1. Kii di nlama boñ inyu pei i hilo hi Yéhôva?

 I NGÉDA Bibel i mpôdôl “hilo hi Yéhôva,” i mpôdôl i ngéda Yéhôva a ga tjé baoo bé, a tohol litén jé. I ngéda kôba Yéhôva a bi kogse matén mahogi. (Yésaya 13:1, 6; Ézékiel 13:5; Sôfônia 1:8) I dilo tjés, “hilo hi Yéhôva” hi mbôdôl ni tjiba i Babilôn Nunkeñi, hi mal ni gwét bi Armagédôn. Inyu pei “hilo” hi, di nlama kôôba nano. Yésu a bi niiga le di nlama ndik bé ba nkôôbaga inyu “njiiha ikeñi,” ndi di nlama ki “yén péé ibabé waa” inyu hilo hi.​—Matéô 24:21; Lukas 12:40.

2. Umbe nseñ di nla ôt i kaat 1 Tésalônika?

² Mu kaat yé bisu mbuu mpubi u bi tinde nye i tilna lôk kéé i Tésalônika, Paul a ngwélél ngandak dihéga inyu hôla bikristen i ke ni bisu i bem hilo hikeñi hi bikééhene hi Yéhôva. Paul a bé yi le hilo hi Yéhôva hi bé lama bé lo ha ha ha. (2 Tésalônika 2:1-3) A bi ti lôk kéé makénd le ba kôôba inyu hilo hi ndik wee hi bé lama lo i kel i bé noñ ha, yak bés di nla noñ maéba ma. Di noode le wan lelaa a bi toñol i mam mana: (1) Lelaa hilo hi Yéhôva hi nlama lo? (2) Bonjee ba ga tjiba i hilo hi? (3) Lelaa di nla kôôba inyu pei?

3. Lelaa hilo hi Yéhôva hi nlo kiki mut wip a nlo juu? (Béñge yak titii.)

³ “Kiki mut wip a nlo juu.” (1 Tésalônika 5:2) Hala a yé hihéga hi bisu ikété dihéga diaa di di ngwéélana inyu éba lelaa hilo hi Yéhôva hi nlo. Bôt ba wip ba mbéna lo juu, i ñem mau i ngéda bôt ba mbem bé bo. Hilo hi Yéhôva hi  ga nyek kunda yada. Hi ga puhe ngandak bôt. Hi nla yak puhe Bañga bikristen inyule mam ma ga pala bôña. Maselna ni bibéba bi bôt, bés di ga tjiba bé.

4. Inyuki hilo hi Yéhôva hi yé kiki nkôôga?

⁴ “Nlélém kiki nkôôga u mpuhe muda jém.” (1 Tésalônika 5:3) I muda a yé bebee ni gwal a nla bé yi i ngeñ nkôôga u mbôdôl nye. A gwé bé pééna yo ki yo, a nyi le kel yada, nkôôga w’a bôdôl. I ngéda nkôôga u mbôdôl, u mpuhe muda jém, u nsôhge, letee a gwal. Nlélém jam, di nyi bé kel to ngeñ hilo hi Yéhôva hi ga bôdôl. Ndi di nyi ntiik le hi ga loo. Hilo hi bikééhene hi ga kwél bibéba bi bôt, ñ, mut nye ki nye a ga la bé so.

5. Inyuki njiiha ikeñi i yé kiki jiibe li maye ma kel?

⁵ Kiki jiibe li maye ma kel. Hihéga hi nyônôs aa hi Paul hi mpôdôl ki bôt ba wip ba ba nip juu. I nene le hana, Paul a nhégha hilo hi Yéhôva ni jiibe. (1 Tésalônika 5:4) Bôt ba wip ba ba nip juu ba nla ba ba pégi kayéle ba tehe bé ngéda i ntagbe. Kel i nla puhe bo, ba bak i wip. Hala a boñ le mapubi ma kel ma yelel bo. Nlélém jam ni njiiha ikeñi, i ga yelel i bôt ba yé kiki bôt ba wip, ba ba nyééne mu jiibe, ba boñok mam ma ma nlémél bé Yéhôva. Maselna ni bo, bés di nla ba nkôôbaga i ngéda di ntjél boñ mam ma ma nlémél bé Yéhôva, di kenek ni bisu “i bana ñem nlam ikété mam momasôna, lôñni telepsép ni maliga.” (Éfésô 5:8-12) Paul a ngwélél ki dihéga diba inyu pôdôl i bôt ba ga pei bé.

