1. Imbe njom i tôbôtôbô di gwé i ba maséé?

KINJE maséé i nok manwin ma mahol ma ntôñ Yéhôva i len ini! I nwii ntagbe, di ntégbaha hiki sôñ iloo 10 000 000 gwigil bi Bibel. Hala a ñunda toi le bagwélél ba Djob ba mbéyés mapubi map! Ni hoñol ki didun di bôt di bi leege i Bilôp bi Nwet. Ni i njel i, ba bi yi gwéha Djob a unda bôt ba binam ngéda a ti binoñ.​—1 Yôhanes 4:9.

2, 3. (a) Limbe jam li nsôñga bé bés i ‘bai kiki tjôdôt’? (b) Inoñnaga ni bibuk bi Yésu di nléba i kaat Matéô 5:14-16, kii di ga wan munu yigil ini?

² Ikété nkoñ isi, bagwélél ba Yéhôva ba mpot ngandak dilémb. Ndi, hala a nsôñga bé bés i bégés Isañ wés Yéhôva ikété adna. (Masoola 7:9) Too di mpot himbe hilémb, to di yiine hee, di nla ‘bai kiki tjôdôt hana nkoñ ’isi.’​—Filipi 2:15.

³ Mahol di ntehe, i adna i yé ipôla yés, ni biliya di mboñ inyu yén péé i pes mbuu bi nti Yéhôva lipém. Munu yigil ini, di ga tehe lelaa hala a mpam i bôña​—Añ Matéô 5:14-16.

4, 5. (a) U héya likalô, kii ipe di nla boñ inyu béyés mapubi més? (b) Bimbe bisai di nla kôs ngéda di yé liyômba? (Béñge titii i bibôdle.)

⁴ Nkum Ntat nu hilo 1 hi sôñ Hilônde i nwii 1925, u bé kal mu yigil yé i i bééna ño nkwel le “Mapubi ma nyek i jiibe” le: “Mut to wada ikété yés, a ta bé le a téñbe ni Nwet, tole a ba maliga munu dilo di nsôk tini . . . he mah le a yéñ manjel inyu béyés mapubi mé. A nla pam i boñ hala ngéda a añle matén ma nkoñ isi ñañ nlam, ni ngéda a nhiôm manjel ma mapubi.” I yé ntiik le, i añal i ñañ nlam ni yilha bôt banigil bi yé njel yada di ngwélél inyu béyés mapubi. (Matéô 28:19, 20) Di nla ki ti Yéhôva lipém ni njel maboñok més malam. Bôt ba yé mambai map, ni bôt ba ntagbe nloñ ba ntehe maboñok més. Lem i yéga bôt ni makénd, ni nwemla ngéda di mboma bo i nla niiga bo njee di yé, ni umbe ntén Djob di mbégés.

⁵ Yésu a kal banigil bé le: “Kii ni njôp ndap, yégnana yo.” (Matéô 10:12) Libôga het Yésu ni baôma bé ba bé béna téé likalô, bôt ba bééna lem i leege bakén. Ndi i len ini, i lem i ntôl ha bé. To hala, i ba minyaô ngéda di ntoñle nwet mbai njom i mayuuga més i ga hôla bés i suhus woñi wé, ni hiun a nla bana. I nôlôs mut i yé i ba loñge njel inyu bôdôl nkwel. Hala a yé a ba ki maliga inyu bilôk bikéé bi bôda ni bi bôlôm bi bi mbéna yoñ ngaba likalô li mbamba, ni likalô li tafel bikaat. Ngéda di nyoñ ngaba ni ntén likalô u, di ga yimbe le bôt ba mbéna neebe likalô jés ngéda di nwemla, ni ngéda di nyéga bo ni makénd. Hala a nla tinde bo i kôôge tafel tole kak bikaat bebee inyu yoñ bikaat. Libak jés li minyaô li nla yak hôla bés i bôdôl nkwel.

