1. Kii i nkônha toi bés maséé?

 YÉHÔVA a nsômbôl le di ba maséé. Kii i nyis bés hala? I jam li nyis bés hala li yé le maséé ma yé mu litam li mbuu. (Galatia 5:22) Di nyi le ti i nlona maséé iloo kôhna, jon ngeñ di nti ngéda yés yosôna likalô ni i hôla lôk kéé yés, hala a nkônha toi bés maséé.​—Minson mi baôma 20:35.

2-3. (a) Kiki di ntehe i kaat Galatia 6:4, kii i nla hôla bés i ba maséé mu nson wés? (b) Kii di ga tehe munu yigil ini?

² I kaat Galatia 6:4, ñôma Paul a mpôdôl mam ima ma ma nla boñ le di ba maséé. (Añ.) Pog, di nlama gwélél Yéhôva ni ñem wés wonsôna. Di ba maséé ibale hala nyen di mboñ. (Matéô 22:36-38) Iba, di nlama bé hégha nson wés ni u bôt bape. To di yé mbôô to di ta bé, to di gwé makeñge to di gwé bé, di nlama ti Yéhôva mayéga inyu nson wés. Mam momasôna di gwé, Yéhôva nyen a bi ti bés mo. Ndi ibale ngim lôk kéé i nyi boñ ngim mam i nson u Yéhôva iloo bés, di nlama kon maséé le ba ngwélél yi yap inyu bégés Yéhôva, he bé inyu nene tole inyu nseñ wap. Di ke bañ i pémsan ni bo, di nigle ndigi bo.

³ Munu yigil ini, di ga tehe kii i yé le i hôla bés ibale di nla ha bé sal nson wés kiki di bé sal wo behee. Di ga  tehe ki lelaa di nla tibil gwélél ngap di gwé, ni biniigana di nla ôt mu ndémbél i bôt bape.

4. Kii i nla tômbôs bés? Ti hihéga.

⁴ Bagwélél ba Yéhôva bahogi ba nok bé le kon tole biuni bi nla ha bé nwas bo le ba sal kiki ba bé sal behee. I jam li jon li bi pémél Carol. A bi sal makoda het ngôñ i bé ngandak. Mu i ngéda i, a bi niiga 35 bôt Bibel, a hôla ngandak yap i ti Yéhôva niñ yap ni i sôblana. Nson wé u bé num matam! I mbus ngéda, a bi kwo kon, bebee le ngéda yé yosôna a bé lôôs yo i ndap. Carol a nkal le: “Me nyi le kon wem u nwas bé me le me sal kiki bana bôt bape, ndi me ntehe ndik wee me ngwélél bé Yéhôva kiki bo, me gwé ngôñ i sal kiki ini lôk kéé ipe, ndi me nla bé. Hala a nlôôha tééñga me.” Carol a nsômbôl gwélél Yéhôva ni ñem wé wonsôna. Hala a yé loñge ngandak! Di nyi le Yéhôva a nkônôl nye maséé.

5. (a) Ibale di nla ha bé sal kiki di bé sal behee, kii di nlama bigda? (b) Kiki di ntehe mu titii, kii i ñunda le mankéé a nsélél Yéhôva ni ñem wonsôna?

⁵ Ibale u nla ha bé sal kiki u bé sal behee, badba le: ‘Kii Yéhôva a nsômbôl le me boñ?’ Yéhôva a nsômbôl ndik le u sélél nye ni ñem woñ wonsôna. Di yoñ le hihéga: Di hégda le sita yada i gwé 80 ma nwii, a nla ha bé sal kiki a bé sal i ngéda a bééna 40 ma nwii, jon hala a ntééñga nye. A nsal ni ñem wé wonsôna, ndi a nhoñol le a nlémél bé Yéhôva. Ndi baa mbale i? Ibale a ngwélél Yéhôva ni ñem wé wonsôna nano nu a gwé 80 ma nwii, kiki a bé gwélél nye ni ñem wé wonsôna i ngéda a bééna 40 ma nwii, wee a ngi kenek ni bisu i gwélél Yéhôva ni ñem wé wonsôna. Ibale di nhoñol le nson di nsélél Yéhôva u kôli bé, di hôiga bañ le Yéhôva nyen a nkal bés too nson di nsélél nye u kôli too u kôli bé. Ibale di nsélél Yéhôva ni ñem wonsôna, a nkônôl bés maséé!​—Hégha ni Matéô 25:20-23.

