Lem lam i i nlôôha mahee iloo diamañ
Ibôdôl behee, bôt ba ndiihe diamañ kiki tik ngok. Diamañ ipe, i bi hee diye ngandak. Ndi baa i mis ma Djob, ngim mam ma nlôôha ba mahee iloo i tik ngok ini le diamañ tole tik ngok ipe?
Higanus, nu a bé ñañal nu muda nu ngi sôblana, nu a niñ i Arménia, a bi léba kaat i nti mut kunde i ke i loñ ipe. Ikété kaat i, a bi koba gwom bi nti kunde i yoñ moni i ndap moni ni ngandak moni. A kal nlô wé i jam li, yak nye a bé ñañal nu a yé ngi sôblana.
Babiina ba, ba bé ba gwé ngandak mandutu ma moni ni mapil; ndi ba bi kit le ba ntimbis moni mi yak i mut jôl li bé ntilga i kaat i nti mut kunde i ke i loñ ipe. I mut gwom bi bi nimil ni lihaa jé, ba bé nhelek kiyaga. Higanus bo nlôm ba bi toñol le libak jap li ba maliga li bé lôl ni yigil yap i Bibel. Ba bi gwélél libak jap inyu pôdôs lihaa li inyu Mbôgi Yéhôva, ni ti bo bikaat gwés.
Lihaa li li bé gwés ti Higanus moni inyu bom nye, ndi a bi tjél. I kel i bé noñ ha, ñwaa mut nu a lo i yuuga bo i mbai yap. Inyu unda le lihaa jé li bé maséé ni i jam ba bi boñ, a soohe Higanus i neebe hilonde hi diamañ a bé ti nye.
Kiki lihaa li, ngandak bôt i yé le i ba nhelek ni libak li ba maliga li Higanus bo nlôm, ba bi unda. Ndi baa yak Yéhôva a bé le a ba nhelek? Lelaa a bi tehe libak jap li ba maliga? Baa biliya gwap inyu ba maliga bi bé toi nseñ?
BILEM BILAM BI BI YÉ MAHEE ILOO NKUS
Mandimbhe ma mambadga ma, ma nlet bé. Njom i yé le bagwélél ba Djob ba nhémle le i numus bilem bilam bi Yéhôva bi nlôôha ba mahee i mis mé iloo diamañ, gôl tole gwom bipe. Ñ, litehge li Yéhôva inyu jam li yé tik tole mahee, li yé mahéñha ni litehge li libim li bôt ba binam. (Yésaya 55:8, 9) Inyu yés, i bés ba di yé bagwélél bé, i kôna bilem bilam bi Yéhôva i yé jam li mahee iloo mam momasôna.
Di nla tehe le hala a téé, ngéda di mbéñge i jam Bibel i nkal inyu jam li bana pék ni tibil yi. Kaat Bingéngén 3:13-15 i nkal le: “Mut a nléba pék a yé kimasoda, yak ni mut a ntibil yi, inyule nseñ wé u nloo nseñ u nlôl silba, yéñe yé ki iloo bañga gôl. I yé tik iloo perl, gwom gwobisôna bi yé le bi kon we ngôñ to yada i nkola bé ni yo.” Ntiik, pééna yo ki yo i ta bé le Yéhôva a ndiihe i nya bilem bilam iloo nkus wo ki wo.
Ndi, kii di nla kal inyu lem i ba maliga?
Yéhôva nyemede a yé maliga; a yé “nu a mpot bé bitembee.” (Titô 1:2) Ni le a bi tinde Paul ni njel mbuu mpubi i tilna lôkkéé i i bé Lôk Héber i hiai hi bisu le: “Soohana inyu yés, inyule di nyimbe le kiññem yés i yé loñge, lakii di nsômbôl hiôm loñge ikété manjel momasôna.”—Lôk Héber 13:18.
Yésu Kristô a yigle bés loñge ndémbél i ba maliga. Di hoñol kiki hihéga, ngéda Prisi Ikeñi Kaifa a kal le: “Me nkumul we soñ ni Nyambe nu niñ, le u kal bés, too u yé Kristô, Man Nyambe.” Yésu a bi kal le nyen a bé Mésia, to hala kii maliga a bé pot, ma bé le ma boñ le Ntôñ bakéés bakeñi ba kal le a bé ñôbôs Nyambe jôl, li bé ki le li kena nye i nyemb.—Matéô 26:63-67.
Di nla kal ni lelaa inyu yés? Baa di ga ba bôt ba maliga ibale di nla kôs ngim nseñ ngéda di mpot bé maliga momasôna, tole ngéda di nhéñha maliga to ndék?
I BA MALIGA—JAM LI NTOMB BÉ
I yé mbale le, hala a nlet i ba maliga munu dilo di nsôk, inyule ngandak bôt i 2 Timôtéô 3:2) Ngéda likala li niñ li loñ li nsôs, tole bibôlô bi nene bé, i ba maliga i nyila ndutu ngandak. Ngandak bôt i nhoñol le ba yé kunde i nip, i boñ mandon, tole i boñ mam mape ma ma ñunda le ba ta bé maliga. Mahoñol ma, ma yé ntjamak ni mbok yosô kayéle, inyu ngandak yap, ngéda u nla kôs nkus inyu ngim jam, i ba maliga i gwé ha bé nseñ. Yak ngim bikristen i bi yoñ makidik mabe mu jam li, ba bi “je bôt nseñ,” ba nimis i jôl lilam ba bé ba gwé ikété likoda.—1 Timôtéô 3:8; Titô 1:7.
