1-2. Imbe ndutu bikristen bi mboma len kiki i ngéda Lôt?

 NGÉDA di ntehe lelaa i bôt ba nkoñ ’isi ini ba niñ, di nôgda nlélém jam Lôt, mut a téé sép nu ngéda kôba a bé nôgda. Bibel i nkal inyu yé le: “Maboñok mabe ngi wonyuu ma bôt ba nyan mbén ma bé tééñga [nye] i ñem,” inyule a bé yi le Tata wés Nungingii a ñoo maboñok mabe. (2 Pétrô 2:7, 8) Kiki Lôt a bé gwés Nyambe, a konok nye woñi, hala a bi tinde nye i tjél kôna maboñok mabe ma bôt ba bé kéña nye. Yak bés i len ini, di yé nkéñaga ni bôt ba ba ngwés bé noñ matiñ ma Bibel, to diihe mo. Ndi to hala, di nla ke ni bisu i bana maboñok malam ibale di nwaa bé gwés Nyambe, di nigil ki i kon nye woñi.—Bingéngén 14:2.

² Inyu hala nyen Yéhôva a nti bés makénd, a lédhak bés ni njel kaat Bingéngén. Bikristen gwobisôna, bôlôm ni bôda, boñge ni mimañ mi bôt, bi nla toi ôt nseñ ni maéba malam di ga léba mu i kaat Bingéngén.

3. Inoñnaga ni kaat Bingéngén 17:3, ti njom yada i i nlama tinde bés i sôñ ñem wés? (Béñge yak titii.)

³ Njom yada i i nlôôha nseñ i i ntinde bés i sôñ ñem wés i yé le, Yéhôva a nwan miñem. Hala a nkobla le a ntehe ndik bé bés kiki bôt bape ba ntehe bés, ndi a ntehe yaga i yom di yé ikétékété. (Añ Bingéngén 17:3.) A ga gwés bés ibale di nyônôs mahoñol més ni maéba mé ma pék ma ma nti niñ. (Yôhanes 4:14) Hala a ga boñ le mahoñol ni maboñok mabe ma Satan ni nkoñ ’isi wé, ma yumus bañ bés. (1 Yôhanes 5:18, 19) Gwéha yés ni lipém di nti Yéhôva bi ga kônde nañ ibale di nke ni bisu i kôôge nye bebee.  Kiki di ngwés bé unbaha Tata wés, di ga oo ndik bé maboñok mabe, ndi yak mahoñol ma ma nla tinde bés i boñ béba. Ibale i mpam le di bana ngôñ i boñ béba, di ga badba le: ‘Lelaa me yé le me ban ñem, me unbaha Nyambe nu a bi lôôha gwés me?’—1 Yôhanes 4:9, 10.

4. Lelaa i kon Yéhôva woñi i bi hôla sita yada i yémbél manoodana?

⁴ Sita yada i loñ Krôasia le Marta, i bé boma ndutu le nyuu i bé bat nye mahôla. A bi tila le: “Hala a bé bé jam li ntomb to ndék i gwel nyuu yem le i tinde bañ me i nok mane ma ndék ngéda ma béba. Ndi woñi u Yéhôva u bi sôñ me.” b Lelaa woñi u Nyambe u nla pam i boñ hala? Sita Marta a nkal le, a bi ôt pék i bikuu a bé le a bana ibale a yoñ makidik mabe. Yak bés di nla boñ nlélém jam. Ikété bikuu di yé le di bana, bi bi nlôôha bibe bi yé le, Yéhôva a ga lôôha nok njôghe, di ga la ha bé to ke ni bisu i bégés nye kiki a ngwés.—Bibôdle 6:5, 6.

5. Kii di nigil mu jam li bi pémél mankéé Léô?

⁵ Ngeñ di nkon Yéhôva woñi, di ga boñ bé béba, i mbus di kahal kaaba. Mankéé Léô nu a yé loñ i Kôñgô a bi nôgda le hala a yé maliga. Nwii mina i mbus sôble yé, a bi bôdôl bana bilôñ bibe. A bé hoñol le ibale nyemede a mboñ bé mam mabe, wee a ta bé hôs i bisu bi Yéhôva. Ndi hala a bi nom bé, bilôñ bibe bi bi boñ le a kahal hiôô, i mbus a kwo i malal ma nyega. Ha nyen a bi yoñ ngéda i ôt pék, a bigda yom bagwal bé, ba ba bé bikristen ba bi niiga nye. A béñge libak jé, lelaa a bi nimis maséé mé. Mam ma bi sôk lelaa? A bi tôde ’ilo. A ke i tehe mimañ inyu bat bo mahôla, a témb yak Yéhôva. I len ini, a  yé maséé i ba mañ u likoda, ni nsañal nu tôbôtôbô.

