YIGIL 33
Yéhôva a ntat bagwélél bé
“Yéhôva a ntat ba ba nkon nye woñi.”—TJÉMBI 33:18, MN.
HIÉMBI 4 “Yéhôva a yé Ntééda wem”
DINYO MALÉP *
1. Inyuki Yésu a bi soohe Yéhôva le a tat banigil bé?
U U NSÔK ilole Yésu a nwo, a bi bat Isañ ngim jam. A bi soohe Yéhôva le a tat banigil bé. (Yôhanes 17:15, 20) Yéhôva a nwaa bé tat bagwélél bé. Ndi Yésu a bé yi le Satan a ga lôôha kolba banigil bé. A bé yi ki le banigil bé ba gwé ngôñ ni mahôla ma Yéhôva inyu kolba Nsohop.
2. Inoñnaga ni kaat Tjémbi 33:18-20, inyuki di nlama bé kon mandutu woñi?
2 Nkoñ ’isi Satan u nlôôha noode bagwélél ba Yéhôva. Mandutu més ma nla boñ le di tomb, di waa yak gwélél Yéhôva. Ndi i yigil ini, y’a unda bés le di gwé bé le di kon woñi. Yéhôva a ntat bés, a ntehe mandutu més, a yé ki bebee i hôla bés. Di béñge miñañ mi Bibel ima mi mi ñéba lelaa Yéhôva “a ntat ba ba nkon nye woñi.”—Añ Tjémbi 33:18-20, MN.
NGÉDA DI NÔGDA LE DI YÉ BÉSBOTAMA
3. Imbe ngéda di yé le di nôgda wengoñle di yé bésbotama?
3 Tolakii di yé munu ntôñ u Yéhôva, ngim mangéda di yé le di hoñol le di yé bésbotama. Kiki hihéga, i ngéda boñge ba wanda ba mpahal hémle yap i suklu, tole i ngéda ba nke likoda lipe, ba nla nôgda wengoñle ba yé botama. Ngim mangéda, ngeñ di gwé nduña, di nla hoñol le mut nye ki nye a ta bé ha inyu hôla bés. Di nla yak kon woñi i kal bôt i jam li ntééñga bés inyule di nhoñol le ba ga nok bé bés. Mangéda mahogi, di yé yak le di hoñol le mut nye ki nye a ntôñ bé bés. Mandutu més ma nla boñ le di hoñol le di yé bésbotama, di lehel ñem, di kahal tôñ ngandak. Ndi Yéhôva a nsômbôl bé le di ba hala. Kii i nyis bés hala?
4. Inyuki mpôdôl Éliya a bi kal le: “Metama nunu nyen me nyégle”?
4 Di béñge ndémbél i ngwélél Yéhôva nunu le Éliya. Hala a bé iloo 40 dilo le a bi bôdôl ke ngwéé inyule Yézabel a bi han nye nyemb. (1 Bikiñe 19:1-9) I mbus ngéda nu a bé a sôli i hôk liaa, a lôndôl Yéhôva a kal nye le: “Metama nunu nyen me nyégle [ikété bapôdôl].” (1 Bikiñe 19:10) Ôbadia a bi péyés 100 bapôdôl i moo ma Yézabel; jon, bapôdôl ba bé ba ngi yii mu loñ. (1 Bikiñe 18:7, 13) Ndi inyuki Éliya a bé hoñol le a yé nyetama? Baa a bé hoñol le bapôdôl Ôbadia a bi péyés, ba bi wo? Baa a bé hoñol le mut numpe a bé gwélél ha bé Yéhôva i ngéda i bi nene i hikôa hi Karmel le bapôdôl ba Baal ba yé bapôdôl ba bitembee? Baa a bé hoñol le bôt ba ntehe bé ndutu yé, tole mut nye ki nye a ntôñ bé nye? Bibel i nkal bé mam momasôna Éliya a bé hoñol ha ngéda i. Ndi di nyi le Yéhôva a bé nok nye loñge loñge, a bé ki bebee i hôla nye.
