YIGIL 4
HIÉMBI 18 Di nti mayéga inyu binoñ
Kii binoñ bi niiga bés?
“Ni njel ini nyen gwéha Nyambe i bi yeelana.”—1 YÔHANES 4:9.
NLÔM JAM
Kii binoñ bi niiga bés inyu bilem bi Yéhôva Nyambe ni bi Yésu Kristô?
1. Bimbe bisai di nkôhna i ngéda di nke i Mbigda nyemb Kristô?
IBABÉ PÉÉNA, bésbobasôna di nyi le binoñ bi yé tik likébla Yéhôva a bi ti bés. (2 Korintô 9:15) U nla ba liwanda li Yéhôva Djob, u nla ki bana botñem i niñ i boga ni boga inyule Yésu a bi wo inyu yés. Di gwé ngandak manjom i ti Yéhôva mayéga inyule gwéha ikeñi i bi tinde nye i ti binoñ! (Rôma 5:8) Inyu hôla bés i ke ni bisu i ti Yéhôva mayéga, ni le kekikel di yoñok bañ binoñ kiki jam di kôli kôhna, Yésu a bi téé Mbigda i nyemb yé.—Lukas 22:19, 20.
2. Kii di ga tehe munu yigil ini?
2 I nwii unu, Mbigda nyemb Yésu i ga tagbe i ngwa jôn i hilo 12 hi sôñ Matôp, nwii 2025. Ibabé pééna, bésbobasôna di yé i kôôba i ba ha yokela. Mu ngéda i, i ga ba loñge le di yoñ ngéda i ôt pék a mu i yom Yéhôva bo Man wé ba bi boñ inyu yés. Munu yigil ini, di ga tehe i yom binoñ bi niiga bés inyu Yéhôva ni Man wé. Yigil i noñ i ga hôla bés i tehe lelaa di nla ôt nseñ ni binoñ ni lelaa di nla unda le di nti mayéga inyu likébla li.
KII BINOÑ BI NIIGA BÉS INYU YÉHÔVA?
3. Lelaa nyemb i mut wada i nla kobol didun di bôt? (Béñge yak titii.)
3 Binoñ bi niiga bés le Yéhôva a yé Djob li telepsép. (Ndiimba Mbén 32:4) Inyuki? Yimbe le i ngéda Adam a bi ndogbene Djob, a bi yila mboñbéba, a wo ki, a lôôs ki bés i béba i i nkena bés i nyemb. (Rôma 5:12) Inyu kobol bés i minkôm mi béba ni mi nyemb, Yéhôva a bi om Yésu i saa binoñ. Ndi u nla badba le: Lelaa sesema i mut wada nu a yé peles, i nla kobol ngandak bôt i minkôm mi béba ni mi nyemb? Ñôma Paul a ntoñol i jam li, a kal le: “Inyule kiki ngandak i bi yila baboñbéba inyu ndok i mpom mut wada [Adam] hala nyen ngandak y’a yila bôt ba téé sép inyu manôgla ma mut wada [Yésu].” (Rôma 5:19; 1 Timôtéô 2:6) Hala a nkobla le ndok i mut wada nu a yé peles i bi yilha bés minkol mi béba ni mi nyemb. Nlélém, manôgla ma mut wada nu a yé peles ma nkobol bés.
Ni njel mut wada, bôt ba binam ba bi jôp i mok mi béba ni mi nyemb, nlélém, mut wada a bi kobol bés (Béñge liben 3)
4. Inyuki Yéhôva a bé bé le a nwas le biloñge bi bôt mu i mbôda i Adam bi niñ i boga ni boga?
4 Baa i bé béda ndik le Yésu a wo inyu tohol bés? Baa Yéhôva a bé ndik bé le a nwas le biloñge bi bôt mu i mbôda i Adam bi niñ i boga ni boga? Di nla hoñol le i bé le i ba loñge i boñ hala. Ndi, di hôya bañ le Yéhôva a yé Djob li telepsép. I boñ hala i bé le i nene kiki bo le Adam a bi boñ bé béba ikeñi, le mbôda yé i ta bé bikwéha bi bôt. Ndi hala a bé bé maliga.
5. Inyuki di nla ba nkwoog nkaa le Yéhôva a ga boñ mam ma téé sép ngéda yosôna?
5 Jam lipe li yé le ibale Yéhôva a ti bé binoñ, a nwas le mbôda i Adam i niñ i boga ni boga, to hala kiki i bi yila bikwéha bi bôt, ki a bi bôk matiñ mé ma telepsép. Sôk i nsôk, bôt ba bé le ba hoñol le a nla bôk matiñ mé inyu mam mape ki. Kiki hihéga, bôt ba bé le ba badba le: Baa a ga yônôs mimbônga nwé? Di hoñol bañ le i nya jam i i nla bôña, inyule Yéhôva a bi boñ jam li téé sép to hala kiki i bi béda le a sem Man wé. Hala a nkwés bés nkaa le a ga boñ ndigi mam ma téé sép.
