YIGIL 4
Yéhôva a nsayap biliya di mboñ inyu bigda nyemb Yésu
“Kena ni bisu i boñ hala, ni hoñlege me mu.”—LUKAS 22:19.
HIÉMBI 19 Bilôp bi Nwet
DINYO MALÉP a
1-2. Inyuki di nke i Mbigda nyemb Yésu hiki nwii?
HALA a nkahal ke 2000 nwii le Yésu a bi ti niñ yé inyu boñ le di kôhna niñ boga. U u nsôk ilole a nwo, Yésu a bi kal banigil bé le ba yoñ ngéda i je bret ni nyo wai inyu boñ le ba bigda sesema yé.—1 Korintô 11:23-26.
2 Kiki di ngwés Yésu ngandak, jon di nôgôl i mbén yé i. (Yôhanes 14:15) Hiki nwii, i ngéda Mbigda nyemb Yésu, di nyoñ ngéda i ôt pék mu sesema yé inyu unda le di nti nye mayéga. Di nlôôs ki ngandak ngéda i likalô, di séblak bôt bape le yak bo ba loo mu ngand i. Di nwas bé le yom yo ki yo i sôñga bés i ke i bigda nyemb Yésu.
3. Kii di ga tehe munu yigil ini?
3 Munu yigil ini, di ga tehe mam maa Mbôgi Yéhôva i mboñ inyu bigda nyemb Yésu: (1) ba noñ ndémbél i banigil ba Yésu, (2) ba naña bôt bape i Mbigda nyemb Yésu, (3) ba nlo i Mbigda nyemb Yésu to ibale ba mboma mandutu.
DI MBIGDA NYEMB YÉSU KIKI BANIGIL BÉ BA BISU
4. Kii di yé di nigil i kel Mbigda nyemb Yésu, inyuki di nlama ti mayéga inyu mam ma? (Lukas 22: 19, 20)
4 Hiki nwii i ngéda di nke i Mbigda nyemb Yésu, di nok nkwel u u ntimbhe ngandak mambadga. I nkwel u, u ñunda inyuki di gwé ngôñ ni binoñ ni lelaa nyemb i mut wada i nsas bibéba bi ngandak bôt. Di ntibil nok kii i yé bret ni wai ni bonjee ba nlama je bret ni nyo wai. (Añ Lukas 22:19, 20.) I ñéba ki bés bisai bi mbem i bet ba ga niñ hana ’isi. (Yésaya 35:5, 6; 65:17, 21-23) Di nlama ti mayéga inyu i mam mana momasôna. Ngandak bôt i nyi bé i mam ma, i nyi bé to nseñ i sesema i Yésu, ba mbigda bé to nyemb Yésu kiki banigil bé ba bé boñ. Inyuki?
5. I ngéda libim li banigil ba Yésu ba bi wo, lelaa ngandak bôt i bi kahal lôôs Mbigda nyemb Yésu?
5 I ngéda libim li banigil li bi wo, bikristen bi malôga bi bi jôp i ntôñ u Yéhôva. (Matéô 13:24-27, 37-39) Ba bi lona “minkoda mi biniigana inyu ôt banigil i mbus yap.” (Minson mi baôma 20:29, 30) Ikété minkoda mi biniigana ba bi lona, jam jada li bé le ba bé niiga le Yésu a bi ti bé niñ yé “ngélé yada inyu ngélé yosôna, inyu begee bibéba bi ngandak bôt” kiki Bibel i niiga, bo ba bé kal le sesema i Yésu i nlama tina ngandak ngélé. (Lôk Héber 9:27, 28) I len ini, ngandak bôt i nhémle bitembee bi. Hiki ngéda, ba nkodba i bibase, bape ba nkodba hiki kel inyu boñ i yom ba nsébél le “Je Tata.” b Bibase bipe bi mbigda bé nyemb Yésu hiki ngéda, ndi, ngandak yap i nyi bé bañga jam mu sesema i Yésu. Bôt bahogi ba yé le ba badba le: “Baa bé le nyemb Yésu i nla boñ le bibéba gwem bi nwéhlana?” Inyuki ba mbadba mbadga i? Ibale u nke béñge, i bôt ba nkal le nyemb Yésu i nla bé boñ le bibéba gwés bi nwéhlana bon ba ntinde bo i hoñol hala. Kii banigil ba Yésu ba bi boñ mu jam li?
