1-2. (a) Inyuki mandutu ma tane bé bés nkén jam? (b) Kii di ga tehe munu yigil ini?

 BÉS bagwélél ba Yéhôva, i ngéda mandutu ma nkwél bés, hala a nhélés bé bés. Di nyi le Bibel i nkal le: “Di nlama tagbene ikété ngandak mandutu inyu jôp i Ane Nyambe.” (Minson mi baôma 14:22) Di nyi le ntel di njôbôk bé i mbok yondo i het “nyemb y’a ba ha bé, to maéya, to nlondok, to njoghe,” mandutu ma nla bé mal.​—Masoola 21:4.

² Yéhôva a nsôñga bé le di boma mandutu. Ndi a nhôla bés i hônba. Di béñge i yom Paul a bi kal lôk kéé i Rôma. A bi bôk a sima ngim mandutu nye ni i lôk kéé i ba bé boma. Ndi a kal le: “Lôñni mahôla ma nu a bi gwés bés, di nyémbél i mam mana momasôna yémbél yosôna.” (Rôma 8:35-37) Hala a nkobla le Yéhôva a nhôla bés yak i ngéda di yé ikété ndutu. Di béñge lelaa Yéhôva a bi hôla Yôsep ni lelaa a nla hôla bés.

3. Imbe ndutu i bi puhe Yôsep?

³ Yakôb a bé sôô bé le a ngwés lok yé Yôsep ngandak. (Bibôdle 37:3, 4) Inyu hala nyen lôkisañ i bi bôdôl kil nye njôñ. I ngéda pôla i bi nene, ba nuñul nye yak Lôk Madian. Lôk Madian i kena nye haa i Égiptô, yak bo ba nuñul nye yak Pôtifar, ñane batat  ndap i Faraô. Niñ i Yôsep i bi héñha, a bé yak isañ nu a bé gwés nye, nano a yé nkol u man Égiptô!​—Bibôdle 39:1.

4. Lelaa di yé le di boma mandutu ma ma mpôna ma Yôsep a bi boma?

⁴ I ngobol i Bibel ini le Holy Bible​—Easy-to-Read Version i nkal le: “Mandutu ma nkwél bôt bobasôna.” (Ñañal 9:11) Ngim mangéda, di yé di mboma mandutu “ma ma mbéna kwél bôt,” hala wee mandutu bôt ba binam bobasôna ba mboma. (1 Korintô 10:13) Tole mandutu ma yé le ma kwél bés ndik inyule di yé banigil ba Kristô. Kiki hihéga, bôt ba yé le ba nol bés hiol, ba kolba bés tole ba tééñga bés inyule di ngwélél Yéhôva. (2 Timôtéô 3:12) To imbe ndutu i ntééñga we, Yéhôva a yé ni we. Lelaa ñañ u Yôsep u ñunda jam li?

5. Ngéda Pôtifar a bi tehe le mam ma nke loñge inyu Yôsep, kii a bi kal? (Bibôdle 39:2-6)

⁵ Añ Bibôdle 39:2-6. Pôtifar a bi yimbe le Yôsep a bé mañge nu a nyi jam, a bak mut bôlô. A bé yi inyuki Yôsep a bé hala. A bé tehe le “Yéhôva a bé boñ le i mam momasôna [Yôsep] a bé boñ ma too.” b I mbus ngéda, Yôsep a yila ngwélél Pôtifar. A téé Yôsep i ngii bôt ba ndap yé yosôna. Hala a bi lona kii? Hala a bi boñ le mam ma kee loñge i ndap Pôtifar.

