1, 2. (a) Lelaa bagwal bahogi ba yé ba nôgda ngéda man wap a mbat sôble? (b) Inyuki ba mbéna bat bakôs sôble ibale ba ma ti bomede nkikip yak Yéhôva? (Béñge titii i bibôdle.)

BAGWAL ba hingonda hiada hi di ga sébél le Maria, ba bé béñge nye a téé ipôla bakôs sôble bape. Ni kiñ ngii, i i nôôga loñge, Maria a timbhe le ñ, i mambadga ima nti nkwel a bi bat. Ndék ngéda mbus ha, a sôblana.

² Bagwal ba Maria ba bé maséé ni ngond yap inyu makidik mé a yoñ i ti nyemede nkikip yak Yéhôva ni ñem wé wonsôna, ni i sôblana. Ndi, ilole a nsôblana, nyañ a bééna ngim mambadga i bé tééñga nye. A bé badba le: ‘Baa Maria a nlôôha ba mañge inyu kôs sôble? Baa a nyi toi le makidik ma a nsômbôl yoñ, ma ta bé jam li minjôha? Baa i yé le i ba nye loñge le a kônde bem ilole a nkôs sôble?’ Mambadga mana mon ngandak bagwal ba gwéha i mbéna badba, ngéda man wap a gwé ngôñ i sôblana. (Ñañal 5:5) Ñ, i ti nyemede nkikip, ni kôs sôble bi yé mam ma nlôôha  ba mahee i niñ i kristen.​—Béñge minkéñék mi matila mini le “ Baa u nti wemede nkikip i boñ sômbôl i Yéhôva?”

3, 4. (a) Lelaa ñôma Pétrô a ñunda nseñ u sôble? (b) Inyuki di nla hégha sôble ni maoñ ma nkuu ma ngéda Nôa?

³ Mu kii a bé kwel inyu sôble, ñôma Pétrô a bi pôdôl maoñ ma nkuu u Nôa: “[Yo ki yon i] ntohol bé hanano kiki ndémbél, hala yé le lisôble.” (Añ 1 Pétrô 3:20, 21.) Nkuu u bé soso ndap i i bé éba ntiik le, Nôa a bé a tiñi i boñ sômbôl i Djob. Nôa a bi yônôs nson Yéhôva a bi ti nye ibabé set. Ñ, minson mi hémle mi bi péyés Nôa ni lihaa jé i Ntida malép. Kii hihéga hini Pétrô a bi ti hi niiga bés?

⁴ Kiki nkuu u bi tibil unda i mbamba le Nôa a bééna hémle, i sôblana bisu bi bôt, i ñunda le mut a gwé hémle. Hala a nkobla le kii? Le nnigil nu, a nti nyemede nkikip i boñ sômbôl i Yéhôva, inyule a nhémle le Kristô a bi tuge. Kiki Nôa, i bôt ba nti bomede nkikip, ba yé bebee i boñ nson Djob a bi ti bo. Kiki Yéhôva a bi péyés Nôa i Ntida malép, hala nyen a’ tohol minsôblege mi bôt mi mi ntéñbe i gwés nye ngéda béba nkoñ isi unu w’a tjiba. (Markô 13:10; Masoola 7:9, 10) Jon i nlôôha ba nseñ le di ti bésbomede nkikip, ni le di kôs sôble. I pot maliga, mut a ntop bé sôblana tole a ntiñha sôblana, a nla nimis niñ boga.

5. Kii di ga wan munu yigil ini?

⁵ Kiki di ntehe le sôble i ta bé jam li minjôha, di nlama wan mambadga mana mo maa: Kii Bibel i niiga inyu lisôble? Mambe mam mut a nlama yônôs ilole a nkôs sôble? Ngéda kristen i niiga, inyuki i nlama boñ le sôble  i ba njômbi i man wé tole i nnigil Bibel numpe?

6, 7. (a) Kii sôble i Yôhanes i bé kobla? (b) Imbe sôble i tôbôtôbô Yôhanes a boñ?

