u gwés nye. Gwéha yoñ inyu Yéhôva i bi tinde we i ti nye niñ yoñ ni i sôblana. Kinje loñge jam!

2. Kii d’a tehe munu yigil ini?

 ² Ibabé pééna, ilole u nkôs sôble, u bi kôs ngandak manoodana. Ndi mu kiki u yé hol, w’a boma manoodana mape. Satan a noode tômbôs hémle yoñ inyu boñ le u waa gwélél Yéhôva. (Éfésô 4:14) U néhne bañ nye njel. Kii i nla hôla we i téñbe ni Yéhôva kiki u bi bôn nye ngéda u bé sôblana? Kee ni bisu i hol, u “boñ biliya” i yila nhôôlak kristen. (Lôk Héber 6:1) Kii i nla hôla we?

3. I mbus sôble, kii bikristen gwobisôna bi nlama boñ?

³ I mbus sôble, bésbobasôna di nlama noñ maéba Paul a bi ti lôk kéé i Éfésô. A bi kal bo le ba yila ‘minhôôlak’ mi bikristen. (Éfésô 4:13) Hala wee  ba ‘kee ni bisu i hol.’ Di ntibil nok i yom Paul a yé kal hana i ngeñ a nhégha mahol ma kristen ni mahol ma man. Ngéda man a ngwéé, bagwal ba yé maséé ngandak. Ndi a nkida bé mañge. Kiki ngéda i ntagbe, a ga ‘boñ ha bé mam kiki mañge.’ (1 Korintô 13:11) Hala nyen yak bés bikristen di yé. Ngéda di nsôblana, i mbéda le di kee ni bisu i hol. Di béñge ngim maéba i i nla hôla bés.

4. Imbe lem ilam i nla hôla bés i hol? Toñol. (Filipi 1:9)

⁴ Kônde gwés Yéhôva. U ngwés Yéhôva ngandak. Ndi u yé le u kônde gwés nye. Lelaa? Ñôma Paul a ñéba bés jam di nla boñ i kaat Filipi 1:9. (Añ.) A bi soohe le gwéha i lôk kéé i likoda li Filipi i “kônde keñep, keñep ni keñep.” Hala a ñéba le di la kônde gwés Yéhôva. Inyu pam i boñ hala, di nlama bana “bañga yi ni nogna i yôni.” Kiki di nyi Yéhôva, hala nyen di nkônde gwés nye. Hala a ntinde bés i kônde lémél nye, ni i keñgle mam ma nla unbaha nye. Di njo sañ inyu yi sômbôl yé, ni i boñ yo.

5-6. Kii i nla hôla bés i kônde gwés Yéhôva? Toñol.

⁵ Yésu a mpôna Isañ ngandak. Jon ibale di nyi nye, d’a kônde gwés Yéhôva. (Lôk Héber 1:3) Inyu yi Yésu, di nlama nigil bikaat bini le Matéô, Markô, Lukas ni Yôhanes. Ibale u ñañ bé Bibel hiki kel, u nla bôdôl ni bikaat bini. Ngéda u mba u ñañ miñañ mi, yimbe bilem bi Yésu. Bôt ba bé maséé i kôôge nye bebee; a bé begee disii di boñge. (Markô 10:13-16) Yak banigil bé ba bé maséé i ba ni nye; ba bé le ba yible nye ñem ibabé i kon woñi. (Matéô 16:22) Yésu a bé nigle ndigi Yéhôva. Yéhôva a ngwés le bôt ba kôôgege nye bebee. Di nla soohe nye. Ngéda di nsoohe, di kal nye mam momasôna ma ntééñga bés. Di nyi le a ga unbene bé bés. A ngwés bés; a tôñôk bés.​—1 Pétrô 5:7.

