1-2. Kii i nla hôla bés i nok i yom Yéhôva a nôgda i ngéda ba ñôbôs jôl jé?

 HÉGDA le i jam lini: Mut nu u ngwés ngandak a ñôbôs we jôl. U nyi le jam a mpot li yé bitembee; ndi, bôt bahogi ba nhémle hala. Ba nsôk bé ha, ba kahal tjam bitembee bi, ngandak bôt ipe i bôdôl hémle gwo. Kii u ga nôgda? Ibale u yé mut nu a ngwés bôt bape, u nyéñék tééda jôl lilam, i jam li li ga tééñga we ngandak, hala bé?​—Bingéngén 22:1.

² Hihéga hini hi nla hôla bés i nok i jam Yéhôva a bi nôgda i ngéda ba bi ôbôs jôl jé. Añgel yé yada i bi teembene Éva inyu yé. Éva a hémle bitembee bi. I jam li jon li bi boñ le bagwal bés ba bisu ba ndogbene Yéhôva. Ni i njel i, bôt ba binam bobasôna ba yila bikwéha bi bôt, ba ba nwo. (Bibôdle 3:​1-6; Rôma 5:12) Bitembee Satan a bi bôdôl tjam i wom Éden, gwon bi bi lona mandutu di ntehe i len ini i nkoñ ’isi: Nyemb, gwét, ni njal. Baa bitembee bi, ni i mam mabe bi nlona bi mpat Yéhôva ñem? Ibabé pééna. Ndi, Yéhôva a ntéédana bé bôt hiun, to pii ñem. Maselna ni hala, a yé “Nyambe nu maséé.”​—1 Timôtéô 1:11.

3. Umbe nsima di gwé?

³ Di gwé nsima i pubus jôl li Yéhôva, i ngéda di nôgôl i mbén ini: “Béghana jôl li Yéhôva.” (Tjémbi 113:1) Di mboñ hala i ngéda di ñañle bôt mam malam inyu yé. Baa u ga boñ hala? Di wan manjom makeñi maa ma ma ga  hôla bés i bégés jôl li Nyambe wés ni ñem wés wonsôna.

DI NLÉMÉL YÉHÔVA I NGÉDA DI MBÉGÉS JÔL JÉ

4. Inyuki bibégés di nti Yéhôva bi nlémél nye? Ti hihéga. (Béñge yak titii.)

⁴ Di nlémél Tata wés nungingii i ngéda di mbégés jôl jé. (Tjémbi 119:108) Baa hala nkobla le, Nyambe wés nu ngui yosôna a yé kiki bôt ba binam ba ba nsoohe bibégés inyule ba yé ngoo? To jam. Di yoñ le hihéga hini. Hingongonda hi nsambla isañ, hi nkal nye le: “Wen u yé loñge papa nu a nloo bapapa bobasôna i nkoñ ’isi!” Hala a nlémél isañ ngandak. Inyuki? Baa di nla kal le, isañ man nunu a nsoohe bibégés bi man, tole ibale man a mbégés bé nye, yom i ga héñél nye? To jam. Maselna ni hala, di yé nkwoog nkaa le a yé loñge isañ, nu a yé maséé i tehe ngond yé i ñunda le i ngwés nye, i tinak nye lipém. A nyi le ibale ngond yé i nke ni bisu i gwés bôt ni i ti bo mayéga, hala a ga boñ le a ba maséé. Nlélém jam, Tata nunkeñi le Yéhôva a yé maséé i ngéda di mbégés nye.

5. I ngéda di mbégés Yéhôva, imbe tembee di nyelel?

⁵ I ngéda di mbégés Tata wés nungingii, di ñunda le i yom Satan a kal inyu yés i yé bitembee. Satan a nkal le mut binam nye ki nye a ta bé le a sôñ jôl li Djob. Le i bisu bi manoodana mut nye ki nye a nla bé téñbe ni Djob. A nkônde le, bésbobasôna di ga kôm Nyambe mbus, ibale di ntehe le ni i njel i, d’a ôt nseñ. (Hiôb 1:​9-11; 2:4) Ndi Hiôb, mut hémle, a bi unda le Satan a yé mut bitembee. We u ga boñ lelaa? Hiki wada wés a gwé pôla i pohol i sôñ jôl li Tata wés nungingii ni i téñbe ni nye. (Bingéngén 27:11) Hala a yé nsima nkeñi di gwé.