⁶ Lisôble li bisu Bibel i nsima li yé li, Yôhanes Nsôble a bé sôble bôt. (Matéô 3:1-6) I bet ba bé neebe lisôble li Yôhanes, ba bé kôs jo inyu unda le, ba bé tam bibéba gwap kingéda Mbén Môsi. Ndi i yé maliga le, sôble ipe i bi loo i, Yôhanes Nsôble a ba sôblege bôt. Yôhanes a bi bana nsima u tôbôtôbô i sôble Yésu, Man Djob nu a bé peles. (Matéô 3:13-17) Yésu a bééna bé béba yo ki yo, jon a bééna bé ngôñ i tam béba to yada. (1 Pétrô 2:22) Sôble yé i bé yimbne le a bé ti nyemede inyu boñ sômbôl i Djob.​—Lôk Héber 10:7.

⁷ Ngéda Yésu a bé añal ñañ nlam hana isi, yak banigil bé ba bi sôble bôt. (Yôhanes 3:22; 4:1, 2) Nlélém kiki lisôble li Yôhanes, bôt ba bi kôs sôble, ba bé unda le ba bé tam bibéba gwap kingéda Mbén Môsi. Ndi, mbus nyemb ni bitugne bi Yésu, sôble i bi kahal bana ndoñi ipe inyu banigil bé.

8. (a) Imbe oda Yésu a bi ti banigil bé mbus bitugne gwé? (b) Toñol kii i yé sôble inyu kristen.

⁸ I nwii 33 N.Y., Yésu a bi pémél iloo 500 i bôt, bôlôm ni bôda, bebek yak boñge mbus bitugne gwé. Bebek le ha ngéda i nyen a kal le: “Jon kenana, yilhana biloñ gwobisôna banigil, ni sôblege bo i jôl li Tata, ni li Man, ni li mbuu mpubi, ni niigaga bo i tééda mam momasôna me bi kal bé.” (Matéô 28:19, 20; 1 Korintô 15:6) Ñ, i mpôôna le ngandak banigil bé i bé ha yokela, ngéda Yésu a om bo i yilha bôt banigil. Yésu a bé yeelene bo le i bet ba neebe kop yé nson, ba nlama kôs sôble. (Matéô 11:29, 30) Nu ni nu a ngwés gwélél Djob inoñnaga ni sômbôl yé, a nlama neebe, a yi ki tel i Yésu ikété biyônôl bi sômbôl i Yéhôva. Mbus hala, ntén mut u, u nla sôblana. Ntén sôble u, wotama won Djob a neebe. Miñañ mi Bibel mi ñunda le banigil ba Yésu ba hiai bisu, ba bé yi kii sôble i bé kobla. Jon ba bé tiñha bé sôblana.​—Minson mi baôma 2:41; 9:18; 16:14, 15, 32, 33.

9, 10. Bimbe biniigana di nla ôt mu sôble i man Etiôpia nu a bi neebe hémle i Lôk Yuda, ni i ñôma Paul?

⁹ Añ Minson mi baôma 8:35, 36. Di yoñ hihéga hi mut Etiôpia nu a bi neebe hémle i Lôk Yuda, nu a bé témb ki i loñ yé mbus bibégés i Yérusalem. Añgel i Yéhôva i bi om Filipô i boma nye, inyu “añle nye miñañ minlam inyu Yésu.” Mut Etiôpia a boñ lelaa mbus nkwel wap? Jam a bi boñ li bé unda le, a bé diihe maliga ba bé niiga nye. A bé bebee i boñ sômbôl i Yéhôva, jon a bi bat sôble ibabé i lep ngéda.

