1. Inoñnaga ni kaat 1 Pétrô 5:2, umbe nsima mimañ mi gwé?

 MIMAÑ mi nlama yoñ ngéda ni mintômba mi Yéhôva. Mi ndiihe nsima mi gwé i gwélél lôk kéé yap i bôda ni i bôlôm, ngéda ba nsal ni ngui inyu ba “batééda mintômba ba ba. . . ntééda toi mintômba.” (Yérémia 23:4; añ 1 Pétrô 5:2.) Ñem u yé bés nyonok ni mayéga i bana i nya bôt i i makoda més!

2. Mambe mandutu mimañ minhogi mi mboma?

² Mimañ mi mboma ngandak mandutu mu nson wap. Kiki hihéga, i yoñ ndun ni likoda i mbat ngandak bisesema. Mañ wada i loñ Amérika le Tony, a nkal le, a bi nigil le a nlama yi minwaa nwé inyu nsoñgi bibôlô a neebe. A ntoñol le: “Ngéda himala hi COVID-19 hi bi bôdôl, me bééna ngandak bibôlô inyu tjek makoda ni likalô. Ndi tolakii me bé sal ngandak, bôlô i bé i nginda yii ngandak i boñ. Hala a bi boñ le me bééna ha bé ngandak ngéda inyu soñgol Bibel, yigil memede ni i soohe.” Mañ wada le Ilir, i loñ Kosovo, u bi boma ndutu ipe. Kiki a bé i homa gwét bi bé nayak, i bé nye ndutu i noñ maéba ntôñ u bé ti nye. A nkal le: “I bé béda me ñem ngui ngéda hikuu hi loñ hi bi ep me i ke hôla lôk kéé i bôda ni i bôlôm i i bé i homa gwét bi bé nayak kiyaga. Me bé kon woñi, i bak ki le maéba ba bi ti me ma bé nene wee ma téé bé.” Mankéé wada nu a yé missionnaire i loñ Asia le Tim, a nkal le: “Me bé pam bé i mélés i mam me bééna ngôñ i boñ inyu ngim kel. Ngim mangéda me bé ntombok kayéle i bé me ndutu i yoñ ndun ni lôk kéé i bôda ni i bôlôm.” Kii i nla hôla mimañ mi mi mboma minlélém mi mandutu?

3. Umbe nseñ bésbobasôna di ñôt mu kiki di nwan ndémbél i nkéés Gidéôn?

³ Mimañ mi nla nigil ngandak mam mu ndémbél  i nkéés Gidéôn. (Lôk Héber 6:12; 11:32) A bé ntat ni ntééda litén li Nyambe. (Bakéés 2:16; 1 Miñañ 17:6) Kiki Gidéôn, mimañ mi bi tééba inyu yoñ ndun ni litén li Yéhôva munu béba ngéda ini. (Minson mi baôma 20:28; 2 Timôtéô 3:1) Di nla ôt biniigana mu ñem nsôhga, suhulnyuu ni libak li manôgla li Gidéôn. Ngéda a bé yônôs nson wé, a bi hônba mandutu. Too di yé mañ tole heni, di nla ti mimañ nwés mayéga. Di nla nit bilôk kéé bini inyu bôlô yap i ngui.—Lôk Héber 13:17.

4. Lelaa Gidéôn a bi unda ñem nsôhga ni suhulnyuu?

⁴ Gidéôn a bé mut ñem nsôhga ni suhulnyuu. b I ngéda añgel i Yéhôva i bi kal nye le nyen ba mpohol inyu kobol litén jé i moo ma Lôk Madian, i mut suhulnyuu nunu a bi timbhe le: “Lôk yem i nlôôha ba ntitigi ikété lihaa li Manasé, yak ikété lihaa li tata, men me nlôôha ba ntitigi.” (Bakéés 6:15) A bi nôgda wee a nla bé gwel nson u, ndi Yéhôva a bé yi le a nla. Ni mahôla ma Yéhôva, Gidéôn a bi yônôs nson wé loñge ngandak.

