1-2. Kii di nlama boñ mu kiki di mbem mbok yondo?

 DI NLÔÔHA gwés i mbônga u Yéhôva unu le, a ga héñha i béba nkoñ ’isi ini ni mbok yondo, i het telepsép i ga ba. (2 Pétrô 3:13) Tolakii, di nyi bé imbe ngéda mbok yondo i ga loo, i mam ma mbôña len ma ñunda le i ta ha bé haa.​—Matéô 24:32-34, 36; Minson mi baôma 1:7.

² To di ma nom ikété ntôñ tole di ntip sôblana, bésbobasôna di nlama lédés hémle yés mu ngéda i ngi yii. Inyuki? Inyule yak hémle i ngui i nla tomb. Ñ, ñôma Paul a bi sébél ngitophémle le “béba i i mpala gwel bés i hiandi.” (Lôk Héber 12:1) Inyu boñ le hémle yés i tomb bañ, di nlama bana lem i nigil i mam ma nkwés bés nkaa le ndék ngéda wee mbok yondo i nlo.​—Lôk Héber 11:1.

3. Kii di ga tehe munu yigil ini?

³ Munu yigil ini di ga tehe manjel maa di nla gwélél inyu lédés hémle mu mbônga u mbok yondo Yéhôva a bi bôn bés: (1) Di ôt pék mu binoñ, (2) di ôt pék mu ngui i Yéhôva, (3) di nyoñ ngaba i mam ma mbuu. I mbus di ga tehe lelaa nwin Yéhôva a bi legel bés ni njel mpôdôl Habakuk, u nlédés hémle yés i len ini. Di bôk ndugi di tehe ngim mandutu tole manoodana ma ma mbat le di ba nkwoog nkaa le mbok yondo i ga loo.

 MANDUTU MA MA MBAT LE DI BANA HÉMLE NGUI

4. Mambe makidik ma mbat bés hémle ngui?

⁴ Hiki kel di nyoñ makidik ma ma mbat le di bana hémle ngui. Kiki hihéga, di nlama pohol i bôt bés ni bo di nhiôm, mintuk nwés, imbe suklu di ga boñ, njee di ga bii, baa di ga bana bon, ni i bôlô di ga sal. Di nlama badba le, ‘Baa makidik me nyoñ mu mam ma, ma ñunda toi le me yé nkwoog nkaa le nkoñ ’isi unu u yé bebee ni mal ni le di yé bebee i jôp i mbok yondo? Tole maselna ni hala, baa yak me me nhoñol kiki bana bôt bape le, nseñ di tuk niñ nano inyule yani di ga wo, hala a mal?’ (Matéô 6:19, 20; Lukas 12:16-21) Ibale di mboñ biliya bi ngui inyu unda le di nhémle toi le mbok yondo i yé bebee, di ga yoñ makidik malam.

5-6. Inyuki di nlama bana hémle ngui munu mangéda mabe mana? Ti hihéga.

⁵ Di mboma mandutu ma ma mbat le di bana hémle ngui. I nla ba le di mboma ndééñga, le di gwé ngim kon i i mal bé tole mandutu mape ma ma yé le ma tômbôs bés. I nla pam le di nôgda le di nla yémbél mandutu més. Ndi ibale mandutu ma ma mal bé, i ga béda bés hémle ngui inyu boñ le di hônba mo, ni inyu ke ni bisu i gwélél Yéhôva lôñni maséé.​—Rôma 12:12; 1 Pétrô 1:6, 7.

⁶ I ngéda mandutu ma yé bés i nayak, di nla nôgda wee i mbok yondo Yéhôva a bi bôn bés i ga lo bé. Baa hala a nkobla le hémle yés i ntomb? Heeni. Di nyoñ hihéga inyu nok i jam li. I ngéda mbéñ i nai, di nla hoñol wee sép y’a ye bé. Ndi ngéda sép i yé i sôk i kola. I nlélém ni mandutu més, i ngéda mandutu ma tômbôs bés, di nla nôgda wee mbok yondo i ga lo bé. Ibale di gwé hémle i ngui, di nyi le ibabé nkaa mimbônga mi Nyambe mi ga yon. (Tjémbi 94:3, 14, 15; Lôk Héber 6:17-19) I bôdôl i, i ga hôla bés i ke ni bisu i bii bibégés di nti Yéhôva kiki jam li bisu i niñ yés.