6. Kii ndémbél i Maria i niiga bés?

⁶ Ibale di nhéléé bé i mbéñge i mam di nla bé boñ, di boñ kii yosôna di nla boñ, ha nyen di ga ba maséé. Di yoñ ndémbél i sita yada le Maria nu a bi kwo kon, a la ha bé sal i likalô kiki a bé sal behee. I jam li, li bi bôk li tômbôs nye ngandak, a kahal hoñol le a ta bé nseñ. I mbus ngéda, a bi hoñol sita yada mu likoda jé, i i bé i niñi i nañ kon, a yoñ makidik le a nhôla nye. Maria a nkal le: “Me bi nôgla ni nye le di mba di ñañal ñañ nlam ni téléfôn, di tilga bikaat. Hiki ngéda me bé sal ni nye, me bé me huu i ndap me bak maséé inyule me nhôla nye.” Yak bés ibale di nhéléé bé i béñge mam di nla bé boñ, di boñ ma di nla boñ, di ga ba maséé. Ndi kii di nla boñ ibale di nsal iloo ini lôk kéé ipe tole di gwé makeñge iloo bo?

7. Mambe maéba ñôma Pétrô a bi ti lôk kéé?

⁷ Ikété kaat i bisu ñôma Pétrô a bi tila, a bi kal lôk kéé le ba gwélél makébla ba bi kôs inyu lédés likoda. A bi kal le: “Inoñnaga ni kiki hiki mut a nkôhna likébla, ni bôñôl jo inyu gwéélana  bé ni bé kiki biloñge bi bokindak bi konangoo i mbuma ñañ i Nyambe.” (1 Pétrô 4:10) Di kon bañ woñi i boñ i jam di nyi boñ ni ñem wés wonsôna inyule di nhoñol le lôk kéé i ga kil bés jôñ tole hala a ga tômbôs bo. Ibale di mboñ hala wee di ngwélél bé Yéhôva ni ñem wés wonsôna.

8. Inoñnaga ni 1 Korintô 4:6, 7, inyuki di nlama bé kadba?

⁸ Di nlama boñ i jam di nyi boñ ni ñem wés wonsôna, ndi di kadba bañ. (Añ 1 Korintô 4:6, 7.) Kiki hihéga, bebek le di nhoo bôdôl gwigil bi Bibel, di kon bañ woñi i gwélél likébla li, ndi di nlama bé kadba. Hégda le u ntip kwel ni mut likalô, u bôdôl yak yigil bi Bibel, u gwé ngôñ i añle lôk kéé i jam li. Ndi u nkoba le sita yada i yé i añle lôk kéé le a nti ngim mut kaat, we u mbôdôl yigil, ndi nye a nti kaat. W’a boñ lelaa? To hala kiki u nyi le ibale u ñañle lôk kéé i jam u mboñ, li yé le li lédés bo, u yé le u nwas le i mankéé a nti kaat a añle lôk kéé i jam a mboñ inyu boñ le a hoñol bañ le u nsal iloo nye. Ibale u mboñ hala, wee u mboñ loñge ngandak. Ndi, u kon bañ woñi i bôdôl gwigil bi Bibel. Ibale u nyi boñ jam, boñ jo!

9. Lelaa di nlama gwélél likébla di bi kôs?

⁹ Di hôya bañ le makébla di gwé Nyambe nyen a bi ti bés mo. Di nlama gwélél mo inyu lédés lôk kéé he bé inyu nene. (Filipi 2:4) Ibale di ngwélél likébla Yéhôva a bi ti bés ni ñem wés wonsôna, di ga ba maséé he bé inyule di nlel lôk kéé yés, ndi inyule di ngwélél likébla li inyu bégés Yéhôva.

10. Inyuki di nlama bé jôp i pémsan ni bôt bape?

¹⁰ Ibale di nyoñ bé yihe di kahal hégha i mam di nyi boñ ni ma lôk kéé yés i nyi bé boñ. Kiki hihéga, bebek ngim mankéé i nyi ti minkwel, a nla kahal yan mankéé numpe nu a nyi bé ti minkwel. Ndi bebek le i mankéé nu a nleege lôk kéé i mbai yé, a niiga bon bé loñge, tole a yé likalô hiki ngéda. Di yé maséé i ba ni lôk kéé i bôda ni bôlôm i i ngwélél makébla ba bi kôs inyu bégés Yéhôva ni inyu hôla bôt bape.