¹⁰ Ndémbél i yônôs iba i di nla sima, i yé i man Lôk Yuda wada nu a bé tééñga bikristen. A bi gwéé i litén li li bé li ma ti jomede nkikip yak Djob. Ndi Lôk Yuda i bi nimis maada map ma tôbôtôbô ni Yéhôva. Mut nu a ba ligip i tééda maéba ma base ma Lôk Yuda, ndi a léba njel i mondo inyu bégés Djob. Yésu Kristô nyemede nyen a tééne nye likalô mbus bitugne gwé, a ma témb i ngii. Ndi mut nu a boñ lelaa? A bi neebe mahôla ma nnigil  wada, le Anania. Bibel i nkal inyu mut nu le: “Ni nye a telep, a sôblana.” (Minson mi baôma 9:17, 18; Galatia 1:14) Bebek ni nyimbe le man Lôk Yuda nu nyen a nyiba kiki ñôma Paul. Ndi ni yimbe ki le, ngéda a bi nok lelaa Djob a bi gwélél Yésu inyu yônôs sômbôl yé, hala a bi tinde Paul i yoñ makidik. A bi sôblana ibabé i nimis ngéda.​—Añ Minson mi baôma 22:12-16.

11. (a) Kii i ntinde banigil Bibel i len ini, i sôblana? (b) Lelaa di nôgda ngéda mut a nti nyemede nkikip yak Djob, a sôblana ki?

¹¹ Hala a yé nlélém jam inyu banigil Bibel i len ini, to ba yé boñge, tole mimañ mi bôt. Bôt ba ndiihe maliga ba yé bebee i ti bomede nkikip ni i kôs sôble. Ngéda nkwel sôble, u u ntiba inyu yap u yé tagbe i makoda més makeñi ni ma ndôn, hala a yé a ba ngéda i tôbôtôbô. Mbôgi Yéhôva i nkon maséé, ngéda nnigil Bibel a neebe maliga, a yoñ ki makidik i sôblana. Baa bagwal ba ba yé bikristen, ba tah ba kon bé maséé, i tehe bon bap mu nsoñgi u bôt ba ntip sôblana? I nwii nson 2017, iloo 284 000 bôt ba ‘ba bé ba kôli,’ ba bi sôblana inyu unda le ba nti bomede nkikip yak Yéhôva. (Minson mi baôma 13:48) I bôt ba ba ntip yila banigil, ba nok loñge le, inyu yila kristen, ba nlama sôblana. Mambe mam ba bé lama ndugi boñ ilole ba nkôs sôble?

12. Mambe mam nnigil Bibel a nlama yônôs ilole a nkôs sôble?

¹² Ilole nnigil Bibel a nsôblana, a nlama bana hémle i i umne i bañga yi i Djob, a nlama yak yi kii i yé sômbôl Yé inyu bôt ba binam ni inyu hisi, ibabé hôya bitelbene Gwé inyu tohi i bôt ba binam. (1 Timôtéô 2:3-6) I nya hémle i, i ntinde nnigil Bibel i keñgle maboñok ma Djob a ñoo, ni i niñ inoñnaga ni matiñ ma téé sép ma Yéhôva. (Minson mi baôma 3:19) I yé ntiik le, Djob a ta bé le a neebe le mut nu a nti nyemede nkikip, a ke ni bisu i boñ mam mabe, ma ma nla boñ nye le a kôdôl bé Ane. (1 Korintô 6:9, 10) Ndi, hala a kôli ndik bé le di noñ matiñ ma nyôgi ma Yéhôva inyu loñge ni béba. Nwet a noñ telepsép a nlama yak ke i makoda, a yoñok ki ngaba i nya yôni i likalô, ni i nson u yilha bôt banigil. Yésu a kal le i bet ba yé toi banigil bé, bon ba bé lama yônôs nson u. (Minson mi baôma 1:8) Ndik ngéda mut a mal yônôs i mam ma momasôna, nyen a nla ti nyemede nkikip yak Yéhôva ikété masoohe, a yis ki bôt hala i mbamba ni njel sôble.

13. Ngéda di niiga bôt bape Bibel, inyuki di nlama bigda le lisôble li yé jam ba nlama boñ inyu yila kristen?

¹³ Ngéda di nhôla bon bés ni bôt bape i yônôs mam ma mahee ma, di nlama bigda le sôble i yé nseñ inyu yila bañga nnigil Yésu. Ibale di nhôya bé hala ntel ngéda wonsôna di nigil ni bo, di ga pam nôgha bo le i ti bomede nkikip ni kôs sôble bi yé nseñ inyu yap. Ñ, di gwé ngôñ le bon bés ni banigil Bibel bape ba hol ikepam i sôble!

