1. Inyuki di ntimbhe i makoda?

 INYUKI di nke makoda? Pog, inyu bégés Yéhôva. (Tjémbi 26:12; 111:1) Iba, di nke makoda inyu tina makénd bés ni bés munu mangéda mabe mana. (1 Tésalônika 5:11) Ngéda di ntimbhe likoda, wee di nyônôs i mam mana mo ima.

2. Imbe ngéda di nla timbhe i makoda?

² Hiki sonde, di gwé pôla i timbhe i makoda. Kiki hihéga, mamélél ma sonde, di ntimbhe i yigil i Nkum Ntat. Likoda li ñem sonde, di nla timbhe i Tik ngok i mbuu, i yigil Bibel i likoda, ni minkwel mimpe i het ba mbat mambadga.

3. Imbe ndutu di nla boma inyu timbhe makoda, lelaa kaat Lôk Héber 10:24, 25 i nla hôla bés?

³ Bésbobasôna di gwé ngôñ i bégés Yéhôva ni i ti lôk kéé yés makénd. Ndi mam ima ma nla kéñ bés i yoñ ngaba i makoda: (1) Di nla kon woñi i timbhe. (2) Di nla bana ngôñ i timbhe ngandak ngélé, ndi ba ti bé bés hop kiki di nsômbôl. Lelaa di nla yémbél mandutu ma? Di nléba ndimbhe i kaat ñôma Paul a tilna Lôk Héber i ngéda a bé pôdôl nseñ i ke makoda, a bi kal  le di nlama “tina makénd bés ni bés.” (Añ Lôk Héber 10:24, 25.) I ngéda u nôgda le u nti bôt bape makénd ngeñ u mpahal hémle yoñ, hala a ga boñ le u kon ha bañ woñi i timbhe. Ibale ba nti bé bés pôla i timbhe ngandak ngélé kiki di nsômblak, di nla kon maséé le lôk kéé ipe i ntimbhe.​—1 Pétrô 3:8.

4. Mambe mam maa di ga tehe munu yigil ini?

⁴ Munu yigil ini, di ga tehe lelaa di nla tina makénd bés ni bés ngéda di yé i man likoda i het ndék bôt yon i ntimbhe. Mbus, di ga wan lelaa di nla tina makénd bés ni bés ngéda di yé i soso tole i mbôm likoda i het ngandak bôt i ntéé dinoo. Mamélél, di ga tehe lelaa di nla kôôba i yom d’a kal kayéle i ti bôt bape makénd.

5. Lelaa di nla tina makénd bés ni bés i ngéda di ta bé ngandak?

⁵ I man likoda tole i man juu li batéé likalô, i bet ba nla timbhe ba ta bé ngandak. Ngim mangéda, i mankéé a ñéga yigil a nlama bem ndék inyu boñ le bôt ba téé dinoo. I jam li li nla boñ le likoda li ba nwee, li kihak bôt ’ilo, li ntina bé to makénd. Kii u nla boñ? Ba bebee i téé hinoo ngandak ngélé. Hala a nla ti bôt bape makénd i bana lem i téé hinoo.

6-7. Kii u nla boñ inyu boñ le u nlôôha bañ kon woñi i timbhe makoda?

⁶ Kii u nla boñ ibale libak li nsut li mboñ le u nkon woñi i timbhe makoda? Ngandak bôt ikété yés i nôgda i jam li. Inyu ti lôk kéé i bôda ni i bôlôm makénd i makoda, di noode wan ngim manjel ma ma mboñ le di kon bañ woñi ngandak i timbhe. Mambe?

⁷ U nla béñge maéba ba bi ti i ba Nkum Ntat. b Kiki hihéga, tibil kôôba. (Bingéngén 21:5) Ngéda u ntibil kôôba, hala a ga ba jam li ntomb i timbhe. Ti ki bon ba mandimbhe. (Bingéngén 15:23; 17:27) Bon ba mandimbhe ba mboñ we le u nlôôha bañ kon woñi. Lôk kéé i mpala ki nok mandimbhe ma yé sem kwep iloo minténdéé mi mandimbhe. Ngéda ndimbhe yoñ i yé sem kwep, u gwéélak bibuk gwoñ, hala a ñunda le u ntibil kôôba, u nok ki biniigana bi loñge.