5. Imbe ngéda i nla ba ndutu inyu mimañ i bana ñem nsôhga ni suhulnyuu?

⁵ Mimañ mi likoda mi mboñ biliya ikété mam momasôna ba mboñ i bana ñem nsôhga ni suhulnyuu. (Mika 6:8; Minson mi baôma 20:18, 19) Ba noode bé kadba inyu ngap yap ni inyu gwom ba mboñ; bibomb gwap bi ntômbôs bé bo kayéle ba kahal hoñol le ba kôli bé gwel nson u. Ndi ngim mangéda, mimañ mi nla boma mam ma ma nla boñ le i ba bo ndutu i unda ñem nsôhga ni suhulnyuu. Kiki hihéga, ngim mañ i nla neebe ngandak minson ndi a pam bé i yônôs nwo. I nla pam le ba yahal nye mu kii a ngwel ngim minson tole ba bégés nye inyu nson umpe. Lelaa ndémbél i Gidéôn i ga hôla mimañ i ngéda mi mboma i nya mandutu i?

6. Kii mimañ mi nla nigil mu ndémbél ñem nsôhga i Gidéôn? (Béñge yak titii.)

⁶ Bat mahôla. I mut a gwé ñem nsôhga a nyi minwaa nwé. Gidéôn a bééna ñem nsôhga jon a bé bebee i bat bôt bape  mahôla. (Bakéés 6:27, 35; 7:24) Mimañ mi mi gwé pék mi mboñ nlélém. Tony nu di mbôk di pôdôl a nkal le: “Me bé neebe minson nwomisôna ibabé i béñge too me nla yônôs nwo, inyule hala nyen ba bi néñés me. Ha nyen me bi kit le di ga tehe gwigil bi bi mpôdôl ñem nsôhga i bibégés bi ndap lihaa, me ti ki nwaa wem kunde le a kal me mahoñol mé. Me bi béñge ki i vidéô i i yé jw.org le “Niigana bape, ni Bôdôl bo ñem ni Kébha ki bo nson kiki Yésu.” Tony a bi bôdôl bat bôt bape le ba hôla nye i gwel minson a bééna. Bimbe bisai a bi kôhna? Tony a nkal le: “Bôlô i likoda i nke loñge, me gwé ki ngandak ngéda inyu lédés hémle yem.”

7. Lelaa mimañ mi nla nigle Gidéôn ibale ba nyahal bo? (Yakôbô 3:13)

⁷ U unup bañ ngéda ba nyahal we. I nla ki ba ndutu inyu mimañ i unda ñem nsôhga ngéda ba nyahal bo. Ndémbél i Gidéôn i nla ki hôla bo. Kiki a bé yi le a ta bé peles, ngéda Lôk Éfraim i bi yahal nye, a bi timbhe bo ni nwee nyensôna. (Bakéés 8:1-3) Gidéôn a bi unup bé. A bi emble bo ni ñemlima, a pôdôs ki bo ni bibuk bilam, hala a bi boñ le hiun hiap hi sôs. Mimañ mi mi gwé pék mi nkôna Gidéôn ngéda mi ñemble i bet ba nyahal bo, ba timbhege bo ni nwee nyensôna. (Añ Yakôbô 3:13.) Hala a mboñ le nsañ u ba ikété likoda.

