Baa ni nyoñ ngéda i añ ba Nkum Ntat ba ba nsôk pam i masañ mana? Ibale ñ, ni béñge too ni nla timbhe mambadga ma noñ hanano:

Mu kii ba ngwés hôla bon bap i hol i pes mbuu, inyuki bagwal ba ba bi ke loñ yap ngwéé ba nlama wan ndutu i hilémb?

Boñge ba ga nigil hilémb hi mpôda libôga linan ni i suklu. I yi ngandak dilémb i nla bane mañge nseñ. Bagwal ba nlama noode wan inyu tehe ikété himbe hilémb bon bap ba nla tibil nok maliga, kayéle ba hol ki i pes mbuu, to ibale ba nke i likoda li li mpot hilémb hi libôga, tole hi hi mpot hilémb hiap. Bagwal ba ba yé bikristen, ba mbii yéñe i bon bap bisu bi yéñe yap.​—w17.05-BS, mapep 9-11.

Ngéda Yésu a bat Pétrô le: “Baa u ngwés me iloo bana?”, kii a bé pôdôl? (Yôhanes 21:15)

I nene le Yésu a bé pôdôl inyu tjobi di bé bo ha bisu ni/tole bôlô i lop. Mbus nyemb Yésu, Pétrô a bi témb nlômbi wé nson​—lop. Bikristen bi nlama tibil wan inyu yi too bôlô yap yon i nlôôha ba nseñ i niñ yap tole heni.​—w17.05-BS, mapep 22-23.

Inyuki Abraham a kal le nwaa a bé manyañ nu muda? (Bibôdle 12:10-13)

I pot maliga, Sara a bé toi manyañ nu muda (isañ wada, banyañ iba). Ibale Sara a kal le a bé nye nwaa, ki ba bé le ba nol Abraham, kayéle ba la ha bé gwal i mbôô i Djob a bi bôn.​—wp17.3-F, mapep 14-15.

Limbe likeñge Elias Hutter a bi gwélél inyu hôla bôt ba bé yéñ nigil hop u Lôk Héber?

A bé sômbôl hôla banigil bé i tehe lelaa bibuk bi ngwañna inyu ti bañga yada. Inyu pam i boñ hala, a bé a bot nlañga tinti i tén buk, bini bipes bipe a nwas gwo hala. Di nléba nlélém jam i len ini i buk i si lipep li Bibel yés i Pulasi le Les Saintes Écritures-Traduction du monde nouveau​—Avec notes et Références.​—wp17.4-F, mapep 11-12.

Mambe mam ma nla héñha litehge li mam li kristen inyu jam li bana ngaa inyu sôñba ni bôt bape?

I mis ma Djob, niñ i yé pubhaga. Yésu a bé bat bé banigil bé le ba yoñ paminsoñ inyu sôñba. (Lukas 22:36, 38) Di nlama ôô paminsoñ yés ni disoo. Niñ i nlôôha ba mahee iloo bigwel moo. Di ndiihe kiññem i bôt bape, di mboñ ki biliya i ti ndémbél ilam. (2 Korintô 4:2)​—w17.07-BS, mapep 31-32.

Inyuki miñañ mi Matéô bo Lukas inyu bibôdle bi niñ i Yésu bi yé maselna?

Matéô a nlôôha pôdôl Yôsep, lelaa a bi boñ ngéda a bi yi le Maria a yé jém, ni kiki Djob a legel nye le a ke ngwéé i loñ Égiptô, mbus a témb. Lukas nye a nlôôha pôdôl Maria; kiki a bi ke i yuuga Elisabét ni kiki a bi boñ ngéda mañge Yésu a bi yégle i témpel.​—w17.08-BS, lipep 32.

Mambe mam Bibel i bé lama hônba?

Kiki ngéda i ntagbe, ngobol i ngim bibuk i yé i héñha héñha yosôna. Mahéñha i pes m’bô ma bi boñ le hilémb bôt ba bé pot homa nyensôna hi héñha. Ngolba inyu kobol Bibel ni dilémb di bé pôda homa nyensôna i bé.​—w17.09-BS, mapep 19-21.

Baa hiki mut ikété yés a gwé añgel i ntat nye?

To. Yésu a bé kal le biañgel bi banigil bé nyoo ngii, bi ntehe su Tata. (Matéô 18:10) A bé sômbôl kal le biañgel bi nyoñ ngéda ni banigil bé, ndi a bé kal bé le biañgel bi ga tat hiki wada wap i nya i nhélhana.​—wp17.5-F, lipep 5.

Umbe ntén gwéha u nlôôha lam?

Ngéda i umne i ngii matiñ ma téé sép, a.gaʹpe a yé gwéha i nlôôha lam. I nla ki ba lisiñgege mut a nsiñge numpe ñem. Gwéha i, i umne i ngii matiñ ma téé sép, i nyina tôbôtôbô i mam di mbôñôl bôt bape ibabé i bem ngim yéñe.​—w17.10-BS, lipep 7.