Ngéda di nhoñol le di yé bésbotama, lelaa mahôla Yéhôva a bi ti Éliya ma nla nlédés bés? (Béñge maben 5-6)
5. Lelaa Yéhôva a bi yis Éliya le a ta bé nyetama?
5 Yéhôva a bi hôla Éliya ngandak. A bi boñ nye le a pot. A bi bat nye ngélé iba le: “U mboñ kii hana?” (1 Bikiñe 19:9, 13) Ngéda Éliya a bé pot, Yéhôva a bé emble nye. Yéhôva a bi timbhe Éliya, a unda nye lipémba jé. A bi yis yak nye le ngandak bôt ipe i ngi gwéélak nye. (1 Bikiñe 19:11, 12, 18) Ibabé pééna, ngéda Éliya a bi yible Yéhôva ñem wé, a nok Yéhôva a ntimbhe nye, a bi kon maséé. Yéhôva a bi ti Éliya ngandak bibôlô. A bi kal nye le a téé Hazael kiñe Siria, Yéhu kiñe Israel, a téé yak Élisa mpôdôl. (1 Bikiñe 19:15, 16) Bibôlô bini Yéhôva a bi ti Éliya, bi bi hôla nye i bana mahoñol malam. Yéhôva a bi ti yak nye so ngwelnson le Élisa. Lelaa Yéhôva a yé le a hôla we i ngéda u nhoñol le u yé wetama?
6. Kii u nla bat Yéhôva ngéda u nôgda wee u yé wetama? (Tjémbi 62:9)
6 Yéhôva a gwé ngôñ le u soohe nye. A ntehe mandutu moñ, a yé ki bebee i emble masoohe moñ hiki ngéda. (1 Tésalônika 5:17) Masoohe ma bagwélél bé ma nlémél nye. (Bingéngén 15:8) Ngéda u nhoñol le u yé wetama, kii u nla bat Yéhôva? Yible nye ñem kiki Éliya. (Añ Tjémbi 62:9.) Añle nye mandutu moñ, ni mam momasôna ma ntééñga we. Bat nye mahôla inyu nihbe mandutu moñ. Kiki hihéga, ibale u nkon woñi i pahal hémle yoñ i suklu, bat Yéhôva le a hôla we i pot. U nla yak bat nye le a ti we pék inyu boñ le u añle bôt ñañ nlam ibabé le u babaa bo. (Lukas 21:14, 15) Ibale u mbéna bana mahoñol mabe, soohe Yéhôva le a hôla we i añle nhôôlak kristen i jam li. U nla bat Yéhôva le a boñ le i mankéé u nke pôdôs, a emble we, a nok ki we. Yible Yéhôva ñem. Ngéda w’a tehe lelaa a ntimbhe masoohe moñ, u neebege le bôt bape ba hôla we, w’a nôgda ha bé le u yé wetama.
Baa u nyéñ manjel i kônde lôôs ngéda likalô u salak ki ni lôk kéé ipe? (Béñge liben 7)
7. Kii ndémbél i Mauricio i niiga bés?
7 Yéhôva a bi bééga bésbobasôna nson nlam. A yé maséé ngéda di nsal bibôlô gwés i likoda, ni ngéda di ñañal ñañ nlam. (Tjémbi 110:3) Lelaa minson mi mi nla boñ le u hoñol bañ le u yé wetama? Di béñge ndémbél i mañge wanda wada le Mauricio. * Ndék ngéda i mbus sôble yé, liwanda jé jada li bi bôdôl tjél maliga. Mauricio a nkal le: “Ngéda me bi tehe nye a nkôm Yéhôva mbus, me bé le me lehel ñem. Me bé badba too m’a gwélél Yéhôva kiki me bi bôn nye, too m’a yén munu ntôñ Yéhôva. Me bé hoñol le me yé metama, le mut nye ki nye a nok bé me.” Kii i bi hôla Mauricio? A nkal le: “Me bi kônde ti ngéda yem i nson likalô. Hala a bi boñ le me lôôha bañ tjelel, me bana bañ to mahoñol mabe. Kiki me bé sal ni lôk kéé i likalô, me bi kahal kon maséé, me bé ha bé me môdi.” To ibale di nla bé ke likalô li mandap ni mandap ni lôk kéé yés, ngéda di ñañal ñañ nlam ni bo ni njel bikaat tole téléfôn, hala a nlédés bés. Kii ipe i bi hôla Mauricio? A nkal le: “Me bé sal ngandak ikété likoda. Me bé yoñ ngéda i kôôba minkwel nwem, ni i lôôs nwo loñge. Hala a bi boñ le Yéhôva a kônde gwés me, yak lôk kéé yem.”
NGÉDA MANDUTU MA NAI
8. Ngéda mandutu ma nai, kii di yé di nôgda?
8 Di nyi le di nlama boma manoodana munu dilo di nsôk. (2 Timôtéô 3:1) Ndi ngim mangéda, ngim mandutu i di bemek bé, i yé le i puhe bés. Di yé le di kwo liyep, di bana béba kon, tole di nimis mut nu di ngwés ngandak. Ha ngéda i, di yé le di lôôha tôñ, téntén ibale mandutu ma nkwél bés yada i mbus yada, tole ibale ngandak mandutu i nkwél bés ngélé yada. Ndi, di hôya bañ le Yéhôva a ntat bés, a nhôla bés i nihbe mandutu més momasôna.