8. Kii lôk kéé i ngwel minson likoda i nlama boñ i ngéda ba nti bo bibégés? Ti hihéga.

⁸ Boñ le Yéhôva nyen a kôhna bibégés inyu mam u mboñ. Ngéda bôt bape ba bé bégés Gidéôn inyule a bi yémbél Lôk Madian, a bi boñ le Yéhôva nyen a kôhna bibégés. (Bakéés 8:22, 23) Lelaa i lôk kéé i ngwel minson likoda i nla kôna ndémbél i Gidéôn? Ba nla boñ le Yéhôva nyen a kôhna bibégés inyu mam momasôna ba mboñ. (1 Korintô 4:6, 7) Kiki hihéga, ibale ba mbégés mañ wada inyu likeñge jé i niiga, a nla bigdaha lôk kéé le Yéhôva nyen a yé lingen li biniigana, tole a ngwélél ntôñ wé inyu niiga bés. Ngim mangéda, mimañ mi nla wanba inyu yi too ba niiga i nya i yé le ba tinde bôt bape i ti Yéhôva bibégés, tole ba ntinde bôt i ti bo lipém. Di béñge ndémbél i mañ wada le Timothy. Ngéda ba bi tip téé nye mañ u likoda, Timothy a bé a ngwés a nti minkwel mi mbamba ngandak. A nkal le: “Majubul ma nkwel wem ni dihéga me bé gwélél bi bé bi ba nténdéé, bi ledek i nok. Bôt bape ba bé béna ti me bibégés inyu jam li. Ngoo le hala a bé boñ le baemble ba bok mahoñol map i ngii yem he bé ikété Bibel, to Yéhôva.” Timothy a bi sôk tehe le a nlama héñha likeñge jé inyu niiga kayéle bôt ba bok bañ mahoñol i ngii yé. (Bingéngén 27:21) Bimbe bisai a kôs? A ntoñol le: “Ngandak lôk kéé i bi kal me lelaa minkwel nwem mi bi hôla bo i yémbél ngim mandutu, i hônba manoodana tole i kôôge bebee ni Yéhôva. Me yé maséé ngandak ngéda me ñemble nya bibañga ini iloo i ngéda me nyen ba bé tinak bibégés bi.”

9. Imbe ndutu Gidéôn a bi boma inyu ba manôgla ni i unda ñem ngui? (Béñge titii i lipep li bisu.)

⁹ Ndék ngéda i mbus le ba bi téé Gidéôn nkéés, i bi ba nye ndutu ngandak i ba manôgla ni i unda ñem ngui. Ba bi ti nye nson u u bé ndutu ngandak, a bé lama bôk juu li Baal li isañ. (Bakéés 6:25, 26) I mbus ha, ngéda a bi kot mintôñ  mi gwét, Nyambe a bi kal Gidéôn letee ni ngélé iba le a suhus nsoñgi wé u bisônda. (Bakéés 7:2-7) Sôk i nsôk ni ñem mau, Yéhôva a bi ti Gidéôn oda le a leñ bo gwét.—Bakéés 7:9-11.

10. Imbe ngéda i nla ba ndutu inyu mañ i ba manôgla?

¹⁰ Mimañ mi likoda mi nlama ba “bebee i nôgôl.” (Yakôbô 3:17) Mañ u u yé manôgla u noñ i yom bitilna ni ntôñ u Yéhôva u nkal. Hala nyen a nti bôt bape ndémbél ilam. Ndi to hala, ngim mangéda i nla ba nye ndutu i ba manôgla. Tole i nIa nene nye wengoñle biniigana ba nti bi yé ngandak, ni le bi mpala héñha. A nla ki hoñol le biniigana bipe bi téé bé. Tole ba nla bat nye le a gwel ngim nson i nla boñ le ba gwel nye, ba ha nye i mok. Lelaa mimañ mi nla kôna ndémbél i manôgla i Gidéôn ha ngéda i?

11. Kii i nla hôla mimañ i ba manôgla?

¹¹ Tibil nok biniigana, u noñ ki gwo. Nyambe a bi kal Gidéôn lelaa a bé lama bôk juu li bisesema li isañ, hee a bé lama oñ juu li bisesema li mondo inyu Yéhôva, ni imbe nuga a bé lama ti kiki sesema. Gidéôn a badba bé le bimbe bini biniigana, a bi noñ ndik gwo. I len ini, ntôñ u Yéhôva u nti mimañ biniigana ni njel biléta, minlegla ni maéba bi bi nhôla bés i tééda maada malam ni Yéhôva ni i ba mbôô. Di nlôôha gwés mimañ mi mi noñ biniigana bi ntôñ u Nyambe ni ñem wap wonsôna. Hala a mboñ le likoda jolisôna li kôhna bisai.—Tjémbi 119:112.