6. Lelaa di nla kôna David ni Lôk Lévi? (Néhémia 9:5)

⁶ Kiki bagwélél ba Yéhôva ba ngwés nye, jon ba mbégés jôl jé ni ñem wap wonsôna. Kiñe David a tila le: “Me béghak Yéhôva; me béghak jôl jé lipubi ni ñem wem wonsôna.” (Tjémbi 103:1) David a bi nok le, ibale a mbégés jôl li Yéhôva wee a mbégés Yéhôva nyemede. I ngéda di mpôdôl jôl li Yéhôva, hala a nhôñlaha bés umbe ntén mut a yé, bilem gwé bilam gwobisôna ni bihélha bi mam a bi boñ. David a bé tehe jôl li Tata wé kiki jôl lipubi, li a nlama bégés. A bé gwés boñ hala ni ‘ñem wé wonsôna.’ Nlélém jam ni Lôk Lévi, bon ba bé babôgna  i bibégés bi Yéhôva. Ni suhulnyuu, ba bi kal le ba ta bé le ba léba bibuk bi kôli inyu bégés jôl lipubi li Yéhôva kiki i nsômbla. (Añ Néhémia 9:5.) Ibabé pééna, i nya suhulnyuu i, i bé kônha Yéhôva maséé.

7. Lelaa di nla bégés Yéhôva ngéda di yé likalô, ni mu i niñ yés i hiki kel?

⁷ I len ini, di nla lémél Yéhôva i ngéda di ñañle bôt bape njee a yé, di undga le di nti nye mayéga inyu mam a mbôñôl bés, di gwéhék ki nye. I ngéda di yé likalô, di hôya bañ le njômbi yés i bisu i yé le di hôla bôt i kôôge bebee ni Yéhôva, di hôla bo i tehe Tata wés nu gwéha kiki bés di ntehe nye. (Yakôbô 4:8) Di nlôôha kon maséé i unda bôt i yom Bibel i nkal inyu Yéhôva, i ñunda le a yé gwéha, a téé sép, a gwé pék, ngui, ni bilem bilam bipe. Di mbégés Yéhôva, di lémlak ki nye i ngéda di mboñ biliya gwobisôna i kôna nye. (Éfésô 5:1) I ngéda di mboñ hala, di nke haa ni i béba nkoñ ’isi ini. Bôt ba nla yimbe le di yé maselna ni bo, kayéle ba kahal badba le, inyuki? (Matéô 5:​14-16) Mu i niñ yés i hiki kel, ibale pôla i nene, di toñle bo inyuki di yé maselna. Hala a’ boñ le bôt ba miñem minlam ba kôôge bebee ni Nyambe. Ngeñ di mbégés Yéhôva i nya i, hala a nkônha ñem wé maséé.​—1 Timôtéô 2:​3, 4.

I NGÉDA DI MBÉGÉS JÔL LI YÉHÔVA DI NLÉMÉL YÉSU

8. Inyuki Yésu nyen a yé ndémbél i mbôk ni i nsôk i bégés jôl li Yéhôva?

⁸ Mut nye ki nye i ngii to ’isi, a nyi bé Tata kiki Man wé. (Matéô 11:27) Yésu a ngwés Isañ, a yé ndémbél i mbôk ni i nsôk i bégés jôl li Yéhôva. (Yôhanes 14:31) I ngéda a bé soohe Isañ i u wé u nsôk hana ’isi, ni bini bibuk nyen a bi pôdôl nson wonsôna a bi gwel: “Me bi boñ le ba yi jôl joñ.” (Yôhanes 17:26) Lelaa Yésu a bi boñ hala?

9. Himbe hihéga Yésu a bi gwélél inyu tibil toñle bôt njee a yé Isañ?

⁹ Yésu a bi yis ndigi bé bôt jôl li Yéhôva, a bi boñ iloo ha. I bon ba Lôk Yuda Yésu a bé niiga ba bé yi jôl li Nyambe. Ndi, Yésu “nyen” a bé mut bisu i “toñle bés njee Nyambe a yé.” (Yôhanes 1:​17, 18) Kiki hihéga, Bitilna bi Lôk Héber bi ñunda le Yéhôva a yé konangoo a ban-ga ñem ngôô. (Manyodi 34:​5-7) Yésu a bi tibil toñol i jam li i ngéda a bi yoñ hihéga hi man nnimlaga ni isañ. Di ñañ le, “i ngéda a bé a ngi yii haa” isañ a bi tehe nye, a ke ngwéé inyu boma nye, a sambla nye, a nwéhél nye ni ñem wé wonsôna. Hihéga hi, hi ntibil unda bés konangoo ni ñem ngôô u Yéhôva. (Lukas 15:​11-32) Yésu a bi unda bés umbe ntén mut Isañ a yé toi.