6. Dihéga di bambe bôda iba di ga tehe nano?

⁶ Nano di wan kaat Bingéngén pes 9, i het ba mpôdôl pék ni bijôñ kiki bôda iba. (Hégha ni Rôma 5:14; Galatia 4:24.) Mu kii di ga wan i pes Bibel i, hoñol kiki nkoñ ’isi u Satan u yé nayak ni malal ma nyega, yak ni bititii bi malal. (Éfésô 4:19) Jon i nlôôha ba nseñ le di kee ni bisu i nigil i kon Nyambe woñi, ni i ke haa ni béba. (Bingéngén 16:6) Ñ, bésbobasôna di nla ôt nseñ ni biniigana bi nlôl mu i pes kaat i. Ngéda di ñañ yo, di ntehe le i bôda bana boba ba naña i bôt ba gwé bé pék i lo i boni. A yé ndik wee hiki muda mu a nkal le: ‘Loga i ndap yem inyu je.’ (Bingéngén 9:1, 5, 6, 13, 16, 17) Lisuk li bôt ba neebe i jôp i ndap muda pék li yé maselna ni li bet ba njôp yak jôñ muda.

7. Inoñnaga ni kaat Bingéngén 9:13-18, kii i mpémél i bet ba neebe nsébla u jôñ muda? (Béñge yak titii.)

⁷ Di wan nsébla u “jôñ muda.” (Añ Bingéngén 9:13-18) Ibabé wonyuu a nsébél bôt ba gwé bé yi, a kalak le: “Lona hana,” ngand i mbel. Ndi i bet ba neebe nsébla wé ba yé ba sôk lelaa? “Ndap yé i yé nyonok ni mim.” Bebek ni mbigda le ngélé bisu bé ini le kaat Bingéngén i gwélél i nya titii i. I mbéhe yak bés le di yoñ yihe ni “muda ngandak mimbok,” yak ni “muda ndéñg.” Ba nkal le: “Ndap yé i nsôôbe ikété nyemb.” (Bingéngén 2:11-19) Bingéngén 5:3-10 a mbéhe bés le di yoñ yihe ni “muda ngandak mimbok numpe” nu “makôô mé ma nsôs i njel nyemb.”

8. Mambe makidik di nlama yoñ?

⁸ I bet ba ntagbe i nloñ, ba emblege “jôñ muda” a mpot, ba nlama pohol i yom b’a boñ: Baa ba ga neebe nsébla wé, tole ba ga tjél wo? I yé i pam le yak bés di boma ngim jam i i mbat le di yoñ minlélém mi makidik. Kiki hihéga ngéda mut a nlop bés inyu malal ma nyega, tole ibale di yé sal i internet ndi titii i malal i nyek, kii di ga boñ?

9-10. Mambe manjom ma ntinde bés i keñgle malal ma nyega?

⁹ Di gwé bañga manjom ma ma ntinde bés i keñgle malal ma nyega. Kaat Bingéngén i ntoñol le i “jôñ muda” ini i nkal le: “Malép ba nip ma yé malam.” Mana “malép ba nip” ma yé kii? Bibel i mbéna pôdôl malal ipôla muda ni munlôm ba ba yé  mbiibaga kiki malép ma nsune. (Bingéngén 5:15-18) Nwaa bo nlôm ba yé kunde i nok lingoñoo li maada ma muda ni munlôm ikété libii. Ndi hala a yé maselna ni “malép ba nip.” Mo ma yé malal ma nyega, ma mut a nlama ke ngwéé. Ma mbéna bôña bisôsôli, ndik wee i bet ba mboñ mo, ba yé i nip. “Malép ba nip” ma nkônde nene malam ibale i bet ba nip mo ba nhoñol le mut to wada a ga yi bé i béba ba mboñ. Kinje tembee! Yéhôva a nyi mam momasôna. W’a tehe bé béba jam kiki i nimis maada malam ni Yéhôva. (1 Korintô 6:9, 10) Ndi bikuu bipe bi yé.

