1. Kii di nla boñ inyu kônha Yéhôva maséé?

 HÉGDA le u nti ngim mut u ngwés ngim likébla li tôbôtôbô, li li yé lilam li bak ki nseñ. Hala a ga tééñga we, ibale i mut nu a yoñ likébla li a bii jo ngim homa a hôya jo ha! Ndi u ga kon maséé i tehe le i mut nunu a ntibil gwélél likébla joñ a nti ki we mayéga. Kii hala a niiga bés? Yéhôva a bi sem Man wé inyu yés. Nlélém Yéhôva a ga lôôha kon maséé i tehe le, di nti mayéga inyu likébla lilam li, ni inyu gwéha i bi tinde nye i ti binoñ!​—Yôhanes 3:16; Rôma 5:​7, 8.

 2. Kii di ga tehe munu i yigil ini?

² Kiki nwii mi ntagbe, di nla waa tehe binoñ kiki likébla li tôbôtôbô. Hala a nla ba wengoñle di nyoñ likébla li Nyambe di leñ jo homa di hôya. Di yé maséé i bana jo, ndi di ngwélél ha bé jo. Di nlama bigda i mam momasôna Nyambe bo Kristô ba bi bôñôl bés, inyu boñ le di kee ni bisu i ti bo mayéga. I yigil ini i nla hôla bés i boñ hala. Di ga tehe lelaa di nla ôt nseñ ni binoñ i len ini, ni lelaa di nla ôt nseñ ni gwo i dilo di nlo. Di ga tehe ki lelaa di nla ti Yéhôva mayéga inyu gwéha a bi unda bés téntén i ngéda Bilôp bi Nwet.

BISAI DI NKÔHNA NI NJEL BINOÑ I LEN INI

 3. Lelaa di ñôt nseñ ni binoñ i len ini, sima njel yada?

³ I len ini, binoñ bi nlona bés ngandak bisai. Kiki hihéga, ni njel binoñ, Yéhôva a nwéhél bibéba gwés. A ta bé nyégsaga i nwéhél bés. Ndi a gwé ngôñ i boñ hala. Ntôp Tjémbi a bi ti Yéhôva mayéga a kal le: “Inyule, a Yéhôva, u yé loñge u bak bebee i nwéhél.”​—Tjémbi 86:5; 103:​3, 10-13.

 4. Inyu bonjee Yéhôva a bi ti binoñ? (Lukas 5:32; 1 Timôtéô 1:15)

 ⁴ Bôt bahogi ba nla hoñol le ba kôli bé ni nwéhél i Yéhôva. I pot maliga, bésbobasôna di kôli bé ni nwéhél i Yéhôva. Ñôma Paul a bi nok le a “kôli bé to sébla le ñôma.” Ndi a bi kal le: “Ni njel konangoo i mbuma ñañ i Nyambe, me yé i yom me yé.” (1 Korintô 15:​9, 10) I ngéda di ntam bibéba gwés, Yéhôva a nwéhél bés. Inyuki? A mboñ hala he bé inyule di kôli, ndi inyule a ngwés bés. Ibale u nôgda wengoñle u kôli bé ni konangoo i Yéhôva, bigda le Yéhôva a bi ti binoñ he bé inyu bôt ba ba yé peles, ndi inyu baboñbéba ba ba ntam bibéba gwap.​—Añ Lukas 5:32; 1 Timôtéô 1:15.

 5. Baa di nla kal le di kôli ni konangoo i Yéhôva? Toñol.

⁵ Mut to wada a nlama bé hoñol le a kôli ni konangoo i Yéhôva, to a ma tégbaha ngandak nwii i ntôñ. I yé maliga le, Yéhôva a ndiihe i mam momasôna di mboñ i nson wé. (Lôk Héber 6:10) A bi ti Man wé kiki likébla, he bé kiki nsaa inyu nson di ngwel. Jon di nlama bé hoñol le, inyule di ma boñ ngandak mam nson u Yéhôva wee di kôli ni nwéhél yé. Ibale di nhoñol hala wee di yé i kal le Yésu a bi wo yañga.​—Hégha ni Galatia 2:21.

 6. Inyuki Paul a bé sal ni ngui i nson u Yéhôva?

⁶ Paul a bé yi le a kôli bé ni konangoo i Yéhôva. Inyuki ni a bé sal ngui i nson u Yéhôva? A bé boñ hala he bé inyu unda le a kôli, ndi inyu unda le a nti Yéhôva mayéga inyu konangoo yé i mbuma ñañ. (Éfésô 3:7) Kiki Paul, yak bés di nwaa bé sal ni makénd, he bé inyu kôhna konangoo i Yéhôva kiki ngim nsaa, ndi inyu ti nye mayéga.

 7. Ni imbe njel ipe di nla ki ôt nseñ ni binoñ i len ini? (Rôma 5:1; Yakôbô 2:23)

⁷ Ni njel binoñ di nla ki bana maada ma bas bas ni Yéhôva a Kiki di ntehe i yigil i ntagbe, di bééna bé maada mo ki mo ni Nyambe i ngéda di bi gwéé. Ndi ni njel binoñ, di yé “nsañ ni Nyambe,” di nla ki kôôge nye bebee.​—Añ Rôma 5:1; Yakôbô 2:23.

