NGÉDA a témb nyoo lisañ lipe, i muda nu a bi témb a yahal Tôñi. Kii Tôñi a bi bôñ? A nkal le: “Hala a bé bé jam li ntomb. A bé unbene me yañga.” Ndi, Tôñi a témb a bat nwéhél, a kal muda le a bé nok i ndutu i mpémél nye.

Ibale u ba Tôñi, ki u bi boñ lelaa? Baa u bé le u unda libak li ñem nwee? Baa hala a bé le a bane we nledek jam i yémbél hiun hioñ ha ngéda i? I yé mbale le, i nla ba nledek jam i yén nwee i nya ngéda i. Ngéda mut a nyumbla bés, ndi a kenek ni bisu i tééñga bés, hala a nlet ngandak i yén nwee.

Ndi, Bibel i nti bikristen makénd i bana ñemlima. Ñ, Bañga i Djob i ñunda le i bana libak li ñem nwee i yé njel pék. Yakôbô a bat le: “Njee a gwé pék ni yi ikété nan?” A timbhe le: “A éba minson nwé lôñni bihiumul bilam ikété ñemlima u pék.” (Yakôbô 3:13) Ni imbe njel libak li ñem nwee li yé njel pék i nlôl i ngii? Kii i nla hôla bés i sal i lem lam i?

Libak li ñem nwee li nsuhus hiun. “Ndimbhe nwee i mômôs kundul [hiun hi nlel héga], ndi nyéiha bañga i nsugde hiun.”​—Bingéngén 15:1.

Béba ndimbhe ngéda ba ñunbaha bés i nla kôñde ôbôs mam, kiki bo le ba nkônde tjé i hié inyu lôñôs hio. (Bingéngén 26:21) Maselna ni hala, i timbhe mut ni ñem nwee i nsuhus hiun hié. I nla yak héñha libak li nwet a mbéna suu bés.

Tôñi a bi kôhna nlélém jam. Ngéda muda a bi tehe le Tôñi a ntimbhe ndik nye ni ñem nwee, a kahal ee. A toñle nye le a bé ntombok ni mandutu, ma nye ni lihaa jé ba bé boma. Tôñi a bi tééne nye likalô loñge, yak yigil i Bibel i bôdôl​—mam ma momasô inyule a bi tééda libak li nwee ni nsañ.

Libak li ñem nwee li nla ti bés maséé. “Bôt ba miñem mi nwee ba yé nsaibak, inyule b’a kôdôl isi.”​—Matéô 5:5.

Inyuki bôt ba miñem mi nwee ba yé maséé? Bôt ba yé ngandak le ba bé gwés mindañ; hanano ba yé maséé, kiki ba ñeñgep i lem lam ini le ñemlima. Niñ yap i nlama, ba nyi le bilôl bilam kiyaga bi mbem bo. (Kôlôsé 3:12) Ngwélél makiiña wada i loñ Panya le Adolfô, a mbigda lelaa a bé niñ ilole a nyi maliga.

Adolfô a nkal le: “Niñ yem i bééna bé me mahee. Me bé bep unup kayéle mawanda mem ma kahal yak ke me ngwéé inyu libak jem li mut bisañ ni pamal.” Sôk i nsôk, niñ yem i pam i ngim likanda. Mu kii me bé jo kel yada, ba bi ôm me ngweñde ngélé isamal, matjél ma pam me kayéle me ba bebee ni nyemb.

Ndi, nano, ni njel bibuk gwé ni ndémbél yé, Adolfô a niiga bôt bape lelaa ba bana ñem nwee. Libak jé li mut minyaô li ñôt ngandak bôt i pañ yé. Adolfô a nkal le a yé maséé ni mahéñha a bi la boñ. A nti ki Yéhôva mayéga inyule nyen a nhôla nye i sal libak li ñem nwee.

Libak li ñem nwee li nkônha Yéhôva maséé. “A man wem, bana pék, u kônha ñem wem maséé, le ndi me la timbhe nu a nyahal me.”​—Bingéngén. 27:11.

Ñoo Yéhôva nu bisu, le Nsohop, a nyahal toi Djob. Djob a gwé manjom i unup inyu diyana ti, ndi Bibel i nkal bés le Yéhôva a yé “Nu a mpala bé unup.” (Manyodi 34:6) Ngéda di mboñ biliya i kôna bilem gwé bi i tjél pala unup, ni ñemlima, wee di nkil i njel pék i i nlémél Yéhôva ngandak.​—Efésô 5:1.

Nkoñ isi u len u nai ni béba ni ngolba. Di nla boma bôt ba mboñ i ndôñ i mam i, ba “humblak manyu, ba bak bôt ba ngagal, ni baôbôs môl, . . . bôt ba minsohi, ni ba biyôgda, bôt ba nyai.” (2 Timôtéô 3:2, 3) Hala a nlama bé tééñga kristen i bana libak li nwee. Bañga i Djob i niiga bés le “pék i nlôl i ngii, . . . i yé ki nwee, i gwé loñgeñem.” (Yakôbô 3:17) Ngéda di gwé libak li mut nwee, ni li loñgeñem, hala a ñunda le di mal kôs pék i nlôl yak Djob. I nya pék i yon y’a tinde bés i timbhe ni ñemlima i ngéda ba nsuu bés, y’a boñ ki le di lôôha ki kôôge bebee ni Lingen li pék yosôna, hala wee Yéhôva.