YIGIL 34
HIÉMBI 107 Yéhôva, ndémbél i gwéha
Lelaa mimañ mi ñunda baboñbéba gwéha ni konangoo?
“Nyambe, ikété konangoo yé, a nyéñ tinde we i hiel ñem.”—RÔMA 2:4.
NLÔM JAM
Di ga tehe lelaa mimañ mi noode hôla i bet ba mboñ béba ikeñi ikété likoda?
1. Kii i nla bôña i mbus le mankéé a mboñ béba ikeñi?
I YIGIL i ntagbe, di ntehe i jam ñôma Paul a bi kal lôk kéé i Korintô le i boñ i ngéda mankéé wada a bi boñ béba ikeñi. I mankéé nu, a bi tam bé béba yé, jon ba bé lama pémés nye i likoda. Ndi kiki i pes kaat i ñéga i yigil ini i ñunda, Yéhôva a nla hôla baboñbéba i hiel ñem. (Rôma 2:4) Lelaa Yéhôva a nla ni gwélél mimañ inyu hôla baboñbéba i hiel ñem?
2-3. Kii di nlama boñ ibale di nyi le mankéé a mboñ béba ikeñi, inyuki?
2 Inyu boñ le mimañ mi ti mahôla ma ma mbéda, mi nlama yi i jam li ntagbe. Kii di nlama ni boñ ibale di nyi le mankéé a mboñ béba ikeñi? Hala wee, a mboñ ngim jam i i nla boñ le ba pémés nye i likoda? Di nlama ti i mankéé nu makénd le a kee a tehe mimañ inyu bat mahôla.—Yésaya 1:18; Minson mi baôma 20:28; 1 Pétrô 5:2.
3 Ndi kii di nlama ni boñ ibale i mankéé nu a ntjél ke i tehe mimañ? Ha ngéda i, bésbomede di nlama ke i tehe mimañ inyu boñ le i mankéé nu a kôhna mahôla ma ma mbéda. Di mboñ hala inyule di ngwés mankéé wés, di nyi ki le mimañ mi nla hôla nye. Ibale mankéé a nke ni bisu i boñ béba, a ga ôbôs maada mé ni Yéhôva. A ga hoo ki jôl li likoda mahindi. Jon di nyoñ makidik ma ngui mana, inyule di ngwés Yéhôva ni mankéé wés.—Tjémbi 27:14.
LELAA MIMAÑ MI NHÔLA I BET BA MBOÑ BÉBA IKEÑI?
4. Kii i yé njômbi mimañ i ngéda mi mbomna ni mankéé nu a mboñ béba ikeñi?
4 I ngéda mankéé a mboñ béba ikeñi, juu li mimañ li mpohol mimañ maa ikété yap mi mi yé nhôôlak inyu ke i boma i mankéé nu. a Mimañ mini mi nlama bana ñem nsôgha, ni suhulnyuu mu kiki mi noode hôla nye i tam béba yé. Mi nyi le ba nla bé nyégsa mboñbéba i héñha. (Ndiimba Mbén 30:19) Mimañ mi nyi le baboñbéba bobasôna bé bon ba ga hiel ñem, kiki Kiñe David a bi boñ. (2 Samuel 12:13) Baboñbéba bahogi ba ga tjél emble mabéhna ma Yéhôva. (Bibôdle 4:6-8) Ndi njômbi i mimañ i yé le ba boñ kii yosôna ba nla inyu hôla mboñbéba i hiel ñem. Kii mimañ mi nlama bigda i ngéda ba nkwélés mboñbéba?
5. Bimbe bilem mimañ mi nlama bana i ngéda mi mboma mboñbéba? (2 Timôtéô 2:24-26) (Béñge yak titii.)
5 Tolakii mankéé a mboñ béba, mimañ mi ngi tehge nye kiki ntômba u u yii tik i mis ma Yéhôva. (Lukas 15:4, 6) Jon i ngéda mimañ mi mboma mankéé, mi nyahal bé nye, mi nkwélés bé to nye ni nledek ñem; mimañ mi nlama bé hoñol le i yom yosôna mi gwé le mi boñ i yé ndik le mi bat mambadga, mi kôhna mandimbhe. Maselna ni hala, ba nlama unda bilem di nléba i kaat 2 Timôtéô 2:24-26. (Añ.) Mimañ mi nlama unda mboñbéba loñgeñem, ni liyômba, mu kiki ba nhôla nye i héñha mahoñol.
