Baa ni nyoñ ngéda i añ ba Nkum Ntat ba mpam munu nwii unu? Wee ni béñge too ni nla timbhe mambadga mana:

Bibuk bini le i “yilha mahoñol manan yondo” bi nkobla le kii? (Rôma 12:2)

Hala a ngwés ndik bé kal le di boñ mam malam. Ndi i nkobla le di wan mahoñol més, inyu tehe mahéñha di nlama lona inyu boñ le niñ yés i kiha ni matiñ ma Nyambe.​—w23.01, mapep 8-9.

Limbe litehge li mam ma ntagbe i nkoñ ’isi di nlama bana?

Di yoñ ngéda i béñge i mam ma ntagbe i nkoñ ’isi, inyu tehe lelaa ma nyônôs mbañ i Bibel. Ndi di nlama bé hoo pot, di tiga lona mbagla ikété likoda, nseñ di pôdôl biniigana bi nsôk ntôñ u Yéhôva u mpémés. (1 Korintô 1:10)​—w23.02, lipep 16.

Inyuki sôble i Yésu i ta bé kiki sôble i banigil bé?

Yésu a bi gwééne litén li Nyambe, jon a bééna bé ngôñ i ti niñ yé nkikip yak Yéhôva, kiki bés. Yésu a bé peles, ngi béba yo ki yo. Jon a bééna bé ngôñ i tam béba yo ki yo.​—w23.03, lipep 5.

Lelaa di nla ti bôt bape pôla i timbhe makoda?

Di nla bana lem i ti mandimbhe ma sem kwep, inyu ti bôt bape pôla i timbhe. Di nlama bé pôdôl mam momasôna. Hala a ga ti bôt bape pôla i pôdôl matode mape.​—w23.04, lipep 23.

Kii i yé “nloñ mpubhaga” ba mpôdôl i kaat Yésaya 35:8?

Nloñ u u bé titii Yéhôva a bi gwélél inyu pôdôl nloñ Lôk Yuda i bi yoñ ibôdôl i Babilôn inyu témb i Israel. Won u yé kii i ngéda yés? Ngandak nwii ilole di mbol i nwii 1919, Yéhôva a bi gwélél bôt ba bé kon nye woñi inyu sañal nloñ u, mu kiki ba bé kobol Bibel ni bikaat bipe, ba pémhak gwo. Bagwélél ba Djob ba nkil mu “nloñ mpubhaga” nano a yé ndék jôga, inyu ke i paradis i mbuu, i i nhôla bo i bem bisai bi Ane Djob.​—w23.05, mapep 15-19.

Bimbe bititii bi bôda iba kaat Bingéngén pes 9 i ngwélél inyu ti bés maéba?

Kaat Bingéngén i mpôdôl “jôñ muda” nu a naña bôt i lo i nyeni, ki le i bet ba neebe, ba nke i “Soñ.” Ki le nunu muda numpe le “bañga pék,” a naña bôt i lo i ôt nseñ ni “bañga yi” yak ni niñ i boga. (Bingéngén 9:​1, 6, 13, 18)​—w23.06, mapep 22-24.

Lelaa suhulnyuu i Yéhôva ni libak jé li mut a nai bé ni litehge jé li mam li nene mu maada mé ni Lôt?

Yéhôva a bi kal Lôt le a kee ngwéé i mbok dikôa. Ndi i ngeñ Lôt a bi bat nye too a nla ke i solop i Zôar, Nyambe a bi neebe.​—w23.07, lipep 21.

Kii muda a nla boñ ibale nlô wé a mbéñge bititii bi malal?

A nlama bigda le i mis ma Djob, a gwé bé ngaba yo ki yo mu maboñok mé. A nlama yoñ ngéda i lédés maada mé ni Djob, a soñgol, a ôt pék mu miñañ mi bôda ba kôba ba ba bi soohe Nyambe i ngéda ba bé ikété ndutu. A nla hôla nlôm i keñgle bahoma ni mam ma nla boñ le a tiimba kwo manoodana.​—w23.08, mapep 14-17.

Lelaa pék i nla hôla bés i timbhe ni ñemlima i ngéda ba mbat bés mambadga mu mam di nhémle?

Di nla tehe mbadga i mut nu kiki ngim njel i yi mahoñol mé. Ha ngéda i, i ga bane bés jam li ntomb i timbhe nye ni ñemlima.​— w23.09, lipep 17.

Kii di nigil mu ndémbél i Maria i ngéda a bi bana ngôñ le ba lédés nye?

I ngéda a bi nok le nyen a ga ba nyañ Mésia, Maria a bi yéñ mahôla ma bôt bape. Añgel Gabriel ni Élisabet ba bi lédés Maria ni njel Bitilna. Yak bés di nla kôhna ngui ni mahôla ma bilôk bikéé bipe.​—w23.10, lipep 15.

Lelaa Yéhôva a nla timbhe masoohe més?

A mbôn le a’ emble masoohe més, téntén ibale ma gwé maada ni sômbôl yé. (Yérémia 29:12) A nla timbhe masoohe més ni ngandak manjel, ndi a ga tjôô bé bés kekikel.​—w23.11, mapep 21-22.

Rôma 5:2 a mpôdôl “botñem,” inyuki ba ntiimba pôdôl yo i nlôñ 4?

I ngéda mut a neebe ñañ nlam, a yé maséé i yi le a nla bana niñ ilam i paradis hana ’isi. Ndi kiki a mboma mandutu, a hônbaga mo, a nôgda le a nlémél Nyambe, hala nyen yak botñem yé i nkônde nañ.​—w23.12, mapep 12-13.