IBABÉ pééna, ni ndiihe makébla Yéhôva a nti, yak lini le a bi nwas le bésbomede di pohol lelaa di ga ôt nseñ ni makébla a nti bés. Ikété makébla ma, jada Bibel i mpôdôl li yé maok, i nkal yak le: “Bijek bi nlona maséé, yak wai i nlémés niñ.” (Ñañal 10:19; Tjémbi 104:15) Ndi bebek, u ma yimbe le maok ma nyila ngok baagene inyu ngim bôt. U héya hala, mahoñol ma bôt mu jam li ma nkiha ni i homa ba niñil, yak ni bilem gwap bi loñ. Jon mbadga i yé le: Lelaa bikristen bi nlama tehe maok?

To di néñél hee homa, to ba niiga bés lelaa, di nlama yéñ yi mahoñol ma Nyambe mu jam li, di nwas ki le mon ma éga bés. Ibale di mboñ hala, di ga ôt nseñ iloo hihéga, di niñ ki loñge.

Kiki wemede u nyimbe, ngandak bôt i gwé lem i nyo maok, i nyo ki ngandak. Bebek bahogi ba nyo inyule i ngéda ba nyo, hala a mboñ le ba nôgda loñge. Bape ba nyo inyu hôya mandutu map ndék. I bahoma bape ki, mut a nlama nyo ngandak inyu unda le a yé lôs tole a gwé ngui.

Ndi, bikristen bi nkôs maéba malam mu jam li, ma nlôl bo ni Nhek wap nu gwéha. Kiki hihéga, a nkal bés i njôghe di nla nok ibale di nhiôô. Bebek u ma añ Bingéngén 23:29-35, u tehe lelaa ba mpôdôl libak li mut a nhiôô, ni mandutu a yé le a bana. a Mankéé Daniel, nu a yé mañ likoda i Érôpa a mbigda lelaa niñ yé i bé ilole a nyila Mbôgi Yéhôva; a nkal le: “I bana lem i nyo ngandak i bi boñ le me yoñ makidik mabe i niñ yem, me bi boma yak bikuu bi bi bi pat me ñem.”

Lelaa bikristen bi nla gwélél i kunde bi gwé i yoñ makidik kayéle bi keñgle mandutu ma nlôl lihiua? I mbéda le di nwas le litehge li Nyambe mu jam li jon li éga mahoñol més ni maboñok més.

Di tehe i yom Bibel i nkal mu jam li, ni i mam ma ntinde bôt bahogi i nyo.

Bibel i nsôñga bé maok. I nkal yak le i nyo wai i nla ba loñge jam. Di ñañ le: “U je bijek gwoñ ni maséé, u nyo ki wai yoñ, ñem u konok we maséé.” (Ñañal 9:7) Yak Yésu a bi nyo wai, yak bôt ba hémle ba kôba ba bi boñ nlélém.—Matéô 26:27-29; Lukas 7:34; 1 Timôtéô 5:23.

Ndi Bañga i Nyambe i ntibil unda maselna ma yé ipôla i nyo maok ni i hiôô. I nkal le: “Ni hiôô bañ to wai.” (Éfésô 5:18) I nkal ki le “bôt ba lihiua . . . b’a kôdôl bé Ane Nyambe.” (1 Korintô 6:10) Ñ, Yéhôva a ngwés bé le di hiôô, to le di ba bôt ba lihiua. Iloole di yoñ i jam li kiki bôt ba libôga jés, tole kiki bilem bi mbok, nseñ u yé le di bana litehge li Yéhôva.

Ngim bôt i nkal le ba nla nyo ngandak maok ibabé bo i hiôô. Ibale ba yik to le hala a yé béba kiyaga. Bibel i nkal le i ba “nkol u ngandak wai” i nla kena munlôm (tole muda) haa ni Yéhôva ndék ni ndék. (Titô 2:3; Bingéngén 20:1) Yak Yésu a kal le “ngandak nyôba” i nla kéñ mut i jôp i mbok yondo. (Lukas 21:34-36) Kii i nla ni hôla kristen i keñgle i tjandi dini di gwé maada ni maok?

I ta bé loñge le mut a nwas le bilem bi loñ yé gwon bi niiga nye lelaa a tehe maok. Bikristen bi mpohol njel pék i i yé le, ba lémél Yéhôva inyu jam li je ni li nyôba. Bibel i mbigdaha bés le: “To ni nje, to ni nyo, to ni mboñ jam lipe jo ki jo, boña mam momasôna le Nyambe a kôhna lipém.” (1 Korintô 10:31) Noode le wan mambadga ma noñ ha ni matiñ ma Bibel ba nti:

Baa me nyo inyu nôgla ni bôt bape? Manyodi 23:2 a nkal le: “U nlama bé noñ limut li bôt.” Hana nlôñ unu, Yéhôva a bé béhe bon ba Israel le ba yéñ bañ noñ bôt ba ba nlémél bé nye. Mabéhna ma, ma mbéñge yak bés bikristen i len ini. Ibale di nwas le bisega gwés gwon bi niiga bés i yi lelaa di tehe maok, hala a nla kena bés haa ni Yéhôva lôñni matiñ mé.—Rôma 12:2.

Baa me nyo maok inyu unda le me yé lôs mut? I ngim biloñ, béba i ta bé i bana lem i nyo, ni i hiôô. (1 Pétrô 4:3) Ndi béñge maéba ma pék ma yé i 1 Korintô 16:13: “Yéna péé, telbana siñ siñ ikété hémle, ni bana ñem ngui, ni yila mimpémba.” Baa maok ma nhôla toi mut i yila mpémba mut? Heni. Ma nla ndik tômbôs mut. Maok ma mboñ le mut a nyi ha bé i yom a mboñ, to i yom a nhoñol. Jon, i ngéda di nyo ngandak, hala a ñunda le di mbomb. Kaat Yésaya 28:7 i ñunda le i mut a ndiñg inyule a nhiôô, a nsôk a baage.

