1. Inyuki Yésu a bi hégha banigil bé ni mintômba?

 YÉSU a bi hégha maada a gwé ni banigil bé ni maada ma yé ipôla ntééda mintômba ni mintômba nwé. (Yôhanes 10:14) Yésu a kôli yoñ hihéga hi. Mintômba mi nyi ntééda mintômba, mi ñemble ki nye. Mut wada nu a bé ke liké a bi yimbe i jam li. A bi kal le: “Di bi noode boñ le mintômba mi kôôge bés bebee inyu ôt nwo fôtô, ndi mi bi tjél kôôge bés bebee inyule mi bé yimbe bé kiñ yés. Ha nyen hisiina mañge hi hi bé ntééda mintômba hi bi lo; kiki a bi sébél ndik mintômba, mi noñ nye.”

2-3. (a) Kii banigil ba Yésu ba nla boñ inyu unda le ba ñemble kiñ yé? (b) Kii di ga tehe munu yigil ini ni i i noñ ha?

² I jam li bi pémél i mut nunu a bé ke liké li mbigdaha bés bibañga Yésu a bi pot inyu banigil bé. A bi kal le: ‘B’a emble kiñ yem.’ (Yôhanes 10:16) Ndi Yésu a yé nyoo i ngii. Lelaa di yé le di emble nye? I ngéda di nôgôl i mam Yésu a bi niiga, wee di ñemble nye.—Matéô 7:24, 25.

³ Munu yigil ini ni i i noñ ha, di ga tehe ngim mam Yésu a bi niiga. Di ga tehe le Yésu a bi kal le di waa boñ ngim mam, ni le di boñ ngim mam ipe. D’a tehe ndugi mam ima Yésu a bi kal le di waa boñ.

4. Inoñnaga ni kaat Lukas 12:29, kii i nla boñ le di ‘tôñ iloo hihéga’?

⁴ Añ Lukas 12:29. Yésu a bi kal banigil bé le ba ‘waa tôñ iloo hihéga’ inyu mam ma mbéda bo. Di  nyi le maéba momasôna Yésu a nti bés ma yé malam. Di gwé ngôñ i nôgôl maéba ma, ndi ngim mangéda hala a yé le a lédél bés. Inyuki?

5. Inyuki bôt bahogi ba ntôñ?

⁵ Bôt bahogi ba yé le ba tôñ inyu bijek, mbot, tole ndap. Bebek le liyep li yé nnayak i loñ yap. I yé le i ba ki le ba gwé bé moni mi kôli inyu tééda mahaa map. Tole bebek i nwet a bé sal inyu ti bo koga i kel a bi wo. I nla yak ba le Corona nyen a mboñ le ba nimis bôlô. (Ñañal 9:11) Ibale di gwé ndutu yada munu mandutu mana, lelaa di yé le di noñ maéba ma Yésu mana le di waa tôñ?

6. Kii i bi pémél ñôma Pétrô lisañ jada?

⁶ Lisañ jada, ñôma Pétrô ni bana baôma bape ba bé ikété môñgô i tuye Galiléa mbuk mbebi a hôñôk, ba tehe Yésu a nkil i ngii malép. Pétrô a kal le: “A Nwet, ibale we nu, ti oda le yak me me kil i ngii malép, me lo me koba we.” Ngéda Yésu a bi kal nye le: “Lok,” Pétrô a bi pam i môñgô a “ke ni makôô i ngii malép inyu boma Yésu.” I mbus kii i bi tagbe? “Ngéda a bi béñge mbuk mbebi, a kon woñi. Kiki a mbôdôl yin, a lond makeñi le: ‘A Nwet, tohol me!’” Yésu a bi gwel nye woo a pémés nye. Di yimbe le i ngéda Pétrô a bé béñge Yésu, ha nyen a bé kil i ngii malép. Ndi i ngéda a bi béñge mbuk mbebi, a kon woñi ngandak, a bôdôl yin.—Matéô 14:24-31.