9. Mambe mandutu Hiôb a bi boma?
9 Di béñge lelaa Yéhôva a bi hôla Hiôb. A bi boma ngandak mandutu i nlélém ngéda. Inyu kel yada ndigi, Hiôb a bi nok le bilém gwé bi nwo, bagwélél bé ba nôla, yak bon bé ba nwo. (Hiôb 1:13-19) I mbus ngéda, Hiôb a bé a ngi nogok njôghe inyu mandutu mana, ha nyen yak béba kon i bi gwel nye. (Hiôb 2:7) Hiôb a bi nok ndutu ngandak, jon a bi kal le: “Niñ yem i ngwélha me nyega; me nsômbôl bé me niñ mba ni mba.”—Hiôb 7:16.
Inyu unda Hiôb le a ntôñ nye ni le a ngwés nye, Yéhôva a bi añle nye lelaa a bi yoñ ndun ni ngandak yé bihégél (Béñge liben 10)
10. Lelaa Yéhôva a bi hôla Hiôb i nihbe mandutu mé? (Béñge titii i lipe li bisu.)
10 Yéhôva a bé tehe mandutu ma Hiôb. Kiki Yéhôva a bé gwés Hiôb, a bi ti nye kii yosôna i bé béda nye inyu nihbe mandutu mé. A bi pôdôs nye, a unda nye pék yé i mbuma ñañ, ni gwéha a gwé inyu bagwélél bé. A pôdôl ngandak binuga bikeñi. (Hiôb 38:1, 2; 39:12, 16, 22, 30; 40:10; 40:20, 21) Yéhôva a bi gwélél ki mañge wanda nunu le Élihu inyu lédés Hiôb. Élihu a bi yis Hiôb le Yéhôva a mbom bagwélél bé ba ba ntéñbe ni nye. Yéhôva a bi gwélél yak Élihu inyu ti Hiôb maéba malam. Élihu a bi tinde Hiôb i hek pék, a éba nye le di ta bé to yom i bisu bi Yéhôva Nhek ngii ni hisi. (Hiôb 37:14) Yéhôva a bi ti yak Hiôb bôlô; a bi kal nye le a soohe inyu mawanda mé maa ma ma bi boñ béba. (Hiôb 42:8-10) Ngéda yak bés di mboma manoodana, lelaa Yéhôva a nhôla bés?
11. Lelaa Bibel i nlédés bés ngéda di gwé mandutu?
11 Yéhôva a nkwel ha bé ni bés kiki a bé kwel ni Hiôb, ndi a mpôdôs bés ni njel Bañga yé. (Rôma 15:4) Botñem a nti bés, i nlédés bés. Di béñge ngim minlôñ mi Bibel i i nla hôgbaha bés i ngéda di gwé mandutu. Yéhôva a nkal bés mu Bañga yé le jam jo ki jo, hala wee to mandutu makeñi, ma ga “la bé bagal bés ni gwéha [yé].” (Rôma 8:38, 39) A nkal ki bés le “a yé bebee ni bôt bobasôna ba nsébél nye.” (Tjémbi 145:18) Yéhôva a nyis bés le, ibale di mbôdôl nye ñem, d’a la nihbe mandutu més, di konok maséé. (1 Korintô 10:13; Yakôbô 1:2, 12) Bibel i niiga ki bés le mandutu més ma yé ndik inyu ndék ngéda ibale di nke hégha mo ni bisai bi mbem bés dilo di nlo. (2 Korintô 4:16-18) Yéhôva a mbôn ki le a ga mélés i mam momasôna ma mboñ le di nok ndutu; a ga tjé Satan ni bibéba bi bôt gwobisôna. (Tjémbi 37:10) Baa u ma tééda ngim minlôñ mi Bibel i y’a hôla we ngéda w’a boma mandutu?
12. Kii di nlama boñ inyu boñ le Bañga i Yéhôva i hôla bés?
12 Yéhôva a gwé ngôñ le di yoñ ngéda i nigil Bañga yé, di ôt ki pék mu mam di nigil. Ngéda di mboñ i mam di ñañ mu Bibel, hémle yés i nkônde let, di nkônde ki yila mawanda ma Yéhôva. Hala a nhôla bés i nihbe mandutu més. I bôt ba ñañ Bibel, Yéhôva a nti bo mbuu wé mpubi. Mbuu wé u nti bés “lipémba li li nloo li mut binam” inyu boñ le di hônba mandutu més.—2 Korintô 4:7-10.
