YIGIL 3
HIÉMBI 35 Di “yi bagal mam” ma nlôôha ba nseñ
Di yoñ makidik ma ma nlémél Yéhôva
“I kon Yéhôva woñi i yé bibôdle bi pék, i yi Nu a nlôôha ba mpubi yon i yé bañga yi.”—BINGÉNGÉN 9:10.
NLÔM JAM
Lelaa u nla gwélél yi, bañga yi, ni i yi bagal mam inyu yoñ makidik malam.
1. Imbe ndutu bésbobasôna di mboma?
HIKI KEL di nlama yoñ makidik. Makidik mahogi ma nlet bé, kiki bo i yi kii u nlama je kegla tole imbe ngeñ u nlama nañal. Makidik mape ma nlet i yoñ. Kiki bo makidik ma ma mbéñge mbôô wés, maséé més, i bôt di ngwés, tole bibégés di nti Nyambe. Di gwé ngôñ i yoñ makidik ma ma ga bane bés nseñ ni bôt bés ba lihaa. U héya hala, makidik més ma nlama lémél Yéhôva.—Rôma 12:1, 2.
2. Mambe mam ma ga hôla bés i yoñ makidik malam?
2 Mam maa ma nla hôla bés i yoñ makidik malam. (1) Yéñ yi mam momasôna, (2) yéñ yi mahoñol ma Yéhôva mu i jam li, (3) yéñ yi too pôla ipe i yé inyu yoñ makidik mape. I yigil ini, i ga pôdôl i mam maa mana, ni lelaa di nla hôlôs ngap yés i yi bagal mam.—Bingéngén 2:11.
YÉÑ YI MAM MOMASÔNA
3. Ti hihéga hi hi ñunda inyuki di nlama yi mam momasôna ilole di nyoñ ngim makidik?
3 Jam li bisu di nlama boñ inyu yoñ makidik malam li yé le di tibil yi mam momasôna mu i jam li. Inyuki hala a yé nseñ? Hégda nkokon nu a nke i tehe dokta inyule a nkon ngandak. Baa dokta a ga kal nye matibla a nlama yoñ ibabé i kwel ni nye tole i yi kii a nkon? Heni! Yak we, u ga pam i yoñ makidik malam ibale u nyéñ yi mam momasôna ma ma gwé maada lôñni makidik u nsômbôl yoñ. Lelaa u nla pam i boñ hala?
4. Inoñnaga ni Bingéngén 18:13, lelaa di nla ba nkwoog nkaa le di nyi mam momasôna? (Béñge yak titii.)
4 Bat mambadga momasôna ma mbéda ilole u nyoñ ngim makidik. Hégda le ba naña we i ngim ngand. Baa u ga kee? Ibale u nyi bé i mut a naña ngand, to i mam ma ga bôña nyoo, u ga badba ngim mambadga kiki bo: “Hee, ni imbe ngéda ngand i ga ba? Bôt bañen ba ga ba mu? Njee a ga éga i ngand i? Bonjee ba ga ba mu? Kii i ga bôña mu i ngand i? Baa maok ma ga ba?” Mandimbhe ma mambadga mana ma ga hôla we i yoñ makidik malam.—Añ Bingéngén 18:13.
Bat mambadga inyu yi mam momasôna (Béñge liben 4) a
5. Nano nu u nyi mam mamosôna ma nkéña ngim jam, kii u nlama boñ?
5 I ngéda u mal yi i mam momasôna ma gwé maada ni makidik ma, ôt pék loñge. W’a boñ lelaa ibale u nok le i bôt ba nlo mu i ngand i, ba ndiihe bé matiñ ma Bibel, tole maok ma ga ba nyoo ngandak ni le hiki mut a ga nyo kiki a ngwés? Baa u ntehe le y’a sôk yila ngand i mpuñgu? (1 Pétrô 4:3) Jam lipe li yé le w’a boñ lelaa ibale ngand i yé i kel u gwé likoda tole u nlama ke likalô? I ngéda w’a wan i mam momasôna ma gwé maada ni i jam li, hala a ga bane we jam li ntomb i yoñ makidik malam. Ndi u nlama boñ jam lipe. Nano nu u yé i tehe i jam u nla boñ, badba le: Lelaa Yéhôva a ntehe i jam li?—Bingéngén 2:6.