10. (a) Lelaa di nyi le Yésu a bi gwélél jôl li Isañ, ni le a ngwés le bôt bape ba gwélél jo? (Markô 5:19) (Béñge yak titii.) (b) Kii Yésu a gwé ngôñ le di boñ i len ini?

¹⁰ Baa Yésu a bé gwés le bôt bape ba gwélél jôl li Isañ? Ntiik. Baéga bibase bahogi ba bé niiga le ibale ba ngwélél jôl li Djob, wee ba nyan jo, ndi Yésu a bi nwas bé le i nya minkoda mi biniigana i, i nkéñ nye i ti jôl li Isañ lipém. Kiki hihéga, di béñge i yom i bi bôña i ngéda a bi héya mut wada mimbuu mimbe i nkoñ u bôt ba Gérasa. I bôt ba bi tehe i jam li, ba bi bôdôl soohe Yésu le a nyodi nkoñ wap, jon a bi yén bé nyoo. (Markô 5:​16, 17) Ndi, Yésu a bééna ngôñ le jôl li Yéhôva li yiba nyoo. Jon a bi kal i mut a  mbuubaha le, a kal bôt bé i yom Yéhôva a bi bôñôl nye, he nye Yésu bé. (Añ Markô 5:19.) a A gwé ngôñ le di boñ nlélém i len ini: Le di yis bôt ba nkoñ ’isi wonsôna jôl li Isañ! (Matéô 24:14; 28:​19, 20) I ngéda di mboñ hala, di nlémél Kiñe yés, Yésu.

11. Inyu limbe jam Yésu a bi niiga banigil bé i soohe, inyuki hala a nlôôha ba nseñ? (Ézékiel 36:23)

¹¹ Yésu a bé yi le njômbi i Yéhôva i yé le jôl Jé li tééba lipubi, ni sas mahindi momasôna ba nhoo jo. Jon Malét wés a bi niiga banigil bé i soohe le: “A Tata wés nu a yé ngii, jôl joñ li tééba lipubi.” (Matéô 6:9) Yésu a bé yi le i jam li, li mbéñge bihégél gwobisôna. (Añ Ézékiel 36:23.) Ikété ngiinda yosôna hégél to yada i ma bé pubus jôl li Yéhôva kiki Yésu. Ndi, i ngéda ba bi gwel Yésu, imbe béba baoo bé ba bi kal le a mboñ? Ba bi ôm nye nsohi le, a nhoo jôl li Isañ mahindi! Ndi Yésu a bé yi le béba ipe yo ki yo i nloo bé i ôbôs jôl lipubi li Isañ. Hala a bi lôôha tééñga nye i nok ba ñôm nye nsohi le a nkand i nya kuu i. Bebek inyu hala nyen, Yésu a bé ikété “nduña ikeñi kiyaga,” ndék ngéda ilole ba ngwel nye.​—Lukas 22:​41-44.

12. Lelaa Yésu a bi pubus jôl li Isañ likala li mbôk ni li nsôk?

¹² Inyu pubus jôl li Isañ, Yésu a bi hônba ndééñga, bisol ni bitembee ba bé leñ nye. A bé yi le a bi nôgôl Isañ ikété manjel momasôna; a bééna bé wonyuu yo ki yo. (Lôk Héber 12:2) A bé yi yak le, mu béba ngéda i, Satan nyen a bé yéñ kolba nye. (Lukas 22:​2-4; 23:​33, 34) Satan a bé hoñlak le Yésu a ga kôm Yéhôva mbus; ndi, mahoñol mé ma bi kwo i lép ni lañgat! Yésu a bi unda i likala li mbôk ni li nsôk le Satan a yé mut bitembee nunkeñi, ni le Yéhôva a gwé bagwélél ba ba ntéñbe ni nye to ikété manoodana makeñi!

13. Lelaa u nla lémél Kiñe yoñ i i yii i yééne Ane?

¹³ Baa u gwé ngôñ i lémél Kine yoñ i i yii i yééne ane? Kee ni bisu i bégés jôl li Yéhôva, u hôlga bôt bape i yi njee a yé  bañga Nyambe. Ibale u mboñ hala, wee u yé kôna Yésu. (1 Pétrô 2:21) Kiki Yésu, u nlémél Yéhôva, u ñunda ki le ñoo wé Satan, a yé mut bitembee!

I NGÉDA DI MBÉGÉS JÔL LI YÉHÔVA DI NHÔLA BÔT BAPE I PEI

14-15. Mambe mam malam ma nla bôña i ngéda di niiga bôt i yi Yéhôva?

