1. Umbe nseñ di nkôs i ngéda di nkal lôk kéé lelaa di bi yi “maliga”?

 “LELAA u bi yi maliga?” Ibabé pééna u ma timbhe i mbadga i ngandak ngélé. I ngéda di mboma mankéé inyu ngélé bisu, i mbadga i yom a yé a mbéna bat bés. Di ngwés i ngéda lôk kéé yés i bôda ni i bôlôm i nkal bés lelaa ba bi yi maliga, yak bés di yé maséé i kal bo inyuki di ngwés maliga. (Rôma 1:11) I nya minkwel i, i nhôla bés i bigda le maliga ma yé toi nseñ. Hala a ntinde ki bés i “téñbe i kil ikété maliga.” Hala wee i niñ inoñnaga ni sômbôl i Yéhôva.​—3 Yôhanes 4.

2. Kii d’a tehe munu i yigil ini?

² Munu i yigil ini, d’a tehe inyuki di ngwés maliga. D’a tehe ki lelaa di nla kônde unda le di ngwés maliga. Hala a ga hôla bés i ti Yéhôva mayéga hala kiki a bi ôt bés maliga. (Yôhanes 6:44) Di ga bana ki ngôñ i hôla bôt bape i yi maliga.

3. Jam li bisu li li ntinde bés i gwés maliga li yé kii?

³ Ngandak mam i ntinde bés i gwés maliga. Jam li bisu li yé le di ngwés Yéhôva nu a bi ôt bés maliga. Bañga yé i niiga bés le nyen a yé Nhek ngii ni  ’isi, ni le a ngwés bés, a ntôñ ki bés. (1 Pétrô 5:7) I niiga ki bés le a yé Nyambe nu “konangoo, ni nu karis, nu a mpala bé unup, ndi a nyaaba ni loñgeñem ni maliga.” (Manyodi 34:6) Yéhôva a ngwés telepsép. (Yésaya 61:8) I ngéda a ntehe bés di nok ndutu, hala a ntééñga nye. A gwé ngôñ i mélés mandutu més momasôna i loñge ngéda. (Yérémia 29:11) Kinje loñga jam! Inyu hala nyen di ngwés Yéhôva ngandak.

4-5. Inyuki ñôma Paul a bi kal le botñem i yé kiki hikoba?

⁴ Kii ipe i ntinde bés i gwés maliga? Maliga ma yéne bés nseñ ngandak. Di yoñ le hihéga. Maliga ma yé yak botñem di gwé inyu dilo di nlo. Inyu éba le botñem i yé nseñ, ñôma Paul a bi kal le: “Di gwé i botñem ini kiki hikoba hi sitima inyu biniñ gwés, i nla bé set, i umi ki siñ.” (Lôk Héber 6:19) Kiki hikoba hi mboñ le sitima i nyeñg bañ, hala nyen botñem yés i nhôla bés le di piñgla bañ i ngéda di mboma manoodana.

⁵ Minhook nwon Paul a bé pôdôl munu i pes i kaat ini. Ndi bibañga gwé bi mbéñge yak bikristen bi bi gwé botñem i niñ i paradis hana ’isi i boga ni boga. (Yôhanes 3:16) Botñem i niñ boga i lémés toi niñ yés.

6-7. Lelaa maliga ma bi hôla Yvonne?

⁶ Di béñge ndémbél i sita yada le Yvonne. A bi néñél bé lihaa li Mbôgi Yéhôva, jon i ngéda a bé mañge a bé kon nyemb woñi. A bi añ ngim bibañga bi, bi bi kônha nye woñi. Bibañga bi bi bé le: “Kel yada u ga niñ ha bé.” A nkal le: “Me bi ke bé hilo inyu i jam li. Inyule me bé badba le: ‘Inyuki me ga niñ ha bé?’ Me bé kal le niñ ipe i nlama ba. ‘Inyuki me yé munu nkoñ ’isi unu?’ Me bé sômbôl bé wo!”

⁷ I mbus, i ngeñ Yvonne a bi kahal nañ, a bi boma Mbôgi Yéhôva. A nkal le: “Me bi nigil le me nla niñ i Paradis i boga boga hana ’isi.” Lelaa maliga ma bi hôla Yvonne? A nkal le: “Nano me nke hilo loñge, me nkon ha bé nyemb woñi.” Yvonne a ngwés maliga ngandak, a yé ki maséé i hôla bôt bape i yi mo.​—1 Timôtéô 4:16.