6. Lelaa ngandak bôt i nke ’ilo? (1 Tésalônika 5:6, 7)

⁶ “Bôt ba nke ’ilo.” (Añ 1 Tésalônika 5:6, 7.) Paul a nhégha i bôt ba ga pei  bé i hilo hi Yéhôva ni bôt ba nke ’ilo. Mam ma ntagbe ipañ yap, ni i ngéda i ntagbe, bi nkal bé bo to jam. Ba nôgda bé to le jam li tôbôtôbô li yé i bôña, to ba ntoñle bo, ba nok bé. Ngandak i len ini i nke ’ilo i pes mbuu. (Rôma 11:8) Ba nhémle bé i mam ma ñunda le di niñil i “dilo di nsôk,” ni le njiiha ikeñi i yé bebee. I ngéda mahéñha makeñi ma mbôña nkoñ ’isi, hala a yé a tôdôl ngôñ i mam ma mbuu yak bahogi, hala a yé a tinde bo i emble ñañ nlam u Ane. Ngandak ipôla yap, iloole ba yén péé, ba ntiimba beha ’ilo. Yak ba ba nhémle le hilo hi bikéheene hi yé, ba nhoñol le hi nginda yii haa ngandak. (2 Pétrô 3:3, 4) Ndi bés di nyi le hiki kel i ntagbe, i nlôôha ba nseñ le di yén péé.

7. Inyuki i bôt Nyambe a ga tjé ba yé kiki bôt ba nhiôô?

⁷ “Bôt ba nhiôô.” Ñôma Paul a nhégha i bet Nyambe a ga tjé ni bôt ba ba nhiôô maog. I ngéda bôt ba nhiôô maog, ba nyi ha bé to yom i ntagbe ipañ yap. Ba nla bé to yoñ makidik malam. Nlélém kiki mut a nhiôô maog, hala nyen bibéba bi bôt ba ñemble bé mabéhna ma Nyambe. Ba mpohol njel i nkena i tjiba. Ndi bikristen bi nlama hiôm ni pék, bi nhiôô bañ. (1 Tésalônika 5:6) Nyimam ma Bibel wada a ntoñol le: “Mut nu a yé péé, a yé mut nu a yé nwee. A gwé litehge lilam li mam, jon a mpubla bé. A nla tibil ôt pék mu inyu yoñ makidik malam.” Inyuki di nlama yén nwee, di bak nkôôbaga? Inyu boñ le di jôp bañ i mam ma m’bô, ndi to yoñ ngaba i minyiñgha mi bôt ba loñ. Kiki hilo hi Yéhôva hi nkôôge bebee, hala nyen ba mba ba nhihe bés, hihe ni hihe le di yoñ ngaba mu mam ma. Di lôôha bañ tôñ, di badbaga kii di ga boñ. Mbuu Nyambe u nla hôla bés i ba nwee, i ba péé ni i yoñ makidik malam.​—Lukas 12:11, 12.

8. Bimbe bititii Tésalônika 5:8 i ngwélél inyu unda bés bilem bi ga hôla bés i yén péé ni i hiôm ni pék? (Béñge yak titii.)

⁸ “Di haba ben tôl . . . ni . . . kôñgô.” Paul a nhégha bés ni bisônda bi bi yé nkôôbaga, ñeñgbak inyu jo gwét. (Añ 1 Tésalônika 5:8.) Sônda i nlama ba nkôôbaga i jo gwét to imbe ngéda. Hala a yé nlélém ni bés. Di nlama ba nkôôbaga i bem hilo hi Yéhôva, di bak di hééba ben tôl i hémle, ni gwéha. Di bak di hééba ki botñem kiki kôñgô. Bilem bi mbuu bi, bi nla bane bés nseñ ngandak.