6. Lelaa mimañ nwomede mi nla kôôba miñem nwap ilole mi mbomna ni mboñbéba? (Rôma 2:4)
6 Mimañ mi nkôôba miñem nwap bomede. Mimañ mi noode kôna Yéhôva mu i mam momasôna ba mboñ ni mboñbéba, ba hoñlak bibuk bi Paul bini le: “Nyambe, ikété konangoo yé, a nyéñ tinde we i hiel ñem.” (Añ Rôma 2:4.) Mimañ mi nhôya bé le nson wap u bisu u yé le mi tééda mintômba isi énél i Kristô. (Yésaya 11:3, 4; Matéô 18:18-20) Ilole ba mbomna ni mboñbéba, mimañ mi nsoohe inyu hôla mboñbéba i hiel ñem. Ba mboñ nyiña ikété Bibel ni ikété bikaat bi ntôñ. Ba nsoohe Yéhôva le a hôla bo i bana pék i yi bagal mam. Mimañ mi ga yéñ yi kii i bi lama tinde i mankéé nunu i bana mahoñol, libak, ni maboñok ma ma bi kwés nye i béba.—Bingéngén 20:5.
7-8. Lelaa mimañ mi nla kôna ndémbel i wongut i Yéhôva i ngéda mi mboma mboñbéba?
7 Mimañ mi nkôna ndémbél i wongut i Yéhôva. Ba nhôya bé lelaa Yéhôva a bi noode hôla baboñbéba i ngéda kôba. Kiki hihéga, Yéhôva a bi yoñ ngéda i hôla Kain i ôt pék. A béhe ki nye le bikuu bi bé lama kwél nye ibale a nkwo i béba, ni bisai a bé lama kôhna ibale a nhéñha. (Bibôdle 4:6, 7) Inyu kodol Kiñe David, Yéhôva a bi gwélél mpôdôl le Natan nu a bi gwélél hihéga hi hi bi tinde David i héñha. (2 Samuel 12:1-7) Yéhôva a bé ‘om bapôdôl bé hiki kel,’ ‘a omok bo a tiimbaga’ inyu béhe litén li Israel li li bé ndogbene nye. (Yérémia 7:24, 25) A bi bem bé le litén jé li hiel ñem inyu hôla jo. Ndi i ngéda ba bé boñ béba, a bé ti bo makénd i héñha.
8 Mimañ mi noode kôna ndémbél i Yéhôva i ngéda mi nhôla i mut a nkwo i béba ikeñi. Kiki kaat 2 Timôtéô 4:2 i ñunda, i ngéda mimañ mi nkwel ni mankéé nu a mboñ béba ikeñi, “ni wongut yosôna” mi nhôla nye i ôt pék. Jon mañ u nlama bana ñem nwee ni wongut ngéda yosôna inyu ti mboñbéba ngôñ i boñ i mam ma téé sép. Ndi ibale mañ u ñunup, u bana lôhla ñem, mboñbéba a yé le a tjél emble maéba mé a tam bé to béba yé.
9-10. Lelaa mimañ mi nla hôla mboñbéba i ôt pék mu i jam a bi boñ?
9 Mimañ mi noode wan i mam ma bi kena nye i béba. Kiki hihéga, baa i mankéé nunu a bi tomb i pes mbuu inyule a bééna ha bé lem i nigil Bibel, tole i ke likalô? Baa a bi waa soohe Yéhôva, tole a bé soohe ndik nye i ngii ni ngii? Baa a bi nwas le minheña mi minsôn nwon mi éga nye? Baa a bééna bilôñ bibe ni mintuk mimbe? Lelaa makidik mé mu i mam ma, ma bi héñha litehge jé li mam? Baa a ntibil nok le makidik mé ni maboñok mé ma bi tééñga Tata wé le Yéhôva?
