1. Kii nkwel ba bi ti likoda li ndôn li nwii 1935, u bi tinde mañge wanda wada i boñ?

MAÑGE wanda nu a bé a gwé 18 nwii, i ngéda a bi sôblana i nwii 1926. Bagwal bé ba bé Mbôgi Yéhôva, ndi ha ngéda i ba bé sébél bo le Banigil Bibel. Ba bééna bon bôlôm 3 ni bon bôda 2, ba bi néñés bo maliga, ba niiga ki bo i noñ ndémbél i Yésu Kristô. Kiki lem i Banigil Bibel bobasôna ha ngéda i, mañge wanda nunu a bé je bret, a nyok wai hiki nwii i Bilôp bi Nwet. Ndi litehge jé li mam li bi héñha kunda yada, i ngéda a bi emble nkwel mut nye ki nye a ta bé le a hôya u u bééna ño le: “Limut li bôt likeñi.” Mankéé J. F. Rutherford nyen a bi ti nkwel u i nwii 1935, likoda li ndôn li bé i Washington, D.C., i Amérika. Kii ba bi yelel mu likoda li ndôn li?

2. Mambe maliga ma ma nkônha maséé mankéé Rutherford a bi yelel mu nkwel wé?

² Mu nkwel wé, mankéé Rutherford a bi toñol njee a yé “limut li bôt likeñi” kaat Masoola 7:9 i mpôdôl. Ba bé hoñol letee ni ha i ngéda i le, limut li bôt li, li yé ntôñ bôt umpe u u ga yiga ke i ngii, inyule wo u gwé bé hémle ikeñi kiki ntôñ bisu. Mankéé Rutherford a bi gwélél Bitilna inyu toñle baemble le, limut li bôt likeñi li ntéba bé inyu ke i niñ i ngii, ndi li yé nyonok ni mintômba mimpe * mi  Kristô, mi mi ga pei “njiiha ikeñi” inyu niñ i boga ni boga hana ’isi. (Masoola 7:14) Yésu a bi bôn le: “Me gwé ki mintômba mimpe, mi mi ta bé munu bémba ini; me nlama jôbna yak nwo, nw’a emble kiñ yem, mi yila ki bémba yada isi ntééda mintômba wada.” (Yôhanes 10:16) Mintômba mimpe mini, mi yé Mbôgi Yéhôva i i tiñi ni Djob jap, ni i i gwé botñem i niñ i boga ni boga i Paradis hana ’isi. (Matéô 25:31-33, 46) Nano di tehe lelaa mapubi ma mondo mana ma bi héñha niñ i ngandak Mbôgi Yéhôva i i bé ha ngéda i, yak niñ i mañge wanda nu di mpôdôl bibôdle, nu a bé a gwé 18 nwii ngéda a bé sôblana.​—Tjémbi 97:11; Bingéngén 4:18.

3-4. I likoda li ndôn li nwii 1935, kii dikôô di bôt di bi sôk nok inyu botñem yap, inyuki?

³ Kinje maséé baemble ba bi nôgda ngéda nti nkwel a bi kal le: “Ba bobasôna ba nôgda le ba gwé botñem i niñ i boga ni boga hana ’isi ba telep!” Mu i 20 000 bôt ma bé ma kôdi yokela, libim li bi telep. Ha nyen mankéé Rutherford a bi kal le: “Nuna ki! Limut li bôt likeñi!” Mbok i bi bôk i mom nwee, i mbus bôt ba kahal bamb moo letee. I bôt ba bi telep yokela, ba bé nôgda le ba ta bé nsoñgi u bôt ba nlama ke i ngii. Ba bé yi le ba ta bé minhook. Hilo hi bé noñ ha, 840 bôt i bi sôblana, libim ikété yap li nôgdaga le li yé nsoñgi u mintômba mimpe.

⁴ Mbus nkwel u, mañge wanda di mpôdôl majubul ma yigil ni lôk kéé ipe i bi waa je koga ni nyo wai i Bilôp bi Nwet. Ni suhulnyuu mankéé wada a kal kiki ini lôk kéé ipe le: “Me bi sôk je koga ni nyo wai i Mbigda nyemb Yésu i i bi tagbe i nwii 1935, inyule me bi nôgda le Yéhôva a bi pohol bé me inyu ba nsoñgi u bôt ba nke niñ i ngii, ndi inyu niñ hana ’isi i boga ni boga, ni i yoñ ngaba i nson i yilha ’isi Paradis.” (Rôma 8:16, 17; 2 Korintô 1:21, 22) Ibôdôl ha, limut li bôt likeñi li nkeñep ndigi keñep ni keñep, li salak ntôñ ni minhook mi mi ngi yii hana ’isi.