Bañga ngui i nlôl yak Yéhôva, i nwet a gwé yo a nyén péé, a téé siñ siñ ikété hémle. (Tjémbi 18:32) Bañga kristen i nla pam i boñ hala i ngéda i yoñ yihe, ni ibale i mboñ kii yosôna i nla inyu ke haa ni mam momasôna ma nla ôbôs maada mé ni Nyambe. Hala nyen Yésu a bi unda le a bé lôs mut ngéda a bé hana ’isi, ngandak bôt i bé tehe nye kiki ntôô mut, ni mut makénd nu a bééna ñem ngui.

Baa me nyo inyu ke mandutu mem ngwéé? Mbuu u Nyambe u bi tinde ntôp tjémbi wada i kal le: “I ngéda nduña i bé me nnayak, u [Yéhôva] bi hôgbaha me, u mômôs ki me.” (Tjémbi 94:19) Jon ibale nduña i nai, yéñ mahôla ma Yéhôva, he  i nyôba maok bé. Inyu boñ hala di nlama bana lem i soohe. Lôk kéé ipe i nkal le i bi kôs hogbe i ngéda i bi kwel ni nhôôlak kristen. Ndi ibale di nkahal nyo ngandak, di nla bôdôl boñ mam mabe, di bana ha bé ngôñ i boñ mam ma téé sép. (Hôséa 4:11) Daniel nu di mbôk di sima a bi nôgda i jam li, a nkal le: “Nduña i bi yuu me, kiññem i kééhak me. Ha nyen me bi kahal nyo ngandak, ndi mandutu mo ma bé ndigi ma nkôndba, me nimis mawanda mem, me bé nôgda le me gwé bé nseñ wo ki wo.” Kii i bi sôk i hôla Daniel? A nkal le: “Me bi nôgda le ndik Yéhôva nyen a nla hôla me, he maok bé. Ni mahôla mé, me bi pam i hônba mandutu mem, ni i yémbél mo.” Maliga ma yé le, kekikel Yéhôva a ga tjôô bé bés i ngéda di mboma mandutu, to ibale bés di ntehe wengoñle a mpam bés i héya bitamb.—Filipi 4:6, 7; 1 Pétrô 5:7.

Ibale i yé i mpam ngim mangéda le di nyo maok, di yoñ ndék manut i wanba ni mana mambadga: ‘Baa mut wem lihaa wada tole liwanda jem jada li ma pôdôs me inyu jam jem li maok?’ Ibale hala, bebek hala a nkobla le me nkahal sômbôl yila mut nyôba ibabé me i yi. ‘Baa me nkahal nyo iloo i ngéda kôba?’ I mut a nhoñol le a ta bé nkol maok, ndék ni ndék a nla kwo mu i hiandi hi. ‘Baa me nla ha bé yén to ndék dilo ibabé i nyo? Ibale hala, wee di nkahal yila nkol maok tole di mal yila nkol maok. Ha ngéda i, bebek yak matibla ma dokta ma mbéda bés inyu yémbél i lem i.

Inyu ke mandutu ma momasôna ngwéé, bikristen bihogi bi bi kit le bi nyo bé maok hies. Bape ba bi tjél mo inyule ma nlémél bé bo. Ibale u nyi mut hala, unda le u ndiihe makidik mé, u yahal bañ to nye.

Tole u nla tehe nseñ i tééne wemede ngim minwaa inyu jam li maok. Ñ, kristen i nla kit le i nyo ha bé ngandak, i nyo ha bé hiki sonde, tole i ga nyo ndigi ndék i ngéda  i nje. Bape ba nkit le ba ga nyo ha bé ngim maok, kiki bo wiski i i gwé ngui ngandak, to mimpôdnaga mi bilam, ndik gwom kiki bo wai tole bie. I ngéda mut a ntééne nyemede minwaa, i ga ba nye jam li ntomb i noñ makidik mé. Ibale nhôôlak kristen u nyoñ i nya makidik i, u nlama bé tehe hala kiki jam li wonyuu.

Jam lipe li yé le, di nlama tôñ bôt bape. Kaat Rôma 14:21 i nkal le: “I yé loñge le u je bé nuga, to nyo wai, to boñ jam lipe jo ki jo li li mboñ le maasoñ a baage.” Lelaa u nla noñ maéba ma? Unda lôk kéé gwéha i lisañ li bôt. Ibale u nôgda le hala a nla tééñga mankéé numpe i tehe we u nyo maok, baa i gwéha u gwééne nye i ga tinde bé we i tjél nyo to ibale u gwé kunde i boñ hala? Ibale ndimbhe i yé le ñ, wee u ntôñ toi bôt bape, u tinak bo lipém, u nyéñ ndik bé nseñ woñ wetama, ndi yak nseñ u bôt bape.—1 Korintô 10:24.

Ni ki le i ngim biloñ, ngomin a bi téé ngim mambén ma ma nla hôla kristen i yoñ makidik malam. Mambén ma ma nla ba le mut a nlama bé nyo ibale a yé ngi pamna ngim nwii, i ngéda a nluk matôa tole i ngéda a ngwélél ngim mashin.—Rôma 13:1-5.

Yéhôva a bi lôôha ti bés lipém kiki a bi gwés le bésbomede bon di kit ibale di ñôt nseñ ni ngim makébla a bi ti bés tole heni. Mu i kunde i, di nla sima i kunde di gwé i pohol i yom d’a je ni i yom d’a nyo. Makidik di nyoñ ma nlama unda le di ndiihe i kunde i, jon ma nlama lémél Tata wés Nungingii.