6. Mambe mahoñol Yôsep a bé le a bana mu ndutu yé?

⁶ Di noode le hégda mahoñol Yôsep a bé le a bana. Kii i bé le i kon nye ngôñ ha ngéda i? Baa a bé yéñ le Pôtifar a yimbe nye, a ti ki nye makébla? I jam li bé kon Yôsep ngôñ li bé le ba nwas nye a témb yak isañ. I yé maliga le Yôsep a bééna ngandak mam malam mu ndap i Pôtifar, ndi di hôya bañ le a bé nkol u mut a bé gwélél bé Nyambe. Yéhôva a bi boñ bé le Pôtifar a nwas Yôsep. Mam ma bi kônde yak bep inyu yé.

7. Lelaa bisamal a bi hielbana Yôsep bôô? (Bibôdle 39:14, 15)

⁷ Kaat Bibôdle pes 39 i ñunda le nwaa Pôtifar a bé gwés Yôsep, jon a bé waa bé tjak nye ndéñg. Hiki ngéda, Yôsep a bé tjél. I jam li, li bi lôôha unbaha nye kayéle a ôm Yôsep nsohi le a nsômbôl lalna nye ni ngui. (Añ Bibôdle 39:14, 15.) I ngéda Pôtifar a bi nok jam li, a ha Yôsep i mok, Yôsep a nom nyoo mok. (Bibôdle 39:19, 20) I mok mi, mi bé lelaa? I buk Héber Yôsep a ngwélél inyu pôdôl ndap mok i nkobla ki le “bee.” Hala a nkobla le i ndap mok i het ba bi ha Yôsep, jiibe li bé mu ngandak, i ngéda a bi jôp nyoo, a lehel ñem. (Bibôdle 40:15, matila isi lipep.) Bibel i nkal le inyu ngim ngéda, ba bi ha nye dikéñ i makôô, ba ha nye nsañ u bikei i joo. (Tjémbi 105:17, 18) Bisamal a bi hielbana nye bôô. A bé nkol, nwet wé a bôdlak nye ñem, ndi i mbus ngéda, a bi yila mut mok nu a yé ngoo.

8. To ndutu i yé nnayak lelaa, kii di nlama bé hôya?

⁸ Baa ndutu i ma nai we, u soohe Yéhôva ngandak, ndi to hala i mal bé? Hala a nla pémél bés. Di niñil i nkoñ ’isi u Satan, jon Yéhôva a nla bé sôñga le mandutu ma kwél bés. (1 Yôhanes 5:19) Ndi u hôya bañ le Yéhôva a ntehe ndutu yoñ, a ntôñ we. (Matéô 10:29-31; 1 Pétrô 5:6, 7) A bi bôn ki bés le: “Me yé mbén i yék we, to tjôô me yé mbén i tjôô we.” (Lôk Héber 13:5) Yak i ngéda u mal lehel ñem, Yéhôva a nla nhôla we. Di béñge lelaa a bi hôla Yôsep.

9. Kii i ñéba le i ngéda Yôsep a bé i mok Yéhôva a bé lôñni nye? (Bibôdle 39:21-23)

⁹ Añ Bibôdle 39:21-23. Yak i ngéda Yôsep a bé i mok, Yéhôva a bé lôñni nye. Lelaa? Maboñok ma Yôsep ma bi boñ le ñane ndap mok a kahal bôdôl nye ñem, a ti ki nye lipém ndik kiki Pôtifar. I mbus ngéda, ñane ndap mok a bi téé Yôsep i ngii bana bôt ba mok bape. Bibel i nkal yak le “ñane ndap mok a bé béñge bé jam jo ki jo li bé i woo Yôsep.” Hala a bi boñ le Yôsep a bana bôlô i i bi hôla nye i hôya mandutu mé. Kinje hélha jam! Lelaa ba yé le ba ti mut mok nu ba nkal le a sômblak lalna nwaa ñane wé i nya tel ini? A ta bé jam lipe, a yé ndik i yom di ñañ hana i kaat Bibôdle 39:23 i i nkal le: “Yéhôva a bé lôñni Yôsep, ni le hiki jam Yôsep a bé boñ, Yéhôva a bé boñ le li too.”