6. Kii banigil Bibel ba bi nok i nwii 1872?
6 Bebee ni nwii 1900, banigil Bibel ba Charles Taze Russell a bé éga, ba bi bôdôl nigil Bibel bañga liniglak. Ba bééna ngôñ i yi umbe nseñ sesema i Yésu i gwé ni lelaa Mbigda nyemb yé i nlama tagbe. I nwii 1872, yigil yap i Bibel i bi éba bo le sesema i Yésu i yé inyu bôt ba binam bobasôna. Ba bi sôô bé i jam li. Ba bi tjam i jam li bok yosôna ni njel bikaat, bakégikel ni mimbamble. Mu nlélém ngéda u, ba bi nigle bikristen bi bisu, ba bôdôl kodba inyu bigda nyemb i Yésu.
7. Lelaa bôlô i banigil Bibel i nhôla bés i len ini?
7 Bôlô i banigil Bibel ba bi sal behee i nhôla bés i len ini. Lelaa? Ni mahôla ma Yéhôva, di mpam i nok kii i yé sesema i Yésu ni umbe nseñ i gwé. (1 Yôhanes 2:1, 2) Di nigil ki le Bibel i mpôdôl mintén mi botñem ima, bahogi ba gwé botñem i niñ i ngii ibabé i wo kekikel, bape ba gwé botñem i niñ hana ’isi i boga ni boga. I ngéda di nok lelaa Yéhôva a ngwés bés, ni kii sesema i Yésu i nlona bés, di nkônde gwés Yéhôva. (1 Pétrô 3:18; 1 Yôhanes 4:9) Inyu hala nyen di mboñ kiki banigil ba Yésu, di naña ngandak bôt i Mbigda nyemb Yésu kiki a bi niiga bés.
DI NAÑA BÔT I MBIGDA NYEMB YÉSU
Kii u nla boñ inyu boñ le u yoñ ngaba ikeñi i naña bôt i Mbigda nyemb Yésu? (Béñge maben 8-10) e
8. Ibôdôl behee, lelaa Mbôgi Yéhôva i naña ngandak bôt i Mbigda nyemb Yésu? (Béñge titii.)
8 Mbôgi Yéhôva i naña ngandak bôt i Mbigda nyemb Yésu ibôdôl behee. I nwii 1881, ba bi naña lôk kéé i bôda ni i bôlôm i loñ Amérika i kodba i ndap mankéé wada i Alleghenie, i Pennsylvanie, inyu bigda nyemb Yésu. I mbus ngéda, hiki likoda li bé lôôs Mbigda nyemb Yésu. I sôñ Matumb nwii 1940, ntôñ u bi kal le lôk kéé i nla naña i bet ba ngwés lo i bigda nyemb Yésu. Ngélé bisu le ntôñ u pémés mapep inyu naña bôt i Mbigda nyemb Yésu a bé i nwii 1960. Ibôdôl ha ngéda i, di ma ti didun di didun di mapep inyu naña bôt i Mbigda nyemb Yésu. Inyuki di nsal i bôlô i yosôna?
9-10. Bonjee di naña i Mbigda nyemb Yésu? (Yôhanes 3:16)
9 Jam jada li li ntinde bés i naña bôt i Mbigda nyemb Yésu li yé le di gwé ngôñ le ba yi kii Yéhôva bo Yésu ba bi bôñol bés. (Añ Yôhanes 3:16.) Ngôñ yés i yé le i mam ba ga tehe nyoo ni i mam ba ga nok, ma tinde bo i bégés Yéhôva. Ndi, di naña ki bôt bape.