8-9. (a) Ikété hihéga hi Yésu, lelaa i mut nu a bi éba le nkus a bi léba u bééne nye nseñ? (b) Lelaa u ntehe maliga?

⁸ Maliga ma yé yak ñañ nlam u Ane i Djob. Yésu a bi kal le maliga ma yé kiki nkus u u sôli. I kaat Matéô 13:44, Yésu a bi kal le: “Ane ngii i yé kiki nkus u bak u sôli i wom, ndi mut a léba wo, a témb a sôô wo; inyu maséé mé, a nke, a nuñul gwom gwobisôna a gwé, a somb i wom u.” Di yimbe le i mut nu a bé yéñ bé nkus, ndi i ngéda a bi léba wo a bi boñ kii yosôna i bé béda inyu bana wo. A bi nuñul gwom gwobisôna a bééna. Inyuki? Inyule a bé yi le nkus u, u yé nseñ ngandak. U bé nseñ iloo mam momasôna a bééna.

⁹ Baa hala nyen yak we u ntehe maliga? Ibabé pééna! Di nyi le to kii di gwé munu nkoñ ’isi unu, i nla bé  bol maséé di nok i gwélél Yéhôva nano ni bisai bi mbem bés dilo di nlo. To kii di nimis munu nkoñ ’isi unu, i nla bé bol bisai di gwé i bana maada malam ni Yéhôva. Di yé maséé ngandak i ngéda di ‘nlémél nye i nya i yôni.’​—Kôlôsé 1:10.

10-11. Kii i bi tinde Micheal i héñha?

¹⁰ Ngandak ikété yés i bi nimis ngandak gwom inyu lémél Yéhôva. Lôk kéé ihogi i bi tjôô loñge bôlô i nkoñ ’isi, bape ba bi nwas nyiña i moni. Bape ki ba bi héñha niñ yap héñha yosôna i ngéda ba bi yi maliga. Hala nyen Micheal a bi boñ. A bi néñél bé lihaa li Mbôgi Yéhôva. I ngéda a bé mañge wanda, a bi nigil i jo bisañ. A nkal le: “Me bé gwés me nyoñ ngéda ni nyuu yem, me bé hoñol le mut a nla bé me.” Ndi i ngéda Micheal a bi bôdôl nigil Bibel, a bi nok le Yéhôva a ngwés bé bisañ. (Tjémbi 11:5) Micheal a nkal le: “Babiina ba bé niiga me Bibel, ba bi kal bé me to kel yada le me nwas karaté. Ba bé niiga ndik me Bibel.”

¹¹ Kiki Micheal a bé nigil Bibel, hala nyen a bé kônde gwés Yéhôva. Konangoo Yéhôva a ñunda bagwélél bé, i bi lôôha tihba nye. I mbus ngéda, Micheal a bi nok le a nlama héñha, a nkal le: “Me bé yi le i nwas karaté i ga lédél me ngandak. Ndi me bé yi le hala a nlémél Yéhôva, ni le me ga kôs ngandak bisai ibale me mboñ sômbôl yé.” Micheal a bi léba le maliga ma yé nseñ ngandak, inyu hala nyen a bé bebee i héñha.​—Yakôbô 1:25.

12-13. Lelaa maliga ma bi hôla Mayli?

¹² Inyu éba le maliga ma yé nseñ, Bibel i nkal le ma yé kiki mapubi ma lambe. (Tjémbi 119:105; Éfésô 5:8) Mayli nu a yé i Azerbaijan, a ngwés Bañga i Djob ngandak. Isañ bo nyañ ba bé bé base yada. Isañ a bé i base bahusa, nyañ a bak i base i Lôk Yuda. A nkal le: “Me bé yi le Nyambe a yé, ndi me bé badba ngandak mambadga. Me bé badba le ‘Inyuki Nyambe a bi hek bôt ba binam. Ibale mut a nlama nok ndutu niñ yé yosôna, a témb a kee a nok ndutu i bee hié i boga ni boga, wee nseñ i niñ i yé le kii?’ Kiki bôt ba nkal le mam momasôna ma mbôña ni sômbôl i Djob, me bé badba le: ‘Baa Djob a ntuk ndik ni bôt ba binam kiki mut a ntuk ni poupé inyu nôgha yo njôghe, a konok maséé?’”