6. Sima jam jada li li ñéba le binoñ bi nyelel gwéha i Yéhôva? (1 Yôhanes 4:9, 10)
6 Binoñ bi nhôla bés i nok le Yéhôva a téé sép, ni le a ngwés bés ngandak. (Yôhanes 3:16; añ 1 Yôhanes 4:9, 10.) Binoñ bi nhôla bés i nok le Yéhôva a nsômbôl le di niñ i boga ni boga ni le di ba ikété lihaa jé. Yi le, i ngéda Adam a bi boñ béba, Yéhôva a bi pémés nye i lihaa jé. Jon bésbobasôna di bi gwééne bé i lihaa li Yéhôva. Ndi, ni njel binoñ, Yéhôva a nwéhél bés bibéba gwés. A neebe ki le nu ni nu a ñunda le a nhémle nye, a bak ki manôgla, a jôp i lihaa jé. Ndi yak nano, di nla bana maada malam ni Yéhôva, ni lôk kéé i bôda ni i bôlôm. I pot maliga, Yéhôva a ngwés bés ngandak!—Rôma 5:10, 11.
7. Lelaa i njôghe Yésu a bi nok i nhôla bés i nok ikepam limbe likala Yéhôva a ngwés bés?
7 Di nla tibil nok ikepam limbe likala Yéhôva a ngwés bés ibale di nhoñol lelaa a bi nok ndutu i tehe Man wé a nson njonok. Satan a bi kal le ngwélél Nyambe nye ki nye a nla bé téñbe ni Yéhôva ikété mandutu. Inyu unda le Satan a yé mut bitembee, Yéhôva a bi nwas le Yésu a nok ndutu ilole a nwo. (Hiôb 2:1-5; 1 Pétrô 2:21) Yéhôva a bi tehe baéga base ba ba bé kolba Yésu ba nol nye hiol, bisônda bi mbép nye disôô, bi péni ki nye i kék. I mbus, Yéhôva a tehe Man wé nu gwéha a nwo béba nyemb. (Matéô 27:28-31, 39) Yéhôva a bé le a kéñ le i mam ma momasôna ma bôña. Kiki hihéga, i ngéda baoo ba bi kal le: “Ibale Nyambe a ngwés toi nye, a tohlak ni nye,” Yéhôva a bé le a boñ hala. (Matéô 27:42, 43) Ndi, ibale Nyambe a kéñ le hala a bôña bañ, ki binoñ bi bi tiba bé, ki bôt ba binam ba bi yégle ngi botñem yo ki yo. Jon Yéhôva a bi nwas le Man wé a nok ndutu ikepam i nyemb.
8. Baa Yéhôva a bi nok ndutu i tehe Man wé a nson njonok? Toñol. (Béñge yak titii.)
8 Di hoñol bañ le inyule Yéhôva a yé Nu ngui yosôna jon a nok bé njôghe. A bi hek bôt ba binam i pôna yé, jon yak bés di nla kon maséé, di nla ki nok njôghe kiki nye. Bibel i ñunda le ba bi ‘hindha nye ñem’ ba ‘nôgha nye njôghe.’ (Tjémbi 78:40, 41) Di béñge ki hihéga hi Abraham ni Isak. Bigda le Yéhôva a bi kal Abraham le a sémél nye mpom wé man. (Bibôdle 22:9-12; Lôk Héber 11:17-19) Di nla ndik hégda i yom Abraham a bi nôgda i ngéda a bé bebee i nol man wé Isak ni hikéñ. Yak Yéhôva a bi lama nok njôghe ngandak i ngéda a bé tehe baoo ba ntééñga Man wé ikepam i nyemb. I jw.org béñge i vidéô ini le Ni kôna hémle yap—Abraham, Pes 2.