10 Di naña yak i bôt ba bi ke haa ni Yéhôva. Di naña bo inyu boñ le ba hôya bañ le Yéhôva a ngwés bo. Ngandak yap i yé i lo i Mbigda nyemb Yésu, di yé ki maséé i ngéda ba yé ha. I ngéda ba nlo i Mbigda nyemb Yésu, ba nhoñol lelaa ba bé maséé i gwélél Yéhôva i ngéda kôba. Di béñge ndémbél i Monica. c A bi témb a bôdôl lo makoda ni i likalô munu ngéda himala hi COVID-19. I ngéda a bi lo i Bilôp bi Nwet i nwii 2021, a bi kal le: “Bilôp bi Nwet bini bi bé tôbôtôbô inyu yem. Hala a yé 20 ma nwii le me sôga téé likalô, ndi nano, me naña bôt i Mbigda nyemb Yésu. Me nsal i bôlô i ni ñem wem wonsôna inyule me nsômbôl ti Yéhôva bo Yésu mayéga inyu jam ba bi bôñôl me.” (Tjémbi 103:1-4) To bôt ba nleege bés, to ba nleege bé bés, di nwaa bé naña bôt i Mbigda nyemb Yésu, inyule di nyi le Yéhôva a nkônôl bés maséé.
11. Lelaa Yéhôva a nsayap bés i ngéda di naña bôt i Mbigda nyemb Yésu? (Hagai 2:7)
11 Yéhôva a nkôp bés bisai i ngéda di nke i naña bôt i Mbigda nyemb Yésu. I nwii 2021, tolakii COVID-19 a bé nnayak, bôt ba bi lo i Mbigda nyemb Yésu 21 367 603. Hala a yé nsoñgi u Mbôgi Yéhôva bebee le ngélé iba ni pes. Ndi nsoñgi bé won Yéhôva a mbéñge, a ntôñ hiki mut. (Lukas 15:7; 1 Timôtéô 2:3, 4) Pééna yo ki yo i ta bé le Yéhôva a ñôt bôt ikété ntôñ ni njel bôlô di nsal inyu naña bo.—Añ Hagai 2:7.
YAK I NGÉDA DI MBOMA MANDUTU, DI NTÔL BÉ I MBIGDA NYEMB YÉSU
Yéhôva a nsayap biliya di mboñ inyu ba i Mbigda nyemb Yésu (Béñge liben 12) f
12. Kii i nla boñ le i ke i Mbigda nyemb Yésu i nla bane bés ndutu jam? (Béñge titii.)
12 Yésu a bi kal le di ga boma ngandak mandutu munu dilo di nsôk, bôt ba lihaa ba nkolba bés, di mboma ndééñga, gwét, himala ni ngandak mam ipe. (Matéô 10:36; Markô 13:9; Lukas 21:10, 11) Ngim mangéda, i mam mana ma nla boñ le i ke i Mbigda nyemb Yésu i ba bés ndutu jam. Kii lôk kéé yés i bôda ni i bôlôm i bi boñ i ngéda i bi boma mandutu ma, lelaa Yéhôva a bi hôla bo?
13. Lelaa Yéhôva a bi sayap Artem i ngéda a bi lôôs Mbigda nyemb Yésu i ndap mok?
13 Mok. Lôk kéé yés i bôda ni i bôlôm i i yé i ndap mok i mboñ biliya inyu bigda nyemb Yésu. Di béñge ndémbél i Artem. I nwii 2020, i ngéda Mbigda nyemb Yésu, a bé ikété ndap mok i i bé isii, bôt ba mok batan ba bak mu ikété. Tolakii a bé mu mok mi, a bi kôhna bret ni wai, a yoñ ki bitelbene le a ga ti nkwel u Mbigda nyemb Yésu. Ndi i bôt ba bé mu ndap mok ni nye ba bé ôt siga, ba podok bijôñ. A bi boñ lelaa? A bi yemhe bo le ba waa pot bijôñ, ba waa ki ôt siga inyu ngeñ yada ndigi. Hala a bi hélés yak nye le ba bi neebe. Artem a nkal le: “Me bi kal bo le me ntoñle bo kii i yé Mbigda nyemb Yésu.” I bôt ba, ba bi kal le ba gwé bé ngôñ le a añle bo jam inyu Mbigda nyemb Yésu. Ndi i ngéda ba bi tehe ni nok lelaa a bé tégbaha Mbigda nyemb Yésu, ba bi bôdôl bat nye mambadga.