¹³ Mayli a bi ke ni bisu i yéñ mandimbhe mu mambadga a bé badba. A bi nigil Bibel a yila Mbôgi Yéhôva. A nkal le: “Maliga ma bi héñha niñ yem. Maliga me bi nigil ikété Bibel, ma bi lona me nsañ.” Kiki Mayli, di nti Yéhôva mayéga, “Nu a bi séblene [bés] ikété jiibe le [di] jôp i mapubi mé ma hélha.”​—1 Pétrô 2:9.

14. Kii i nla hôla bés i kônde gwés maliga? (Béñge yak minkéñék mi matila mini le “ Dihéga dipe.”)

¹⁴ Ngandak dihéga ipe i yé i i nla unda bés le maliga ma yé nseñ. Ibabé  pééna, di nyi dihogi mu. Di nla yoñ makidik le, i yigil yés bésbomede, di nkônde yéñ mam mape ma ma ntinde bés i gwés maliga. I ngéda di ngwés maliga, di gwé ngôñ i unda le di ngwés toi mo.

15. Lelaa di nla unda le di ngwés maliga?

¹⁵ Di ñéba le di ngwés maliga i ngéda di nigil Bibel ni bikaat bi ntôñ. To di yé i ntôñ u Yéhôva ibôdôl behee, di nlama bé waa nigil. Nkum Ntat nu bisu a bi nkal le: “Munu nkoñ ’isi unu, maliga ma yé kiki man mbônji nu a yé nkéñga ni ngandak bikai bibe. Ibale u nsômbôl yi maliga, u nlama tibil yéñ mo. . . . Ibale u gwé ngôñ ni maliga, u nlama jo sañ, u bañal bañ maliga. Yéñ mo hiki ngéda.” Yigil i ntomb bé, ndi i yé nseñ ngandak.

16. Limbe likeñge u ngwélél i ngéda u nigil Bibel? (Bingéngén 2:4-6)

¹⁶ Bésbobasôna di ngwés bé lisoñgol ni yigil. Ndi, Yéhôva a nsômbôl le di “yéñ,” di “tibil yéñ” inyu boñ le di  nok maliga. (Añ Bingéngén 2:4-6.) I ngéda di mboñ hala, di nkôs ngandak bisai. Corey a nkal le i ngéda a nigil Bibel, a nigil nlôñ wada wada. A nkal le: “Me ñañ hiki buk i yé i si lipep, me añ minlôñ mi mi nkiha ni nlôñ me yé añ, me témb me yéñ mu bikaat bi ntôñ. . . . I ngéda me ñañ Bibel hala, me nigil ngandak mam!” Too likeñge jé jon di ngwélél, too likeñge lipe, i ngéda di nyoñ ngéda i nigil Bibel, di ñéba le di ngwés maliga.​—Tjémbi 1:1-3.

17. I niñ inoñnaga ni maliga hala a nkobla le kii? (Yakôbô 1:25)

¹⁷ Yigil yotama i kôli bé. Inyu boñ le yigil yés i bane bés nseñ, di nlama niñ inoñnaga ni maliga, hala wee di boñ i yom di nigil. Ha nyen maliga ma ga kônha bés maséé. (Añ Yakôbô 1:25.) Kii di nla boñ inyu niñ inoñnaga ni maliga? Mankéé wada a nkal le: “Di nla béñge i mam di mboñ, ni ma di mboñ bé.” Ñôma Paul a kal le: “To ibale mahol més ma mpam to limbe likala, wee di kilak ndigi ikété oda mu nlélém njel.”​—Filipi 3:16.

18. Inyuki di nlama téñbe “i kil ikété maliga”?

¹⁸ Di hoñol le bisai di nkôs i ngéda di ntéñbe “i kil ikété maliga”! Niñ yés i nkônde lama, di nkônha ki Yéhôva maséé yak ni lôk kéé yés. (Bingéngén 27:11; 3 Yôhanes 4) I mam mana mon ma ntinde bés i gwés maliga, ni i niñ inoñnaga ni maliga.