5. Lelaa Yéhôva a ntehe i bet ba bi waa je koga ni nyo wai i Mbigda nyemb Yésu?

⁵ Lelaa Yéhôva a ntehe bilôk bikéé bi bi bi waa je koga ni nyo wai i nwii 1935? I len ini mam m’a ba lelaa inyu kristen i i bé je koga i nyok wai Bilôk bi Nwet, ndi a yik téé inyule a nôgda le a ta bé nsoñgi u minhook? (1 Korintô 11:28) Ngandak lôk kéé i bé je koga i nyok wai inyule ba bé hoñol le ba gwé botñem i ke niñ i ngii. Ndi ibale ba neebe hihôha hiap, ba waa je koga ni nyo wai, ndi ba téñbe i gwélél Yéhôva ipam lisuk, Yéhôva a ga neebe le ba jôp nsoñgi u mintômba mimpe. Tolakii ba nje ha bé bret to nyo wai, ba ntôl bé Mbigda nyemb Yésu, inyule ba nlôôha kon maséé ni i jam Yéhôva bo Yésu ba bi bôñôl bo.

6. Imbe oda Yésu a bi ti biañgel?

⁶ Kiki njiiha ikeñi i yé bebee, i tiimba nigil i yom Bibel i nkal i kaat Masoola pes 7 inyu minhook ni limut likeñi li mintômba mimpe i nla ti bés makénd. Yésu a bi ti biañgel oda le, bi kee ni bisu  i gwel mbebi yo ina i tjiba. Bi nlama bé nwas le mbebi i hôñ i nkoñ ’isi letee Yéhôva a mal band minhook nwominsôna. (Masoola 7:1-4) Kiki mi ntéñbe ni Nyambe, minhook mi ga ba bikiñe ni biprisi nyoo i ngii, mi salak ntôñ ni Kristô. (Masoola 20:6) Yéhôva, Yésu ni biañgel gwobisôna bi niñ nyoo i ngii bi ga ba maséé i tehe 144 000 minhook i nkôs bom yap nyoo i ngii.

7. Kiki kaat Masoola 7:9, 10 i nkal, bonjee Yôhanes a bi tehe ikété yiinda, kii ba bé boñ? (Béñge titii i lipep li bisu.)

⁷ I mbus le Yôhanes a bi tehe 144 000 di bikiñe ni biprisi, a bi tehe ki jam li hélha lipe, “limut li bôt likeñi” li li mpei gwét bi Armagédôn. Maselna ni ntôñ bisu a bi tehe, unu ntôñ u bé nkeñi ngandak, mut to wada a bé bé le a soñgol wo. (Añ Masoola 7:9, 10.) Ba hééba “mimbôñgô mi bipuba bi mambot,” hala a nkobla le ba nhooba bé to “liton li mahindi” mu nkoñ ’isi u Satan, ndi ba ntéñbe i gwélél Nyambe bo Kristô. (Yakôbô 1:27) Ba nlond ba kalak le, Yéhôva bo Yésu, Man ntômba nu Nyambe, bon ba ntohol bo. Bobasôna ba gwé masee i moo, hala a ñunda le ba neebe Yésu kiki Kiñe Yéhôva a ntéé.​—Hégha ni Yôhanes 12:12, 13.

8. Kii kaat Masoola 7:11, 12 i niiga bés inyu lihaa li Yéhôva li li yé i ngii?

⁸ Añ Masoola 7:11, 12. Kii i bi tagbe nyoo i ngii ngéda ba bi tehe limut likeñi? Yôhanes a ntehe lihaa jolisôna li Yéhôva li li yé i ngii nyonok ni maséé inyule limut likeñi li mbégés Nyambe. Bagwélél ba Yéhôva bobasôna ba ba yé i ngii, b’a ba maséé i tehe biyônôl bi yiinda ini ngéda limut likeñi li mba li nlôl i njiiha ikeñi.

9. Inoñnaga ni kaat Masoola 7:13-15, kii i bet ba yé nsoñgi u limut likeñi ba mboñ i len ini?

⁹ Añ Masoola 7:13-15. Yôhanes a bi kal le limut likeñi li bi ‘jôwa ki mimbôñgô nwap mi mambot, li yilha nwo puba ikété matjél ma Man ntômba.’ Hala a nkobla le ba gwé kiññem i mpôp, ni le ba téé sép i mis ma Yéhôva. (Yésaya 1:18) Ba bi ti bomede nkikip, ba sôblana, ba ñunda ki le ba gwé hémle i ngui mu sesema i Yésu, ni le ba gwé maada malam ni Yéhôva. (Yôhanes 3:36; 1 Pétrô 3:21) Jon ba kôli telep bisu bi yééne ane i Nyambe, inyule ba ‘ngwélél nye juu ni njamuha’ hana ’isi. I len ini, ba nyoñ ngaba ikeñi i nson i añal ñañ nlam u Ane ni i yilha bôt banigil, ba biak gwéñe bi Ane kiki yom bisu i niñ yap.​—Matéô 6:33; 24:14; 28:19, 20.