YÉÑ YI MAHOÑOL MA YÉHÔVA
6. Inoñnaga ni Yakôbô 1:5, inyuki di nlama soohe inyu bat Yéhôva mahôla?
6 Bat Yéhôva le a hôla we i yi mahoñol mé. Yéhôva a mbôn le a ga ti bés pék inyu yi too makidik di nsômbôl yoñ inyu ngim jam ma nlémél nye. A nti bés pék “i nya i nloo hihéga ibabé i yahal bés.”—Añ Yakôbô 1:5.
7. Lelaa u nla pam i yi mahoñol ma Yéhôva? Ti hihéga.
7 I ngéda u mbat Yéhôva mahôla ikété masoohe, yoñ ngéda i emble ndimbhe yé. Di yoñ hihéga inyu tibil nok i jam li. Ibale u yé i ke liké, ndi u nimil, w’a bat mut a nyi libôga li mahôla. Ndi baa w’a nyodi u kahal ke we ngi nok ndoñi yé yosôna? Heni! U ga tibil emble ndoñi a nti we. Nlélém, i ngéda u mbat Yéhôva pék, yoñ ngéda i léba ndimbhe mu mambén ni matiñ ma Bibel ma ma gwé maada ni makidik u sômbôl yoñ. Kiki hihéga, ilole u nke i ngand di bak di pôdôl, w’a yéñ ndugi i mam momasôna Bibel i niiga inyu mangand ma nyega, bilôñ bibe, ni nseñ i bii mam ma mbuu kiki jam li bisu i niñ yoñ.—Matéô 6:33; Rôma 13:13; 1 Korintô 15:33.
8. Kii u nla boñ ibale u gwé ngôñ ni mahôla inyu léba biniigana bipe? (Béñge yak titii.)
8 I nla pam le u bana ngôñ ni mahôla inyu yi mam mape. U nla kôôge bebee ni nhôôlak mankéé nu muda tole nu munlôm inyu bana mahôla ma. Ndi i nlôôha ba nseñ le u boñ nyiña i bikaat bi ntôñ. Di nléba ngandak biniigana ikété bisélél gwés kiki bo Ñéga inyu nyiña u bikaat bi Mbôgi Yéhôva ni Bitilna inyu niñ i bikristen. U hôya bañ kii i yé njômbi yoñ: le u yoñ makidik ma ma ga lémél Yéhôva.
Yéñ mahoñol ma Yéhôva (Béñge liben 8) b
9. Lelaa di nla ba nkwoog nkaa le makidik més ma ga lémél Yéhôva? (Éfésô 5:17)
9 Lelaa di nla ba nkwoog nkaa le makidik més ma ga lémél Yéhôva? Jam li bisu li yé le di nlama yi nye loñge loñge. Bibel i nkal le: “I yi Nu a nlôôha ba mpubi yon i yé bañga yi.” (Bingéngén 9:10) I yi bilem bi Yéhôva, sômbôl yé, kii a ngwés, ni kii a ñoo yon i nti bañga yi. Badba le: ‘Ni i mam momasôna me nyi inyu Yéhôva, mambe makidik ma ga lémél nye.’—Añ Éfésô 5:17.
10. Inyuki matiñ ma Bibel ma yé nseñ iloo bilem bi loñ?
10 Inyu lémél Yéhôva, ngim mangéda i ga béda le di yoñ makidik ma ma ga lémél bé mawanda més to bôt bés ba lihaa. Kiki hihéga bagwal ba nla gwés le ngond yap i biiba ni mut nu a gwé moni. Tole ni mut nu a nla ti ngandak moni inyu hôl ngond yap to ibale a ta bé nhôôlak u mankéé i pes mbuu. Maliga ma yé le bagwal ba ngwés le ngond yap i bana matééda malam i pes minsôn, ndi njee a ga hôla nye i hol i pes mbuu? Lelaa Yéhôva a ntehe i jam li? Matéô 6:33 a ntimbhe i mbadga i. Bibel i nti bikristen makénd i ke ni bisu i “yéñ ndugi Ane.” To hala kiki di nti bagwal bés ni bôt bés ba libôk lipém, jam li nlôôha ba nseñ li yé le di kônha Yéhôva maséé.
YÉÑ YI TOO U NLA YOÑ MAKIDIK MAPE
11. Imbe lem ilam di nléba i kaat i Filipi 1:9, 10, i i ga hôla we i yi mambe makidik u nlama yoñ?
11 I ngéda u ga léba matiñ ma Bibel ma ma gwé maada ni makidik moñ, tibil ôt pék inyu yi mambe makidik u ga yoñ. (Añ Filipi 1:9, 10) Liyi bagal mam li ga hôla we i yi lisuk li makidik momasôna u ga yoñ. Ngim mangéda hala a yé jam li ntomb i yoñ makidik. Ndi makidik momasôna bé mon ma ntomb i yoñ. Liyi bagal mam li ga hôla we i yoñ makidik malam to i ngéda mam ma ntomb bé.