¹⁰ Malal ma nyega ma nti yak bés wonyuu, ma mboñ le di nôgda wee di nhee bé to yom, i nla pam yak le di yoñ jém bés ngi kôôba, tole ma nlona lisanda ikété ndap yés lihaa. I ntiik, i yé toi njel pék i keñgle ndap i “jôñ muda,” ni i tjél je bijek gwé. U héya le di ga wo i pes mbuu, i yé i pam le ngandak bôt i i nkil mu njel i, i kwo kon, i wo ki ngéda ngi kola. (Bingéngén 7:23, 26) Inyu hala nyen kaat Bingéngén pes 9 nlôñ 18 i mal hana le: “I bôt muda nu a naña i nyeni ba yé ikétékété soñ.” Kii i mboñ ni le ngandak bôt i mpohol i njel i, ki le i nlona bo bikuu?—Bingéngén 9:13-18.

11. Inyuki i nlôôha ba béba i béñge bititii bi malal?

¹¹ Hiandi hiada hi hi mbéna gwel ngandak bôt hi yé i béñge bititii bi malal. Inyu ngandak bôt, béba i ta bé i béñge gwo. Ndi ki le, i béñge bititii bi, i yé béba jam ngandak, i nwéha nyuu, i yilhak bés minkol. Bititii bi nyega bi, bi nla yén bés mahoñol ntandaa ngéda, i ta bé bun i sas gwo i boña wés. U héya hala, lem i béñge bititii bi malal i mélés bé mahoñol mabe, ndi i nlôñôs mo. (Kôlôsé 3:5; Yakôbô 1:14, 15) Ñ, ngandak bôt i i bi bôdôl béñge bititii bi malal, i bi sôk kwo i malal ma nyega.

12. Kii di nla boñ inyu unda le di nkeñgle bititii bi nsuu ngôñ malal?

¹² Kii di nlama boñ ibale titii i malal i nyek i ngéda di yé gwélél téléfôn yés tole ordinater? Di nlama lep su homa numpe, di héya yo. Di ga pam i boñ hala ibale di mbigda le, i jam li nlôôha nseñ inyu yés i yé le di tééda maada malam ni Yéhôva. Bititii bipe bi ta bé bititii bi malal, ndi bi nla suu ngôñ malal. Inyuki di nlama keñgle bititii bi? Inyule di gwé bé to ngôñ i hégda bés di nlal ni mut ñem wés. (Matéô 5:28, 29) Mankéé wada le David nu a yé mañ likoda i loñ i Tailand a nkal le: “Me mbadba le: ‘To ibale bititii bini bi ta bé bititii bi malal, baa Yéhôva a yé le a ba maséé ibale me nke ni bisu i béñge gwo?’ I yoñ ngéda i ôt pék hala i nhôla me i yoñ makidik malam.”

13. Kii i nla hôla bés i yoñ makidik malam?

¹³ Di nla pam i yoñ makidik malam ibale di nigil i kon Yéhôva woñi. I kon Yéhôva woñi i yé “bibôdle bi pék” tole lipigil li “pék.” (Bingéngén 9:10) Bibôdle bi kaat Bingéngén pes 9 bi ntibil unda hala, mu kii i ngwélél titii i muda inyu pôdôl “bañga pék.”

14. Umbe nsébla umpe kaat Bingéngén 9:1-6 i mpôdôl?

¹⁴ Añ Bingéngén 9:1-6. Yom di ñañ mu minlôñ mi i yé nsébla u nlôl toi ni Lingen tole ni lipigil li bañga pék, Nhek wés nu nyetama a gwé pék. (Bingéngén 2:6; Rôma 16:27) I ndap ba mpôdôl ha bibôdle i yé soso ndap ni mél  masaambok. Titii i i nhôla bés i nok le Yéhôva a yé Nyambe nu likap nu a nleege ba bobasôna, ba ngwés bana pék.

