Ngandak batéé likalô i ngwélél JW Library^® inyu kôôba makoda, ba yé ki maséé i ngéda nyiña u nkena bo kunda yada i gwigil bi Nkum Ntat nu yigil. Ndi i yé i pam le Nkum Ntat nu yigil a bana minkwel mimpe mi mi nlédés bés i pes mbuu. Lelaa u nla léba minkwel mi, u ôt ki nseñ ni nwo i ngéda u ngwélél JW Library?

• Mamélél ma hiki yigil i Nkum Ntat, man ño nkwel wada a yé a ba ha isi man ño nkwel le “Autres articles dans ce numéro.” Ibale u nhihe wo, u ntémbna we miño mi minkwel nwominsôna mi mi bi pam mu Nkum Ntat nu. Ngéda a nyibla, béñge miño mi minkwel ni nomba i mapep i het u nla léba i gwigil bi. Ha u nla ni hihe ño nkwel u gwé ngôñ i añ.

• Ngéda u yé i JW Library, homa wada a yé mu le: “Kii i ntip pam?”, u nla yoñ Nkum Ntat nu mondo w’a koba ha. Ngéda u mal yoñ nye, yibil nye inyu tehe too u gwé minkwel nwominsôna.