8. Lelaa Yéhôva a ntehe biliya di mboñ ni ñem wés wonsôna?

⁸ Ibale i mpam le u mboñ biliya inyu noñ maéba mana, ndi to hala u ngi konok woñi i timbhe to ngélé iba tole iloo ha, kii u nlama boñ? Ba nkwoog nkaa le Yéhôva a ndiihe biliya u mboñ ni ñem woñ wonsôna. (Lukas 21:1-4) I boñ kii yosôna u nla, hala a nkobla bé le u boñ jam li nloo we ngui. (Filipi 4:5) Pohol kii u nla boñ, u tehe lelaa u nla yônôs yo, u soohe ki inyu bana ñem nwee. Kiki hihéga, u nla pohol le u nti mandimbhe ma yé sem kwep.

9. Imbe ndutu ipe di nla boma i mbôm likoda?

⁹ Ibale likoda joñ li gwé ngandak batéé likalô, u nla boma ndutu ipe.  Bebek le ngandak lôk kéé i bôlôm ni i bôda i ntéé dinoo, kayéle ba ntehe bé hinoo hioñ. Kiki hihéga, sita yada le Danielle, a ngwés a ntimbhe ngandak i makoda. c Inyu yé, hala a yé bibégés a nti Nyambe, ngim njel inyu lédés lôk kéé yé ni hémle yé. Ndi i ngéda a bi nyodi a ke i mbôm likoda, ba bé ti ndik nye hop ndék, ngim mangéda ba bé ti bé nye hop hes! A nkal le: “Hala a bi lôôha tééñga me, i bé ndik wengoñle me bé nimis ngim nsima. Ibale hala a mbôña ngandak ngélé, u nla bôdôl hoñol le ba nkôôba i boñ hala.”

10. Ibale i ta bé jam li ntomb le ba pohol we i ngéda u ntéé hinoo, kii u nla boñ?

¹⁰ Baa u ma boma nlélém ndutu kiki Danielle? Ibale hala, u nla hoñol le nseñ u ta ha bé le u téé hinoo, u ñemble ndik joñ likoda. Ndi soho, u waa bañ téé hinoo. Kii u nla boñ? Hiki ngéda u nke likoda, u nla kôôba ngandak mandimbhe. Ibale ba mpohol bé we i bibôdle bi yigil, kee ni bisu i téé hinoo, bebek njee a nyi, ba ga pohol we ilole likoda li mal. Ngéda u nkôôba Nkum Ntat, u nlama tehe maada ma yé ipôla hiki liben ni ño nkwel u yigil. Bebek ni njel i, w’a bana pôla i ti loñge ndimbhe. U nla ki kôôba i timbhe maben ma gwé njip biniigana i i nlet i toñol. (1 Korintô 2:10) Inyuki? Inyule ndék bôt yon i yé i téé hinoo ha ngéda i. Ibale u noñ maéba ma, ndi to hala i mbus ngandak makoda, u bana bé pôla i timbhe, kii u nlama boñ? Ilole likoda li mbôdôl, u nla tehe mankéé a ñéga yigil, u kal nye i mbadga u ngwés timbhe.

11. Kii kaat Filipi 2:4 i nti bés makénd i boñ?

¹¹ Añ Filipi 2:4. Mbuu mpubi u bi hôla ñôma Paul i kal bikristen le, ba tôñ ndik bañ ni bomede, ndi ba tôñ yak inyu bôt bape. Lelaa di nla noñ maéba ma ngéda di yé makoda? Di hôya bañ le yak bôt bape ba gwé ngôñ i timbhe kiki bés.

12. Imbe loñge njel di nla gwélél inyu ti lôk kéé ipe makénd i makoda?

 ¹² Inyu tibil nok i jam li, di yoñ le hihéga hini. Ngéda u nkwel ni mawanda moñ, baa wetama nyen u nsop hop? Heni. U ngwés le yak bo ba pot. Ibale u mboñ bé hala, ba nla hoñol le u gwé bé ngéda yap. Nlélém jam inyu makoda, di gwé ngôñ le ngandak bôt i timbhe. Jon njel yada di gwé inyu ti lôk kéé yés i bôda ni i bôlôm makénd, i yé le di ti bo pôla i pahal hémle yap. (1 Korintô 10:24) Di tehe lelaa hala a nla bôña.

13. Kii di nla boñ inyu ti ngandak bôt pôla i timbhe?

¹³ Jam jada di nla boñ li yé le di bana lem i ti mandimbhe ma yé sem kwep, hala a nti yak bôt bape pôla i timbhe. Mimañ ni minhôôlak mi batéé likalô ba nlama ti ndémbél mu jam li. Yak i ngéda u nti mandimbhe ma sem kwep, u pôdôl bañ mam momasôna. Ibale u mpôdôl mam momasôna, bañga jam a ga ba ha bé inyu bôt bape. Kiki hihéga, munu liben lini, di mpôdôl mam ima: Pog, di bana lem i ti mandimbhe ma sem kwep. Iba, di pôdôl bañ mam momasôna ma yé mu liben. Inyuki u ta bé le u pôdôl ndigi jam jada ngeñ ba nti we hop?