11. Inyuki di nlama noode noñ ndémbél i Yésu?

¹¹ Di nlama bé jôp i pémsan ni bôt  bape, ndi di nla ôt biniigana mu i ndémbél i bagwélél ba Yéhôva bape. Di wan le ndémbél i Yésu. Tolakii di ta bé peles kiki Yésu, di nla nigle bilem gwé, di noode ki boñ i mam a bi boñ. (1 Pétrô 2:21) Ibale di mboñ kii yosôna di nla inyu noñ ndémbél i Yésu, di ga kônde lémél Yéhôva, di kônde ki bana likeñge i nson likalô.

12-13. Kii ndémbél i Kiñe David i niiga bés?

¹² Bibel i mpôdôl ngandak bagwélél ba Yéhôva ba ba bé bikwéha bi bôt, ndi di yé le di nigle bo. (Lôk Héber 6:12) Kiki hihéga, Yéhôva a bi sébél Kiñe David le “mut nu a nkônha ñem wem maséé” tole kiki Bibel ipe i nkal “mut kingéda ñem wem.” (Minson mi baôma 13:22) Ndi David a bé bé peles, a bi boñ mam mabe. Ndi to hala di yé le di nigle nye. Inyuki? Inyule i ngéda ba bi unda nye le a mboñ béba a bi pééna bé. A bi emble maéba ba bi nye, a bat ki nwéhél inyu bibéba a bi boñ. Inyu hala nyen Yéhôva a bi nwéhél nye.​—Tjémbi 51:5, 6, 12-14.

¹³ Inyu boñ le di nigle ndémbél i David, di badba le: ‘I ngéda ba nti me maéba me yé me boñ lelaa? Baa me yé me neebe le me nhôs, tole me yé me kahal pééna? Baa me yé me ôm bôt nsohi? Baa me yé me jo sañ le me boñ ha bañ i jam li?’ I ngéda u ñañ miñañ mi bagwélél ba Yéhôva bape mu i Bibel, u nla badba mambadga ma. Baa i ndutu u mboma yon yak bo ba bi boma? Bimbe bilem bilam ba bééna? I ngéda u ñôt pék mu i ndémbél i wada yap, badba le: “Lelaa me nla kônde nigle nye?”

14. Lelaa di nla nigle lôk kéé yés?

¹⁴ Ibale di mbéñge lelaa lôk kéé yés i niñ, mimañ mi bôt ni boñge, di yé le di nigle bo. Kiki hihéga, baa u nyi ngim mankéé mu likoda joñ nu a ntéñbe ni Yéhôva tolakii bisega gwé bi ntinde nye i boñ béba, lihaa jé li nkolba, tole kon u ntééñga nye? Baa i mankéé nu a gwé bilem bilam bi u nsômbôl nigle? Ibale u mbéñge lelaa a niñ, ndémbél yé i yé le i hôla we i nihbe mandutu moñ. Di nti Yéhôva mayéga inyu lôk kéé yés i i yéne bés ndémbél ilam. Hala a nkônha toi bés maséé!​—Lôk Héber 13:7; Yakôbô 1:2, 3.

15. Mambe maéba ma Paul ma nla hôla bés i kon maséé i gwélél Yéhôva?

¹⁵ Inyu boñ le adna ni nsañ bi ba likoda, i mbéda le hiki wada wés a gwélél Yéhôva ni ñem wé wonsôna. Di bigda ndémbél i bikristen bi hiai hi bisu. Ba bééna ngandak makeñge ni ngandak minson. (1 Korintô 12:4, 7-11) Ndi hala a bi lona bé pémsan to mbagla. Paul a bi kal bo le, hiki wada wap a nlama sal “inyu mahol ma nyuu Kristô.” Paul a bi kal lôk kéé i Éfésô le: “I ngéda hiki jô i nsal loñge, hala a nhôla nyuu i hôlôl, mu kiki i nhol ikété gwéha.” (Éfésô 4:1-3, 11, 12, 16) I bôt ba bé boñ hala, ba bé boñ le adna ni nsañ bi ba ikété likoda. Hala nyen i yé yak i len ini i makoda.

16. Kii di nlama boñ? (Lôk Héber 6:10)

¹⁶ U ke bañ i pémsan ni bôt bape. Noode ndik nigle Yésu, nigle bagwélél ba Yéhôva ba ngéda kôba ni ba ngéda yés. Kee ni bisu i gwélél Yéhôva ni ñem woñ wonsôna. U hôya bañ le Yéhôva “a ta bé mut a téé bé sép le a hôya nson woñ.” (Añ Lôk Héber 6:10.) Kee ni bisu i gwélél Yéhôva ni maséé, yi le a yé maséé i ngéda a ntehe we u ngwélél nye ni ñem woñ wonsôna.