⁶ Yésu a bé kônôl bôt ngoo. Matéô a nkal le: “I ngéda a bi tehe mamut, a kon mo ngoo, inyule ba bé tét mo, ba bé yôi ki mo, kiki mintômba mi mi gwé bé ntééda bémba.” (Matéô 9:36) Baa yak Yéhôva a yé hala? Yésu a kal le: “Tata wem nu a yé i ngii a ngwés bé le mut to wada ikété bana bôt batitigi a tjiba.” (Matéô 18:14) Kinje bibuk bi nlédhana! Kiki di nyi Yésu, hala nyen di nkônde gwés Yéhôva.

7. Bimbe bisai di nla kôs ibale di nyila mawanda ma minhôôlak mi bikristen?

⁷ Ibale di nyila mawanda ma minhôôlak mi bilôk bikéé ikété likoda, hala a ga boñ le di kônde unda bôt gwéha, di kônde ki hol. Béñge kiki ba yé maséé! Ba ntam bé kiki ba bi yoñ makidik i gwélél Yéhôva. Bat bo le ba añle we mam ba ma boñ i nson Yéhôva. Nwaa le u nyoñ makidik, bat bo maéba. U hôya bañ le: “Ngéda bati maéba ba yé ngandak, mam ma nke loñge.”​—Bingéngén 11:14, MN.

8. Ibale u nkahal bana pééna mu ñem inyu mam u nigil i Bibel, kii u yé le u boñ?

 ⁸ Waa pééna. Kiki di ntehe i  maben ma nyônôs ima, Satan a ta bé maséé i ngéda a ntehe we u nhol. A nla boñ le u kahal pééna ngim mam u nigil mu Bibel. Kiki hihéga, kel yada, ba yé le ba añle we bitembee bini le gwom gwobisôna bi yé munu nkoñ ’isi bi bi héga bé, bi bi lo ndigi hala gwomede. Bebek ngéda u bé hisii mañge u bé ngi nok i nya jam i, ndi kiki u bi kahal nañ, ba bôdôl niiga we i mam ma i suklu. U yé le u tehe wengoñle i yom balét boñ ba nkal, i téé. Ndi bebek, ba mah ngi yéñ yi too Nhek a yé toi. Hoñol bibañga bi yé hana i kaat Bingéngén 18:17: “Nu a mbôk kaa hop a nene sép, ndi nunhogi a nlo bañ, ba nwan nye.” Iloole u nwas le ba lôk we nyoo i suklu, yoñ ngéda i nigil Bibel inyu yi maliga. Yéñ mu bikaat bi ntôñ. Kwel ni lôk kéé i i bé hémle ndugi i mam ma. Bat bo kii i bi kwés bo nkaa le Nhek a yé toi, ni le a ngwés bés. I nya minkwel i, i nla hôla we i yi le Nhek a yé toi.

9. Kii ndémbél i Melissa i niiga bés?

⁹ Sita yada le Melissa, yigil yé i Bibel i bi hôla nye i nok le Nhek a yé toi. * A nkal le: “Ngéda ba niiga i suklu le gwom gwobisôna bi bi lo ndigi hala gwomede, biniigana bi, bi nene wee bi téé. Me bé kon ndugi woñi i nigil i jam li mu bikaat bi ntôñ. Me bé hoñol le ibale me nyéñ yi i jam li, me nla léba le i yom ba niiga bés i suklu yon i yé maliga. Ndi me bi bigda le Yéhôva a nsômbôl bé le di neebe ndigi i yom a nkal bés ibabé i hek pék. Jon me bi jôp i yigil. Me bi nigil i kaat ini le: Y a-t-il un Créateur qui se soucie de vous ? ni i bon ba bikaat bana le: La vie a-t-elle été créée ? ni Cinq questions à se poser sur l’origine de la vie. I yigil i, i bi  hôla me ngandak. Ibale me yi, ki me bi nigil i mam ma behee.”

