Ba bé titii i mintôñ mi gwét mi biañgel i ngii bi bi bi yoñ ngaba i tjé Yérusalem, ni bi bi ga yoñ ki ngaba i tjiba i béba hiai hi Satan hini i Armagédôn. Inyuki litehge li mondo li, li kôli?

Mbus le Ezékiel a tehe bibéba bi mam bi bé bôña i tison matjañg i Yérusalem ilole i ntjiba i ñwii 607 B.N.Y., a bi kôs yiinda i mam ma bé lama kena Yérusalam i tjiba. A tehe bôt basamal ni tjil yap bôt i woo. A tehe ki mut wada ikété yap nu a bé “a héba loñge mboñ” ni ‘pôs tiñté i matila ntéñék i likas.’ (Ezékiel 8:6-12; 9:2, 3, MN) Ba kal mut nunu le: “Lôô mu nkoñ, ikété Yérusalem, ndi u yimbe bôt mbom, ba yaga ba ñumnde ni siida inyu mam momasôna ma mbôña ikété yé, ma ma nsuñgaha ñem.” Mbus, i bôlôm ba bééna tjil bôt i woo ba bi kôs oda i nol i bet bobasôna ba bé ikété tison, ba ba bééna bé yimbne. (Ezékiel 9:4-7) Kii i yiinda ini i niiga bés? Njee a yé mut a bééna pôs tiñté i matila ntéñék i likas?

Mbañ ini, i bi tiba i ñwii 612 B.N.Y., biyônôl gwé bi bisu ki bi bé ngéda mintôñ mi gwét mi Babilôn mi bi tjé Yérusalem​—jam li bé lama bôña ñwii mitan mbus (hala wee i ñwii 607 B.N.Y.). Yéhôva a bi nwas le mintôñ mi gwét mi Babilôn mi tjé Yérusalem. (Yérémia 25:9, 15-18) Hala a bôña inyule Yéhôva a bi gwélél bo inyu kokse litén jé li li bé tjañgap. Ndi, bôt bobasôna bé bon ba bi tjiba. Bôt ba telepsép ba bé lama bé tjiba lôñni bibéba bi bôt. Ni gwéha, Yéhôva a bi yoñ bitelbene inyu sôñ Lôk Yuda i i bé neebe bé i mam mabe ma bé bôña i tison Yérusalem.

Ezékiel a bé lama bé yoñ ngaba i nson i mage bôt i mbom, to i tjé bôt. Maselna ni la, biañgel gwon bi bé lama éga i tjiba i. Jon ni njel mbañ ini, di nla tehe i yom i bé tagbe i ngii, ha ngéda i. Yéhôva a bi om ndik bé biañgel gwé inyu éga tjiba i bibéba bi bôt, ndi yak inyu bagal bôt ba téé sép inyu tohi. *

Di bé toñol behee le biyônôl bi yiinda ini i ngéda yés bi yé le: I mut a bééna pôs tiñté i matila ntéñék i likas a yé minhook mi ngi yii hana isi. Di bé hoñlak le i bet ba neebe likalô jés ba nkôs yimbne i tohi nano. Ndi, i ñwii mi ntip tagbe, mam ma ñunda loñge loñge le, mahéñha ma mbéda mu nlômbi ndoñi i. Inoñnaga ni yom i yé ntilbaga i kaat Matéô 25:31-33, Yésu nyen a yé mut nu a nkéés bôt. A nti mbagi i nsôk ngéda njiiha keñi y’a bôdôl, ha nyen a’ bagal bôt ba yé kiki mintômba inyu tohi, ni i bet ba yé kiki kembee inyu tjiba.

Jon, kii di nigil mu yiinda i Ezékiel? I ndék yosô, mam ma-tan:

1. Ndék ngéda, ilole Yérusalem a tjiba, Ezékiel a bé sal kiki mut faa i nlélém ngéda ni Yérémia, kiki Yésaya a boñ i bisu bi ngéda. I len ini, Yéhôva a ngwélél man juu li bagwélél ba ba yé minhook inyu jés litén jé, ni béhe bôt bape ilole njiiha keñi i mbôô (hala wee bôdôl). Jon, bôt ba ndap Kristô bobasô ba nlama yoñ ngaba i nson i béhe bôt.​—Matéô 24:45-47.

2. Ezékiel a bi yoñ bé ngaba i mage bôt inyu tohi; to bagwélél ba Djob i len ini ba gwé bé jam mu. Ba nlegel ndik ñwin u Djob nleglak, ba béhge ki bo le lisuk li hiai hini hi yé bebee. Biañgel gwon bi ñéga nson u.​—Masoola 14:6.

3. I dilo di Ezékiel, mut nye ki nye a kôs bé  yimbne i mbom yé, yimbne i i ntéa mis. Hala a yé ki maliga i len ini. Kii bôt ba nlama boñ i len ini inyu kôs yimbne (i mbuu) i tohi? Bôt ba gwé ngôñ i neebe likalô li ntéa i len ini, i engep libak li bikristen, i ti bomede nkikip yak Yéhôva, ni i téñbe i nit lôk tata i Kristô. (Matéô 25:35-40) I bet ba mboñ mam mana b’a kôs yimbne i tohi ngéda njiiha keñi i nlo.

4. I len ini, mut a bééna pôs tiñté i matila ntéñék i likas a yé Yésu Kristô. I njiiha keñi, nyen a ga mage limut likeñi li bôt a ga kit le ba mpôna mintômba. Ha nyen, ba ga la niñ mba ni mba hana isi.​—Matéô 25:34, 46. *

5. I len ini, bôt basamal ba bé ba gwé tjil yap bôt ba yé mintôñ mi gwét mi biañgel mi Yésu a ñéga i ngii. Ndék ngéda, ba ga tjé biloñ bi nkoñ isi, ba mélés ki béba yosôna hana isi.​—Ezékiel 9:2, 6, 7; Masoola 19:11-21.

Biniigana di ñôt munu yiinda ini bi nlédés botñem yés le Yéhôva a ga tjé bé bôt ba téé sép lôñni bibéba. (2 Pétrô 2:9; 3:9) I nhôñlaha ki bés le, nson wés u likalô u yé nseñ ngandak i len ini. Hiki mut a nlama nok mabéhna ilole lisuk li nlo!​—Matéô 24:14.