7. Mambe mahoñol di nlama bé bana?

⁷ Kiki di gwé ngôñ ni hémle ngui inyu yémbél mandutu, hala nyen di gwé ki ngôñ ni hémle ngui inyu téé likalô. Ngandak bôt di mboma likalô i nhoñol le “ñañ nlam” u mbok yondo di ñañle bo u yé ndigi eem. (Matéô 24:14; Ézékiel 33:32) Di neebe bañ kekikel le i pééna ba gwé i yoña bés. Inyu hala nyen di nlama ke ni bisu i lédés hémle yés. Di tehe manjel maa di nla gwélél inyu pam i boñ hala.

DI ÔT PÉK MU BINOÑ

8-9. Lelaa i yoñ ngéda i ôt pék mu binoñ, i nlédés hémle yés?

⁸ Njel yada di nla gwélél inyu lédés hémle yés, i yé le di ôt pék mu binoñ. Binoñ bi nkwés bés nkaa le mimbônga mi Nyambe mi ga yon. I ngéda di ntibil ôt pék mu njom i bi tinde Yéhôva i ti binoñ, ni i yom hala a nkobla, di nlédés hémle yés le mbônga u Nyambe i mbok yondo u ga yon. Inyuki di nkal hala?

⁹ Kii i yé binoñ? Yéhôva a bi om mpom wé man, nu a ngwés ngandak, liwanda jé, le a gwéé hana hisi kiki mut binam nu a yé peles. I ngéda Yésu a bé hana ’isi, a bi hônba mintén mi mandutu nwominsôna. I mbus, a bi son njonok a wo béba nyemb. Kinje ndamba ikeñi Yéhôva a bi saa! Nyambe wés nugwéha a bé bé le a neebe le Man wé a son njonok, a  wo ki inyu ti bés niñ nlam inyu ndék ngéda ndigi. (Yôhanes 3:16; 1 Pétrô 1:18, 19) Kiki a bi ti niñ i tik yé Man, Yéhôva a ga yoñ bitelbene le di niñ i boga ni boga i mbok yondo ibabé set.

DI ÔT PÉK MU NGUI I YÉHÔVA

10. Inoñnaga ni Éfésô 3:20, kii Yéhôva a nla boñ?

¹⁰ Njel i nyônôs iba di nla gwélél inyu lédés hémle yés, i yé le di ôt pék mu ngui i Yéhôva. A gwé ngui i yônôs mimbônga nwé nwominsôna. Maliga ma yé le, mbônga u Nyambe le bôt ba binam ba ga niñ boga ni boga i mbok yondo i nla nene bés wee u ga yon bé. Ndi ngélé bisu bé i le Yéhôva a mbôn bôt ba binam mam ma ma yé le bomede ba nla bé yônôs. Di nhôya bañ le a yé Nyambe nu ngui yosôna. (Hiôb 42:2; Markô 10:27) Jon hala a nhélés bé bés i tehe nye a mbôn bés bihélha bi mam.​—Añ Éfésô 3:20.