10 Mimañ mi nla bat nye mambadga ma ma ga tinde nye i ôt pék inyu tehe kii i bi tinde nye i ôbôs maada mé ni Yéhôva, ni i boñ béba? Ba mboñ hala ni loñgeñem, ba mbat bé nye mambadga inyu i mam ma mbéñge bé bo. (Bingéngén 20:5) Mimañ mi nla gwélél dihéga inyu unda mboñbéba inyuki maboñok mé ma yé mabe, nlélém kiki Natan a boñ ni David. Mu nkwel wé u bisu ni mimañ, mboñbéba a nla bôdôl nok njôghe i ñem; inyu jam a bi boñ, a tam ki béba yé.
11. Kii Yésu a bi boñ inyu hôla baboñbéba?
11 Mimañ mi mboñ biliya i kôna ndémbél i Yésu. Inyu hôla Saulô mut Tarsô, Yésu a bi bat nye i mbadga ini le: “A Saulô, a Saulô, inyuki u ntééñga me?” Yésu a bi hôla nye i tehe le a bé boñ béba jam. (Minson mi baôma 9:3-6) Inyu “i muda nunu le Yézabel,” Yésu a bi kal le: “Me bi ti nye ngéda le a hiel ñem.”—Masoola 2:20, 21.
12-13. Lelaa mimañ mi nla ti mboñbéba ngéda inyu boñ le a hiel ñem? (Béñge yak titii.)
12 Mimañ mi nkôna ndémbél i Yésu i ngéda mi mpabla bé i yoñ makidik. Mi nhoñol bé to le mboñbéba a ga hiel bé ñem. Baboñbéba bahogi, ba nla tam béba yap i mbus nkwel wap u bisu lôñni mimañ, ki le inyu bape, i ga béda bo ndék ngéda. Jon mimañ mi nla tehe le ibale mi mbomna ni mboñbéba ngélé yada ndigi, hala a ga kola bé. Bebek i mbus nkwel wap u bisu nyen mboñbéba a ga bôdôl ôt pék mu i mam ba nkal nye; ni suhulnyuu, a nla soohe Yéhôva le a nwéhél nye béba yé. (Tjémbi 32:5; 38:18) Hala a nla boñ le i nkwel u noñ, mboñbéba a bana mahoñol ma ma yé mahéñha ni ma a bééna i nkwel u bisu.
13 Inyu hôla mboñbéba i hiel ñem, mimañ mi unda nye ñem ngôô ni loñgeñem. Ba mbot ñem, ba soohege Yéhôva le a sayap biliya gwap i hôla mboñbéba le nyuu i yi nye jam, a hiel ki ñem.—2 Timôtéô 2:25, 26.
14. Njee a kôli ni bibégés i ngéda mboñbéba a nhiel ñem, inyuki?
14 Ibale mboñbéba a nhiel ñem, hala a ga lôôha kônha bés maséé! (Lukas 15:7, 10) Njee a kôli ni bibégés mu i jam li? Baa mimañ? Bigda i jam Paul a kal inyu baboñbéba: “Bebek Nyambe a’ ti bo hielñem.” (2 Timôtéô 2:25) Jon Yéhôva nyen a nhôla i mboñbéba i héñha mahoñol mé ni libak jé, he mut binam bé. Paul a ntoñol i mam malam ma mbôña i ngéda mut a nhiel ñem. I mut nu a nla bana bañga yi i maliga, nyuu i yi nye jam, a “tohla ki i hiandi hi Nsohop.”—2 Timôtéô 2:26.
15. Lelaa mimañ mi nla ke ni bisu i hôla mboñbéba nu a nhiel ñem?
15 I ngéda mut a nhiel ñem, mimañ mi nke ni bisu i yuuga nye inyu lédés hémle yé. Mi nhôla ki nye i yémbél manoodana ma Satan ni i boñ loñge. (Lôk Héber ) Mimañ mi nkal bé mut i yom i mankéé nu a mboñ. Ndi kii likoda li nlama yi? 12:12, 13
“KODOL . . . I BISU BI BÔT BOBASÔNA”
16. Inoñnaga ni 1 Timôtéô 5:20, bonjee ba yé i “bôt bobasôna” Paul a mpôdôl hana?
16 Añ 1 Timôtéô 5:20. Paul a bi kal mañ umpe le Timôtéô le a kodol “i bôt ba gwé lem i boñ béba” i bisu bi bôt bobasôna. Kii a bé sômbôl kal nye? A bé sômbôl bé kal le likoda jolisôna jon li yé i “bôt bobasôna” a mpôdôl hana. Ndi a bé pôdôl i ndék bôt i bé yi bibéba bi. I nla ba le bomede ba bi tehe i jam li, tole mboñbéba nyemede nyen a bi yeelene bo jo. I ndék bôt i yon mimañ mi ga yis le mi mal wan i jam li, mi kodol ki mboñbéba.
