1-2. (a) Lelaa Yéhôva a ntehe mut nu a nkôôba boñ béba? (b) Kii Yéhôva a mbémél baboñbéba?

 YÉHÔVA a neebe bé to limbe liboñok; a ñoo béba. (Tjémbi 5:​4-6) A mbem le di nôgôl matiñ mé ma ma yé ikété Bibel. Yéhôva a nyi le di yé bikwéha bi bôt, ni le di nla bé nôgôl nye i nya i yôni. (Tjémbi 130:​3, 4) Ndi i nlélém ngéda, a neebe bé ‘bayan Nyambe ba ba ngwélél konangoo yé i mbuma ñañ inyu boñ mam mabe ngi wonyuu.’ (Yuda 4) Bibel i mpôdôl “tjiba i bayan Nyambe” i gwét bi Armagédôn.​—2 Pétrô 3:7; Masoola 16:16.

² Ndi, Yéhôva a nsômbôl bé le mut nye ki nye a tjiba. Kiki di ntehe i gwigil bi ntagbe, Bibel i nkal le Yéhôva “a nsômbôl le bôt bobasôna ba pam i hiel miñem.” (2 Pétrô 3:9) Mimañ mi nkôna Yéhôva i ngéda mi noode hôla mboñbéba ni wongut yosôna i héñha maboñok mé ni i tiimba bana maada malam ni Yéhôva. Ndi baboñbéba bobasôna bé bon ba neebe mahôla ma. (Yésaya  6:9) Bape ba nke ni bisu i boñ béba tolakii mimañ mi nwaa bé hôla bo i hiel miñem. Kii i nlama bôña ha ngéda i?

“NI HÉYA BÉBA MUT”

3. (a) Inoñnaga ni Bibel, kii mimañ mi nlama boñ inyu mboñbéba nu a nhiel bé ñem? (b) Inyuki di nla kal le mboñbéba nyen a mpohol le ba héya nye ikété likoda?

³ I ngéda mboñbéba a ntam bé béba yé, mimañ mi gwé bé njel ipe, mi noñ ndigi maéba ma nlébna i kaat 1 Korintô 5:13 ma ma nkal le: “Ni héya béba mut ikété nan.” Di nla kal le, mboñbéba nyemede nyen a mpohol bikuu bi yé i kwél nye. A yé i bumbul i yom a a nsal. (Galatia 6:7) Inyuki di nkal hala? Inyule mboñbéba a ntjél héñha yak i mbus le mimañ mi noode hôla nye ngandak ngélé. (2 Bikiñe 17:​12-15) Maboñok mé ma ñunda le a ntjél nôgôl mambén ma Yéhôva.​—Ndiimba Mbén 30:​19, 20.

4. Inyuki ba yé ba legel le ba mpémés mboñbéba nu a ntjél hiel ñem i likoda?

⁴ I ngéda ba nhéya mboñbéba nu a ntjél hiel ñem ikété likoda, mimañ mi legel le i mut nu a ta ha bé Mbôgi Yéhôva. b Njômbi i nlegla u i ta bé le ba wéha mboñbéba nyuu. Ndi le lôk kéé i nôgôl mbén i Bibel i i nkal le: “Ni kiha bañ lôñni” i nya mut i, “ni je bañ to lôñni” nye. (1 Korintô 5:​9-11) Mabéhna ma ma yé inyu loñge yés. Ñôma Paul a tila le: “Ndék séñha i nhulus flawa yosôna.” (1 Korintô 5:6) Ibale ba mpémés bé mboñbéba nu a ntjél hiel ñem i likoda, bape ba nla hoñol le i ta bé nseñ i nôgôl mambén ma Yéhôva.​—Bingéngén 13:20; 1 Korintô 15:33.