14. Inyuki di nyégsa bé mut i bat sôble?

¹⁴ I yé ntiik le, mut nye ki nye a nlama bé nyégsa mañge, i bat sôble, to ibale a yé ngwal wé. Nlélém jam inyu mankéé nu a ntégbaha yigil i mut numpe ikété likoda. Yéhôva a nyégsa bé mut i gwélél nye. (1 Yôhanes  4:8) Maselna ni hala, ngéda di niiga bôt bape, di nlama unda bo nseñ i bana maada malam ni Djob. Maséé mut nyemede a nôgda ngéda a nigil maliga, lôñni ngôñ yé i boñ kii yosôna i mbéda inyu ba nnigil, gwon bi ga tinde nyemede i bat sôble.​—2 Korintô 5:14, 15.

15, 16. (a) Baa ngim nwii i mbéda inyu kôs sôble? Toñol. (b) Inyuki nnigil Bibel a nlama sôblana kiki Mbôgi Yéhôva to ibale a bi bôk a sôblana i base ipe?

¹⁵ Ngim nwii i tôbôtôbô i mbéda bé inyu sôblana. Banigil Bibel ba nhol bé nya yada. Ngandak i nkôs sôble ngéda i yé boñge ba wanda, i ntéñbe ki ni Yéhôva letee ni ngéda i nañ. Banigil Bibel bape ki, ba ntehe nseñ i sôblana mbus ngandak nwii mi yigil​—bahogi ba nyoñ makidik ma, ba ma tagbe 100 nwii!

¹⁶ Mañ muda wada, u bi bat mankéé nu a bé nigil Bibel ni nye too i bé ki nseñ le a sôblana, a bé a ma kôs sôble behee i bibase bipe. Sita i, i bi wan bipes bi Bibel ni nye, bi bi bé pôdôl jam li. Mañ muda u, u bi nok le inoñnaga ni Bibel, i bé béda nye le a sôblana, a boñ ki hala ndék ngéda mbus nkwel wap. To hala kii a bééna 70 nwii ni jam, a bi kal bé le sôble i gwé bé nseñ inyu yé. Ñ, sôble Djob a neebe, i umne i bañga yi i sômbôl i Yéhôva. Jon, i bet ba ntip bôdôl yigil Bibel ba nlama sôblana, to ibale ba bi sôblana i base ipe.​—Añ Minson mi baôma 19:3-5.

17. Kii di nlama bigda i kel mut a nsôblana?

¹⁷ Kel sôble i yé i ba ngéda maséé kiyaga. I yé ki loñge ngéda inyu ôt pék mu makidik di nyoñ. I tééda likak di bi boñ le di ga ti bés bomede nkikip yak Djob, i mbat biliya bi ngui. Inyu hala nyen Yésu a hégha makidik i yila kristen ni yoñ kop nson. Banigil ba Yésu ba ‘niñ ha bé inyu yap bomede, ndik inyu nu a wo, a tuge ki inyu yap.’​—2 Korintô 5:15; Matéô 16:24.

18. Mambe mambadga di ga wan i yigil i noñ ha?

¹⁸ Nyañ Maria a bééna minlélém mi mahoñol, ngéda a bé badba mambadga di nsima bibôdle bi yigil ini. Ibale u yé ngwal, bebek yak we u nla badba le: ‘Baa man wem a yé bebee i kôs sôble? Baa a gwé yi i kôli inyu ti nyemede nkikip yak Djob? Baa man wem a nlama ndugi meehe suklu yé, a kôs ki bôlô ilole a nsôblana? M’a boñ lelaa ibale man wem a nkôs sôble, ndi mbus a kwo i béba keñi?’ Di ga wan mambadga mana i yigil i noñ ha, di ga tehe ki lelaa bagwal ba nla bana litehge li kôli inyu sôble.