Bahogi ba bi néñél i homa ngandak bôlôm i ntehe bé bôda kiki bôt. Kiki hihéga, mankéé Hans nu a yé ngwélél makiiña i loñ Bôliwai a nkal le: “Ngim bôlôm i bi nañ i het ba bi niiga bo le munlôm a nlama ba lôs, a undga le a gwé ngui, jon ba nhoñol ikétékété yap le bôlôm ba nloo bôda.” Mankéé Shengxian, nu a yé mañ likoda i loñ Taiwan a nkal le: “I homa me bi néñél, muda a gwé bé yom yo ki yo i pot i ngéda i mbéda le munlôm a yoñ makidik. Ibale bôlôm ba yé i kwel, ndi wada a kal i yom nwaa a nhoñol, mawanda mé ma ntehe nye kiki mut a mbomb.” Yak bôlôm bape, litehge jap libe li bôda li nene nya ipe. Kiki hihéga, ba mbéna bana bipôdôl bi bi nsuhus libak li bôda inyu jôha.

Masoda le, munlôm nye ki nye a ta bé nyégsaga i boñ i mam ba bi niiga nye i ngéda a bé nañ. Di nla héñha litehge lini le, bôlôm ba nloo bôda. (Éfésô 4:22-24) Di nla pam i boñ hala ibale di nkôna ndémbél i Yéhôva. Munu yigil ini, di ga tehe lelaa Yéhôva a ntehe bôda, lelaa lôk kéé i bôlôm i nla nigil i tehe bôda kiki Yéhôva, ni lelaa mimañ mi nla ti ndémbél mu jam li.

LELAA YÉHÔVA A NTEHE BÔDA?

Yéhôva a nti bés ndémbél i peles mu jam li. Kiki Isañ nu konangoo, a ngwés bés bon bé bobasôna. (Yôhanes 3:16) Bôda ba hémle ba yé i mis mé kiki tik yé bingond. Nano di béñge ngim mam Yéhôva a mboñ inyu unda le a ndiihe bôda.

 A mbagal bé bo. Yéhôva a bi hek bôlôm ni bôda i pôna yé. (Bibôdle 1:27) A bi hek bé bôlôm ni yi i i nloo i bôda, to ni makeñge ma tôbôtôbô; a ntehe bé to le bôlôm ba yé nseñ iloo bôda. (2 Miñañ 19:7) A hek bôlôm ni bôda ni ngap i nigil Bitilna ni i nok i yom ba nigil, kayéle ba hôlôs bilem gwé. Yéhôva a bi ti bôda ni bôlôm ba hémle botñem i niñ i boga hana ’isi, tole i ba bikiñe ni biprisi i ngii. (2 Pétrô 1:1, buk isi lipep.) Ñ, Yéhôva a gwééne bé bôda mahoñol mabe mo ki mo.

A ñemble bo. Yéhôva a nyoñ ngéda i yi mahoñol ma bôda ni i yom ba nôgda. Kiki hihéga, a bi emble masoohe ma Rahel ni ma Hana, a timbhe ki mo. (Bibôdle 30:22; 1 Samuel 1:10, 11, 19, 20) Ni ngui i mbuu mpubi, Yéhôva a bi tinde bôt i tila miñañ mi bôlôm ba ba bi emble bôda. Kiki hihéga, Abraham a bi nôgôl Yéhôva nu a bé bat nye le a emble nwaa wé Sara. (Bibôdle 21:12-14) Kiñe David a bi emble Abigail. Inyu David, Yéhôva nyen a bi om Abigail i pôdôs nye. (1 Samuel 25:32-35) Yésu nu a bi kôna bilem bi Isañ i nya i yôni, a bi emble mama yé Maria. (Yôhanes 2:3-10) Dihéga di tjodisôna di ñunda le njel yada Yéhôva a ngwélél inyu ti bôda lipém i yé le a ñemble bo.

A mbôdôl bo ñem. Kiki hihéga, Yéhôva a bi bôdôl Éva ñem, jon nyen a bi pohol inyu hôla Adam i yoñ ndun ni hisi. (Bibôdle 1:28) Hala a bé unda le i mis mé, Adam a bé loo bé nwaa wé Éva, ndi a bé tehe le a nla bane nye nhôla nu a kôli ni nye. Yéhôva a bi bôdôl ki bôda bape kiki bo Débôra ni Hulda ñem, a téé bo bapôdôl inyu béhe litén jé, kiñe ni nkéés. (Bakéés 4:4-9; 2 Bikiñe 22:14-20) I len ini, Yéhôva a mbôdôl bisita ñem, jon a mbééga bo nson. Ba yé batéé likalô, basañal ni missionnaires. Ba nhôla i ôt bititii bi mandap ma ntôñ, i maoñ, ni i bôñgôl mandap ma Ane ni ma Bétel. Bahogi ba nsal i Bétel, bape ba salak i muu ma ngobol. Bisita bini bi yé kiki soso ntôñ gwét Yéhôva a nkot inyu yônôs sômbôl yé. (Tjémbi 68:11) Ñ, Yéhôva a ntehe bé bôda kiki mimboye mi bôt mi mi nla bé boñ yom yo kiki yo.