11. Ti hihéga hi mbônga wada Nyambe a bi yônôs. (Béñge minkéñék mi matila le “ Mimbônga mi hélha Nyambe a bi yônôs.”)

¹¹ Di tehe ngim mam Yéhôva a bi bôn bagwélél bé ba ngéda kôba, ma bôt ba binam ba bé hoñlak le i nla bé yon. A bi kal Abraham bo Sara le ba bana man biuni gwap. (Bibôdle 17:15-17) A kal ki Abraham le a ga ti mbôda yé hisi hi Kanaan. Mu ntandaa ngéda u wonsôna, bon ba Abraham le Lôk Israel i bé minkôm Égiptô, a bé ndigi wengoñle mbônga u Yéhôva u ga yon bé kekikel. Ndi u bi sôk u nyon. I mbus ngéda, Yéhôva a bi legel le i mañ muda unu le Élisabet w’a bana man. A kal yak Maria nu a bé ngi yi bôlôm le a gwal Man Nyambe nu Yéhôva a bi bôn le a’ loo, dikôô di nwii i bisu bi ngéda i wom Éden, yak i mbônga u u bi yon!​—Bibôdle 3:15.

12. Kii minlôñ mi bikaat mini le Yôsua 23:14 ni Yésaya 55:10, 11 mi niiga bés inyu ngui i Yéhôva?

¹² I ngéda di ntehe mimbônga nwominsôna Yéhôva a bi yônôs i ngéda kôba, hala a nkwés bés nkaa le a gwé ngui, ni le a ga yônôs yak mbônga u mbok yondo. (Añ Yôsua 23:14; Yésaya 55:10, 11.) Hala a nhôla yak bés i yi kii di kal inyu hôla bôt bape i nok le mbônga u mbok yondo u ta bé eem, to digaana. Yéhôva nyemede a nkal inyu mbônga wé i nlona ngii yondo ni hisi yondo le: “Bibañga bini bi yé maliga, bi yé ki ntiik.”​—Masoola 21:1, 5.

DI BANA NGANDAK MAM I BOÑ I NSON I NWET

13. Lelaa makoda ma nla lédés hémle yés? Toñol.

¹³ Njel i nyônôs aa di nla gwélél inyu lédés hémle yés i yé le di bana ngandak mam i boñ i nson Nwet. Kiki hihéga, di tehe nseñ di ñôt i ngéda di ntôl bé makoda més. Sita Anna, nu a ntégabaha ngandak nwii i nson u nsañal a nkal le: “Makoda ma nhôla me i bana hémle i ngui. Yak i ngéda i nwet a niiga a yi bé ti nkwel tole a nkal bé yom i tôbôtôbô, me nléba ndigi ngim yom i i nkônde hôla me i tibil nok Bibel, tole i i nlédés hémle yem.” b Yak mandimbhe ma lôk kéé i bôda ni i bôlôm ma nlédés hémle yés.​—Rôma 1:11, 12; 10:17.

14. Lelaa nson likalô u nlédés hémle yés?

¹⁴ Di nlédés ki hémle yés i ngéda di nyoñ ngaba i nson likalô. (Lôk Héber 10:23) Sita Barbara, nu a ngwélél  Yéhôva nano a yé 70 ma nwii, a nkal le: “Me nléba le nson likalô u nlédés hémle yem. Kiki me ntégbaha ngéda i kwélés bôt bape mimbônga mi hélha mi Yéhôva, hala nyen hémle yem i nkônde let, let ni let.”

15. Lelaa yigil yoñ wemede i nlédés hémle yoñ? (Béñge yak bititii.)

¹⁵ Di tehe jam lipe li li nla lédés hémle yés: yigil yés bésbomede. Susana a nkal le a ngwés a ntéé mangéda a ga nigil, ni i yom a ga nigil. A nkal le: “I kel sonde, me yé me ngwés me nigil yigil i Nkum Ntat i sonde i nlo. Me nkôôba likoda li ñem sonde i ngwa njañgumba ni i ngwa um. Dini dilo dipe, me mboñ yigil yem memede.” Kiki Susana a mboñ biliya i noñ ntjega wé, hala nyen a mpam i lédés hémle yé. Irène, nu a nsal i hikuu hikeñi nano a yé ngandak nwii, a nôgda le i nigil mbañ i Bibel i nlédés hémle yé. A nkal le: “Hala a nhélés me i ngéda me ntehe le mbañ i Bibel i nyon letee ni disii di mam.” c