15. Nyambe a naña bés i boñ kii?

¹⁵ Yéhôva a nlôôha likap, a nti ibabé nwaa. Hala a nene mu i titii kaat Bingéngén pes 9 i ngwélél inyu pôdôl “bañga pék,” mu kii i hégha yo ni muda. I nkal le muda nu a nkôôba nuga yé, a mpôdna ki wai yé, a tek yak téblé. (Bingéngén 9:2, buk isi lipep.) Minlôñ 4 ni 5 mi nkal le: “Muda nunu a nkal i bet ba nhañ pék le: ‘Loga, ni je bret gwem.’” Inyuki di nlama neebe nsébla i jôp i ndap bañga pék, inyu je nuga yé? Inyule Yéhôva a gwé bé ngôñ le yom ibe i pémél bon bé, ndi le ba bana pék. A gwé bé ngôñ le di lék ndugi inyu yi le ngim jam i yé ibe, mbus di kahal tam. Jon “a ntéédana bôt ba téé sép bañga pék.” (Bingéngén 2:7) Ngéda di nigil i kon Yéhôva woñi, hala a ntinde bés i gwés lémél nye. Ha ngéda i, di ñemble maéba mé, di bii ki mo bibôñôl.—Yakôbô 1:25.

16. Kiki Alain a bé kon Nyambe woñi, lelaa hala a bi hôla nye i yoñ makidik malam, mam ma bi sôk lelaa?

¹⁶ Di béñge lelaa i kon Nyambe woñi i bi hôla Alain i yoñ makidik malam. I mankéé nunu a yé mañ likoda, a bak malét suklu, a nkal le: “Ngandak mawanda ma bôlô i mbéñge bisinima bi malal inyu nigil lelaa malal ma nlama bôña.” Ndi Alain a bé yi le hala a ta bé loñge jam. A nkal le: “Kiki me bé kon Nyambe woñi, hala a bé boñ le me béñge bañ bisinima bi, tjagda! Me bi yoñ ki ngéda i toñle mawanda mem ma bôlô inyuki me nyoñ makidik ma.” Alain a bé noñ maéba ma “bañga pék,” a bé “kil i njel i bañga yi.” (Bingéngén 9:6) Ngéda mawanda mé ma bôlô ma bi tehe makidik ma ngui a nyoñ, ma bi bôdôl nigil Bibel, ma nlo yak makoda.

17-18. Bimbe bisai i bet ba neebe nsébla u “bañga pék” ba nkôs, imbe botñem ba gwé inyu dilo di nlo? (Béñge yak titii.)

¹⁷ Yéhôva a ngwélél dihéga di bôda bana boba inyu unda bés jam di nla boñ inyu bana niñ ilam dilo di nlo. I bet ba neebe nsébla u “jôñ muda” ba mbok mahoñol map i “mane” ba nla kôs ibale ba noode malal ma nyega bisôsôli. Ñ, mane ma ma yé inyu ndék ngéda hanano, ndi ba nyi bé i yom i mbem bo dilo di nlo. Maboñok map ma ga boñ le ba mal “ikétékété soñ.”—Bingéngén 9:13, 17, 18.

¹⁸ Kinje maselna ni i bet ba neebe nsébla  u “banga pék”! Ba nje loñge loñge i pes mbuu i len ini, jon ba yé maséé hiki ngéda. (Yésaya 65:13) Yéhôva a nkal ni njel mpôdôl Yésaya le: “Emblana me loñge, jena ki gwom bilam, ha nyen ni ga nok line li yom i yé toi bañga bijek.” (Yésaya 55:1, 2) Di nigil i gwés i mam Yéhôva a ngwés, ni i oo i mam a ñoo. (Tjémbi 97:10) Di nlôôha ki ba maséé inyule di nla naña bôt bape i lo i ôt nseñ ni “bañga pék.” A yé ndik wee di yé “bahoma ba nyôgi ba tison, [di londok] le: ‘A bé ba ni gwé bé yi, lona hana.’” Nseñ bés ni i bôt di naña di nla kôs u ta ndik bé inyu nano. Bisai bi bi nom, inyule di ga “niñ” i boga ni boga ibale di nke ni bisu i “kil i njel i bañga yi.”—Bingéngén 9:3, 4, 6.

19. Inoñnaga ni kaat Ñañal 12:13, 14, mambe makidik di nlama yoñ? (Béñge yak minkéñék mi matila le “ Woñi u Nyambe u yéne bés nseñ.”)

¹⁹ Añ Ñañal 12:13, 14. Di nlama yoñ makidik le di ga ke ni bisu i kon Nyambe woñi inyu boñ le hala a sôñ ñem wés, a hôla ki bés i bana maboñok malam munu dilo di nsôk dibe dini. I woñi u u ga ti yak bés makénd i ke ni bisu i naña ngandak bôt i yéñ “bañga pék” ni i ôt nseñ ni yo.