Baa ni nyoñ ngéda i añ ba Nkum Ntat ba mpam munu nwii unu? Wee ni béñge too ni nla timbhe mambadga mana:

Lelaa Yéhôva a ntehe bôda, imbe ndémbél a nti bés mu jam li?

A mbagal bé bo, a ntehe bé to le bôlôm ba yé nseñ iloo bôda. Djob a ñemble bôda, a nyoñ ngéda i yi mahoñol map ni i yom ba nôgda. A mbôdôl bo ñem, jon a mbééga bo ngandak minson.—w24.01, mapep 15-16.

Lelaa di nla noñ mana mabéhna ma kaat Éfésô 5:7, le: “Ni yoñ bañ ngaba yo ki yo ni bo”?

Ñôma Paul a mbéhe bés le, di ba bañ mawanda ni bôt ba ba ngwés bé matiñ ma Yéhôva. I bilôñ ba mpôdôl hana, bi ta ndigi bé i bôt bés ni bo di ntégbaha ngéda i mbom ni mbom, bi nla yak ba i bôt ba mbéna kwel ni bés i internet.—w24.03, mapep 22-23.

Mimbe miñañ mi bitembee di nlama keñgle?

Di nlama yoñ yihe ni i nya miñañ ini: ñañ u u nlôl ni liwanda jés, ki le a ntibil bé wan wo inyu yi too u yé mbale; hélha ñañ, u u nlo ndik hala i internet ni ngim mut di nyi bé loñge loñge; ni miñañ mi batjañgbene maliga ba ba mboñ wee ba ngwés ñañ nlam.—w24.04, lipep 12.

Mu bikééhene bi Yéhôva inyu bitugne, kii di nyi, ni kii di nyi bé, inyu Kiñe Salômô, ni inyu i bôt ba bi wo i tjiba i Sôdôm ni Gômôra ni i Ntida malép?

Di nyi bé ibale Yéhôva a bi mal kit le i bôt ba, ba bi tjiba i boga ni boga. Ndi i yom di nyi, i yé le, a nyi mam momasôna ma bi tagbe i niñ yap, ni le a nlôôha ba konangoo.—w24.05, mapep 3-4.

Kiki Nyambe a yé “Liaa,” di nla ba nkwoog nkaa ni kii? (Ndiimba Mbén 32:4)

Di nla yilha Yéhôva lisolbene jés. Di nla bôdôl nye ñem, le a nyônôs mimbônga nwé ibabé set. Ni le a mpiñgla bé, bilem gwé ni sômbôl yé bi nhéñha bé.—w24.06, mapep 26-28.

Inyu meya likoda joñ li mondo, kii i nla hôla we?

Bôdôl Yéhôva ñem, a ga hôla we nlélém kiki a bi hôla bagwélél bé ba kôba. U hégha bañ likoda joñ li mondo ni i het u nlôl. Jôp i bôlô mu likoda joñ li mondo, boñ ki biliya i bot mawanda ma mondo.—w24.07, mapep 26-28.

Bimbe biniigana di ñôt mu dihéga diaa di kaat Matéô pes 25?

Hihéga hi mintômba ni minyaa mi kembee hi niiga bés nseñ i téñbe ni Nyambe, ni i ba maliga. Hihéga hi bingond bi bé konji, bi bi bééna pék ni bi bi bé bijôñ, hi niiga bés i ba nkôôbaga, di bak ki péé. Hihéga hi talént hi niiga bés nseñ i ba bôt ba bôlô.—w24.09, mapep 20-24.

Libebe li li bé i bisu bi témpel i Salômô li bééna umbe ntel?

I kaat 2 Miñañ 3:4, ngim minlômbi mi bikaat i ñunda le libebe li bééna “120 ma dikéñéé di moo,” hala wee li bé ap 53 méta. Ndi bikaat bipe, bi ngandak bayimam i mbôdôl ñem, bi ñunda le lijubul li, li bé ap “20 ma dikéñéé di moo,” tole méta bôô. I nene le lini liabak jon li nkiha toi ni bikeñi bi mabap ma témpel.—w24.10, lipep 31.

Inyu mankéé nu a yé nhôla nson, i “bana ndik nwaa wada” i nkobla le kii? (1 Timôtéô 3:12)

Hala a nkobla le a yé mbiibaga ndik ni muda wada, ni le kekikel, a ga nwas bé nwaa wé inyu ke i lal ni mut numpe. Iloo ki hala, a nlama bé to béñge bôda bape ni mahoñol ma nyega.—w24.11, lipep 19.

Kii i nyis bés le bibañga bi Yôhanes 6:53 bi ta bé inyu unda bikristen lelaa bi nlama lôôs Bilôp bi Nwet?

Yôhanes 6:53 a nkal le bôt ba nlama je minsôn mi Yésu, ba nyo ki matjél mé. I Galiléa nyen Yésu a bi pot bibañga bi, i nwii 32 N.Y., inyu bon ba Lôk Yuda ba ba bééna ki ngôñ i unda le ba nhémle nye. Nwii wada u bi tagbe, ndi to le Yésu a ntéé Bilôp bi Nwet i Yérusalem. I yokel nu, a bi pôdôs i bôt ba ga ane ni nye nyoo i ngii.—w24.12, mapep 10-11.