“I GA YON IBABÉ SET”

16. Inyuki i jam Yéhôva a bi kal Habakuk li mbéñge yak bés i len ini? (Lôk Héber 10:36, 37)

¹⁶ Nano a yé ntandaa ngéda le bagwélél ba Yéhôva bahogi ba mbem lisuk li nkoñ ’isi unu. I litehge li bôt ba binam, i nla nene wee mbônga u Nyambe u ntiñha i yon. Yéhôva a sima i jam li i ngéda a bé lédés hémle i mpôdôl Habakuk, a kal le: “Inyule yiinda i gwé ntéak ngéda, i yé bebee ni yon, i ga tembee bé. To ibale i ntiñha, kônde bem yo! Inyule i ga yon ibabé set. I ga tagbe bé ngéda yé!” (Habakuk 2:3) Baa hémle i Habakuk yotama yon Yéhôva a bé sômbôl lédés? Tole baa i yom a kal nye i mbéñge yak  bés i len ini? Ni njel ñôma Paul Yéhôva a gwélél minlélém mi bibuk inyu lédés bikristen, bi bi mbem mbok yondo. (Añ Lôk Héber 10:36, 37.) Ñ, to ibale i nene bés wee kobla yés ntiñha, “i ga yon ibabé set. I ga tagbe bé ngéda yé!”

17. Lelaa sita yada i bi noñ maéba Yéhôva a bi ti Habakuk?

¹⁷ Hala a yé ngandak nwii le ngandak bagwélél ba Yéhôva ba noñ maéba Yéhôva a ti Habakuk le: “Kônde bem.” Kiki hihéga sita Louise, a bi bôdôl gwélél Yéhôva i nwii 1939. A nkal le: “Me bé hoñol le Armagédôn a ga loo ilole me mal collège. Ndi baa wee. Mu nwii mi nwominsôna i yom i nhôla me i yé i añ miñañ mi bôt ba kôba ba ba bi bem le mimbônga mi Yéhôva inyu yap mi yon kiki bo Nôa, Abraham, Yôsep ni bape ki. Hala a nhôla me ni lôk kéé ipe i ba nkwoog nkaa le mbok yondo i yé toi bebee.” Ngandak lôk kéé i i ngwélél Yéhôva i bôdôl behee, i yé nlélém kiñ ni nye!

18. Lelaa i yoñ ngéda i memle bihégél i lédés hémle yés le mbok yondo i ga loo?

¹⁸ Maliga ma yé le, mbok yondo i yé ngi ba. Ndi hoñol bihégél bi nkéña we i len ini kiki bo tjôdôt, biee, binuga ni bôt ba binam bape. Mut to wada a nla bé pééna le i mam ma ma yé toi, tolakii ngim ngéda i bé le, ma bé bé. Ma yé ha i len ini inyule Yéhôva a hek mo. (Bibôdle 1:1, 26, 27) Nyambe wés a mbôn yak le a ga lona mbok yondo. A ga yônôs mbônga u. Ha ngéda i bôt ba ga niñ i boga ni boga, ba bak mbôô. Di nla ba nkwoog nkaa mbok yondo i ga lo i ngéda Yéhôva a bi téé, i nlélém kiki a boñ ni ngiinda i nkéña bés i len ini.​—Yésaya 65:17; Masoola 21:3, 4.

19. Lelaa u nla lédés hémle yoñ?

¹⁹ Mu kiki u bem, gwélél pôla yosôna u nla bana inyu lédés hémle yoñ. Kee ni bisu i ti mayéga inyu binoñ. Yoñ ngéda i ôt pék mu ngui i Yéhôva. U ban-ga ngandak mam i boñ i nson Nwet. Mu kiki u mboñ hala w’a la ba i nsoñgi u “bôt ba nkôhna mimbônga ni njel hémle ni wongut.”​—Lôk Héber 6:11, 12; Rôma 5:5.