14. Kii i nla hôla bés i yi ngélé yañen di téé dinoo?

¹⁴ Yoñ yihe ngéda u nsômbôl pohol ngélé yañen u nsômbôl timbhe. Inyule ibale u ntéé hinoo hiki ngéda, w’a nyégsa nkena yigil i téé we ngandak ngélé, ki le bana bape ba yé ngi pot. Hala a yé le a boñ le ba waa téé dinoo.​—Ñañal 3:7.

15. (a) Kii di nlama boñ ibale ba ntéé bé bés inyu timbhe? (b) Lelaa i bet ba ñéga yigil ba nla unda le ba ntôñ bôt bobasôna? (Béñge minkéñék mi matila ni ño le “ Ibale we nyen u nkena yigil.”)

¹⁵ Ngéda ngandak lôk kéé i ntéé  dinoo, i nla pam le di timbhe bé kiki di ngwéhék. Ngim mangéda i nla pam le nkena yigil a ti bé bés hop to ngélé yada. Hala a nla tééñga bés ngandak, ndi soho di unup bañ.​—Ñañal 7:9.

16. Lelaa di nla ti lôk kéé i i ntimbhe, makénd?

¹⁶ Ibale u nla bé timbhe kiki u gwéhék, inyuki u nla bé tibil emble mandimbhe ma lôk kéé ipe inyu bégés bo mamélél ma likoda? I nla pam le bibégés bi bi nlédés lôk kéé i bôlôm ni i bôda kiki mandimbhe moñ ma bak le ma boñ. (Bingéngén 10:21) I bégés bôt bape i yé njel ipe di nla gwélél inyu tina makénd bés ni bés.

17. (a) Lelaa bagwal ba nla hôla bon bap i kôôba mandimbhe ma nkiha ni nwii nwap ? (b) Inoñnaga ni vidéô ba nti, mambe mam ma-na di nlama boñ inyu kôôba ndimbhe yés?

¹⁷ Kii ipe di nla boñ inyu tina makénd i makoda? Ibale u yé ngwal, hôla bon boñ i kôôba mandimbhe ma ma kôli ni nwii nwap. (Matéô 21:16) Ngim mangéda, yigil i yé i pôdôl mam kiki bo mandutu babiina ba mboma, tole biliya bikristen bi nlama boñ inyu ke haa ni malal ma nyega, ndi to hala liben jada tole ima ma nla ti boñge pôla i timbhe. Hôla bon boñ i nok inyuki, ba  nlama bé bem le ba ti bo hop hiki ngéda ba ntéé hinoo. Nkwel u u ga boñ le ba unup bañ ibale ba ntéé hinoo ndi ba pohol bé bo, ba pohlak ndigi bôt bape.​—1 Timôtéô 6:18. d

18. Kii di nla boñ inyu boñ le i nene bañ wee di nkadba i ngéda di ntimbhe? (Bingéngén 27:2)

¹⁸ Bésbobasôna di nla kôôba mandimbhe malam ma ma nti Yéhôva lipém, ma lédhak lôk kéé yés. (Bingéngén 25:11) Tolakii i nla pam ngim mangéda le di pôdôl ngim jam i bi pémél bés, di nlama yoñ matat le di nlôôha bañ pôdôl bésbomede. (Añ Bingéngén 27:2; 2 Korintô 10:18) Maselna ni hala, di bana lem i pôdôl Yéhôva, Bañga yé, ni ntôñ wé. (Masoola 4:11) Ndi hala a nsôñga bé le, ibale mbadga i nti bés makénd i ti mahoñol més, di boñ hala. Kiki hihéga, mbadga i liben li nsôk li yigil ini i ga ti bés i pôla i.

19. (a) Mam ma yé ma sôk lelaa i ngéda di ntôñ bôt bobasôna ba yé likoda? (Rôma 1:11, 12) (b) Lelaa we u ntehe i pôla di gwé i timbhe makoda?

¹⁹ Tolakii mambén ma ta bé inyu mandimbhe di nla ti makoda, bésbobasôna di nla boñ biliya i ti mandimbhe ma ma ntina makénd. Hala a nkobla ngim mangéda le di timbhe bé ngandak, tole di ba maséé i tehe le lôk kéé ipe i mbana nsima i timbhe. Ibale njômbi yés i bisu i yé le, di tôñ bôt bape makoda, hiki wada wés a ga ba maséé i ‘lédés hémle i nuu numpe.’​—Añ Rôma 1:11, 12.