9. Lelaa hémle i nsôñ bés?

⁹ Ben tôl i nsôñ ñem sônda. Hala ki nyen hémle ni gwéha bi nsôñ ñem wés i pes mbuu. Bi ga hôla bés i gwélél Nyambe ni i noñ Yésu. Hémle i nkwés bés nkaa le Yéhôva a ga bom bés ibale di ngwélél nye ni ñem wés wonsôna. (Lôk Héber 11:6) I ga hôla bés i téñbe ni Ñéga wés Yésu to ibale di nlama hônba manoodana. Di nla lédés hémle yés kayéle di pam i hônba mandutu, i ngéda di nwan dihéga di bôt ba niñ i dilo tjés, ba ba ntéñbe ni Nyambe tolakii ba mboma ngolba ni liyep. Di nla ki keñgle le di kwo bañ i hiandi hi njômbi nkus, i ngéda di nkôna ndémbél i bôt ba ba bi suhus likala jap li niñ inyu bii gwéñe bi Ane kiki jam li bisu i niñ yap. b

10. Lelaa gwéha inyu Nyambe ni mut wés libôk bi nhôla bés i hônba?

 ¹⁰ Gwéha inyu Nyambe i nhôla bés i yén péé ni i ke ni bisu i hiôm ni pék. (Matéô 22:37-39) Gwéha i nhôla bés i ke ni bisu i téé likalô to ibale hala a nla lona bés ndééñga. (2 Timôtéô 1:7, 8) Kiki di ngwés i bet ba ngwélél bé Yéhôva, jon di nke ni bisu i añle bôt ba libôga jés ñañ nlam ni njel likalô li mandap ni mandap, ni njel téléfôn ni biléta. Di gwé botñem le kel yada, bôt bés ba libôk ba ga héñha, ba bôdôl boñ loñge.​—Ézékiel 18:27, 28.

11. Lelaa gwéha di ngwés bilôk bikéé i nhôla bés? (1 Tésalônika 5:11)

¹¹ I ngéda Bibel i nkal le di nlama gwés mut wés libôk, hala a mbéñge yak bilôk bikéé gwés. Di nla unda i nya gwéha i, i ngéda ‘di ntina makénd bés ni bés. Di lédhanaga ki bés ni bés.’ (Añ 1 Tésalônika 5:11.) Kiki bisônda bi bi yé i gwét bi mbéna sal ntôñ, hala nyen yak bés di ntina makénd. I ngéda gwét bi nai, i nla pam le sônda i tidbe manyañ, ndi a mboñ bé hala ni ntjeñ. Nlélém ni bés, di ta bé le di nôgha bilôk bikéé gwés njôghe ni ntjeñ, tole di kit le ibale wada a bi nôgha bés njôghe, yak bés di nsaa. (1 Tésalônika 5:13, 15) Di nla ki unda le di ngwés lôk kéé, i ngéda di nti lôk kéé i i ñéga bés lipém. (1 Tésalônika 5:12) I ngéda Paul a bi tila kaat 1 Tésalônika, likoda li, li bé ngi bana to nwii wada. Bebek le mimañ mi mi bé éga jo, mi bé boñ dihôha ngandak. Ndi to hala, ba bé ba kôli le ba ti bo lipém. Kiki njiiha ikeñi i nkôôge bebee, di ga bana ngôñ ni maéba ma mimañ mi likoda jés iloo i ngéda kôba. I nla pam le njel i ba ha bé i kôhna maéba ma hikuu hikeñi, tole hikuu hi loñ yés, jon i nlôôha ba nseñ le di nigil i gwés ni i ti mimañ lipém nano. To kii i mpam, di kee ni bisu i hiôm kiki bôt ba pék. Di bok bañ mis i ngii bibomb gwap, ndi di tehe i bôt ba hémle bana kiki i bet Yéhôva a ngwélél ni njel Kristô.

12. Lelaa botñem i nsôñ mahoñol més?

 ¹² Kiki kôñgô i nsôñ ño sônda, hala nyen botñem i nsôñ mahoñol més. I ngéda botñem yés i gwé ngui, di nyi le hiki yom i nkoñ ’isi unu u nti, i yé yañga. (Filipi 3:8) Botñem yés i nhôla bés i yén nwee. di bak nkôôbaga. Babiina bana le Wallace bo Laurinda ba ba ngwel nson i Afrika, ba bi unda hala. Wada, ngwal wé a bi wo, sonde aa i mbus, yak nuu numpe, ngwal wé a wo. Himala hi Covid-19 hi bi boñ le ba laa bé témb i mbai yap inyu ba ni mahaa map. Wallace a ntila le: “Botñem i bitugne i bi hôla me i hoñol bo. Di bé hoñol bé bo kiki ba bé i dilo tjap di nsôk hana ’isi, ndi kiki b’a ba i dilo tjap di bisu i mbok yondo. Botñem i nhôla me i ba nwee i ngéda nduña i gwé me tole me nhoñol i bôt me bi nimis.”