LELAA BILÔK BIKÉÉ BI BÔLÔM BI NLA NIGIL I TEHE BÔDA KIKI YÉHÔVA?

A lôk kéé i bôlôm, inyu yi too di ntehe bisita kiki Yéhôva, di wan mahoñol ni maboñok més. Di gwé ngôñ ni mahôla inyu pam i boñ hala. Kiki rayons Laser i nhôla i yi too mut a nkon i ñem, Bañga i Nyambe i nla hôla bés i wanba inyu yi ibale di ngi gwé to ndék mahoñol mabe inyu bôda, yak liwanda jés jada li nla hôla bés i yi i jam li. Kii di nla boñ inyu kôs mahôla ma?

Bat liwanda joñ jada. (Bingéngén 18:17) Di nla bat liwanda jés jada di mbôdôl ñem, nu a nyiba kiki mut minyaô, ni nu a nai bé ni litehge jé li mam le: “We u nhoñol le limbe litehge li bisita me gwé? Baa bisita bi nôgda toi le me nti bo lipém? Baa u ntehe le me nlama kônde lémés maada mem ni bo?” Ibale liwanda joñ li ñunda we ngim mam u nlama kodol, u kaaba bañ. Ndi boñ biliya i lona mahéñha.

Nigil Bañga i Nyambe. Njel i nlôôha ilam inyu yi ibale di gwé litehge li Djob inyu bisita i yé le, di wan mahoñol ni maboñok més i ngéda di nigil Bañga i Nyambe. (Lôk Héber 4:12) Yigil yés i Bibel i nhôla bés i tehe ndémbél i bôlôm ba ba bééna litehge lilam li bôda ni ba ba bééna bé yo. Ngéda di yé i nigil yada mu, di wanba. Mu kiki di nigil, di nlama wan ngandak minlôñ mi Bibel inyu boñ le di yoba bañ mu jam Bibel i nsômbôl niiga bés. Kiki hihéga, kaat 1 Pétrô 3:7 i nkal le, munlôm a nlama ti nwaa “lipém kiki ébél i i mbomb iloo nye.” b Baa hala nkobla le munlôm a nloo nye? Le a nyi bé jam kiki munlôm, tole a yé mboye? Heni! Inyu nok i yom Pétrô a ngwés kal hana, di hégha bipôdôl  gwé ni i yom di nléba i kaat Galatia 3:26-29 i het ba nkal le Yéhôva a bi pohol bôlôm ni bôda inyu ke i ane lôñni Yésu i ngii. Ngéda di nigil Bañga i Nyambe, di bat ki liwanda jés jada le a kal bés too di gwé litehge lilam li bôda, di ga pam i unda lôk kéé yés i bôda le di nti bo lipém ni le di ndiihe bo.

LELAA MIMAÑ MI NLA TI LÔK KÉÉ YÉS I BÔDA LIPÉM?

Bilôk bikéé bi bôlôm bi nla yak nigil i ti bisita lipém ngéda ba mbéñge ndémbél i mimañ mi likoda. Lelaa mimañ mi nla ti ndémbél ilam mu jam li? Di yoñ ndék dihéga.

Ba mbégés bisita. Ñôma Paul a bi ti mimañ ndémbél ilam mu jam li. Ngéda a bi tilna likoda li Rôma, a bi wo bé nyuu i bégés ngandak bisita mukété. (Rôma 16:12) Baa ni yé le ni hégda maséé bisita bini bi bi nôgda i ngéda kaat i Paul i bi éña bisu bi likoda? Nlélém i len ini, mimañ mi ngwelba bé i ngéda i mpam le mi bégés bisita inyu bilem gwap bilam ni inyu bôlô ba nsélél Yéhôva. Hala a nhôla bisita i yi le likoda li ndiihe bo ngandak, li tinak bo lipém. Makénd mañ u nla ti bisita, ma nla ba i yom bi gwé ngôñ inyu ke ni bisu i téñbe ni Yéhôva.—Bingéngén 15:23.

Ngéda mimañ mi mbégés bisita, mi nlama kal bo kii i tôbôtôbô i nlémél bo i boni. Inyuki? Sita yada le Jessica a nkal le: “Ngéda bilôk bikéé bi bôlôm bi nkal sita yada le ‘bôlô ilam,’ hala a yé loñge. Ndi di nlôôha ba maséé i ngéda bilôk bikéé bi bôlôm bi mbégés bés inyu ngim jam i tôbôtôbô di mboñ, bebek inyule di nhôla bon bés i ba nwee makoda, tole di nsomb ngéda i ke yéñ nnigil Bibel inyu lona nye i likoda.” Ngéda mimañ mi mbégés bisita inyu ngim jam i tôbôtôbô,  hala a nhôla bisita i nôgda le ba yé mahee ngandak i likoda.