 8. Inyuki di nlama ti Yéhôva mayéga inyu nsima di gwé i soohe nye?

⁸ Di wan le jam li tôbôtôbô jada mu maada més ni Yéhôva​—masoohe. Yéhôva a ñemble ndik bé masoohe més i ngéda di kôdi kiki bo i makoda, ndi yak masoohe ma hiki wada wés. Masoohe ma nla mômôs miñem nwés, ma suhus ki nduña yés, ndi ma nsôk ndigi bé ha. Ma nla lédés maada més ni Nyambe. (Tjémbi 65:2; Yakôbô 4:8; 1 Yôhanes 5:14) I ngéda a bé hana ’isi, Yésu a bé béna soohe inyule a bé yi le Yéhôva a ñemble nye, a bé soohe ki inyu lédés maada mé ni Isañ. (Lukas 5:16) Di nti Yéhôva mayéga inyule ni njel sesema i Yésu, di nla ba mawanda mé, di nla ki soohe nye!

BISAI DI GA KÔHNA NI NJEL BINOÑ I DILO DI NLO

 9. Bimbe bisai binoñ bi ga lona bagwélél ba Yéhôva i dilo di nlo?

⁹ Bimbe bisai binoñ bi ga lona bagwélél ba Yéhôva i dilo di nlo? Ba ga kôhna niñ boga. Ngandak bôt i nhoñol le hala a nla bé bôña inyule bôt ba binam ba  nwo hala a yé dikôô di nwii. Ndi sômbôl i Yéhôva i ngéda a bi hek bôt ba binam i bé le ba niñ i boga ni boga. Ibale Adam a boñ bé béba, mut a bé bé le a hoñol le mut binam a nla bé niñ i boga ni boga. To ibale i len ini hala a nlet neebe le ngim yom i yé le niñ boga, di nla hémle le i yé inyule Yéhôva a bi saa ndamba ikeñi inyu boñ le di bana yo: sesema i Man wé nu gwéha.​—Rôma 8:32.

10. Bimbe bisai minhook ni mintômba mimpe mi mbem?

¹⁰ To hala kiki niñ boga i yé bisai di ga kôs i dilo di nlo, Yéhôva a nsômbôl le di hoñlak yo ibôdôl nano. Minhook mi bikristen mi nyamnda ni ngôñ i bana niñ i maséé i ngéda mi ga ane lôñ yada ni Kristô i ngii. (Masoola 20:6) Mintômba mimpe mi gwé botñem i niñ i boga ni boga hana isi i het njôghe ni nduña bi ga ba ha bé. (Masoola 21:​3, 4) Baa u yé wada mu mintômba mimpe mi mi gwé botñem i niñ i boga ni boga hana isi? I bom i, i ta bé ititigi iloo niñ boga i ngii. Inyu hala nyen bôt ba binam ba bi héga, le ba niñ i boga ni boga hana isi, ikété maséé ma mbuma ñañ.

11-12. Bimbe bisai di nyamnda ni ngôñ i tehe i Paradis? (Béñge bititii.)

¹¹ Hégda lelaa u ga niñ i Paradis hana isi. U ga kon ha bé woñi le w’a kwo kon, tole w’a wo. (Yésaya 25:8; 33:24) Yéhôva a ga ti we mam malam momasôna ma nkon we ngôñ. Mambe mam u ga gwés nigil nyoo? Baa u ga bana ngôñ i nigil i yi binuga? I kôt nsik? I ôt bititii? Ibabé pééna, di ga bana ngôñ ni bôt ba ba nyi likeñge li maoñ, ni basal nwom. I ga béda ki bôt inyu lamb bijek, inyu bañ bisélél ni inyu lémés hisi. (Yésaya 35:1; 65:21) Kiki di ga niñ i boga ni boga, di ga bana ngéda i boñ i mam momasôna ma ga kon bés ngôñ.

¹² Di ga nôgda maséé ma mbuma ñañ  i leege bôt bés ba ba ga lo i bitugne. (Minson mi baôma 24:15) Hédga ki maséé u ga nôgda i nigil ngandak mam Yéhôva a bi hek. (Tjémbi 104:24; Yésaya 11:9) Iloo mam momasôna, di ga bana nsima nkeñi i bégés Yéhôva ni kiññem i i mpôp! Baa u ga héñha i mam malam Yéhôva a mbôn bés i dilo di nlo ni “ndék mane i béba” i len ini? (Lôk Héber 11:25) To jam! Bisai bi, bi nloo bisesema gwobisôna di nla boñ i len ini. Bigda le Paradis hana hisi, i ga ba bé ngim jam di mbem ibabé waa, ndi i ga ba toi liyééne jés. I mam mana momasôna ma ga yon ndik inyule Yéhôva a bi lôôha gwés bés, a ti Man wé le a wo inyu yés!