10. Limut likeñi li yé nkwoog nkaa ni kii, umbe mbônga b’a tehe u nyon?

¹⁰ Limut likeñi li li nlôl i njiiha ikeñi li yé nkwoog nkaa le Nyambe a ga ke ni bisu i tôñ bo, inyule “Nu a yii i yééne ane a ga sambal ndap yé libadô i ngii yap.” Ha nyen mbônga mintômba mimpe mi mbem nano a yé ntandaa ngéda w’a yon, won u yé le: “[Nyambe] a’ sas gwiiha gwobisôna i mis map, nyemb y’a ba ha bé, to maéya, to nlondok, to njôghe bi ga ba ha bé.”​—Masoola 21:3, 4.

11-12. (a) Inoñnaga ni kaat Masoola 7:16, 17, bimbe bisai bi mbem limut likeñi? (b) Kii mintômba mimpe mi mboñ i Mbigda nyemb Yésu, inyuki?

¹¹ Añ Masoola 7:16, 17. I len ini, bagwélél ba Yéhôva bahogi ba mpam bé  i je, inyule liyep li nai, tole gwét bi yé nayak i loñ yap. Bape ba yé mok inyu hémle yap. Ndi i bet ba yé nsoñgi u limut likeñi, li li ga pei i tjiba i béba nkoñ ’isi unu, ba yé maséé i yi le ha ngéda i, b’a bana ngandak bijek i pes minsôn ni i pes mbuu. I ngéda nkoñ ’isi u Satan unu u ga tjiba, Yéhôva a ga yoñ bitelbene le hiun hié hi kalna bañ limut likeñi. I mbus njiiha ikeñi, Yésu a ga éga i bet b’a pei “mangen ma malép ma niñ [boga].” Ni hoñol ki i botñem i tôbôtôbô limut likeñi li gwé! Didun di bôt dini, di di bi niñ i nkoñ ’isi u Satan, di pei njiiha ikeñi, bebek di ga wo ha bé kekikel!​—Yôhanes 11:26.

¹² Mintômba mimpe mi nti Yéhôva bo Yésu mayéga inyu i botñem i tôbôtôbô ini ba gwé. Tolakii ba bi pohlana bé inyu ke i niñ i ngii, Yéhôva a ngwés bo ngandak, nlélém kiki a ngwés minhook. Mintôñ mi bôt mi nwo ima mi mbégés Nyambe bo Kristô. Njel yada inyu unda le ba mboñ hala, i yé le ba ba ha i Bilôp bi Nwet.

13-14. Inyuki minhook ni mintômba mimpe mi nlama bé tôl i Mbigda nyemb Kristô?

¹³ Ikété bôt bobasô ba yé ba lo i Mbigda nyemb Yésu, ibale ba nyoñ hikôô hiada, bebee le mut wada nyen a yé a je koga, a nyo ki wai. Hala a nkobla le ikété nkoñ ’isi wonsôna, jam kiki bo makoda matan tole masamal ma gwé bé mut to wada nu a nje koga yokela, a nyok wai. Hala a ñunda le libim li bôt li yé li ba ha i Mbigda nyemb Yésu li gwé botñem i niñ hana ’isi. Ndi inyuki ba yé ba ba ha Bilôp bi Nwet? I njom i ntinde bôt i ke libii li liwanda jap, yon i ntinde yak bo. I bôt ba ba nke libii li liwanda jap inyu unda le ba ngwés babiina, ba nit ki bo. Nlélém inyu mintômba mimpe, ba yé ba ba i Mbigda nyemb Yésu inyu unda le ba ngwés Kristô ni minhook, ba nit ki bo. Mintômba mimpe mi yé mi ba ha inyu unda le mi nti mayéga inyu sesema i Yésu i i néhne bo njel i niñ i boga ni boga hana ’isi.

 ¹⁴ Njom ipe i i ntinde bo i ba ha yokela i yé le ba nyéñ noñ oda i Yésu. I ngéda Yésu a téé Bilôp bi Nwet bini ni baôma bé, a kal bo le: “Kena ni bisu i boñ hala, ni hoñlege me mu.” (1 Korintô 11:23-26) Jon ba nke ni bisu i ba ha Bilôp bi Nwet ntel ngéda wonsô minhook mi ngi yii i niñ hana ’isi. Ñ, mintômba mimpe mi naña bôt bobasô i tégbaha Mbigda nyemb Yésu ni bo.