Ba ñemble bisita. Mimañ mi mi yé suhulnyuu mi nyi le nwotama bé nwon mi nla bana mahoñol malam. Inyu hala nyen mi yé mi bat bisita mahoñol map, ba yoñ ki ngéda i emble gwo i ngéda bi mpot. Ngéda mimañ mi mboñ hala, mi nti lôk kéé i bôda makénd, hala a yéne ki bomede nseñ. Lelaa? Mañ wada le Gérardo nu a nsal i Bétel a nkal le: “Me bi yimbe le i ngéda me mbat bisita mahoñol map, hala a nhôla me i kônde lémés bôlô yem. I yé i ba yak le, ba bi gwel nson u ntandaa ngéda iloo ngandak bilôk bikéé bi bôlôm.” Ikété likoda, ngandak bisita i nsal kiki basañal, jon ba nyi ngandak mam i i mbéñge bôt ba libôga jés. Mañ wada le Bryan a nkal le: “Bilôk bikéé bi bôda bi gwé bilem bilam ngandak ni makeñge, ntôñ u gwé ngôñ. Jon di ôt nseñ ni yi yap!”

Mimañ mi mi gwé pék mi nyoñ ngéda i emble mahoñol ma bisita. Inyuki? Mañ wada le Edward a nkal le: “Mahoñol sita i nla ti, tole i mam a ma tehe, ma nla hôla mankéé nu munlôm i tehe makas momasôna ma ngim jam, hala a nla yak hôla nye i yi kii bôt bape ba nôgda. (Bingéngén 1:5) To ibale mañ u nyi le u nla bé noñ maéba ma ngim sita, u nla ti nye mayéga inyu mahoñol mé.

Ba niiga bisita. Mimañ mi mi gwé pék mi nyéñ manjel i niiga lôk kéé i bôda. Kiki hihéga, ba nla niiga bisita i yi kena boma i likalô i ngéda minsôblege mi lôk kéé i bôlôm mi ta bé. Ba nla niiga bo i gwélél bisélél tole mashin i ngéda ba nsal ni bo maoñ ma ntôñ, tole i bôñgôl mandap ma Ane. Mimañ mi Bétel mi niiga lôk kéé i bôda i yônôs ngandak minson kiki bo i tibil gwom, i yi somb gwom, i yi tjek mam ma moni, i yi tjek ngim minson ni ordinateur, ni gwom bipe ki. Ngéda mimañ mi niiga lôk kéé i bôda hala, mi ñunda bo le ba yé toi bôt ba nla bôdôl ñem.

Ngandak bisita i ngwélél biniigana ba nkôs inyu hôla bôt bape. Kiki hihéga, bisita bi ba bi niiga maoñ bi ngwélél makeñge ma inyu hôla bôt i tiimba oñ mandap map i ngéda bikuu bi nkwo. Bipe bi ba bi niiga i téé likalô li mbamba, bi niiga ngandak ipe makeñge ma. Kii bisita bi nôgda ngéda mimañ mi ñôô bo hala? Sita yada ba nsébél le Jennifer a nkal le: “Ngéda me bé sal maoñ ma ndap Ane yada, i mankéé a bé éga nson a bi yoñ ngéda i ôô me. A bé yimbe i bôlô me nsal, a béghak me. Me bé gwés sal ni nye ngandak, inyule a bé diihe me, a bôdlak me ñem.”

NSEÑ DI GWÉ I YOÑ BISITA KIKI BÔT BÉS BA LIHAA

Kiki Yéhôva, di ngwés lôk kéé yés i bôda! Jon di nyoñ bo kiki bôt bés ba lihaa. (1 Timôtéô 5:1, 2) Kinje maséé di nôgda i sal lôñ yada ni bo. Di yé ki maséé i yi le ba nôgda gwéha yés, ni le di nit bo. Sita yada le Vanessa a nkal le: “Me nlôôha ti Yéhôva mayéga inyule a bi ôt me ntôñ wé, u u yé nyonok ni bilôk bikéé bi bôlôm bi bi nti me makénd.” Sita yada i Taiwan i nkal le: “Me nlôôha ba maséé i yi le Yéhôva ni ntôñ wé, ba ndiihe bôda ngandak, ba yéñék yi i yom di nôgda. Hala a nlédés hémle yem, a hôlga ki me i nok nsima me gwé i ba i ntôñ u Yéhôva.”

Kinje maséé Yéhôva a nôgda i tehe bilôk bikéé bi bôlôm bi mboñ biliya i tehe bôda kiki nye! (Bingéngén 27:11) Mañ wada i Scotland nu ba nsébél le Benjamin a nkal le: “Litehge li nkoñ ’isi inyu bôda li ta bé lilam to ndék, ba nyan libak li bôda. Jon di gwé ngôñ le i ngéda bôda ba nlo i ndap Ane, bomede ba nôgda mahéñha.” Ñ, bésbobasôna di nlama boñ kii yosôna di nla i kôna Yéhôva nu a nlôôha gwés lôk kéé yés i bôda, a tinak bo lipém.—Rôma 12:10.