7. Kii ndémbél i Pétrô i niiga bés?

⁷ Di nla ôt biniigana mu ndémbél  i Pétrô. I ngéda Pétrô a bi nyodi i môñgô a jôp i tuye, a bé hoñol bé le a nla yin. A bé sômbôl kil i ngii malép ikepam i het Yésu a bé. Ndi a bi kon mbuk mbebi woñi, a waa béñge Yésu. Bés di ta bé le di kil i ngii malép kiki Pétrô, ndi di mboma mandutu. Ibale di nwaa bôdôl Yéhôva ñem, di ga bôdôl yin. To imbe ndutu di mboma i niñ yés, di bôdôl Yéhôva ñem di yik le a ga hôla bés. Kii i nla hôla bés i boñ hala?

8. Kii i nla hôla bés le di tôñ bañ iloo hihéga inyu mam ma mbéda bés?

⁸ I jam li nla hôla bés li yé le di waa tôñ, di bôdôl Yéhôva ñem. Di bigda le Yéhôva a mbôn bés le ibale di nyéñ ndugi Ane, a ga ti bés mana mam mape momasôna. (Matéô 6:32, 33) A mah tembee bé kekikel. (Ndiimba Mbén 8:4, 15, 16; Tjémbi 37:25) Ibale Yéhôva a ntôñ dinuni ni mbônji, wee yak bés bôt ba binam di nlama yi le a ga ti bés bijek ni mambot! (Matéô 6:26-30; Filipi 4:6, 7) Kiki bagwal ba nti bon bap i mam momasôna ma mbéda bo inyule ba ngwés bo, hala nyen yak Yéhôva a nti bés i mam momasôna ma mbéda bés inyule a ngwés bés. Di péénaga bañ le Yéhôva a ga tééda bés!

9. Kii ndémbél i babiina bada i niiga bés?

⁹ Di béñge ndémbél yada i i ñéba lelaa Yéhôva a nti bés mam ma mbéda bés. Babiina bada ba ba yé basañal ba bi kena bôk yap litôa yom kiki bo liké li ngeñ yada inyu ke i yoñ bisita bi bi bé i homa bôt ba nso gwét ba nyééne le ba kena bo likoda. Mankéé nu munlôm a nkal le: “I ngéda likoda li bi mal, di bi naña bo i je i ndap, ndi di hoñol le di bééna bé bijek inyu kébél bo.” Babiina ba ba bi boñ lelaa? Mankéé nu munlôm a nkal le: “I ngéda di bi bol i ndap, di bi koba bibot bikeñi biba bi bijek i bisu bi nwemel. Di bi yi bé i nwet a bi bii gwo ha. Yéhôva a bi ti bés i yom i bé béda bés.” I mbus ndék ngéda, litôa li babiina ba li bi ôbi. Jon ba bé gwélél inyu likalô; ndi ba bééna bé moni inyu tiblaha jo. Ba bi kena jo i het ba ntibil matôa, mut wada a lo a bat le: “Njee a gwé litôa lini?” Mankéé a nkal nye le litôa jap li, ba nlona jo le ba tibil jo. I mut nu a kal le: “Béba i ta bé. Nwaa wem a gwé ngôñ ni litôa lini, nlélém litôa yaga, li nhee tañ laa?” Mankéé a bi nuñle i mut nu litôa li, a kôhna moni mi mi bé mi kôli inyu somb litôa lipe. A bi sôk kal le: “Bébomede ni yé le ni hégda maséé di bi nôgda ha ngéda i. Di bé yi le masoda bé ma. Yéhôva Nyambe nyen a bi boñ i jam li.”