5. Lelaa di nlama tehe mut ba nhéya i likoda, inyuki?

⁵ Lelaa di nlama yoñ mankéé nu ba mpémés i likoda? Tolakii di nlama bé bana maada ma bas bas ni nye, di nlama tehe nye kiki nnimlak ntômba, di nlama bé to lehel ñem inyu yé. Ntômba u nla nimil ndi i mbus ngéda u témb i bémba. Bigda le, i mankéé nunu a bi ti nyemede nkikip yak Yéhôva. Ngoo le a niñ ha bé inoñnaga ni matiñ ma Yéhôva nano, jon hala a nlona nye ngandak mandutu. (Ézékiel 18:31) Ndi kiki ngéda i ngi yii, Yéhôva a bak ki bebee i unda nye konangoo yé i mbuma ñañ, jon di mbot ñem le i mut nunu a ga témb yak Yéhôva. Lelaa mimañ mi nla hôla mboñbéba nu ba nhéya i likoda?

LELAA MIMAÑ MI NHÔLA I BÔT BA MPÉMÉS I LIKODA

6. Kii mimañ mi nlama boñ inyu hôla i mut ba mpémés i likoda?

⁶ Baa i ngéda ba mpémés mut i likoda ba ntjôô nye​—baa mimañ mi nhôla ha bé nye i témb yak Yéhôva? To jam! I ngéda mimañ mi ntoñle mboñbéba le ba ga héya nye i likoda, mi nkal ki nye mambe mam a nlama boñ inyu témb i likoda. Ndi mimañ mi ga boñ yak iloo ha. Libim li ngéda, mimañ mi ga kal nye le mi ga témb i tehe nye i mbus ngim ngéda inyu tehe ibale a nhéñha mahoñol. Ibale mboñbéba a  mbana ngôñ i tiimba bomna ni mimañ, mimañ mi ga ti nye makénd i hiel ñem ni i témb yak Yéhôva. To ibale a yé ngi hiel ñem ha ngéda i, mimañ mi ga tiimba bomna ni nye inyu ti nye makénd i hiel ñem.

7. Ngéda ba mpémés mankéé i likoda, lelaa mimañ mi nkôna konangoo i Yéhôva? (Yérémia 3:12)

⁷ Mimañ mi nkôna Yéhôva nu a ñunda i bôt ba mpémés i likoda konangoo. Kiki hihéga, i ngéda kôba, Yéhôva a bi bem bé le bon ba Israel ba hiel ndugi ñem inyu hôla bo. Ndi a bi yoñ bitelbene i kôôge bo bebee ilole ba nhiel ñem. Yigil i nyônôs iba i Nkum Ntat nunu, i ntoñol le Yéhôva a bi kal mpôdôl Hôséa le a nwéhél nwaa wé, a témb a yoñ ki nye i mbai yé tolakii a bé a ngi yii ikété béba ikeñi. Hala nyen Yéhôva a bi niiga litén jé. (Hôséa 3:1; Malaki 3:7) Kiki Yéhôva, mimañ mi nsômbôl le baboñbéba ba témb yak Yéhôva, mi mboñ ki kii yosôna mi nla inyu boñ le hala a lédél bañ bo i témb yak Yéhôva.​—Añ Yérémia 3:12.

8. Lelaa hihéga hi man nnimlaga hi ñunda ñem ngôô ni konangoo i Yéhôva? (Lukas 15:7)

⁸ Di bigda hihéga hi man nnimlaga di mpôdôl i yigil i nyônôs iba munu Nkum Ntat nunu. I ngéda isañ a bi tehe man wé, kunda yada a bi “ke ngwéé, a sambla nye, a sos nye limañ ni gwéha.” (Lukas 15:20) Yimbe le isañ a bi bem bé le man a bat nye nwéhél. Ndi isañ nyen a bi ke ngwéé i boma man wé inyule a bé gwés nye. Mimañ mi mboñ nlélém inyu bôt ba mpémés i likoda. Mi nsômbôl le ‘minimlak mi mintômba mi témb i mbai yap.’ (Lukas 15:​22-24, 32) Maséé ma yé i ngii i ngéda mboñbéba a ntémb i likoda, maséé ma yé yak hana isi.​—Añ Lukas 15:7.

