“ME NYÉGA! I nke laa?”

Ibabé pééna u mbéna yéga bôt hala. Bebek le u ma yéga mut ni woo, tole u ma sambla mut. Bilem bi loñ ni bibuk bi ngwéélana inyu mayéga bi nhéñha inoñnaga ni bahoma bôt ba niñ, ndi njom i ntinde bôt i yéga bape i yé nlélém. I bak ki le, i tjél yéga mut i nla nene wengoñle u ngwés bé nye, tole wengoñle u gwé bé bilem bilam.

Ndi bôt bobasôna bé bon ba gwé lem i. Kiki hihéga, bôt bahogi ba ba nhoñol le ba gwé bé nseñ, ba nkon woñi i yéga bôt. Bape ba nyéga bé bôt inyule ba nhoñol le litén jap, binéñél gwap, ni tel ba gwé bi mboñ le ba nloo bôt bape. Ndi ki le, to nso mayéga i nla mbubaha mut.

Badba le: Bimbe bisai mayéga ma nla lona mut? Ni le, kii Bañga i Djob i niiga me inyu mayéga?’

Ngéda ñôma Pétrô a bi leege Kornéliô likoda, mut matén nu bisu i yila kristen, a kal le: “Nyambe a ta bé ntodol bôt.” (Minson mi baôma 10:34) Mbus, Pétrô a tila le Nyambe a ngwés “ndigi le [bôt] bobasôna ba pam homa ba nhiel miñem.” (2 Pétrô 3:9) Di nla hoñol le bipes bi bikaat bini bi mbéñge ndigi banigil Bibel. Ndi maéba ma Pétrô ma bé béñge yak bikristen, ngéda a béhe bo le: “Ni tinak bôt bobasôna lipém. Ni gwéhak lôktata.” (1 Pétrô 2:17) Baa i ta bé loñge le di yéga bôt bobasôna ibabé i béñge kôgôô yap nyuu, to binéñél gwap? Hala a bé ngim njel i unda bo gwéha ni ti bo lipém.

Ñôma Paul a béhe lôk kéé le: “Hi mut a leege numpe kiki yak Kristô a leege bés.” (Rôma 15:7) Paul a bi sima lôk kéé i i bi ti nye “hogbe.” Ibale lôk kéé i bééna ngôñ ni hogbe ha ngéda i, bôô ni ngélé yañen hala a yé nseñ inyu lôk kéé i bôlôm ni i bôda i ngéda yés, nano nu Satan a nlôôha ba ñunbak ni bagwélél ba Djob.​—Kôlôsé 4:11; Masoola 12:12, 17.

Dihéga di nléba Bitilna di ñéba le, mayéga ma nhôla ndik bé mut ba nyéga i yi le baleege nye ba yé maséé ni malo mé.

Ngéda i kola bañ le Maria a gwal Man Djob, Yéhôva a bi om añgel i pôdôs nye. I kal nye le: “Me nyéga we, a we nu u nkôs karis, [Yéhôva] a yé ni we.” Maria a bi “sihla inyu lipôdôl lini,” a badbaga inyuki añgel yon i bé pôdôs nye. Ngéda añgel i bi nôgda hala, i kal nye le: “A Maria, u kon bañ woñi, inyule u nkôs karis ni Nyambe.” Añgel i kônde ki le, sômbôl i Djob i bé le nyen a gwal Mésia. Iloole hala a ke ni bisu i tééñga nye, Maria a timbhe ni suhulnyu le: “Nun-ki, me yé [nkol] Nwet; i bôña ni me kingéda bañga yoñ.”​—Lukas 1:26-38.

Hala a bé nsima inyu añgel i ba nlegel nwin nu Yéhôva; ndi i bé hoñol bé le, kwel ni kwéha mut i bé hoo yo mahindi. A bôk ndugi a yéga nye. Bimbe biniigana di nla ôt mu ñañ u? Di nlama ba bebee i yéga bôt bape, ni ti bo makénd. To ni ndék bibuk ndigi, di nla hôla bôt bape, ni kwés bo nkaa le ba yé toi ikété lihaa li bagwélél ba Djob.