10. Lelaa kaat Tjémbi 37:5 i nla hôla bés i waa tôñ inyu mam ma mbéda bés?

¹⁰ I ngéda di nok maéba Yésu a nti bés le di tôñ bañ iloo hihéga inyu mam ma mbéda bés, di yé nkwoog nkaa le Yéhôva a ga ti bés i mam ma momasôna. (Añ Tjémbi 37:5; 1 Pétrô 5:7) Di hoñol mandutu di mpôdôl liben li nyônôs 5. Ibôdôl nu di yé ikété ndutu bebek le Yéhôva a ma gwélél isañ mbai tole nwet wés i homa bôlô inyu ti bés i mam momasôna ma mbéda bés. To ibale isañ  mbai a nla ha bé ti bés koga kel, tole di nimis bôlô yés, Yéhôva a ga ke ni bisu i ti bés i mam ma mbéda bés. Di nlama ba nkwoog nkaa le a ga boñ hala. Nano di béñge jam lipe Yésu a bi kal le di waa boñ.

11. Inoñnaga ni kaat Matéô 7:1, 2, Yésu a bi kal le di waa boñ kii, inyuki hala a yé le a lédél bés?

¹¹ Añ Matéô 7:1, 2. Yésu a bé yi le bôt ba binam ba ngwés ba nkéés bôt bape. Di yimbe le a bi kal le: “Ni waa kéés.” Di yé le di jo sañ le di kéés bañ lôk kéé yés. Ndi, hala a ta bé jam li ntomb. Ibale di nyimbe le ngim mangéda di yé di nkéés lôk kéé yés, kii di nlama boñ? Di emble maéba ma Yésu, di jo sañ le di waa kéés bôt bape.

12-13. I ngéda di ntehe lelaa Yéhôva a bi nwéhél David, kii hala a niiga bés?

¹² Di yé le di ôt ngandak biniigana mu ndémbél i Yéhôva. A mbéñge ndik mam malam bôt bape ba mboñ. I jam a bi boñ ni Kiñe David nu a bi boñ ngandak bibéba bikeñi jon li ñunda bés hala. Kiki hihéga, David a bi ke ndéñg ni Batséba, a boñ yak le ba nol nlô wé. (2 Samuel 11:2-4, 14, 15, 24) I jam li li bi boñ nyemede béba, yak ni lihaa jé ni baa bé bobasôna. (2 Samuel 12:10, 11) Lisañ lipe, David a bi bôdôl bé Yéhôva ñem, a bi kal le ba soñgol bisônda bi ntôñ gwét u Israel ki le Yéhôva a bi kal bé nye le a boñ hala. Bebek le ngôk won u bi tinde David i boñ i jam li, a hoñlak le ntôñ wé gwét nkeñi won w’a tat nye. Mam ma bi sôk lelaa? Himala hi bi nol bebee le 70 000 ma bon ba Israel!—2 Samuel 24:1-4, 10-15.

¹³ Ibale u bé i loñ Israel ha ngéda i, ki u bi tehe lelaa David? Baa ki u bi kal le a kôli bé ni nwéhél i Yéhôva? Yéhôva nye a bé tehe bé hala, a bi hoñol ndigi i mam malam momasôna David a bé a ma boñ, a tehe ki le David a bi tam béba yé. Jon, Yéhôva a bi nwéhél David inyu bibéba bikeñi a bi boñ. Yéhôva a bé yi le David a bé gwés nye ngandak, a bé sômbôl ki boñ loñge. Baa di ta bé maséé kiki Yéhôva a mbéñge ndigi mam malam di mboñ?—1 Bikiñe 9:4; 1 Miñañ 29:10, 17.

14. Kii i nla hôla bés i waa kéés bôt bape?

¹⁴ Yéhôva a nyi le di ta bé peles, jon yak bés di nlama yi le lôk kéé yés i ta bé peles. Hala a yé jam li ntomb i tehe ndigi mam mabe bôt bape ba mboñ ni i kéés bo. Ndi i mut a nigle Yéhôva, a nla tehe bibomb bi bôt bape, to hala a kee ni bisu i gwés bo. I ngéda ba yé ngi sal diamant, mut a yé le a yan yo; ndi i mut a nyi jam a nyi le i ngéda ba ga sal yo, ha nyen ba ga tibil tehe nseñ wé, ni bilama gwé. Kiki Yéhôva bo Yésu, di nlama bé héléé i béñge mam mabe bôt bape ba mboñ, ndi di nlama béñge bilem gwap bilam.

