1-2. Kii i bi tinde Yésu i pot bibuk di nléba i kaat Yôhanes 4:35, 36?

YÉSU a bé lôô i nwom i het bibebela bi bé bi ma tip bôdôl o. (Yôhanes 4:3-6) Nwom mini mi bé lama bumblana i mbus sôñ ina. Yésu a bi pot jam li li bi lama hélés bôt. A bi kal le: “Nuna-ki, ni paa mis, ni béñge lelaa nwom mi yé nhôôlak inyu libumbul.” (Añ Yôhanes 4:35, 36.) Kii Yésu a bé sômbôl kal?

² I nene le Yésu a bé sômbôl pôdôl libumbul li bôt ba binam. Di béñge i yom i bi tagbe. To hala kiki Lôk Yuda i bé nôgla bé ni bôt ba Samaria, Yésu a bi añle muda Samaria ñañ nlam, i muda nu a emble ki nye! I ngéda Yésu a bé pôdôl nwom mi mi yé “nhôôlak inyu libumbul,” ngandak bôt i Samaria i i bi nok ngan i Yésu ba bé lo i boma nye. (Yôhanes 4:9, 39-42) Ntoñol Bibel wada a nkal le: “Kiki bôt ba bé nyamnda ni ngôñ i boma Yésu ni i emble nye . . . hala a ñunda le ba bé kiki bibebela bi bi yé nhôôlak inyu libumbul.”

3. Ibale u ntehe bôt kiki Yésu a bé tehe bo, hala a ga tinde we i boñ kii?

³ Lelaa u ntehe i bôt u ñañle ñañ nlam? Baa u ntehe bo kiki bibebela bi bi yé nhôôlak inyu libumbul? Ibale hala nyen u ntehe bo, hala a ga tinde we i boñ mam maa. Pog, w’a jôha bé ni nson likalô to ndék inyule ngéda libumbul i yé nhubuk. Iba, i ngéda w’a tehe bôt ba nleege ñañ nlam, hala a ga kônha we maséé. Bibel i nkal le: ‘Bôt ba nséé i ngéda libumbul.” (Yésaya 9:3)  Aa, w’a tehe hiki mut kiki mut a nla yila ngwélél Djob, w’a boñ ki le minkwel nwoñ mi kiha ni i mam ma nlémél bôt.

4. Bimbe biniigana di ga ôt mu ndémbél i ñôma Paul?

⁴ Yésu a bé tehe bé bôt ba Samaria kiki banigil bé ba tehe bo. A bé tehe bo kiki bôt ba nla yila banigil bé. Yak bés di nlama tehe bôt bés ba libôk kiki bôt ba nla yila banigil ba Kristô. Ñôma Paul a bi yigle bés ndémbél ilam kiyaga. Imbe ndémbél? Munu yigil ini, di ga tehe lelaa Paul (1) a bé yéñ yi i bet a bé tééne likalô, (2) a bé yéñ yi i mam ba bé gwés, (3) a bé tehe ki bo kiki bôt ba nla yila banigil ba Yésu.

5. Inyuki Paul a bééna bé ndutu i niiga i ndap bibégés?

⁵ Paul a bé béna tééne Lôk Yuda likalô i mandap ma bibégés. Kiki hihéga, i ndap bibégés i Tésalônika, “a tégbaha Sabat aa, a gwéélak Bitilna inyu tinde [Lôk Yuda] i hek pék.” (Minson mi baôma 17:1, 2) I nene le Paul a bé kon bé woñi i niiga i ndap bibégés, inyule a bi néñél i base i Lôk Yuda. (Minson mi baôma 26:4, 5) Kiki a bi meina ni Lôk Yuda, jon a bééna bé ndutu yo ki yo i añle bo ñañ nlam.​—Filipi 3:4, 5.

6. Mambe maselna ma bé ipôla bôt Paul a bé tééne likalô i bôm i Atén ni i bôt ba bé ndap bibégés?

⁶ Ngéda bakolba ba bi buñga Paul i Tésalônika ni i Béréa, a bi ke i tison i Atén. Yak ha, “a bôdôl tinde Lôk Yuda lôñni bôt bape ba ba bé bégés Nyambe i hek pék.” (Minson mi baôma 17:17) Paul a bi tééne ki mintén mi bôt mimpe likalô ngéda a bé i bôm. Mu i bôt ba, bayimam ni bôt ba matén mape ba bé tehe biniigana bi Paul kiki “biniigana bi mondo.” Ba bé kal nye le: “U yé i toñle bés mam ma yé nkén i maôô més.”​—Minson mi baôma 17:18-20.