Yéhôva a bi nok ndutu i tehe Man wé a nson njonok (Béñge liben 8)
9. Kii Rôma 8:32, 38, 39 a niiga we inyu gwéha i Yéhôva?
9 Binoñ bi niiga bés le mut nye ki nye a ngwés bé bés iloo Yéhôva. To bôt bés ba lihaa, to mawanda més ma ñem nyuu. (Añ Rôma 8:32, 38, 39.) Di nla ba nkwoog nkaa le Yéhôva a ngwés bés iloo kiki di ngwés bésbomede. Baa u nsômbôl niñ i boga ni boga? Yéhôva a gwé i ngôñ i iloo wemede. Baa u nsômbôl le ba nwéhél we bibéba gwoñ? Yéhôva a gwé i ngôñ i iloo wemede. Yéhôva a mbat ndik bés le di neebe likébla jé li mbuma ñañ, di unda le di nhémle nye, di nôgôl ki nye. Binoñ bi yé toi likébla li mbuma ñañ li li ñunda le Yéhôva a ngwés bés ngandak. I mbok yondo, di ga kônde nigil i mam Yéhôva a bi bôñôl bés inyule a ngwés bés.—Ñañal 3:11.
KII BINOÑ BI NIIGA BÉS INYU YÉSU
10. (a) Kii i bi lôôha tééñga Yésu i nyemb yé? (b) Lelaa Yésu a bi pubus jôl li Isañ? (Béñge yak minkéñék mi matila ni ño le “Ndéñbe i Yésu i bi pubus jôl li Yéhôva.”)
10 Yésu a nlôôha tôñ inyu i yom bôt ba nhoñol inyu jôl li Isañ. (Yôhanes 14:31) Hala a bi lôôha tééñga Yésu i ngéda ba bi ôm nye nsohi le a yé ntonba, ni le a ñôbôs jôl li Isañ. A bé kon woñi le i nsohi u, u nla hoo jôl li Isañ mahindi, jon a bi soohe le: “A Ta, ibale hala a nla bôña, boñ le libôndô lini li ke me haa.” (Matéô 26:39) Kiki a bi téñbe ni Yéhôva letee ni nyemb, Yésu a bi pubus jôl li Isañ.
11. Lelaa Yésu a bi unda le a ngwés bôt ba binam ngandak? (Yôhanes 13:1)
11 Binoñ bi niiga ki bés le Yésu a nlôôha tôñ inyu bôt ba binam, téntén banigil bé. (Bingéngén 8:31; añ Yôhanes 13:1.) Kiki hihéga, Yésu a bé yi le ngim mam a bé lama boñ mu nson wé hana ’isi i bé lama ba ndutu, téntén i béba nyemb i bé bem nye. Ndi Yésu a bi boñ i mam mana momasôna, he ndik bé inyule Isañ a bi bat nye le a boñ mo, ndi téntén inyule a bé gwés bôt ba binam. Jon ni ñem wé wonsôna, Yésu a bi añal ñañ nlam, a niiga bôt, a hôla ki bape. Yak i kel nyemb yé, Yésu a bi jôwa makôô ma banigil bé, a ti bo makénd, a niiga ki bo ni bibuk gwé bi nsôk. (Yôhanes 13:12-15) Yak i ngéda a bé a péni i kék, Yésu a bi yoñ ngéda i ti ntonba u u bé nye ipañ botñem le a ga niñ i Paradis. A yoñ yak bitelbene le ba yoñ ndun ni nyañ. (Lukas 23:42, 43; Yôhanes 19:26, 27) Yésu a bi unda ndik bé gwéha ni nyemb yé, ndi a bé unda bôt bape gwéha ni loñgeñem.
12. Mambe mam Yésu a yé i bôñôl bés i len ini?
12 I yé maliga le Kristô a bi wo “ngélé yada inyu ngélé yosôna,” ndi, a ngi boñok ngandak mam inyu yés. (Rôma 6:10) Mambe ma mam? A ngi salak ni ngui inyu boñ le di ôt nseñ ni binoñ. Di pôdôl minson a ngwel. A yé Kiñe yés, Prisi keñi ni ñéga likoda. (1 Korintô 15:25; Éfésô 5:23; Lôk Héber 2:17) Nyen a gwé le a kot minhook ni limut likeñi, i nson u a ga mélés wo ilole njiiha keñi i mal. b (Matéô 25:32; Markô 13:27) A nyoñ bitelbene le bagwélél ba Yéhôva ba je loñge i pes mbuu munu i dilo di nsôk dini. (Matéô 24:45) Yak i Ane i hikôô hi nwii, a ga ke ni bisu i yoñ ndun ni bés. I ntiik, Yéhôva a bi ti Man wé inyu yés!
U WAA BAÑ NIGIL
13. Lelaa u nla ke ni bisu i nigil ngandak mam mu i gwéha Nyambe bo Kristô ba gwé inyu yés?
13 U nla ki nigil ngandak mam mu i gwéha Yéhôva Nyambe bo Kristô Yésu ba bi unda bés ibale u nke ni bisu i ñôt pék mu i mam ba ma bôñôl we. Ndék sonde ilole Mbigda i nyemb Yésu i ntagbe, ni i mbus Mbigda i nyemb Yésu, u nla yoñ ngéda inyu kônde añ bikaat bi mpôdôl niñ i yé. U añ bañ ngandak bipes ngélé yada, kee mbeñee mbeñee, inyu léba manjom ma ma ga hôla we i kônde gwés Yéhôva bo Yésu. Boñ ki biliya i añle bôt bape i mam u nléba mu lisoñgol joñ.