15. Ibale di nyi bôt loñge loñge, inyuki di ta bé le di kéés bo?

¹⁵ Handugi le di nlama béñge bilem bilam bi bôt bape, kii ipe i nla hôla bés le di kéés bañ bo? Di noode yi bo loñge loñge. Di yoñ le hihéga hiada. Lisañ jada, Yésu a bi tehe hiyeyeba hi  yik muda i témpel hi hi bé ha bon ba batjañtjañ iba ba ba bééna bé nseñ bañga ikété hikukuu. A bi kal bé le: “Ndi inyuki i muda nunu a nha bé iloo ha?” Yésu a bi béñge bé likébla i yik muda i i bi ti, a bi béñge mahoñol mé ni mam a bé boma i niñ yé, a bégés ki nye inyule a bi boñ kii yosôna a bé la.—Lukas 21:1-4.

16. Kii i jam li bi pémél Veronica li niiga bés?

¹⁶ I jam li bi pémél sita yada le Veronica li nla hôla bés i tehe nseñ i yi lôk kéé yés loñge loñge. Sita yada i i bé bé mbiibaga i bé mu likoda jé lôñni lok yé. Veronica a nkal le: “I bé pôna ndik me wee ba nlo bé makoda ni likalô kiki i mbéda. I jam li li bé tééñga me. I mbus ngéda, me bi ke likalô ni i sita i. A bi toñle me le lok yé i nkônôô ño. A bé boñ kii yosôna a bé la inyu yéñ koga kel ni lédés hémle yap. Ngim mangéda, kon u lok yé u bé u boñ nye le a kee makoda homa numpe.” Veronica a nkal le: “Me bé yi bé le hala nyen a bé nok ndutu. Nano me ngwés i sita i, me nti ki nye lipém ngandak inyu kii yosôna a mboñ i nson u Yéhôva.”

17. Mambe maéba ma yé i kaat Yakôbô 2:8, lelaa di nla noñ mo?

¹⁷ Kii di nlama boñ ibale di nléba le di nkéés ngim mankéé? Di bigda le di  nlama gwés lôk kéé yés. (Añ Yakôbô 2:8.) Di nlama ki soohe Yéhôva ni ñem wonsôna, di yemhe nye le a hôla bés i waa kéés bôt. Inyu boñ le di kiha ni masoohe més, di nlama yéñ njel le di kwel ni mankéé di yé di mbéna kéés. Hala a ga hôla bés i yi nye loñge. Di nla kal nye le a kee ni bés likalô tole di nla naña nye i je. Ibale di nyéñ manjel i yi i mankéé nu loñge, di ga noode noñ ndémbél i Yéhôva bo Yésu, di béñge ndigi i mam malam a mboñ. Ibale di mboñ hala, wee di yé noñ maéba ma Yésu mana le di waa kéés.

18. Lelaa di nla emble kiñ Yésu?

¹⁸ Kiki mintômba mi ñemble kiñ i ntééda mintômba, hala nyen yak banigil ba Yésu ba ñemble kiñ yé. Ibale di njo sañ le di waa tôñ di waa ki kéés bôt bape, Yéhôva bo Yésu ba ga sayap bés. Too di yé i “bémba titigi,” too di yé “mintômba mimpe,” di kee ni bisu i emble kiñ Yésu. (Lukas 12:32; Yôhanes 10:11, 14, 16) Mu yigil i noñ ha, di ga tehe mam ima Yésu a bi kal banigil bé le ba boñ.