13. Lelaa biniigana di nkôs ni njel “nkol u maliga ni u pék” bi nhôla bés i hônba mandutu més?
13 Yéhôva a ngwélél “nkol u maliga ni u pék” inyu ti bés ngandak bikaat, bividéô, ni minsik. I gwom bi gwobisôna bi nhôla bés i lédés hémle yés. (Matéô 24:45) Di nlama tibil gwélél biniigana bi. Sita yada i Amérika, i bi unda lelaa i ntehe biniigana gwobisôna a nkôs munu ntôñ u Yéhôva. A bi kal le: “Munu 40 nwii me ma tégbaha i ntôñ u Yéhôva, me nkôs manoodana nya ndi nya.” Manoodana ma bi yuu nye. Mut wada nu a bi hiôô maook, a bi kumul sôgôl wé ni matôa a nol nye, bagwal bé ba bi kon ngandak, ba wo, nyemede a bi kon pos ngélé iba. Kii i bi hôla nye? A nkal le: “Yéhôva a mah tjôô bé me. Biniigana gwobisôna nkol u maliga ni u pék u nti bés, bi bi hôla me i hônba mandutu mem. Inyu hala nyen me nla kal kiki Hiôb le: ‘Letee me wo, m’a tjôô bé libak jem li ngi nsohi!’”—Hiôb 27:5.
Lelaa di nla hôla lôk kéé? (Béñge liben 14)
14. Lelaa Yéhôva a ngwélél lôk kéé yés inyu hôla bés i ngéda di mboma mandutu? (1 Tésalônika 4:9)
14 Yéhôva a bi niiga bagwélél bé i gwéhna ni i lédhana i ngéda ndutu. (2 Korintô 1:3, 4; añ 1 Tésalônika 4:9.) Kiki Élihu a bi hôla Hiôb, lôk kéé yés i bôda ni i bôlôm i yé bebee i hôla bés i ngéda di yé ikété ndutu. (Minson mi baôma 14:22) Kiki hihéga, di béñge lelaa lôk kéé i likoda li Diane i bi hôgbaha nye, i hôla ki nye i lédés hémle yé ngéda nlô wé a bé kon ngandak. A nkal le: “Ndutu i bé nnayak. Ndi di bi tehe woo u Yéhôva mu ngéda i. Lôk kéé i likoda jés i bi hôla bés. Ba bé ba nsébél bés, ba yuugaga bés, ba samblaga bés. Hala a bi hôla bés i hônba. Kiki me nluk bé me matôa, lôk kéé i bôda ni i bôlôm i bé kena me makoda ni likalô i ngéda njel i bé.” Kinje bisai di gwé i ba munu i ntôñ u Yéhôva!
DI NTI YÉHÔVA MAYÉGA INYU MAHÔLA MÉ
15. Kii i nkwés bés nkaa le di nla hônba mandutu més?
15 Bésbobasôna d’a boma mandutu. Ndi, kiki di ntehe munu yigil ini, di ta bé bésbotama. Kiki isañ nu a ngwés bon bé, Yéhôva a yé ha inyu tat bés. A yé bés ipañ, a yé ki bebee i hôla bés i ngéda di gwé ngôñ ni mahôla. (Yésaya 43:2) Di nyi le di nla hônba mandutu més inyule Yéhôva a nti bés mam momasôna ma mbéda bés inyu hônba. A nyible bés njel i soohe nye, a nti bés Bañga yé, biniigana munu ntôñ wé, ni lôk kéé yés i bôda ni i bôlôm i i yé ha inyu hôla bés i ngéda di gwé ndutu.
16. Kii di nlama boñ inyu boñ le Yéhôva a kee ni bisu i tééda bés?
16 Di yé maséé i yi le Yéhôva a ntat bés. “Miñem nwés mi nkon maséé inyu mam a bi boñ.” (Tjémbi 33:21, MN.) Inyu unda Yéhôva le di nkon maséé ni mam a nti bés, di nlama gwélél mo. Di nlama boñ kii yosôna i mbéda inyu boñ le Yéhôva a kee ni bisu i tat bés. Hala a nkobla le ibale di nke ni bisu i nôgôl Yéhôva, di boñok ki sômbôl yé, a’ tat bés i boga ni boga!—1 Pétrô 3:12.
HIÉMBI 30 Tata wem, Djob jem ni Liwanda jem