15. Lelaa di nla ti Nyambe ni Kristô bibégés i Mbigda nyemb Yésu?

¹⁵ I Mbigda nyemb Yésu, di mbégés Nyambe ni Kristô ni njel tjémbi ni masoohe. Ño nkwel u Bilôp bi Nwet di ga emble i nwii unu u yé le: “Unda le u nti mayéga inyu jam Nyambe ni Kristô ba bi boñ inyu yoñ!” Nkwel u, w’a kéñbaha mayéga ni nti Yéhôva bo Kristô inyu jam ba bi boñ inyu nan. I bôt bobasôna ba mba ba kôdi yokela b’a bigda le bret bi yé yimbne i nyuu Yésu, wai i bak yimbne i matjél mé. Nkwel u u ga hôñlaha bés le Yéhôva a ngwés bés ngandak, jon a bi neebe le Man wé a wo inyu yés. (Matéô 20:28) Ba bobasôna ba ngwés Yéhôva ni Man wé, ba ga tôl bé Mbigda nyemb Yésu.

16. Inyuki maselna ma ta bé ipôla minhook ni mintômba mimpe?

¹⁶ Inyu Yéhôva, maselna ma ta bé ipôla minhook ni mintômba mimpe. A nlôôha diihe mintôñ mi bôt mi nwo ima. Inyu somb minhook ni mintômba mimpe, a bi saa nlélém ndamba, hala wee matjél ma Man wé. I yom i yé maselna i yé botñem yap. Jam lipe li yé ki le, mintôñ mi nwo ima mi nlama téñbe ni Nyambe, yak ni Kristô. (Tjémbi 31:24) Di hôya bañ le nlélém mbuu Djob won u nsal i ngii yés. Hala a nkobla le, too di yé nsoñgi u minhook, too di yé nsoñgi u mintômba mimpe, Yéhôva Nyambe a nti hiki wada wés mbuu mpubi inoñnaga ni i nson a ngwel.

17. Kii minhook mi ngi yii hana ’isi mi mbem?

¹⁷ Minhook mi bikristen mi ngwéé bé ni botñem i niñ i ngii. Nyambe nyen a nha bo mahoñol ma i ñem. Ba nhoñol botñem yap, ba soohege inyu yo, ba ban-ga ki ngôñ i kôs bom yap i i yé i ke niñ i ngii. Ba nla bé yi umbe ntén nyuu b’a bana nyoo i ngii. (Filipi 3:20, 21; 1 Yôhanes 3:2) Ndi to hala, ba nyamnda ni ngôñ i ke ada Yéhôva, Yésu, biañgel ni minhook mi bi bôk mi bet i ngii inyu sal ntôñ i Ane i ngii.

18. Kii mintômba mimpe mi mbem?

 ¹⁸ Mintômba mimpe mi nlôôha kon maséé ni i botñem bôt bobasôna ba ngwééna, hala wee botñem i niñ i boga ni boga hana ’isi. (Ñañal 3:11) Ba mbem hilo b’a bana pôla i yilha hisi hiosôna paradis. Ba gwé ngôñ i pala tehe hilo ba ga oñ mandap, ba bel nwom mi mbônji, ba néñés bon bap, ba ba mba mbôô. (Yésaya 65:21-23) Kinje maséé ba mba ba nôgda i ngéda ba mba ba memle hisi, mapan, dikôa, batuye, ba ôdôk ki pék mu mam momasôna Yéhôva Nyambe a bi hek. Iloo mam momasô, ba ga ba maséé i yi le maada malam ba gwé ni Yéhôva m’a ke ni bisu i let.

19. Imbe botñem Mbigda nyemb Yésu i nti hiki wada wés, i ga ba kekii unu nwii?

¹⁹ Yéhôva a nti hiki ngwélél wé botñem ilam inyu dilo di nlo. (Yérémia 29:11) Mbigda nyemb Kristô i nti minhook ni mintômba mimpe pôla i ti Nyambe ni Kristô mayéga inyu jam ba bi bôñôl bo, hala wee ba bi saa ndamba ikeñi inyu boñ le di bana niñ boga. Ibabé nkaa, Mbigda nyemb Yésu i yé likoda li nlôôha nseñ inyu bikristen gwobisô hiki nwii. Unu nwii, Mbigda nyemb Yésu i ga ba i ngwa jôn, hilo 27 i sôñ Matumb, nwii 2021, i mbus manañle ma hiañgaa. Ngandak i ga pam i kodba ibabé le yom yo ki yo i tééñga bo. Ki le inyu bape, i ga béda le ba yémbél ngolba inyu ba ha. Bape ki ba ga tégbaha Bilôp bi Nwet i ndap mok. Di nsoohe le bôt bobasôna i nkoñ ’isi ba tégbaha Mbigda nyemb Yésu ilam bisu bi Yéhôva, Yésu, biañgel ni minhook mimpe mi mi bi bet i ngii!