TI YÉHÔVA MAYÉGA INYU GWÉHA YÉ

13. Lelaa di nla unda le di nti Yéhôva mayéga inyu gwéha a bi unda bés? (2 Korintô 6:1)

¹³ Lelaa di nla ti Yéhôva mayéga inyu binoñ a bi ti inyu yés? Di boñ le nson u Yéhôva u ba jam li bisu i niñ yés. (Matéô 6:33) Di hôya bañ le Yésu a bi wo inyu bôt bobasôna “inyu boñ le ba niñ ha bañ inyu yap bomede, ndi inyu nu a bi wo inyu yap, a tuge ki.” (2 Korintô 5:15) Di gwé bé ngôñ i les njômbi i konangoo i mbuma ñañ i Yéhôva.​—Añ 2 Korintô 6:1.

14. Lelaa di nla éba le di mbôdôl Yéhôva ñem?

¹⁴ Di nla unda le di nti Yéhôva mayéga inyu gwéha a bi unda bés i ngéda di mbôdôl nye ñem, di noñok i njel a ntéé. Lelaa di nla boñ hala? I ngéda di nlama yoñ makidik inyu suklu tole bôlô di nlama pohol, di yoñ mo inoñnaga ni sômbôl i Yéhôva. (1 Korintô 10:31; 2 Korintô 5:7) I ngéda di mboñ hala, hémle yés i nkônde keñep, yak maada més ni Yéhôva ma nkônde lama. Botñem yés i niñ i boga i nkônde bana ngui.​—Rôma 5:​3-5; Yakôbô 2:​21, 22.

15. Lelaa di nla unda le di nti Yéhôva mayéga i ngéda Bilôp bi Nwet?

¹⁵ Di nla boñ jam lipe inyu ti Yéhôva mayéga inyu gwéha a bi unda bés. Di gwélél ngéda i Bilôp bi Nwet inyu unda Yéhôva le di nti nye mayéga inyu Binoñ. Di yoñ bitelbene i ba i Bilôp bi Nwet. Di naña ki bôt bape. (1 Timôtéô 2:4) Toñle i bôt u ga naña lelaa Bilôp bi Nwet bi ga tagbe. I ga ba nseñ le u unda bo bividéô bini i jw.org le: Inyuki Yésu a bi wo? ni Mbigda i nyemb Yésu. Mimañ mi nlama yoñ bitelbene i naña i lôk kéé i i bi tomb i pes mbuu! Hégda le maséé ma ga ba i ngii yak hana ’isi, ibale nnimlak ntômba wada u ntémb yak Yéhôva. (Lukas 15:​4-7) I Bilôp bi Nwet, di yéga bôt bobasôna, bakén ba bôt, yak i bôt ba bi sôga lo i makoda. Hala a yé njel  yada i kal bo le malo malam!​—Rôma 12:13.

16. Inyuki di nlama yoñ bitelbene i kéñbaha nson wés i ngéda Bilôp bi Nwet?

¹⁶ Baa u nla kéñbaha i ngéda u ntégbaha i nson likalô i ngéda Bilôp bi Nwet? I ngéda u mboñ hala, u ñunda le u nti Nyambe bo Kristô mayéga inyu mam momasôna ba bi bôñôl bés. Ibale di nyoñ ngaba ikeñi i nson likalô, di ga tehe lelaa Yéhôva a ga nit bés, hala nyen di ga kônde bôdôl nye ñem. Yoñ ki bitelbene i añ lisoñgol li Bibel inyu Bilôp bi Nwet li li yé i man kaat le Di wan Bitilna hiki kel tole i minkéñék mi matila mi mi yé i kaat likoda li ñem sonde. U nla ki gwélél minlôñ mi Bibel mini kiki mam u nsômbôl nigil.

17. Kii i nlémél Yéhôva? (Béñge yak minkéñék mi matila ni ño le “ Mam di nla boñ inyu unda le di nti Yéhôva mayéga inyu gwéha yé.”)

¹⁷ Bebek u ga la bé boñ i mam momasôna di ntehe munu i yigil ini. U hôya bañ le Yéhôva a nhégha bé i yom u nla boñ ni i bôt bape ba nla boñ. A nyi le u ngwés nye. A yé maséé i ngéda u nti nye mayéga inyu likébla jé li mbuma ñañ le Binoñ.​—1 Samuel 16:7; Markô 12:​41-44.

18. Inyuki di nti Yéhôva Nyambe bo Yésu Kristô mayéga?

¹⁸ Ni njel binoñ nyen Yéhôva a nwéhél bibéba gwés, di nla bana maada malam ni nye, ni botñem i niñ i boga. Di ti Yéhôva mayéga hiki ngéda inyu gwéha yé i i bi tinde nye i kôp bés bisai bini. (1 Yôhanes 4:19) Di nlama yak ti Yésu mayéga inyule a bi gwés bés ngandak, a sem yak niñ yé inyu yés!​—Yôhanes 15:13.