14. Lelaa di bi lôôs Mbigda nyemb Yésu tolakii COVID-19 a bé?
14 COVID-19. I ngéda COVID-19 a bi bôdôl, di bé ha bé le di ke i Mbigda nyemb Yésu i ndap Ane. Ndi hala a bi sôñga bé le di bigda nyemb Yésu. d I bôt ba bééna internet, ba bi lôôs Mbigda nyemb Yésu ni njel Zoom. Ndi i bôt ba bééna bé internet ba bi boñ lelaa? I ngim biloñ, ntôñ u bi boñ le nkwel u Bilôp bi Nwet u tagbe i télé tole i radiô. Ntôñ u bi boñ ki le ba kobol nkwel u Mbigda nyemb Yésu ikété iloo 500 dilémb inyu boñ le yak i lôk kéé i i yé i mambai i laa emble wo. Lôk kéé i bôlôm i bé i ke i ti nkwel u nyoo mambai ma.
15. Kii ndémbél i Sue i niiga we?
15 Ngolba i bôt bés ba lihaa. Lôk kéé ihogi, bôt bap ba lihaa bon ba nsôñga bo i ke i Mbigda nyemb Yésu. Di yoñ hihéga hi muda wada le Sue nu a bé nigil Bibel. I nwii 2021, hilo hiada ilole kel i Mbigda nyemb Yésu i nkola, Sue a bi kal mankéé nu a bé kena yigil yé i Bibel le a ga la bé ke i Mbigda nyemb Yésu inyule lihaa jé li nkolba nye. I mankéé nu a bi éñél nye kaat Lukas 22:44. A kal nye le, i ngéda di mboma mandutu, di nlama noñ ndémbél i Yésu nu a bé yemhe Yéhôva, a bôdlak nye ñem. I kel Mbigda nyemb Yésu, Sue a bi kôôba bret ni wai, a béñge buk kel i Mbigda nyemb Yésu i jw.org. Kôkôa, a jôp i tuñ yé, a kahal emble nkwel u Mbigda nyemb Yésu mu téléfôn yé. I mbus ngéda, Sue a bi tilna i mankéé nu a bé kena yigil yé i Bibel, a kal nye le: “Bibuk u bi kal me yani, bi bi ti me makénd ngandak. Me bi boñ i ni i me bé la inyu ba i Mbigda nyemb Yésu, Yéhôva a sayap. Maséé ma yé le ma nol me!” U nhoñol le yak we Yéhôva a yé le a hôla we ibale i nya jam i i mpémél we?
16. Kii i nyis bés le ibale di nke i Mbigda nyemb Yésu, Yéhôva a ga sayap bés? (Rôma 8:31, 32)
16 Yéhôva a yé maséé ngandak i ngéda di mboñ biliya i ke i Mbigda nyemb Yésu. Ibabé pééna yo ki yo, ibale di nti nye mayéga inyu jam a bi bôñôl bés a ga sayap bés. (Añ Rôma 8:31, 32.) Di boñ kii yosôna di nla inyu ke i Mbigda nyemb Yésu i nwii unu, di boñ ki ngandak mam i nson u Yéhôva mu ngéda Mbigda Nyemb Yésu.
HIÉMBI 18 Di nti mayéga inyu binoñ
a I ngwa um, i hilo 4 hi sôñ Matôp nwii 2023, didun di bôt di ga kodba ni nkoñ ’isi wonsôna inyu bigda nyemb Kristô. Inyu ngandak bôt, hala a ga ba bo ngélé yap i bisu. Bape ba yé Mbôgi Yéhôva i i ma sôga makoda. Bape ba mboma ngandak mandutu, ndi to hala ba nlo i Mbigda nyemb Yésu. To imbe ndutu di mboma, Yéhôva a yé maséé i ngéda di nlo i likoda li.
b I bôt ba yé mu bibase bi, ba nhoñol le i kel je tata, bret ni wai bi nyila nyuu ni matjél ma Kristô. Mahoñol map ma yé le, nyuu ni matjél ma Yésu ma ntina kiki sesema hiki ngéda ba yé i je tata.
c Di nhéñha ngim mol.
d Béñge yak i gwigil bini le: “Le Mémorial de 2021” i jw.org.