9. Kii Yéhôva a nti baboñbéba makénd i boñ?

⁹ Kiki di ntip tehe, Yéhôva a nwas bé le baboñbéba ba ba nhiel bé miñem ba yégle ikété likoda. Ndi a nkôm bé bo mbus. A nsômbôl le ba témb. Béñge i yom Yéhôva a nôgda i ngéda baboñbéba ba nhiel ñem. I kaat Hôséa 14:4 a nkal le: “M’a mélés ndok yap. M’a gwés bo ni ñem wem wonsôna, inyule m’a unbene ha bé bo.” Kinje ndémbél ilam inyu mimañ mi mi nyéñ tehe le mut a bôdôl hiel ñem. Bibuk bini bi lama kwés babobasôna ba bi tjôô Yéhôva nkaa le a ngwés bo, a nsômbôl ki le ba témb i nyeni ibabé i lep ngéda.

10-11. Lelaa mimañ mi nla hôla i bôt ba bi pémés i likoda behee?

¹⁰ Kii di nla kal inyu i bôt ba bi héya i likoda behee, bebek hala a yé ngandak nwii len? Bahogi ipôla yap ba bi tjôô i béba i bi boñ le ba pémés bo i likoda. Bebek le ba mbigda ha bé ki to inyuki ba bi héya bo i likoda. To ibale hala a yé ngandak nwii len le ba bi héya mut i likoda, mimañ mi ga boñ biliya i yi hee i nya bôt i i nyééne. Mu mayuuga ma, mimañ mi ga soohe ni bo mi ti ki bo makénd i témb i likoda. Ndi kiki di nyi, ibale mut a ntégbaha ngandak nwii haa ni likoda, i ga bat le ba lédés nye i pes mbuu. Jon ibale a nkal le a nsômbôl témb i likoda, mimañ mi ga yoñ bitelbene le mankéé wada a tiimba nigil Bibel ni nye to ibale a yé ngi témb i likoda. Ndi mimañ nwon mi ga pohol njee a ga nigil Bibel ni nye.

¹¹ Mimañ mi noode kôna ndémbél  i konangoo i Yéhôva, jon mi nyéñ babobasôna ba bi tjôô Yéhôva inyu ti bo makénd i témb i nyeni. I ngéda mboñbéba a nhiel ñem, a tjôô maboñok mé mabe, ba nla timbis nye i likoda ibabé i lep ngéda.​—2 Korintô 2:​6-8.

12. (a) Imbe ngéda mimañ mi nlama yoñ yihe ngandak? (b) Inyuki di nlama bé hoñol le ngim baboñbéba i kôli bé ni konangoo i Yéhôva? (Béñge yak matila isi lipep.)

¹² Ngim mangéda i ga bat le mimañ mi yoñ yihe ngandak ilole mi ntimbis mut i likoda. Kiki hihéga, ibale i mut ba bi pémés i likoda a bi ôbôs mañge tole a bé ntjañgbene maliga tole a bi bos ni sobiina wé ngi njom i Bibel, i ga bat le mimañ mi ba nkwoog nkaa le a nhiel toi ñem. (Malaki 2:14; 2 Timôtéô 3:6) Ba nlama tat lôk kéé i likoda. Ndi di nlama yi le Yéhôva a yé bebee i neebe le to numbe mboñbéba nu a ntam toi béba yé, a tjôô maboñok mé mabe a  témb i nyeni. Tolakii mimañ mi nsômbôl ba nkwoog nkaa le i mut a mboñ béba ikeñi a nhiel toi ñem, mi nlama bé hoñol le kekikel i mut nu a nla bé kôhna konangoo i Yéhôva. c​—1 Pétrô 2:10.