12-13. Lelaa liyi wan mam li nla hôla we i yi imbe bôlô u ga pohol?
12 Hégda le i jam lini: U nyéñ bôlô inyu jés lihaa joñ. U nléba bibôlô biba. U nwan mam momasôna, kiki bo, ntén bôlô, ntjega woñ, ngeñ yañen i ga béda we inyu ke i bôlô, ni mam mape ki. Bibôlô bini gwo biba bi mbôk bé mambén ma Bibel. Bebek u mpohol bôlô yada mu inyule u ngwés i ntén bôlô i, tole inyule i nti ngandak moni. Ndi ilole u nyoñ makidik, mam mape ma yé le u nlama wan.
13 Kiki hihéga, baa i bôlô i i ga kéñ bé we i ke makoda? Baa i bôlô i i ga yoñ bé we ngéda u nlama tégbaha ni lihaa joñ, ni i yoñ ndun ni jo i pes mbuu? I badba i nya mambadga i, i ga hôla we i tehe maada moñ ni Yéhôva lôñni lihaa joñ kiki mam ma nlôôha ba nseñ iloo nyiña moni. Ha nyen u nla yoñ makidik Yéhôva a ga sayap.
14. Lelaa liyi wan mam ni gwéha bi ga hôla bés le di bane bañ bôt bape ngok baagene?
14 I yi bagal mam i ga hôla bés i yoñ makidik ma ma ga ba bé “ngok baagene inyu bôt bape.” (Filipi 1:10) Inyu bôt bape hala a yé nseñ i ngéda di nyoñ makidik inyu mahabga més ni bieñg gwés. Kiki hihéga, di nla gwés ngim mahabga tole ngim bieñg. Ndi kii u ga boñ ibale hala ntééñga lôk kéé i likoda tole bôt bape? I yi bagal mam i ga hôla bés i tôñ bôt bape. Gwéha i ga tinde bés le lôñni hôtnyuu di yéñ ndik bañ loñge yés bésbotama, ndi yak loñge i “bôt bape.” (1 Korintô 10:23, 24, 32; 1 Timôtéô 2:9, 10) Ha nyen di ga nyoñ makidik ma ma ñunda le di ngwés bôt bape, di tinak ki bo lipém.
15. Kii u nlama hoñol ilole u nyônôs makidik ma ngui u bi yoñ?
15 Ibale u yé i yoñ makidik ma ngui, hoñol kii i ga béda we inyu yônôs mo. Yésu a bi niiga bés le di nlama “ôt nsoñgi.” (Lukas 14:28) Noode wan inyu yi i ngéda hala a ga yoñ we ni kii i ga béda we inyu yônôs njômbi yoñ. Ngim mangéda i ga béda le u yi mahoñol ma lihaa joñ inyu yi kii hiki wada a nla boñ inyu hôla we i yônôs makidik moñ. Inyuki i nseñ i yi hala? Hala a ga hôla we i yi too i mbéda ndék mahéñha mu makidik moñ tole u nla pohol njel ipe. Ibale u nwas le lihaa joñ li nit we mu makidik u yé i yoñ, li ga ba bebee i hôla we i yônôs mo.—Bingéngén 15:22.
YOÑ MAKIDIK MALAM
16. Mambe mam ma ga hôla we i yoñ makidik malam? (Béñge yak minkéñék mi matila le “ Lelaa u nla yoñ makidik malam?”)
16 Ibale u mal boñ i mam momasôna di mpôdôl, u nla yoñ makidik malam. U mbéñge mam momasona mu i jam li, u wan yak matiñ ma ma nla hôla we i yoñ makidik ma ma nlémél Yéhôva. Nano soohe Yéhôva le a hôla we i yoñ makidik malam.
17. Kii i nlôôha ba nseñ inyu yoñ makidik malam?
17 To ibale u bi yoñ ngandak makidik malam kôba, bigda le jam li nlôôha ba nseñ inyu yoñ makidik malam li yé le u nigbene Yéhôva nu a yé lingen li pék he yi yoñ wemede bé. Nyetama nyen a nla ti we bañga yi ni liyi bagal mam li li yé hikuu hi pék. (Bingéngén 2:1-5) Yéhôva a nla hôla we i yoñ makidik ma ma nlémél nye.—Tjémbi 23:2, 3.
HIÉMBI 28 A Yéhôva, njee a’ ba liwanda joñ?