12. Lelaa mimañ mi nla noñ bibañga bi yé i kaat Lôk Héber 13:17 i ngéda ntôñ u nlona mahéñha i biniigana ba bi bôk ba ti?

¹² Ba bebee i héñha. Bigda le Yéhôva a bi kal Gidéôn le, a huuha bebee le bisônda gwé gwobisôna. (Bakéés 7:8) A bé le a badba le: ‘Baa me nlama toi boñ i jam li? Baa m’a pam i yémbél gwet?’ Ndi Gidéôn a boñ bé hala, a bi nôgôl Nyambe. I len ini, mimañ mi nla kôna ndémbél i Gidéôn mu kii mi noñ maéba ntôñ u nti bés. (Añ Lôk Héber 13:17.) Kiki hihéga i nwii 2014, Juu li bakena ntôñ li bi ti biniigana bi mondo inyu hee moni mi maoñ ma mandap ma Ane ni mandap ma makoda makeñi mi nlama lôl. (2 Korintô 8:12-14) Makoda ma bé ha bé nyégsaga i saa ibale ba ôñôl mo ndap Ane. Maselna ni hala, makoda ma ma nkoñ ’isi ma bé lama gwañna moni nwap inyu nit maoñ ma ntôñ ni nkoñ ’isi wonsôna. I ngéda José a bi nok hala, a hoñol le i jam li li ga ba ndutu, a kal le: ‘To ndap Ane yada i ga ôña bé. Hala a nla bé bôña nyono i bés ni.’ Kii i bi hôla José i noñ biniigana bini? A nkal le: “Bibañga bi yé i kaat Bingéngén 3:5, 6 bi mbigdaha me le me bôdôl Yéhôva ñem. Mam ma bi yik tagbe loñge ngandak! Di bi oñ ndik bé ngandak mandap ma Ane, ndi di nigil ki  i ti makébla kayéle i ngandak bahogi ba gwé i yônôs i ndék bape ba nti.”

13. (a) Gidéôn a bé nkwoog nkaa ni kii? (b) Lelaa mimañ mi nla kôna ndémbél i Gidéôn? (Béñge yak titii.)

¹³ Yônôs sômbôl i Yéhôva ni ñem ngui. Gidéôn a bi nôgôl Yéhôva tolakii a bé kon woñi, a yik le ba nla nol nye. (Bakéés 9:17) I mbus le Yéhôva a bi lédés nye, Gidéôn a bi yi ntiik le Nyambe a ga hôla nye i tat litén jé. Mimañ mi mi yé i homa ba nsôñga nson wés, mi nkôna ndémbél i Gidéôn. Ni ñem ngui, ba ntééda makoda, ba ken-ga nson likalô tolakii ba nla gwel bo, ba bôdôl bat bo mambadga, bape ba nla nimis bôlô yap, ba bép yak bo. c I njiiha ikeñi, mimañ mi ga bana ngôñ ni ñem ngui inyu nôgôl biniigana mi ga kôs. Kiki hihéga, biniigana inyu yi lelaa ba legel nwin u bikééhene u u yé kiki nop matanga makeñi, ni i yom di ga bana ngôñ i boñ inyu pei gwét bi Gôg nu Magôg.—Ézékiel 38:18; Masoola 16:21.