6. Lelaa babiina ba ba yé ñunuk ba nkéñbaha nson wap?

⁶ I loñ Ngisi, mankéé wada bo nwaa, ba ba yé ñunuk, ni ba makon ma ntééñga, ba nla bé téé likalô li mandap ni mandap. Jon ba bi kit le ba mbéyés mapubi map ha bisu bi mbai yap. Ba mbii bikaat ngii téblé yap inyu boñ le ngéda bagwal ba nlo yoñ bon bap i suklu i i yé bo bebee, ba tehe gwo. Ni njel i nyen, ngandak bagwal i ma kôs kaat ini le Les jeunes s’interrogent​—Réponses pratiques, Volumes 1 et 2, ni bon ba bikaat bipe. Nsañal wada ikété likoda jap, nu a yé muda a mbéna lo i sal ni bo. Libak jé li minyaô, ni li babiina bana, li bi boñ le ngwal wada a neebe yigil i Bibel.

7. Lelaa di nla hôla bakén ba bôt ba libôga jés?

⁷ Nwii mini, ikété ngandak biloñ, nsoñgi bôt i bi ke loñ yap ngwéé i mbet. Lelaa di nla boñ inyu hôla bo i yi Yéhôva ni bitééne gwé ngéda ba niñ libôga jés? Di nla bôdôl nigil mayéga ni hop wap. I sélél ini le JW Language i nla hôla bés i nigil wo. Mbus mayéga, di nla ki nigil ndék bibuk i i ga unda bo le di ntôñ ni bo. Di nla ki unda bo site yés le jw.org, i het ba ga léba bividéô ni bikaat bi bi yé ikété hilémb hiap.​—Ndiimba mbén 10:19.

8, 9. (a) Mambe mahôla di nkôs makoda més ma ñem sonde? (b) Lelaa bagwal ba nla hôla bon bap i timbhe makoda?

⁸ Ni gwéha, Yéhôva a niiga bés lelaa di boñ le nson wés likalô u num matam malam ni njel lini likoda le Niñ yés ni nson wés u bikristen. Biniigana bi mahee di nkôhna mu likoda li, bi nhôla ngandak ikété yés i hôlôs likeñge jap inyu mapeple ni gwigil bi Bibel.

 ⁹ Ngandak bôt i i ntip bôdôl lo makoda més, i nyimbe le bon bés ba ntimbhe makoda. A bagwal, ni hôla bon banan i béyés mapubi map mu kii ba nti mandimbhe ni bibuk gwap bomede. Mandimbhe map ma sem kwep, ntinak ni ñem wap wonsôna, ma mbéna tihba bôt ba ntip bôdôl lo makoda més, kayéle ba yé ba sôk yimbe le ñ, maliga toi ma.​—1 Korintô 14:25.

10. Lelaa bibégés bi ndap lihaa bi nhôla i lédés maada?

¹⁰ Njel ipe di nla gwélél inyu béyés mapubi més, i yé le di nlama sal inyu adna i lihaa jés, ni i likoda. Bagwal ba nla pam i boñ hala ibale ba ntéé ngim ngéda inyu bibégés bi ndap lihaa. Libim li mahaa li yé li pohol i béñge JW Nkuu Biliñgeliñge ntôñ. Mbus di mal béñge yo, inyuki di ta bé le di kwel inyu tehe lelaa di nla bii biniigana di nkôs bisélél i niñ yés? Ngéda a nkena bibégés bi ndap lihaa, ngwal a nlama bigda le maéba mañge ntitigi a gwé ngôñ ma yé mahéñha ni ma somb mañge (mañge wanda). A bagwal, ni boñ le hiki mut ikété ndap lihaa a nôgda le mam ni nigil ma mbéñge yak nye.​—Tjémbi 148:12, 13.

11-13. Lelaa bés bobasôna di nla hôñôs adna i likoda, ni nhôla bôt bape i béyés mapubi map?