14. Inoñnaga ni Tjémbi 119:97 ni matila isi lipep, lelaa nyiña u nla hôla bés i kéñbaha yi yés inyu binoñ ni mam mape ki? (Béñge yak titii.)
14 Ibale u bi sôblana hala a yé ngandak nwii nano, u nla badba too u nla ki nigil mam mape inyu telepsép i Nyambe, gwéha yé ni binoñ. Maliga ma yé le, di ga ke ni bisu i nigil mam ma mondo mu miño mi minkwel mi, ni mimpe ki. Ndi kii u nla ni boñ? Kee ni bisu i añ ni i nigil bikaat bi ntôñ. Ibale u ntibil bé nok ngim yom u ñañ ikété Bibel, boñ nyiña. I mbus, kee ni bisu i ôt pék mu i mam u nléba. Yéñ yi kii ma niiga we inyu Yéhôva, Man wé ni gwéha yap inyu yoñ.—Añ Tjémbi 119:97 ni matila isi lipep.
To ibale di yé i maliga ibôdôl behee, di nla ke ni bisu i nigil ngandak mam inyu binoñ (Béñge liben 14)
15. Inyuki di nlama yéñ biniigana bi mondo ikété Bibel?
15 To ibale u nléba bé biniigana bi mondo tole jam lilam mu lisoñgol joñ li Bibel to i ngéda u mboñ nyiña, u tomb bañ. Hégda le u yé kiki mut nu a nyéñ gôl. Libim li ngéda, i bôt ba nyéñ gôl, ba yé ba tégbaha ngandak ngeñ tole ngandak dilo nwaa le ba nléba to hisiina hi jis li gôl. Ndi to hala, ba nwaa bé, inyule hiki jis li gôl li yé nseñ i mis map. Bôô ni ngélé yañen ni biniigana di nléba ikété Bibel. Bi yé nseñ ngandak iloo gôl! (Tjémbi 119:127; Bingéngén 8:10) Jon bana wongut, kee ni bisu i añ Bibel, ni i yéñ biniigana bi mondo.—Tjémbi 1:2.
16. Lelaa di nla kôna Yéhôva bo Yésu?
16 I ngéda u nigil, yéñ manjel i bii i mam u nigil i bisélél. Kiki hihéga, u nla kôna telepsép i Yéhôva i ngéda u ntodol bé bôt. U nla kôna gwéha i Yésu inyu Isañ, ni inyu bôt bape i ngéda u yé bebee i nok ndutu inyu jôl li Yéhôva, ni i ngéda u nhôla lôk kéé ipe, yak i ngéda hala a ta bé bun. U nla ki kôna Yésu i ngéda u ñañle bôt bape ñañ nlam inyu boñ le yak bo, ba hémle binoñ.
17. Kii d’a tehe mu i yigil i noñ?
17 Kiki di nke ni bisu i nigil mam ma mondo inyu binoñ, hala nyen gwéha yés inyu Yéhôva ni inyu Yésu i ga kônde keñep. Yak Yéhôva bo Yésu ba ga kônde gwés bés. (Yôhanes 14:21; Yakôbô 4:8) Jon di kee ni bisu i gwélél i mam momasôna Yéhôva a nti bés inyu kônde nigil mam mape inyu binoñ. I yigil i noñ ha, di ga tehe ngim manjel ipe i i nla hôla bés i ôt nseñ ni binoñ, ni lelaa di nla ti Yéhôva mayéga inyu gwéha yé.
HIÉMBI 107 Yéhôva, ndémbél i gwéha
a NDOÑI I BUK: To “I ôt pék” hala wee i bok mahoñol i ngim jam, ni i tibil tém inyu ôt biniigana gwobisôna bi mpémél mu.
b I kot “i mam ma yé i ngii” Paul a mpôdôl i kaat i Éfésô 1:10, i yé maselna ni i kot “mimpohlak mi bôt” Yésu a mpôdôl i kaat i Matéô 24:31 ni i Markô 13:27. Paul a mpôdôl i ngéda Yéhôva a mpohol i bet ba ga ane ni Yésu, a hoo ki bo ni mbuu mpubi wé. Ki le Yésu nye a mpôdôl i ngéda minhook mi mi ngi yii hana ’isi, mi ga kodba nyoo i ngii i njiiha ikeñi.