10-11. Kii i nla hôla we le u kwo bañ i hiandi hi malal ma nyega? (1 Tésalônika 4:3, 4)

¹⁰ Tjél malal ma nyega. Ngéda u nkahal kondop, u nla bana ngôñ malal ngandak, bôt ba nla yak tinde we i kwo i hiandi hi malal ma nyega. Hala nyen Satan a nsômbôl le u boñ. Kii i nla hôla we i keñgle i hiandi hi? (Añ 1 Tésalônika 4:3, 4.) Kal Yéhôva kii yosôna u nôgda. U sôô bañ nye jam jo ki jo, kal nye le a hôla we. (Matéô 6:13) U hôya bañ le Yéhôva a nsômbôl ndik le a hôla we, a’ kéés bé we. (Tjémbi 103:13, 14) Yak yigil Bibel i nla hôla we. Melissa nu di mbôk di pôdôl, a bé hoñol mam mabe. A nkal le: “Kiki me bé añ Bibel hiki kel, hala a bi hôla me le me kwo bañ i manoodana. Yigil yem i bi éba me le me yé ngwélél Yéhôva, ni le me nlama nôgôl nye.”​—Tjémbi 119:9.

¹¹ U hoñol bañ le u nla mélés mandutu moñ wemede. Kal bagwal boñ mam ma ntééñga we. I kwélél i nya mam i i ntomb bé, ndi u nlama boñ hala. Melissa a nkal le: “Me bi bôk me soohe Yéhôva, ndi me kal pua yem i jam li bé tééñga me. Hala a bi lona me hogbe. Me bé yi le Yéhôva a nkônôl me maséé.”

12. Kii i nla hôla we i yoñ makidik malam?

¹² Nwas le matiñ ma Bibel mon ma éga we. Kiki u mba u nañ, bagwal boñ ba mbôdôl nwas we le u yoñ makidik moñ wemede. Ndi u hôya bañ le u gwé bé pék bañga. Kii i nla hôla we i keñgle mam ma ma nla ôbôs maada moñ ni Yéhôva? (Bingéngén 22:3) Sita yada le Kari, a nkal bés i jam li bi hôla nye i yoñ makidik malam. A bi nok le nhôôlak kristen u gwé bé ngôñ le ba ti nye mambén inyu hiki jam. A nkal le: “Me bi yéñ nok matiñ ma Bibel, he ndik mambén bé.” Ngéda u ñañ Bibel, badba le: ‘Mahoñol ma Yéhôva munu i pes kaat ini ma yé le kii? Baa maéba ma yé hana ma nla hôla me i niñ yem? Bimbe bisai me ga kôs ibale me noñ maéba ma?’ (Tjémbi 19:8; Yésaya 48:17, 18) Ibale u ñañ Bibel u yéñék maéba mu, w’a tehe le w’a yoñ makidik malam, u lémél ki Yéhôva. Kiki w’a ke ni bisu i hol, w’a yimbe le u gwé bé ngôñ ni mambén inyu hiki jam, inyule u nyi mahoñol ma Yéhôva.

13. Lelaa bañga mawanda i nla hôla bés? (Bingéngén 13:20)

¹³ Mawanda moñ ma nlama gwés Yéhôva. Kiki di mbôk di tehe, ibale u gwé mawanda malam, hala a ga hôla we i hol. (Añ Bingéngén 13:20.) Sita yada le Sara a bi nimis maséé. Ndi jam jada li bi hôla nye le a témb a kahal gwélél Yéhôva ni maséé. A nkal le: “Me bi bana biloñge bi mawanda, i loñge ngéda. Me ni sita yada di bé nigil Nkum Ntat hiki sonde. Sita ipe i bi hôla me i bôdôl timbhe i makoda. I mawanda mem mana ma bi hôla me i gwés yigil i Bibel ni masoohe.  Yéhôva a bi kônde yila liwanda jem, me témb me kahal kon maséé.”

14. Kii i bi hôla Julien i bana biloñge bi mawanda?

¹⁴ Lelaa u yé le u bana mawanda ma ma nla hôla we i hol? Julien nu a yé mañ a nkal le: “Ngéda me bé mañge, me bi bana biloñge bi mawanda i likalô. I lôk kéé i i bé gwés likalô, hala a boñ le yak me me kahal gwés likalô. Ba ti yak me ngôñ i yila nsañal. Me bi yimbe ki le kiki me bé yéñ ndigi mawanda ma ma yé bisega gwem, jon me bééna bé ngandak mawanda malam. I mbus ngéda, me bi bana mawanda malam mape i Bétel. Ba bi hôla me i pohol mintuk mi mi nlémél Yéhôva. Hala a bi boñ le me kônde yila liwanda li Yéhôva.”

