Ñôma Paul a bi tilna Timôtéô nu a bé mañ u likoda kiki nye le: “Me nti we oda i bisu bi Nyambe ni Kristô Yésu lôñni mimpohlak mi biañgel le u noñ biniigana bini ibabé i bana mahoñol mabe, u todol bañ to bôt.”—1 Timôtéô 5:21.

Di ga tehe ndugi bonjee di nla kal le ba yé biañgel bini. Ibabé nkaa, ba ta bé mu nsoñgi u 144 000. I ngéda Paul a tilna Timôtéô, bitugne bi minhook mi bikristen bi bé ngi bôdôl. Baôma ni minhook mimpe ba bé ngi yila bihégél bi mbuu, jon ba nla bé ba “mimpohlak mi biañgel.”—1 Korintô 15:50-54; 1 Tésalônika 4:13-17; 1 Yôhnanes 3:2.

Jam lipe ki, “mimpohlak mi biañgel” mi nla bé ba biañgel bi bi bi ndogbene Djob i ngéda Ntida malép. Biañgel bi, bi bi noñ Satan, bi yila mimbuu mimbe, baoo ba Yésu. (Bibôdle 6:2; Lukas 8:30, 31; 2 Pétrô 2:4) I dilo di nlo, Yésu a ga leñ bo i soñkum inyu 1 000 nwii, i mbus ha, ba ga tjiba lôñ yada ni Nsohop.—Yuda 6; Masoola 20:1-3, 10.

“Mimpohlak mi biañgel” Paul a bé pôdôl mi nlama ba biañgel nyoo ngii bi bi nit “Nyambe ni Kristô Yésu” ba Paul a nsima mu nlôñ u.

Dikôô di dikôô di biañgel di tiñi ni Yéhôva. (Lôk Héber 12:22, 23) I nene le Yéhôva a nti bé biañgel gwobisôna minlélém mi bibôlô. (Masoola 14:17, 18) Bigda le Yéhôva a bi kal añgel yada le i tjé 185 000 bisônda bi Lôk Asiria. (2 Bikiñe 19:35) A nla ki om ngandak biañgel i “pémés ikété Ane i [Yésu’] i bôt bobasôna ba ntinde bape i boñ bibéba bi mam, ni bôt ba ba gwé lem i yan mbén.” (Matéô 13:39-41) Bape ba nla “kot mimpohlak nwé mi bôt nyoo i ngii. (Matéô 24:31) Biañgel bipe bi ‘ntat bés hiki kel.’—Tjémbi 91:11; Matéô 18:10; hégha ni Matéô 4:11; Lukas 22:43.

“Mimpohlak mi biañgel ba mpôdôl i 1 Timôtéô 5:21 mi yé biañgel bi bi nhôla i tat makoda, bi nhôla ki i gwel minson mimpe i likoda. Hana, Paul a bi ti mimañ maéba malam inyu minson mi ngwel ikété likoda, ni lelaa bôt bape ba nlama ti mimañ lipém. Yak mimañ mi nlama yônôs minson nwap “ibabé i bana mahoñol mabe, [mi] todol bañ to bôt,” mi nlama bé to yoñ makidik, to pémés mbagi ibabé i tibil wan mam. Njom i bisu i i ntinde mimañ mi i noñ maéba ma Paul mana i yé le mi mboñ hala “i bisu bi Nyambe ni Kristô Yésu lôñni mimpohlak mi biañgel.” Jon biañgel bi ngwel ngim minson mi mi gwé maada ni ntôñ u Yéhôva, kiki bo i tat makoda, i éga nson likalô, ni i añle Yéhôva i mam bi ntehe.—Matéô 18:10; Masoola 14:6.