14. Inyuki Gidéôn a bééna ngôñ ni mban?

¹⁴ Nson u nkéés i Gidéôn i bé bat mban. I ngéda Lôk Madian i bi ke ngwéé i u ba bé jo gwét, Gidéôn a bi noñ bo letee ni i nsôsôgô u Yisreel mu manjel momasôna ma nke nyoo i lom Yordan, bebek le mbok yosôna i bé lipan in lipan. (Bakéés 7:22) Baa Gidéôn a bé lama telep ha i Yordan? To jam! To hala kii ba bé nwaak, nye ni 300 bôt ba bi lela Yordan, ba ke ni bisu i noñ bo. Sôk i nsôk, ba bi gwel bon ba Madian, ba bép bo gwét.—Bakéés 8:4-12.

15. Inyuki mañ u gwé ngôñ ni mban ngim mangéda?

¹⁵ Ngim mangéda mañ u nla ba nwaak i pes minsôn, i mahoñol, mañ u nla ba nwaak ngandak inyu gwel minson nwé mi likoda ni yoñ ndun ni lihaa jé. I nya ngéda i, lelaa mimañ mi nla kôna ndémbél i Gidéôn?

16-17. Kii i bi hôla Gidéôn i bana mban, mimañ mi nla ba nkwook nkaa ni kii? (Yésaya 40:28-31) (Béñge yak titii.)

 ¹⁶ Bôdôl Yéhôva ñem le a ga ti we ngui. Gidéôn a bééna botñem le Yéhôva a ga ti nye ngui, Nyambe a bi wéha bé nye nyuu. (Bakéés 6:14, 34) Gidéôn ni bôt bé ba bé noñ bini bikiñe biba bi Lôk Madian ni makôô, ki le bikiñe bi bi bé kil i ngii kamél. (Bakéés 8:12, 21) Ndi ni mahôla ma Nyambe ba bi ada bo, ba yémbél yak bo gwét. Kiki Gidéôn, mimañ mi nla bôdôl Yéhôva ñem, Nyambe nu “a nwaa bé, a ntomb bé to.” Ngéda ba ga bana ngôñ ni ngui, a ga ti bo yo.—Añ Yésaya 40:28-31.

¹⁷ Di yoñ hihéga hi Matthew, a yé i Comité de liaison hospitalier. Kii i bi hôla nye i kena nson wé ni bisu tolakii a bé nwaak? Matthew a nkal le: “Me bi tehe bibañga bi Filipi 4:13 bi nyônôl me. Ngéda me bé nôgdaga le me yé nwaak le me nla ha bé me boñ yom yo ki yo, me bé me soohe ni ñem wem wonsôna, me yemhe Nyambe le a ti me ngui i mbéda me inyu hôla lôk kéé. Mu mangéda ma, me bé me nôgda mbuu u Yéhôva u nti me ngui, u hôla me i sal ni mban.” Kiki Gidéôn, mimañ mi nsal ni ngui i yoñ ndun ni litén li Yéhôva tolakii hala a ta bé bun. Jon, mi nlama yi minwaa nwap, mi nlama ki bana ñem nsôhga, mi yik le mi nla bé boñ mam momasôna. Ibale mi mbat Yéhôva mahôla, mi nla ba nkwook nkaa le a ga ti bo ngui i mbéda bo inyu gwel nson wap.—Tjémbi 116:1; Filipi 2:13.

18. Inyu bigda i yom di ntehe, lelaa mimañ mi nla kôna Gidéôn?

¹⁸ Mimañ mi nla ôt biniigana bilam mu ndémbél i Gidéôn. Mimañ mi nlama unda ñem nsôhga ni suhulnyuu mu bibôlô bi neebe, yak i ngéda bôt bape ba nyahal bo tole ba mbégés bo inyu mam ba mboñ. Mimañ mi nlama ba manôgla, ba ban-ga ñem ngui, téntén inyule lisuk li hiai hini li nkôôge bebee. Ba nlama ki ba nkwoog nkaa le to imbe ndutu ba mboma mu nson wap, Nyambe a nla ti bo ngui. Ibabé set, di yé maséé ni batééda bémba bana ba ba nsal ni ngui, di nke ki “ni bisu i diihe mintén mi bôt mini.”—Filipi 2:29.