13. Kii di nla boñ inyu bana mbuu mpubi?

¹³ “Ni lém bañ hié hi mbuu u Nyambe.” (1 Tésalônika 5:19) Paul a nhégha mbuu mpubi ni hié hi hi nloñ ikété yés. I ngéda di gwé mbuu Nyambe, di yé nyonok ni makénd ni liyômba inyu boñ loñge. Di gwé ki ngui i sal inyu Yéhôva. (Rôma 12:11) Kii di nla boñ inyu bana mbuu mpubi? Di nla soohe inyu bat wo, di nla ki nigil Bañga i Nyambe. Di jôp i ntôñ wé u mbuu mpubi u ñéga. Hala a ga hôla bés i hôlôs “litam li mbuu.”​—Galatia 5:22, 23.

14. Inyu kônde bana mbuu mpubi u Nyambe, kii di nlama keñgle? (Béñge yak titii.)

¹⁴ I mbus le Nyambe a nti bés mbuu mpubi wé, di nlama yoñ yihe le “di lém bañ hié hi mbuu u Nyambe.” Nyambe a nti ndik i bet ba gwé mahoñol malam ni maboñok malam mbuu mpubi wé. Ibale di nke ni bisu i bana mahoñol ma nyega, Nyambe a ga ti bé bés mbuu mpubi wé. (1 Tésalônika 4:7, 8) Inyu boñ le di kônde bana mbuu mpubi, ‘di nlama bé to yan mbañ.’ (1 Tésalônika 5:20) Munu nlôñ Bibel unu, “mbañ” i yé manwin Nyambe a bi tinde bôt i tila ni njel mbuu  mpubi wé. Ikété manwin ma, di nla sima hilo hi Yéhôva, ni i jam lini le, i ngéda i yii i yé nhubuk. Di hoñol bañ le hilo hi Yéhôva tole Armagédôn hi ngi yii haa ngandak, tole hi ga loo di ma wo. Maselna ni hala, di nlama niñ hiki kel kiki bo le hilo hi hi gwé ni moo, di bak di pégi hiki kel ni “maboñok ma ndéñbe i gwés Nyambe.”​—2 Pétrô 3:11, 12.

15. Kii di nla boñ inyu boñ le bitembee ni prôpagand i mimbuu mimbe bi yumus bañ bés? (1 Tésalônika 5:21)

¹⁵ Ndék ngéda, i bet ba nkolba nyambe ba ga kal le: “Nsañ u yé, woñi u ta ha bé!” (1 Tésalônika 5:3) Prôpagand i mimbuu mimbe i mba homa nyensôna hana ’isi, i ga yumus ngandak bôt. (Masoola 16:13, 14) Ndi mam ma ga ba lelaa inyu yés? I mam ma, ma ga yumus bé bés ibale di nyoñ ngéda ‘i wan mam momasôna.’ (Añ 1 Tésalônika 5:21.) I buk Grikia i ngwéélana ina le ‘wan,’ i ngwéélana inyu éba lelaa ba bé boñ inyu yi too gôl tole silba i bé bañga. Jon di nlama wan i mam di nok ni ma di ñañ inyu yi too ma yé toi maliga. Hala a bé nseñ ngandak inyu bôt ba Tésalônika, hala a nlôôha ki ba nseñ inyu yés inyule njiiha ikeñi i nkôôge bebee. Iloole di neebe hiki yom bôt ba nkal, tole i mam di ñemble, tole ma di ñañ, di nlama gwélél ngap yés i hek pék inyu yi too ma nkiha ni i yom Bibel ni ntôñ u Yéhôva u nkal. Mu kiki di mboñ hala, prôpagand tole bitembee bi mimbuu mimbe bi ga yumus bé bés.​—Bingéngén 14:15; 1 Timôtéô 4:1.

16. Imbe botñem i ngui di gwé, kii hala a ntinde bés i boñ?

¹⁶ Litén li Yéhôva li ga pei i njiiha ikeñi. Ndi inyu hiki wada ikété yés, di nyi bé lelaa yani a ga ba. (Yakôbô 4:14) Ndi to hala, too di niñ ipam i njiiha ikeñi tole di nwo ilole i nkola, di ga kôhna bom yés le niñ boga, ibale di ntéñbe. Minhook mi bikristen mi ga ba i ngii ni Kristô. Mintômba mimpe mi ga ba hana ’isi, hi ma yila paradis. Bésbobasôna di bok mis i botñem ilam di gwé, di bak nkôôbaga inyu hilo hi Yéhôva!