Paul a bé yi ngandak bôt makoda ma Asia Ntitigi ni ma Érôpa. Bikaat gwé bi yé nyonok ni  mayéga ma tôbôtôbô. Kii hihéga, hala a nene i Rôma 16. Paul a bi ômle ki ngandak bilôk bikéé mayéga. A bi sébél Fébe le “mantata wés nu muda,” a bat ki lôk kéé yé le ‘i leege nye i Nwet kiki bapubhaga ba kôli leegana, ni le ba hôla nye ikété mam momasôna ma nsômbla le ba hôla nye.’ Paul a yéga Priskila ni Akuila, ba yak ‘mintôñ mi biloñ bipe nwominsôna mi nti mayéga.’ A bi yéga yak bet di nyi bé pak i len ini​—kiki ngéda a nkal le “Epenétô, mut me ngwés” yak ni “Trifena ni Trifôsa, bôda ba ntumbba ni nson inyu Nwet.” Ñ, Paul a bé bebee i yéga lôk kéé yé i bôlôm ni i bôda.​—Rôma 16:1-16.

Hégda maséé ba bi kôs i yi le bôt ba bé gwés bo ba bé hoñol bo. Hala a bi lama lédés gwéha yap inyu Paul, yak ni gwéha yap inyu wada ni nuu! I kôs mayéga ma gwéha mana, i bi lama ti bikristen bipe makénd, ni hôla bo i ke ni bisu i ba siñ ikété hémle. Ñ, mayéga ma ma ñunda le mut a ntôñ toi bés, ni le a nti bés bibégés bi kôli, ma nlédés mawanda ipôla yés, ma hôlga bés i ke ni bisu i tééda adna yés.

Ngéda Paul a bi bol i libôñ li Putéôli, a kenek i loñ Rôma, bikristen bi bé niñik i nwelmbok bi bi lo i tehe nye. Ngéda a bi tehe ndik bo ba nlo haa, “a yéga Nyambe, ñem u let nye.” (Minson mi baôma 28:13-15) Ngim mangéda, i nla pam le yom yosôna di nla boñ i yé le, di nôlôs mut, tole di pek ndik nye woo. Ndi hala a nla yak ti mut nu a gwé nduña ñem tole nwet a nyodop makénd.

Nnigil Yakôbô a bé sômbôl ti maéba ma ngui. Bikristen bihogi bi bi bôdôl ke ndéñg i pes mbuu, inyule ba bi bôdôl gwés nkoñ isi. (Yakôbô 4:4) Ndi béñge lelaa Yakôbô a mbôdôl kaat yé:

“Me Yakôbô, nkol Nyambe ni u Nwet le Yésu Kristô, me ntilna jôm li matén mbôk iba, ma ma sanda ikété biloñ bipe. Me nyéga bé!” (Yakôbô 1:1) Ibabé pééna, i bé ntombok jam inyu bet a tilna kaat ini i leege maéba mé, ngéda ba bi nôgda mu mayéga mé le ba bé jam jada bisu bi Djob. Ñ, mayéga ma ma yé nyonok ni suhulnyu ma nla nti bés pôla i bôdôl minkwel mi ngui.

Bañga mayéga, to ibale ma nom bé, ma nlama lôl ñem, ma ñundga toi le di ngwés nwet di nyéga. Hala a yé maliga to ibale u nhoñol le jam bé li. (Matéô 22:39) Sita yada i loñ Irlan i bi bol i ndap Ane, likoda li bak bebee ni bôdôl. Mu kii a bé pabla inyu yén, mankéé wada nu munlôm a hielba, a nôlôs nye, a nkal nye le: “Me nyéga. Me yé maséé i tehe we.” Sita a bi yén ndigi.

Ndék sonde mbus, a bi kal mankéé nu le, hala a bé ndék ngéda le, ngim jam i bé tééñga nye i mbai. A kal ki le: “Me bé ñunbak ngandak i kôkôa i, kayéle me bé bebee i tôl likoda yokel. Me nyi bé too me bi tééda jam mu likoda li, he mah mayéga moñ. Maleege ma ma bi tihba toi me. Me nyéga.”

I nla ba le mankéé nu, a bi nôgda bé ngui i mayéga mé. A nkal le: “Ngéda sita i, i bi kal me lelaa ndék bibuk i i bi tihba nye, me bé maséé ngandak inyu biliya gwem. Hala a bi boñ yak me loñge.”

Salômô a tila le: “Leñ koga yoñ ngii malép, inyule w’a léba yo mbus ngandak dilo.” (Ñañal 11:1) Ngéda di nyi nseñ i yéga bôt, téntén lôk kéé yés i mbuu, di ngwéñbaha bo yak ni bésbomede. Jon, di yanak bañ ngui i mayéga kekikel.