‘ntôñ ndigi bomede, ba gwéhék moni.’ (Libim li bikristen li nkôna Yésu. Ba nok le bilem bilam bi yé nseñ iloo to limbe lingwañ jo ki jo. Jon, bikristen bi bi yé boñge ba wanda ba nip bé biyi i suklu inyu net makékse. (Bingéngén 20:23) I yé mbale le, i ba maliga li nlona bé bibom hiki ngéda, kiki i ba inyu Higanus. Ndi to hala, i ba maliga i yé loñge jam i mis ma Djob, i nla ki hôla bés i ke ni bisu i tééda kiññem i mpôp, i i yé toi mahee.
Ndémbél i Gajik i nhôla bés i nok i jam li. A nkal le: “Ilole me nyila kristen, me bé salak i homa bôlô nunkeñi i het nwet wés bôlô a bé keñgle i saa tas, a bé yelel bé nseñ wonsôna di bé kôs i homa wés bôlô. Kiki me bé nkena mam i homa bôlô, me bé lama ti nkottas makala pati inyu boñ le a yib mis i ngii maboñog ma mandon ma homa wés bôlô. Jon, me bi sôk yiba kiki nu a ta bé maliga. Ngéda me bi nigil maliga, me bi tjél ke ni bisu i boñ hala, tolakii ba bé saa me ngandak moni. Mbus, memede me bi yibil homa wem bôlô. Ibôdôl hilo hi bisu, me bi boñ mapep momasô ma homa wem bôlô, me saa ki tas yosôna.”—2 Korintô 8:21.
Gajik a ntoñol le: “Me bi nimis pes nkus me bé kôs, jon i bi kahal ba nledek jam i jés lihaa jem. Ndi, me yé maséé ngandak nano. Me gwé kiññem i mpôp i bisu bi Yéhôva. Me yé ndémbél ilam inyu bon bem ba wanda iba ba bôlôm, me bi kôs ki mbegee i tôbôtôbô ikété likoda. I bôt me ni bo di nsal ni bakottas, ba nyi me kiki mut maliga.
YÉHÔVA A YÉ LIÑGEN LI MAHÔLA
Yéhôva a ngwés i bet ba nlémés biniigana gwé ni njel biliya ba mboñ inyu sal bañga yé bilem, lôñni lem i ba maliga ipôla yap. (Titô 2:10) Mbuu mpubi u bi tinde Kiñe David i tila le: “Me bé mañge, ndi hanano me yé mañ mut; ndi me ntehge bé me le mut a téé sép a nkida, to mbôô yé le i nyagal koga.”—Tjémbi 37:25.
I jam li bi pémél muda hémle le Ruth i nit i jam li. A bi adbe nyôgôl wé Naômi i mbus, ilole a tjôô nye biuni gwé. Ruth a bi ke letee ni i loñ Israél, i homa a bé le a bégés bañga Djob. (Ruth 1:16, 17) Ngéda ba bi pam i Israél, Ruth nu a bé muda bôlô, a bak ki maliga, a bi toohe loñge loñge kiki Mbén i bé tinak pôla ha i ngéda i. Inoñnaga ni yom David a kôs mbus ngéda, Yéhôva a bi nwas bé Ruth bo Naômi ikété liyep. (Ruth 2:2-18) Yéhôva a bi ti yak Ruth iloo koga i bé i kôli ni nye hiki kel. A pohol nye i ba sôgôsôgôl nu Kiñe David nu muda, yak ni nu Mésia nu likak!—Ruth 4:13-17; Matéô 1:5, 16.
Ngim bagwélél ba Djob i nla bana ndutu i léba ndék bigwel moo bi bi nla hôla bo inyu niñis bôt bap ba lihaa. Ilole ba yéñ njel i ntomb, ndi i i téé bé sép, ba nliya i sal ni ngui ni ñem wap wonsôna. Hala Bingéngén 12:24; Efésô 4:28.
nyen ba ñunda ni le ba ndiihe mbôm bilem bilam bi Djob, yak lem i ba maliga, iloo mam mape momasôna.—Nlélém kiki Ruth nu kôba, bikristen ikété nkoñ isi ba ñunda le ba nhémle le Yéhôva a gwé ngui i hôla bo. Ba mbii botñem yap yosôna i Nwet nu a bi bôn le: “M’a yôi yaga bé me we; to yék we kekikel.” (Lôk Héber 13:5.) Yéhôva a bi unda ngandak ngélé le a nla, ni le a ga hôla ki i diyeyeba ba ba yé maliga hiki ngéda. A nyônôs mbônga wé i ti bés koga i kôli ni bés hiki kel.—Matéô 6:33.
Ñ, bôt ba binam ba nla diihe tik ngok ini le diamañ tole gwom bi mahee bipe. Ndi, di nla ba nkwoog nkaa le i mis ma Tata wés nu ngii, libak jés li ba maliga ni bilem gwés bilam bipe bi nlôôha ba mahee iloo tik ngok yo ki yo!
I ba maliga i mboñ le di tééda kiññem i mpôp, ni le di bana makénd i pot i likalô