10. Kii i bé le i boñ le Yôsep a hoñol le Yéhôva a ta bé i boñ le hiki jam a mboñ li too?

¹⁰ Di noode ki hégda mahoñol Yôsep a bé le bana. Baa ni nhoñol le i ngéda ba bi ôm nye nsohi yañga, ba ha nye i mok, Yôsep a bé le a hoñol le Yéhôva a yé boñ le hiki jam a mboñ li too? Kii i bé i nkon nye ngôñ ha ngéda i? Baa ngôñ yé i bé le ñane ndap mok a kônôl nye maséé? Sômbôl i Yôsep i bé le ba pémés nye mu mok mi. A bi kal yak mut mok numpe nu a bé pam i mok le a hôla nye i kwélés Faraô ibale a nla pémés nye i mok. (Bibôdle 40:14) Ndi i ngéda i mut mok nu a bi pam,  a bi ke bé i tehe Faraô. Hala a bi boñ le Yôsep a témb a yén mu mok mi nwii ima. (Bibôdle 40:23; 41:1, 14) Ndi Yéhôva a bi ke ni bisu i sayap nye. Lelaa?

11. Limbe likeñge Yéhôva a bi ti Yôsep, lelaa likeñge li li bi hôla i yônôs sômbôl i Yéhôva?

¹¹ I ngéda Yôsep a bé i mok, Yéhôva a bi boñ le kiñe Égiptô i emel bieem biba bi, bi bi kônha nye woñi. Faraô a bééna ngôñ i yi ngobol i bieem bi. I ngéda Faraô a bi nok le Yôsep a nyi kobol bieem, a bi ep le ba sébél nye. Yéhôva a bi hôla Yôsep i kobol bieem bi, ni i ti Faraô maéba malam, hala a hélés Faraô. Kiki Faraô a bi tehe le Yéhôva a bé lôñni Yôsep, a bi téé nye le nyen a kap bijek ikété loñ Égiptô yosôna. (Bibôdle 41:38, 41-44) I mbus ngéda, njal i bi nai, ha ndik i loñ Égiptô bé ndi yak i Kanaan i het lihaa li Yôsep li bé yén. Hala a bi boñ le Yôsep a laa tohol lihaa jé i het Mésia a bé lama lôl.

12. Lelaa Yéhôva a bi boñ le mam ma Yôsep ma too?

¹² Di hoñol bihélha bi mam bi bi bôña i niñ i Yôsep. Njee a bi boñ le Pôtifar a yimbe nkol kiki Yôsep? Njee a bi boñ le ñane ndap mok a gwés Yôsep nu a bé mut mok? Njee a bi boñ le Faraô a emel bieem, a ti ki Yôsep pék inyu kobol gwo? Njee a bi tinde Faraô i téé Yôsep le nyen a kap bijek ikété loñ Égiptô yosôna? (Bibôdle 45:5) Ibabé nkaa, Yéhôva nyemede a bi boñ le mam ma Yôsep momasôna ma too. Sôk i nsôk, Yéhôva a bi gwélél jimb lôktata i Yôsep i bi ôô inyu boñ nye béba, inyu yônôs sômbôl yé.

13. Baa hiki ngéda di mboma mandutu Yéhôva a mboñ jam? Toñol.

¹³ Kii ñañ u Yôsep u niiga bés? Baa hiki ngéda di mboma mandutu Yéhôva a mboñ jam? Baa a nkena mam momasôna i niñ yés kayéle di nla kal  le béba jam i nla bé kwél bés yañga? Hala bé nyen Bibel i niiga. (Ñañal 8:9; 9:11) Ndi di nyi le i ngéda di mboma mandutu, Yéhôva a ntehe, a ñemble ki masoohe més. (Tjémbi 34:15; 55:22; Yésaya 59:1) Yéhôva a nla yak hôla bés i hônba mandutu més. Lelaa?