¹⁴ I ngéda di mbégés jôl li Yéhôva, di nhôla bôt i pei. Lelaa hala? Satan ‘a bi kwés mahoñol ma bôt ba ntop bé hémle ndim.’ (2 Korintô 4:4) Jon ba bi hémle bitembee bini le: Djob a ta bé, Djob a yé haa ni bés, a ntôñ bé to bôt ba binam, Djob a yé béba mut, ni le a nkogse bibéba bôt i mba ni mba. Bitembee bi bi gwé ndigi njômbi le bi ôbôs jôl li Yéhôva, ñ, i jôl lilam a gwé, inyu boñ le bôt ba binam ba bana bañ ngôñ i kôôge nye bebee. Ndi nson wés u likalô u nkéñ Satan i yônôs njômbi yé. Di niiga bôt njee Tata wés a yé, ni i bégés jôl lipubi li Nyambe wés. Kii hala a nlona?

¹⁵ Bañga i Nyambe i gwé ngui ngandak. I ngéda di niiga bôt njee a yé toi Yéhôva, di ntehe i mam malam hala a nlona. Ndék ni ndék, mis ma mbuu ma bôt ba, ma nkahal yibla, ba bôdôl tehe bilem bilam bi Tata wés nu gwéha kiki bés. Ba yé nhelek i tehe le ngui yé i gwé bé minwaa. (Yésaya 40:26) Ba nigil i bôdôl nye ñem inyule a téé sép i nya i yôni. (Ndiimba Mbén 32:4) Ba nigil ngandak mam inyu pék yé i i mbuma ñañ. (Yésaya 55:9; Rôma 11:33) Hala a nhôgbaha bo i yi le Nyambe a yé gwéha. (1 Yôhanes 4:8) Kiki ba nkôôge bebee ni Yéhôva, ba nkônde ba nkwoog nkaa le b’a yila toi bon ba Nyambe, ba niñik i boga ni boga! Kinje nsima di gwé i hôla bôt i kôôge bebee ni Isañ wap! I ngéda di mboñ hala, Yéhôva a ntehe bés kiki “baso bagwelnson” bé.​—1 Korintô 3:​5, 9.

16. Kii ngim bôt i nôgda i ngéda i nigil jôl li Djob? Ti dihéga.

¹⁶ Inyu bôdôl, di nla niiga bôt le jôl li Nyambe li yé Yéhôva. I jam li jotama,  li nla tihba ñem u mut a ngwés toi yi maliga. Kiki hihéga, njohok muda wada le Aaliyah b a bi nañ i base ipe, a bé bé kristen. Ndi a bi nôgda le base yé i bé hôla bé nye i kôôge bebee ni Djob. Ndi mam ma bi héñha i ngéda a bi bôdôl nigil ni Mbôgi Yéhôva. Ndék ni ndék a bôdôl tehe Nyambe kiki Liwanda jé. A bé nhelek i nigil le ba bi héya jôl li Nyambe ikété ngandak bi Bibel, ba héñha jo ni mangédi kiki bo Nwet. I yi le jôl li Djob li yé Yéhôva, i bi héñha toi niñ yé. A nkal le: “Bañga yem Liwanda i gwé jôl! Mam ma bi sôk lelaa? A nkal le: “Nano me yé toi nwee. Kinje nsima me gwé!” Mut wada nu ba nsébél le Steve, nu a bé ntôp tjémbi, a bi nañ i base i Lôk Yuda. A bé gwés ha bé ke i base inyule bôt ba bihéñba bon ba bé nyoo. Ndi, i mbus nyemb mama yé, a bi neebe nigil Bibel ni Mbôgi Yéhôva yada. Hala a bi tihba nye ngandak i yi le Djob a gwé jôl. A nkal le: “Me mah yi bé le Djob a gwé jôl.” A nkônde le: “Inyu ngélé i bisu, me bi nôdga le Djob a yé toi! Me tehe nye kiki Mut. Me bi yi ha ngéda i le me nléba Liwanda.”

17. Inyuki u nlama ke ni bisu i bégés jôl li Yéhôva? (Béñge yak titii.)

¹⁷ Baa i nson woñ likalô, u niiga bôt jôl lipubi li Yéhôva? Baa u nhôla bo i yi njee a yé toi Nyambe? Ibale u mboñ hala, u mbégés jôl li Djob. Kee ni bisu i bégés jôl lipubi li Yéhôva mu kii u nhôla bôt i yi njee a gwé i jôl li. Ni i njel i, u ga hôla bôt i pei. U ga unda ki le u noñ mabal ma Kiñe yoñ, Kristô Yésu. U héya hala, u ga lémél Tata woñ nu gwéha le Yéhôva. Jon kee ni bisu i “bégés jôl [jé] i boga ni boga”!​—Tjémbi 145:2.