BAA me mbéna ti mayéga? Hiki wada wés a nlama badba i mbadga i. Bibel i bi bôk kal le bôt ba ngéda yés ba ga ‘yi bé ti mayéga.’ (2 Timôtéô 3:2) Bebek, ni nyi bôt ba nhoñol le mam momasôna ma yé bo kunde, kiki bo le ba kôli bana gwom gwobisôna. A yé ndik wengoñle ba ntehe bé nseñ i ti mayéga. Baa u ntehe bé le i nlôôha ba ndutu i niñ ni i nya bôt i?

Ndi Yéhôva nye a nkal bagwélél bé le: “Ni tinak ki mayéga.” Di nlama ‘ti mayéga inyu mam momasôna.’ (Kôlôsé 3:15; 1 Tésalônika 5:18) Ñ, ngéda di gwé lem i ti mayéga, hala a yéne bésbomede nseñ. Di nkéléé hala inyu ngandak manjom.

Njom yada i i ntinde bés i ti mayéga i yé le, hala a nhôla bés i nôgda le di yé nseñ. I mut a mbéna ti mayéga a mbéna kon maséé, yak nwet ba nti mayéga a nkon maséé. Inyuki i ti mayéga i mboñ le bés ni bôt bape di ba maséé? Di yoñ hihéga hini: Ngeñ u ntehe bôt ba yé maséé i bôñôl we loñge, baa hala a ñunda bé we le u yé nseñ? Ntiik, hala a ñunda le ba ntôñ we. Ngeñ u ntehe i mam ba mbôñôl we, u nôgda le u yé nseñ. Ibabé pééna Ruth a bi lama nôgda nlélém jam. Kiki Bôas a bi ti nye ngandak makébla, hala a bi lama kônha nye maséé iloo héga, inyule a bi tehe le mut a ntôñ nye.​—Ruth 2:10-13.

Yéhôva Nyambe nyen a yé mut bisu di nlama ti mayéga. Ibabé pééna, u mbéna hoñol makébla ma mbuu ni ma minsôn a nti we hiki ngéda. (Ndiimba Mbén 8:17, 18; Minson mi baôma 14:17) U nlama ndik bé pôdôl bisai bi i ngii ni ngii, ndi u nlama yoñ ngéda i ôt pék mu mam malam Nyambe a mbôñôl we ni lihaa joñ. Ibale u nyoñ ngéda i ôt pék mu mam ma, hala a ga kéñbaha gwéha yoñ inyu yé, u ga tehe ki ipam limbe likala a ngwés we.​—1 Yôhanes 4:9.

U héléé ndik bañ i hoñol mam malam a mbôñôl we ni i ôt pék mu; ndi ti Yéhôva mayéga inyu loñge yé ñem. (Tjémbi 100:4, 5) Bôt ba mbéna kal le: “i ti mayéga i nlona bôt ba binam ngandak maséé.”

I ti mayéga i yé ki loñge inyule i nlédés mawanda. Bés bobasôna di yé maséé ngéda ba ngwés bés. Ngéda u nti mut mayéga ni ñem woñ wonsôna inyu jam lilam a mbôñôl we, hala a nkônde lédés maada manan. (Rôma 16:3, 4) Ni ki le, i bôt ba mbéna ti mayéga ba yé ki bebee i ti bôt bape mahôla. Ngéda ba mbôñôl bo loñge jam, hala a ntinde yak bo i bôñôl bôt bape loñge. Ñ, i hôla bôt i ntina maséé. Ndik kiki Yésu a kal: “Ti i nlona maséé iloo kôhna.”​—Minson mi baôma 20:35.

Robert Emmons, ñéga suklu ikeñi yada i Kaliforni; nu a nigil i jam lini le i ti mayéga, a nkal le: “Inyu boñ le di yi ti mayéga di nlama yi le i mut a nti a yé nseñ, kiki yak i mut a nleege.” Maliga ma yé le, di nla bé niñ bésbotama, di nla bé ki to bana niñ lam ibale bôt bape ba nhôla bé bés. Kiki hihéga, ba nla nti bés bijek, tole ba nla hôla bés ngéda di nkon. (1 Korintô 12:21) I Bôt ba nyi ti mayéga ba mboñ mam ma ñunda le ba yé maséé inyu loñge  bôt bape ba mbôñôl bo. Jon di kôli badba le, baa me gwé lem i ti bôt bape mayéga inyu mam ba mbôñôl me?

Njom ipe di gwé i ti mayéga i yé le, hala a nhôla bés i bok mis bilem bilam bi bôt bape he bibe bé. Di yé le di kal le boña wés a nsal kiki segesege. A nhôla bés i tééda mam malam ni i lep mam mabe. Di yé bebee i bok mis i mam malam, ni i hôya mandutu. Kiki u nti bôt mayéga hala nyen u nke ni bisu i kon maséé, i maséé ma mon ma ntinde we i kônde ti mayéga. Ibale u mbok mis mam malam ba mbôñôl we, hala a ga hôla we i noñ mana maéba ma ñôma Paul le: “Kona maséé i Nwet ngéda yosôna.”​—Filipi 4:4.

W’a léba le ngéda u mbéna ti mayéga u gwé bé mahoñol mabe. Bun bé le u tehe mut a mbéna ti mayéga, i nlélém ngéda a bak mut tama, mut a modop, tole mut biba. I bôt ba nyi ti mayéga ba mbéna bé hép nkus. Ba nkon maséé ni i yom ba gwé.​—Filipi 4:12.

Kiki u yé kristen, u nyi le Satan a nsômbôl le u modop, u nimis ki makénd ngéda u mboma mandutu munu dilo di nsôk. A ngwés le u bana lem i tjelel inyu mam mabe ma nkwél we. Ndi ibale u mbéna tjelel, i ga bane we nledek jam i tis miñem mi bôt likalô. I ti mayéga i nkiha ni litam li mbuu, di yé maséé ngéda di ntehe i mam malam Djob a nti bés, di nhémle ki le mimbônga nwé mi ga yon.​—Galatia 5:22, 23.

Kiki u yé ngwélél Yéhôva, bebek u neebe i mam momasôna di ntehe munu yigil ini. Ndi u nyi ki le i ti mayéga ni bok mis mam malam i ta bé jam li ntomb. To hala, u tomb bañ. U nla bana litehge li kôli mu jam li. Lelaa? Hiki kel, yoñ ngéda i hoñol ngim mam mu niñ yoñ ma ma nla tinde we i ti mayéga. Kiki u nke ni bisu i boñ hala, hala nyen w’a meya ti mayéga. Hala a ga lôôha lona we maséé, ilel ba ba ntégbaha ngéda i hoñol mandutu map. Hoñol mam malam Nyambe ni bôt bape ba mbôñôl we, ma ma nti we makénd ni maséé. U nla yak tila mo ngim homa. Hiki kel u nla tila mam ima tole maa ma ma ntinde we i ti mayéga.

Bôt ba njoñ yi ba ba bi nigil i jam lini, ba nkal le: “Ngéda di mbéna ti mayéga, boña wés a kahal sal ntén mpe, kayéle ilole di bana lem i tjelel, di ga bana ngandak manjom i ba maséé i niñ yés.” Mut mayéga a mbéna ba maséé. Jon hoñol i mam malam momasôna u ma kôs, kon maséé ni mo, u ti ki mayéga! Ilole di boñ wee di kôli kôs i mam malam ba mbôñôl bés, di ‘ti Yéhôva mayéga inyu mam momasôna.’ Ñ, “tina mayéga inyu mam momasôna.”​—1 Miñañ 16:34; 1 Tésalônika 5:18.