15. Mambe maéba Paul a bi ti Timôtéô inyu jam li mawanda? (2 Timôtéô 2:20-22)

¹⁵ Ibale u nyimbe le ngim mut mu likoda joñ i ta bé loñge liwanda inyu yoñ, kii u nlama boñ? Paul a bé yi le ngim bikristen i ngéda yé i bééna bé bihiumul bilam, jon a bi kal Timôtéô le a keñgle bo. (Añ 2 Timôtéô 2:20-22.) Maada més ni Yéhôva ma yé nseñ ngandak. Di nwas bañ le mut nye ki nye a loo a ôbôs maada ma, inyule di njo sañ i ngui inyu ba mawanda ma Yéhôva.​—Tjémbi 26:4.

16. Mambe makidik di nla yoñ?

¹⁶ Yoñ makidik malam. Yoñ makidik ma ma ga hôla we i lédés hémle yoñ ni i hol. (Éfésô 3:16) Kiki hihéga, u nla kit le u nkônde lémés yigil yoñ wemede, tole u nkônde añ Bibel. (Tjémbi 1:2, 3) U nla ki kit le u nkônde lémés masoohe moñ. Tole u yé ki le u kit le u ntibil pohol mintuk nwoñ ni le u nlôôs ha bé ngandak ngéda mu. (Éfésô 5:15, 16) Yéhôva a’ ba maséé ngéda a’ tehe we u nhol.

17. Ibale di mbéna hôla bôt, bimbe bisai di ga kôs?

 ¹⁷ Ngéda di nhôla bôt, di nkônde hol. Yésu a kal le: “Ti i nlona maséé iloo kôhna.” (Minson mi baôma 20:35) Ibale u nti ngéda yoñ ni ngui yoñ inyu hôla bôt, w’a kôs ngandak bisai. Kiki hihéga, u nla kit le u nhôla mimañ mi bôt ni bibôk bi bôt bi likoda joñ. U yé le u kil bo i bôm, tole u hôla bo i gwélél bikei gwap. Ibale u yé mankéé nu munlôm, yéñ manjel i yila nhôla nson inyu boñ le u laa hôla lôk kéé yoñ. (Filipi 2:4) U nla yak unda bôt bape gwéha ngeñ u ñañle bo ñañ nlam u Ane. (Matéô 9:36, 37) Ibale u nla, yoñ makidik i yila nsañal.

18. Lelaa bôlô i nsañal i nla hôla we i hol?

¹⁸ Bôlô nsañal i nyible we ngandak manjel inyu boñ le u hol. Ngéda u yé nsañal, u nla ke i Suklu baañal ñañ nlam u Ane. U nla sal i Bétel tole i maoñ. Sita yada le Kaitlyn nu a yé nsañal a bak mañge wanda a nkal le: “I mbus sôble yem, kiki me bé lôôs ngandak ngéda likalô ni minhôôlak mi bilôk bikéé, hala a bi hôla me i hol. Ba bi hôla me i tibil nok Bibel, ni i niiga loñge.”

19. Ibale u nke ni bisu i hol, bimbe bisai u ga kôs?

¹⁹ Ibale u nke ni bisu i hol, w’a bana ngandak bisai. W’a lep bé ngéda yoñ i boñ mam ma ma ta bé nseñ. (1 Yôhanes 2:17) W’a yoñ bé makidik ma ma ga lona we bikuu. W’a kôs ngandak bisai ni bañga maséé. (Bingéngén 16:3) Ndémbél yoñ y’a hôla lôk kéé yosôna, boñge ni mimañ mi bôt. (1 Timôtéô 4:12) W’a ba ki maséé inyule u nlémél Yéhôva, u yé ki liwanda jé.​—Bingéngén 23:15, 16.