¹¹ Lelaa boñge ba wanda ba nla sal inyu adna i likoda, ni ti ki bape makénd i béyés mapubi map? Ibale u yé mañge wanda nu a yé kristen, inyuki i yoñ ndun ni mimañ mi bôt i nla bé yila njômbi yoñ? Ni suhulnyu, u nla bat bo le ba añle we mam ba mboñ mu ntandaa ngéda ba ntégbaha nson Djob. Hala a ga lédés hémle yoñ ngandak, kayéle we ni bo ni ga kôs ngui i ke ni bisu i béyés mapubi ma maliga. Bés bobasôna di nla yoñ makidik i leege bôt ba nlo makoda i ndap Ane. Ngéda di mboñ biliya bi, hala a’ hôñôs adna, hala a nla ki tinde bakén i béyés mapubi map. Ikété mam u nla boñ, leege bo ni maséé, bebek u nla yak hôla bo i léba homa liyééne. Yéñ manjel i hôla bo i meina ni bilôk bikéé bipe, ni njel i, b’a nôgda wengoñle ba yé i boni.

 ¹² Ibale u nlama éga likoda li likalô, u nla yoñ bitelbene inyu hôla miñunuk mi bôt i yoñ ngaba i nson likalô. Baa ngim libôga li yé li li nla ba loñge inyu yap? Ngim mangéda, ni nla ti bo mañge wanda inyu nit bo mu liké jap. Ni nla ki yoñ bitelbene inyu bet mbôô ni mam mape ma ñume bé i sal kiki bôt bobasôna. Ñ, nduña u gwé ipañ boñge ba wanda ni mimañ mi bôt, ba ba ma nom maliga tole heni, ni ngap yoñ i wan mam bi ga hôla bo i téé likalô ni makénd.​—Lôk Lévi 19:32.

¹³ Ntôptjémbi a tila le: “Nun-ki, kinje loñge ni maséé ngéda lisañ li bôt li nyén ni adna!” (Añ Tjémbi 133:1, 2.) Mu kii ba bé ntôñ, bon Lôk Israel ba bi kôs nseñ i bégés Yéhôva ni bagwélél bé bape. Hala bé kiki lañ i nlôôha tik, i i tina hogbe. Nlélém kiki bo, u nla hôñôs adna ipôla lôk kéé i bôlôm ni bôda ngéda u noode lémél bo, u bak ki minyaô ni bo. Ibale u gwé lem i boñ hala ibôdôl behee, di nla ndik kal we le ntôñ ni ntôñ. Baa u yé le u ‘nhiañdal i ñem woñ’, hala we yéñ ba liwanda ni lôk kéé u meya bé i likoda?​—2 Korintô 6:11-13.

14. Kii u nla boñ inyu béyés mapubi moñ libôga joñ?

¹⁴ Kii u nla boñ inyu ke ni bisu i béyés mapubi ma maliga libôga joñ? Bipôdôl ni maboñok moñ malam ma nla tinde bôt ba libôga joñ i gwés maliga. Badba le: ‘Lelaa bôt bem ba libôk ba ntehe me? Baa bôt bem ba libôk ba nyimbe le ndap yem i yé mbôñglak loñge ikété ni i mbédgé? Baa me nyéñ manjel i hôla bôt bape?’ Ngéda u nkwel ni lôk kéé ipe, inyuki u nla bé bat bo le ba añle we lelaa loñgeñem ni maboñok map malam bi ma tihba bôt bap ba lihaa, bôt ba libôga jap, mawanda map ma bôlô ni ma suklu? Bebek ni njel i, u ga nok mam ma ntina makénd.​—Efésô 5:9.

15. Inyuki di nlama yén péé?

¹⁵ Inyu boñ le mapubi més ma kee ni bisu i bai, di nlama yi i ngeñ di tééne. Yésu a béhe banigil bé ngandak ngélé le: “Yéna péé.” (Matéô 24:42; 25:13; 26:41) Ibale di nhoñol le “njiiha keñi” i ngi yii haa, tole di nhégda le i ga ada ha bé bés niñ, di ga tehe bé nseñ i pala añal ñañ nlam. (Matéô 24:21) Ha ngéda i, iloole di bai i libôga jés, mapubi més ma nla bôdôl sôs, sôs ni sôs letee ma lém.