14. I ngéda di mboma mandutu, lelaa Yéhôva nhôla bés?

¹⁴ Jam jada Yéhôva a mboñ inyu hôla bés li yé le a yé a lédés bés i loñge ngéda. (2 Korintô 1:3, 4) I jam li jon li bi pémél mankéé wada i Turkménistan le Eziz i ngéda ba bi ha nye i mok nwii ima inyule a ngwélél Yéhôva. A nkal le: “I hilo hi bikééhene gwem, mankéé wada a bi éñél me kaat Yésaya 30:15, i i nkal le: ‘Ngui nan y’a ba le ni yén nwee, ni bôdôl ki me ñem.’ I nlôñ kaat u, u nhôla me i ba nwee ni i bôdôl Yéhôva ñem hiki ngéda. Kiki me bi yoñ ngéda i ôt pék mu nlôñ kaat u, hala a bi hôla me i hônba mu ngéda yosôna me bi tégbaha i mok.” Baa u ngi hoñlak i ngéda u bé boma mandutu, ndi Yéhôva a hôla we?

15-16. Kii ndémbél i Tori i niiga bés?

¹⁵ Di mbéna nôgda le Yéhôva a nhôla bés i ngéda ndutu yés i ntagbe. Sita yada le Tori a bi tehe jam li, lok yé Mason a bi kon pos nwii minsamal letee a wo. I jam li li bi pat nye ñem. A nkal le: “Ndutu yo ki yo i nlel bé i me bi nok. Bagwal ba nyi le nseñ wemede u nok ndutu, ilole u tehe man woñ a nok ndutu.”

¹⁶ Tolakii i ndutu i i bi pat nye ñem, a nhoñol lelaa Yéhôva a bi hôla nye. A nkal le: “I ngéda me mbigda i jam li, me ngi hoñlak lelaa Yéhôva a bi hôla me mu kon u lok yem. Kiki hihéga, yak i ngéda Mason a bé bé le a telep inyu kwel ni lôk kéé, hala a bé sôñga bé le ba kee liké li ngeñ iba inyu lo i dokta. Hiki ngéda, lôk kéé i bé lo inyu yuuga bés, i bak bebee i hôla bés. Ba bé ti bés mam momasôna ma bé béda bés. Yak i ngéda mam ma bé lédél bés, di bééna i ni i i bé béda bés.” Yéhôva a bi ti Tori bona lok yé Mason hiki yom i bé béda bo.​—Béñge minkéñék mi matila mini le “ Yéhôva a bi ti bés i yom i bé béda toi bés.”

17-18. Kii i nla hôla bés i tehe mam Yéhôva a bôñôl bés i ngéda di mboma mandutu? (Tjémbi 40:5)

¹⁷ Añ Tjémbi 40:5. I ngéda mut a mbet hikôa, ngôñ yé i yé le a pam i ngii hikôa. Ndi ngandak bahoma i yé mu njel i het a nla telep a kahal memle. Hala nyen yak bés di nlama telep, inyu béñge lelaa Yéhôva a nsayap bés yak i ngéda di mboma mandutu. Hiki kôkôa badba le: ‘Lelaa Yéhôva a nsayap me len? Tolakii ndutu yem i malak bé, lelaa Yéhôva a yé hôla me i hônba?’ Yéñ to jam jada Yéhôva a mbôñôl we.

¹⁸ Bebek u yé soohe le Yéhôva a mélés ndutu yoñ, u kôli bôñ hala. (Filipi 4:6) Ndi, di béñge yak bisai di gwé hanano. Di hôya bañ le Yéhôva a bi bôn le a ga lédés bés, a hôla ki bés i hônba. Jon di ti Yéhôva mayéga inyule a yé ni bés. Ha nyen d’a tehe woo u Yéhôva kiki Yôsep a bi tehe wo i ngéda a bé boma mandutu.​—Bibôdle 41:51, 52.