17. Ibale béba ikeñi i nyiba ni likoda jolisôna tole i ga yiba, umbe nlegla u nlama bôña, inyuki?
17 Ngim mangéda i nla pam le i béba i i yiba ni likoda jolisôna tole i ga pam i yiba. Ha i ngéda i, i “bôt bobasôna” Paul a mpôdôl ba yé likoda jolisôna. Jon mañ wada u ga legel i bisu bi likoda le, ba nkodol i mankéé nu. Inyuki? Paul a ntimbhe le: “Inyu béhe bana bape” le ba kwo bañ i béba.
18. Ibale mankéé nu a yé isi 18 nwii a mboñ béba ikeñi, kii mimañ mi nla mboñ? (Béñge yak titii.)
18 Kii mimañ mi nlama boñ ibale mañge nu a yé ngi pamna 18 nwii a bak nsôblege a mboñ béba ikeñi? Juu li mimañ li nyoñ bitelbene le mimañ ima mi boma i mañge nunu ni bagwal bé ba ba yé bikristen, tole mi boma nye ni i kristen i i ntééda nye. Mimañ mi ga yéñ yi kii bagwal ba ma boñ inyu hôla man wap i hiel ñem. Ibale i mañge nu a nôgôl bagwal bé, a héñha mahoñol ni maboñok mé, mimañ mi nwo ima mi nla tehe le i ta bé nseñ i kena i jam li ni bisu. Mimañ mi nyi le Yéhôva a bi ti bagwal kunde i kodol bon bap ni gwéha. (Ndiimba Mbén 6:6, 7; Bingéngén 6:20; 22:6; Éfésô 6:2-4) Ndi ngim mangéda, mimañ mi ga ke ni bisu i kwel ni bagwal inyu tehe ibale ba yé i ti man wap mahôla ma mbéda. Ndi nano kii y’a mbôña ibale mañge wanda nu a yé nsôblege a nke ni bisu i boñ béba ibabé i hiel ñem? Ha i ngéda i mimañ maa mi ga bomna ni nye lôñni bagwal bé ba ba yé bikristen tole lôñni mankéé nu a néñés nye.
“YÉHÔVA A YÔNI NI ÑEM GWÉHA NI KONANGOO”
19. Lelaa mimañ mi noode kôna ndémbél i Yéhôva i ngéda mi mbomna ni i mut a mboñ béba ikeñi?
19 Yéhôva a mbem le mimañ mi tééda likoda mapubi. (1 Korintô 5:7) Mimañ mi mboñ kii yosôna i mbéda inyu hôla baboñbéba i hiel ñem. I ngéda mi nhôla bo, mimañ mi mbot ñem le baboñbéba ba ga héñha. Inyuki? Inyule mi nsômbôl kôna ndémbél i Yéhôva nu a “yôni ni ñem gwéha lôñni konangoo.” (Yakôbô 5:11) Yimbe lelaa ñôma Yôhanes a bi unda lôk kéé i ntén gwéha u. A tila le: “A bon bem batitigi, me ntilna bé i mam mana inyu boñ le ni boñ bañ béba. Ndi ibale mut a mboñ toi béba, di gwé nhôla yak Tata, mut a téé sép le Yésu Kristô.”—1 Yôhanes 2:1.
20. Kii di ga pôdôl i yigil i nsôk?
20 I ngéda mimañ mi mbomna ni i mut a mboñ béba, ngoo le ngim mangéda, kristen i nla tjél hiel ñem. Ha i ngéda i, ba nlama pémés nye i likoda. Kii mimañ mi mboñ i mbus ngéda? Di ga pôdôl i jam li i yigil i nsôk.
HIÉMBI 103 Batééda bémba—Bôt ntinak kiki makébla
a Ba bé sébél ndugi mimañ maa mini le juu li bikodlene. Ndi kiki bikééhene ni bikodlene bi yé ndik nson wada ikété minson ba ngwel, di ga gwélél ha bé i buk i.