16, 17. Kii ni nla boñ inyu yén péé?

¹⁶ Mu kii mangéda ma nke ndigi ni bisu i let, bés bobasôna di nlama yén péé. Di yé nkwoog nkaa le hilo hi Yéhôva hi ga lo i loñge ngéda. (Matéô 24:42-44) Mu ndék ngéda i yii, di nlama bem ni wongut, di bak péé iloo ngéda bisu. Di nlama soñgol Bañga i Djob hiki kel, di soohege ibabé waa. (1 Pétrô 4:7) Di kôna ndémbél i lôk kéé i bôda ni i bôlôm i i bi yén péé ikété maséé, i béihak mapubi map ibôdôl behee. Ndémbél yada mu i nlébna i Nkum Ntat nu dilo 15 hi sôñ Matôp, i nwii 2012, mapep 18-21, ni ño nkwel le “Môm masaambok ma nwii i kôbda mintômb mi libadô mi man Lôk Yuda.”

¹⁷ Niñ yés i nlama ba nyonok ni minson mi hémle, di tégbahaga ki ngéda ni lôk kéé yés. Hala a’ ti bés maséé makeñi, ni le i ga nene bés wee ngéda i nhoo tagbe. (Efésô 5:16) hala a yé jam kiki bo mbôgôl nwii len, le lôk kéé yés i bi ti ngéda yap yosôna i nson  Ane. Ndi mam di mboñ len, ni ngui i Yéhôva, ma nlôôha ki bôl iloo ha ngéda i. Mapubi di mbéyés i len ini, ma mbai i likala di mah hégda bé.

18, 19. Lelaa mimañ mi likoda mi nla hôla bés i yén péé, ni sélél Djob ni makénd? Ti hihéga.

¹⁸ Hala a ntina makénd i yi le libak jés likwéha li nla bé tuga bés i ti Yéhôva bibégés bi nlémél nye. Jon inyu nhôla bés, Yéhôva a bi ti bés ‘bôt kiki makébla,’ hala wee mimañ mi likoda. (Añ Efésô 4:8, 11, 12.) I kel, mañ likoda u ga yuuga we, ôt nseñ ni pék yé, lôñni maéba mé.

¹⁹ Mimañ ima i loñ Ngisi mi bi ke i yuuga babiina ba bé ikété mindañ. Muda a bé tjelel le nlô wé a bé éga bé lihaa i pes mbuu. Nlôm a bi neebe le a bé yi bé niiga, ni le ngéda bibégés bi ndap lihaa i bé bé ntjegek loñge. Mimañ mi bi bigdaha bo ndémbél Yésu. Ba hôñlaha bo le a bi yoñ ndun ni banigil bé. Mimañ mi, mi bi ti nlôm makénd i kôna Yésu. Ba ti nwaa makénd i bem ni wongut. Mimañ mi bi ti ki bo iba maéba malam, ma ma bé le ma hôla bo i tégbaha bibégés bi ndap lihaa lôñni bon bap bo iba. (Efésô 5:21-29) Mbus ngéda mimañ mi bi bégés munlôm inyu biliya gwé. Ba bi ti nye makénd i ke ni bisu, ni i yéñ mahôla ma mbuu mpubi inyu ba loñge ñéga i pes mbuu. Gwéha ni loñgeñem mimañ mi bi unda lihaa li, bi bi hôla bo i béyés mapubi map.

20. Kii u ga kôs mu kii u mbéyés mapubi moñ?

²⁰ Ntôptjémbi a loñge le: “Hiki mut nu a nkon Yéhôva woñi a yé kimasoda, nu a nhiumul manjel mé.” (Tjémbi 128:1) Ngéda u mbéyés mapubi moñ​—ni biliya u mboñ i naña bôt bape i sélél Djob, ni maboñok ma ma nhôñôs adna, yak ni biliya u mboñ inyu yén péé​—u ga bana maséé ma mbuma ñañ. Bôt bape b’a tehe minson nwoñ minlam, hala a tinde ngandak ikété yap i ti Isañ wés lipém.​—Matéô 5:16.