7. Inoñnaga ni Minson mi baôma 17:22, 23, lelaa Paul a bé boñ le nkwel wé u kiha ni ngôñ baemble?

⁷ Añ Minson mi baôma 17:22, 23. Paul a bi kwélés bé bôt ba Atén kiki a bi kwélés Lôk Yuda i ndap bibégés. Paul a bi lama badba le ‘mambe mam bôt ba Atén ba nhémle?’ A bi tibil béñge i mam ma bé kéña bo, a yimbe ki mop ba bé  bégés. Ha nyen Paul a bi noode nyéñ nlôñ u Bibel u u nkiha ni biniigana gwap. Ntoñol Bibel wada a nkal le: “Kiki Paul a bé man Lôk Yuda, a bi yimbe le Lôk Grikia i bé bégés bé Djob li Lôk Yuda ni li bikristen, ndi to hala a bi noode unda bo le i Djob a yé pôdôl bo li ta bé nkén inyu yap.” Hala a ñunda le Paul a bé bebee i héñha ño nkwel inoñnaga ni i bôt a bé boma. A bi kal bôt ba Atén le i mam a bé niiga bo ma bé nlôl yak “Nyambe nu a nyiba bé,” nu ba bé ba noode bégés. To hala kiki bôt ba matén mape ba yi bé Bitilna, Paul a bi somol bé. Ndi a bé tehe ndigi bo kiki matam ma ma yé nhôôlak inyu libumbul, a bé boñ ki le nkwel wé u kiha ni mam ma niñ yap.

8. (a) Lelaa u nla yi i mam bôt ba libôga joñ ba nhémle? (b) Ibale mut a nkal le a yé i ngim base, lelaa u nla timbhe nye?

⁸ Kiki Paul, i ngéda u yé likalô, béñge i gwom bi nkéña we. Yéñ i mam ma nla hôla we i yi kii bôt ba libôga joñ ba nhémle. Lelaa nwet ndap a mbôñgôl ndap yé tole litôa jé? Gwom kiki bo jôl jé, mbot yé tole bieñg gwé, minsonol tole lipodok jé bi nla hôla we i yi base yé. Bebek le nyemede a nkal we le a yé i ngim base. Nsañal nu tôbôtôbô wada le Fluturia a nkal le i ngéda mut a nkal nye le a yé i ngim base a ntimbhe le: “Me nsômbôl bé nyégsa we i jôp i base yem, me nsômbôl ndik le di kwélél ngim jam . . . ”

9. Kii u nla boñ inyu nôgla ni mut base?

⁹ Mimbe minkwel mi nla lémél mut base? Yéñ njel le ni nôgla. I nla ba le a nyi le Djob li yé ndigi jada, a nyi ki le Yésu nyen a bi tohol bôt ba binam, tole bebek a nhémle le di yé dilo di nsôk ni le ndék ngéda i hiai hibe hini hi ntjiba. Ibale u nléba jam bé bo iba ni nhémle, gwélél jo inyu añle nye ñañ nlam i nya i tis nye ñem.

10. Kii di nlama boñ, inyuki?

¹⁰ U hôya bañ le bôt ba nhémle bé mam momasôna ba niiga bo i base yap. Jon to ibale u nyi base i mut, noode yéñ i yi kii a nhémle toi. David nu a yé nsañal nu tôbôtôbô i loñ Ôstrélia a nkal le: “Ngandak bôt i pôdna pék i bôt ba binam ni biniigana bi base.” Donalta nu a yé loñ Albania a nkal le: “Libim li bôt di mboma, ba nkal le ba yé i ngim base, ndi i mbus ngéda ba kal le ba nhémle bé Djob.” Nsañal nu  ntôñ u bi om i loñ Argañtina a nkal le: “Ngim bôt i nkal le i nhémle Trinitas, ndi ba nhémle bé le Isañ, Man ni mbuu mpubi ba yé Djob jada. Hala a nhôla bés i nôgla ni bo ngéda di añle bo ñañ nlam.” Jon di yéñ yi kii bôt ba nhémle toi. Ha nyen di ga “yila mam momasôna inyu mintén mi bôt nwominsôna” kiki Paul.​—1 Korintô 9:19-23.