KII LIKODA LI NLA BOÑ

13. Lelaa di nlama yoñ i mut mimañ mi nkodol ni i mut ba mpémés i likoda?

¹³ Kiki di ntehe i yigil i ntagbe, ngim mangéda mimañ mi nla legel le ba nkodol ngim mut. Ha ngéda i, di nla ke ni bisu i kiha ni nye inyule a ntam toi béba yé, a tjôô yak liboñok jé libe. (1 Timôtéô 5:20) A ngi yii mankéé i pes mbuu, a gwé ngôñ le lôk kéé i ti nye makénd i ke ni bisu i boñ loñge. (Lôk Héber 10:​24, 25) Ndi mam ma yé mahéñha ni mut ba nhéya i likoda. Di ‘nkiha ha bé’ ni i mut nu, di ‘nje bé to lôñni i nya mut i.’​—1 Korintô 5:11.

14. Mambe makidik kristen i nla yoñ mu maada mé ni mut ba nhéya i likoda? (Béñge yak titii.)

¹⁴ Ndi baa biniigana bi 1 Korintô 5:11 bi nkobla le i ngéda ba mpémés mut i ntôñ di nlama boñ wengoñle di ntehe bé nye? Heni. I yé maliga le di nlama ha bé kiha ni nye. Ndi inoñnaga ni kiññem yé, kristen i nla kit le i naña mut ba mpémés i ntôñ i makoda, ibale a yé mut wé lihaa tole a bé liwanda jé li ñemnyuu. Kii di nlama boñ ibale i mut nu a nlo i likoda? Behee di bé yéga bé i nya mut i. Yak hana, kristen i nla gwélél kiññem yé Bibel i niiga inyu yoñ makidik le i yéga i nya mut i tole heni. Hala a ga tééñga bé bôt bahogi i yéga i nya mut i tole i leege nye i makoda. Ndi di nlama bé kwel ni nye, di nlama bé to tégbaha ngéda i boñ mam mape ni nye.

15. Bonjee kaat i 2 Yôhanes 9-11 i mpôdôl? (Béñge yak minkéñék mi matila ni ño le “ Baa Yôhanes bo Paul ba bé pôdôl nlélém béba?”)

¹⁵ Bôt bape ba nla badba le, ‘Baa i mankéé a nyéga i nya mut i, a ‘nyoñ  bé ngaba mu minson nwé mimbe?’ (Añ 2 Yôhanes 9-11.) Hana, Bibel i mpôdôl batjañgbene maliga tole i bôt ba nhôñôs maboñok mabe. (Masoola 2:20) Jon, ibale mut a ntjañgbene maliga tole a nhôñôs maboñok mabe, mimañ mi ga yuuga bé i nya mut i. To hala, i nya mut i i nla hiel ñem. Ndi di ga yéga bé nye to naña nye i makoda ibale a yé ngi hiel ñem.

DI KÔNA ÑEM NGÔÔ NI KONANGOO I YÉHÔVA

16-17. (a) Kii Yéhôva a mbémél baboñbéba? (Ézékiel 18:32) (b) Lelaa mimañ mi nsal lôñ yada ni Yéhôva i ngéda mi noode hôla baboñbéba?

¹⁶ Kii di nigil munu Nkum Ntat nunu? Yéhôva a nsômbôl bé le mut nye ki nye a tjiba! (Añ Ézékiel 18:32.) A nsômbôl le baboñbéba ba sañgla ni nye. (2 Korintô 5:20) Inyu hala nyen ibôdôl i ngéda kôba Yéhôva a nwaa bé ti bagwélél bé ba ba bi tjôô nye makénd i hiel ñem ni i témb i nyeni. Mimañ mi likoda mi gwé nsima nkeñi i sal lôñ yada ni Yéhôva mu kiki mi nhôla baboñbéba i hiel ñem.​—Rôma 2:4; 1 Korintô 3:9.

¹⁷ Hégda maséé ma yé i ngii i ngéda baboñbéba ba nhiel miñem! Tata wés nu ngii le Yéhôva a nôgda maséé ma hiki ngéda nnimlak ntômba u ntémb i likoda. I ngéda di ñôt pék i ñem ngôô ni i konangoo i mbuma ñañ i Yéhôva, gwéha yés inyu yé i nkônde keñep.​—Lukas 1:78.