BUK i Grikia ba bi gwélél inyu pôdôl “kak” ikété Ngobol mbok yondo i nla ba ngandak mintén mi bikak. (Minson mi baôma 8:​28, 29, 38) Ndi i mpôna le i kak mut Étiôpia nunu a bé a bédne i bé soso iloo bikak ba bé gwélél i gwét tole i pééna ngwéé. Di wan ngim manjom i i ntinde bés i kal hala.

Mut Étiôpia nu a bé bañga mut, a bi ke ntandaa liké. A bé “bañga mut nu a bé sélél Kandaké, kiñemuda Étiôpia, nyen a bé tééda ki nkus wonsôna u kiñemuda.” (Minson mi baôma 8:27) Nlômbi loñ i Étiôpia i bé yoñ nwelmbok i loñ i Égiptô di nyi len ni loñ i Sudañ. Tolakii i nene le a bi gwélél bé nlélém kak inyu liké jolisôna, a bi lama lôñôl ngandak gwom inyu ntandaa liké li. Ikété bikak ba bé gwélél i hiai hi bisu N.Y. inyu begee bôt, bihogi bi bééna makôô ma-na, bi ban-ga man nyôl. “Ni ntén kak i, ba bé la begee ngandak mambegee, jon liké li, li bé lilam, hala a bé ki jam li ntomb inyu bôt i ke liké haa ngandak,” inoñnaga ni i yom di ñañ i kaat ini le Acts​—An Exegetical Commentary.

Mut Étiôpia a bé añ i ngéda Filipô a bi kôôge nye bebee. Ñañ u nkal le “Filipô a kee ngwéé ipañ kak, a nok [nwak u] ñañ kaat i mpôdôl Yésaya makeñi.” (Minson mi baôma 8:30) Ba bi bañ bé i nya bikak i inyu ke ngwéé ngandak. Ibale bikak bi, bi bé ke ngwéé, ki ba bé bé le ba kal le nwak Étiôpia u bé añ tole ki Filipô a bé bé le a ke ngwéé a koba i kak i.

Nwak Étiôpia u “yemhe Filipô le a bet, a yén lôñni nye.” (Minson mi baôma 8:31) Ndi ibale i kak i i bé inyu bapééna ngwéé, ki i bet ba bé mu ba bé lama ba bitétéé. Ndi inyu kak liké, homa a bé lama ba inyu boñ le nwak Étiôpia u yén lôñni Filipô.

Jon, inoñnaga ni kaat i Minson mi baôma pes 8, ni i yom miñañ mi kôba mi ñunda, bikaat gwés bi mbôdôl unda titii i nwak Étiôpia ikété soso kak i i yé maselna ni bon ba bikak ba bé gwélél i gwét tole i pééna ngwéé.