11. Kiki kaat Minson mi baôma 14:14-17 i ñunda, limbe likeñge Paul a bi gwélél inyu añle bôt ba Listra ñañ nlam?

¹¹ Añ Minson mi baôma 14:14-17. Paul a bé bôdôl nkwel wé inoñnaga ni mam a bé yi le ma nlémél bôt. Kiki hihéga, limut li bôt a bi kwélés i Listra li bé yi bé Bitilna. Jon Paul a bi gwélél i jam ba bé yi inyu kwélés bo. A bi pôdôl libumbul li matam malam ni mane ma niñ. A bi gwélél bibuk ni dihéga di ba bé le ba hoo nok.

12. Lelaa u nla jubus nkwel woñ inoñnaga ni mam ma nkéña bôt ba libôga joñ?

¹² Jubus nkwel woñ inoñnaga ni mam ma nkéña bôt ba libôga joñ. Lelaa u nla yi i yom i nlémél mut ngéda u ntiige nye bebee tole ngéda u yé jôp i ndap yé? Béñge mam ma nkéña we. Bebek a yé bôñgôô mbônji, a yé añ ngim kaat, a yé tibil litôa tole a yé boñ bôlô ipe. Ibale hala a nla bôña, u yé le u gwélél i jam a yé boñ inyu bôdôl nkwel. (Yôhanes 4:7) Mbot mut a héba, i nla yis we njee a yé. I nla hôla we i yi loñ yé, bôlô yé tole hikip hi bol a ngwés. Gustavô a nkal le: “Me bi bôdôl nkwel ni mañge wanda nu 19 nwii, a bé a héba jombe li li bééna fôtô i ntôp tjémbi nu a nlôôha yiba. Me bi bat nye inyuki i mbot i i nlémél nye, ha nyen a bi toñle me inyuki a bé gwés i ntôp tjémbi nu. Nkwel u u bi boñ le a bôdôl nigil Bibel, nano a yé Mbôgi Yéhôva.”

13. Lelaa u nla ti bôt ngôñ i nigil Bibel?

 ¹³ I ngéda u niiga mut Bibel, boñ le a gwés yigil; unda nye lelaa yigil i nla hôla nye. (Yôhanes 4:13-15) Kiki hihéga, sita yada le Poppy a bi jôp ndap i muda wada nu a bi gwés ñañ nlam. Ngéda Poppy a bi tehe lipep mu libap li ndap li li bé unda le i muda nu a bi boñ suklu balét, a nôñôl mu inyu kal nye le yak bés di niiga bôt Bibel i mambai map ni makoda. I muda nu a bi neebe yigil i Bibel, a ke i likoda i kel i bé noñ ha, i mbus ndék ngéda a ke yak i likoda li makiiña. I mbus nwii wada, a sôblana. Badba le: ‘Lelaa me yé me mboñ mapeple mem? Baa me yé le me pôdôl yigil Bibel i nya i nti bôt ngôñ i neebe yigil?’

14. Lelaa u nla tégbaha yigil i Bibel inoñnaga ni ngôñ i hiki mut?

¹⁴ I ngéda u mbôdôl niiga mut Bibel, kôôba hiki ngéda ilole u nke i niiga nye, hoñol niñ yé ni mam ma nlémél nye. I ngéda u nkôôba, pohol minlôñ mi Bibel u ga gwélél, bividéô w’a unda, yak bititii w’a toñol. Badba le: ‘Kii i yé le i lémél nye?’ (Bingéngén 16:23) I loñ i Albania, muda wada nu a bé nigil ni nsañal wada nu ngéda yosôna a bi kal nye le: “Me nla bé me neebe le bawoga ba nla tuge.” Flora a bi nyégsa bé nye i neebe biniigana bi. A nkal le: “Me bi tehe le i mbéda le a yi ndugi i Djob li mbôn bitugne.” Ibôdôl ha ngéda i, Flora a bé pôdôl gwéha i Yéhôva, pék yé, ni lipémba jé hiki kel a bé niiga i muda nu. I mbus ngéda, i muda nu a bi kahal hémle bitugne. Nano a yé Mbôgi Yéhôva.

