Njômbi i bisu i kaat Ndiimba Mbén 22:25-27 i ta bé i unda le munlôm a mboñ béba, inyule pééna i bé bé le a mboñ béba. I mbén ini, i nsômbôl ndigi unda le muda a gwé bé nsohi wo ki wo. Di béñge minlôñ mi nkéña ñañ u.

Ibale di ntémb ni mbus ndék munu pes kaat ini, di ntehe le ngéda mut a bé a lalna muda ‘mu tison,’ nu a bé a ma yegna libii ni mut numpe, a bé mut ndéñg inyule i muda nunu a bé wengoñle a yé mbiibaga. Ba bé boñ laa ni muda? Yak nye a bé kôs kogse, inyule a ‘bi lond bé.’ Ibale a lond to, ki bôt ba tison ba bi nok, ba sôñ nye. Jon ba bé sugus le yak muda a nke ndéñg.​— Ndiimba Mbén 22:23, 24.

Mbén i bé pôdôl jam lipe: “Ndi ibale mut a nkoba ngond i gwé yega libii i wom, ndi a hélés yo, a nañla ki yo, ha nyen mut nu a nañlana yo nyetama nyen a’ wo; ndi u boñok bañ ngond i jam; i gwé bé béba i kôli ni nyemb. I jam lini li yé wengoñle mut a ntelep ikolba mut wé libôk, ni nol nye. Inyule munlôm nu a koba yo wom, ngond i gwé yega libii i lond, ndi mut a nsôñ yo a ba bé.”​—Ndiimba Mbén 22:25-27.

Ha ngéda i, bakéés ba bé neebe i jam muda a nkal. Inyuki? Inyule ba bé sugus le bebek a ‘nlond, ndi mut a bak bé inyu sôñ nye.’ Jon ba bé sugus le a nke bé ndéñg. Ndi inyu munlôm, ba bé sugus le a nke i ndéñg, inyule a ‘nlalna nye ni ngui.’

To hala kiki i Mbén ini i bé unda le muda a yé ngi nsohi, i bé unda ki le i munlôm nu a nke i ndéñg, a nlalna ki i muda nu ni ngui. Di mbot ñem le bakéés ba bé ba ‘tibil wan i jam li,’ ba pémés ki mbagi inoñnaga ni Mbén i Djob ba bé kôs.​—Ndiimba Mbén 13:14; 17:4; Manyodi 20:14.