15. Inoñnaga ni Minson mi baôma 17:16-18, mambe maboñok ma bôt ba Atén ma bi tééñga Paul, ndi inyuki a bi somol bé?

¹⁵ Añ Minson mi baôma 17:16-18. Paul bi tjôô bé bôt ba Atén to hala kiki tison yap i bé nyonok ni bisat, ni malal ma nyega, ni pék i bôt ba binam; a bi nwas bé to le bisol gwap bi tômbôs nye. Paul nyemede a bi yila kristen to hala kiki a bé “mut a ñôbôs jôl li Nyambe i ngéda bisu, mut a ntééñga bôt ba Nyambe, ni mut lipamal.” (1 Timôtéô 1:13) Kiki Yésu a bé nkwoog nkaa le Paul a bé le a gwélél Djob, hala nyen yak Paul a bé nkwoog nkaa le bôt ba Atén ba nla gwélél Djob. I jam li bi tagbe i mbus ngéda li ñunda le a bé toi a kôli bôdôl bo ñem.​—Minson mi baôma 9:13-15; 17:34.

16-17. Kii i ñunda le mintén mi bôt nwominsôna mi nla yila banigil ba Kristô? Ti hihéga.

¹⁶ I hiai hi bisu, mintén mi bôt nwominsôna mi bi yila banigil ba Yésu. I ngéda Paul a bi tilna bikristen bi bé i tison i Grikia ini le Korintô, a bi kal le ngim bôt mu likoda li i bé ndugi bôt ba manola tole bôt ba bééna niñ i nyega. I mbus a kônde le: “Hala nyen bahogi ikété nan ba bé. Ndi ba bi nugus bé.” (1 Korintô 6:9-11) Ibale u ba ha i ngéda i, baa ki u bi hémle le i bôt ba ba bé le ba yila banigil?

¹⁷ I len ini, ngandak bôt i yé bebee i lémés niñ yap inyu yila banigil ba Yésu. Kiki hihéga, i loñ i Ôstrélia nsañal nu tôbôtôbô le Yukina, a bi léba le mintén mi bôt nwominsôna mi nla leege ñañ nlam. Kel yada, a bé i ngim sabe, a tehe muda a bééna matila mu i nyuu yé, a ma bep ki haba. Yukina a  nkal le: “Me bi kon ndugi woñi i tééne nye likalô, i mbus me kahal kwélés nye. Me bi yimbe le a bé lôôha gwés Bibel kayéle mu matila ma bé nye i nyuu, minlôñ mi kaat Tjémbi mi bé mu!” I muda nu, a bi bôdôl nigil Bibel a bôdôl ke makoda. *

18. Inyuki di nlama bé sugus le ngim mut i nla bé leege ñañ nlam?

¹⁸ Kiki Yésu a bi kal le nwom mi yé nhôôlak inyu libumbul, baa a bé sômbôl kal le ngandak bôt y’a yila banigil bé? To jam. Bibel i bi bôk i kal le, ndik ndék bôt yon y’a hémle nye. (Yôhanes 12:37, 38) Yésu a bééna ngap i yi mahoñol ma bôt. (Matéô 9:4) Tolakii a bi lôôha ti ngéda yé inyu hôla i bet ba bi hémle, a bi añle bôt bobasôna ñañ nlam ni makénd. Bôô ni ngélé yañen ni bés ba di nla bé yi mahoñol ma bôt, di kéés bañ bôt ba libôga jés! Ndi di tehe bo kiki bôt ba nla yila banigil. Marc, nsañal nu ntôñ u bi om i Burkina Fasô, a nkal le: “I bôt me nhoñol le ba nla yila bagwélél ba Djob ba mbéna téé yigil. Ndi i bôt me nhoñol le ba nlôôs me ngéda, bon ba nhol loñge. Jon me bi sôk nok le, di nlama nwas le mbuu u Yéhôva won u éga bés.”

19. Lelaa di nlama tehe bôt ba libôga jés?

¹⁹ I bibôdle, u yé le u hoñol le bôt ba ba yé kiki matam ma nhôlôl ba ta bé ngandak mu libôga joñ. Ndi, bigda i jam Yésu a bi kal banigil bé. Nwom mi yé nhôôlak, hala wee mi yé bebee i bumblana. Bôt ba nla héñha, ba yila ki banigil ba Kristô. Yéhôva a ntehe i bôt ba nla yila banigil kiki “tik gwom.” (Hagai 2:7) Ibale di ntehe bôt kiki Yéhôva bo Yésu ba ntehe bo, di ga yéñ yi niñ yap ni i mam ma nlémél bo. Di ga tehe bé bo kiki bakén ba bôt, ndi kiki bôt ba nla yila lôk kéé yés i bôda ni i bôlôm.