“Amen” woñ a yé nseñ i mis ma Yéhôva
YÉHÔVA a ndiihe bibégés di nti nye. A ‘nsédi maôô, a emblege bés’ kayéle bibégés gwés, to bi yé isii kiki kii, a ntehe gwo. (Malaki 3:16) Kiki hihéga, di béñge buk yada di mbéna gwélél. I buk i i yé “amen.” Baa Yéhôva a ndiihe i man buk nu? Ñ, a ndiihe yo! Inyu nok inyuki, di wan i yom i buk i i nkobla ni lelaa Bibel i ngwélél yo.
“NI LIKODA JOLISÔNA LI KAL LE: ‘AMEN!’”
Ni hop u Ngisi i buk ini le, “amen” i nkobla le “i ba hala,” tole “hala a yé maliga.” I nlôl ni buk i Lôk Héber i i nkobla le “i ba maliga,” “i ba mut ba nla bôdôl ñem.” Ba bé gwélél i buk i inyu bikééhene. Mut a bé kal “amen” mbus a mal kum soñ, inyu unda le jam a nkal li yé toi maliga, ni le a bé bebee i neebe bikuu bi bé le bi kwél nye ibale a ntembee. (Ñañga bôt 5:22) Ngéda a bé kal le “amen,” a bééna bañga njom i tééda mbônga wé.—Néhémia 5:13.
Ndémbél i nlôôha lam i het “amen” a bi kéla i nlébna i kaat Ndiimba Mbén pes 27. I mbus le bon ba Israel ba bi jôp Hisi Likak, ba bi kodba ipôla Hikôa Ebal ni Hikôa Gérizim inyu emble lisoñgol li Mbén. Ba bé ndik bé ha inyu emble, ndi yak inyu unda le ba neebe i yom Mbén i bé kal. Ba bé boñ hala ngéda ba bé kémhe le “Amen!” mbus ba bé soñgol bikuu bi bé lama kwél bo ibale ba ndogop. (Ndiimba Mbén 27:15-26) Hégda mbimba i kiñ i dikôô di bôlôm, di bôda, ni di boñge ngéda di bé kémhe! (Yôsua 8:30-35) I yé ntiik le ba bi hôya bé bibuk ba bi pahal yokela. Bon ba Israel ba, ba bi yônôs mbônga wap, jon ñañ u nkal le: “Ni Israel i gwélél Yéhôva dilo di Yôsua tjodisôna, yak dilo tjodisôna di mañ mi bôt mi mi yégle mbus nyemb i Yôsua, mi yik ki nson u Yéhôva wonsôna, u a gwélél Israel.”—Yôsua 24:31.
Yésu a bi gwélél i buk ini le “amen” inyu unda le i yom i bi kéla i téé, ndi “amen” wé a bééna ngobol i tôbôtôbô. Iloole a gwélél yo inyu kémhe bipôdôl bi mut numpe, a bi gwélél “amen” (tole “hodo”) inyu jubus biniigana bi maliga a bé ti bôt. Ngim mangéda, a bé tiimba yo, a kalak le “hodo hodo.” (Matéô 5:18; Yôhanes 1:51) Ni njel i, a bé yis baemble nye le bipôdôl gwé bi bé maliga. Yésu a bé le a pot hala inyule nyen a bé lama yônôs mimbônga mi Djob nwominsôna.—2 Korintô 1:20; Masoola 3:14.
“BÔT BOBASÔNA BA POT LE, ‘AMEN!’ BA BÉGÉS KI YÉHÔVA”
Bon ba Israel ba bé gwélél i buk ini le “amen,” ngéda ba bé bégés Yéhôva, ba soohege ki nye. (Néhémia 8:6; Tjémbi 41:14) Mbus masoohe, baemble ba bi unda le ba neebe i yom i nkéla. I bet bobasôna ba bé la yoñ ngaba, ba bi nok maséé i bégés Yéhôva ni i njel i. Jam li jon li bi bôña ngéda Kiñe David a bi lona Nkuu malômbla u Yéhôva i Yérusalem. Mu ngand i tagbe yokela, a bi ti masoohe ma ngui ni njel hiémbi hi hi nlébna i kaat 1 Miñañ 16:8-36. Bibuk bi David bi, bi bi lôôha tihba i bet ba bé ha yokel, kayéle ñañ u nkal le: “Bôt bobasôna ba pot le, ‘Amen!’ ba bégés ki Yéhôva.” Ñ, ndimbhe ba bi ti ni kiñ yada i bi kéñbaha maséé ba bi nok i kel i.
Yak bikristen bi hiai bisu bi bé gwéélak ini buk le “amen” ngéda ba bé bégés Yéhôva. Batila Bibel ba bé béna gwélél yo bikaat gwap. (Rôma 1:25; 16:27; 1 Pétrô 4:11) Kaat Masoola i mpôdôl biañgel bi nti Yéhôva lipém, bi kalak le: “Amen! Aléluya!” (Masoola 19:1, 4) Bikristen bi hiai bisu bi bééna lem i kal le “amen” i mamélél ma masoohe makoda map. (1 Korintô 14:16) Ndi, ba bé tiimba ndik bé i buk i, tiimba ni tiimba.
INYUKI “AMEN” WOÑ A YÉ NSEÑ
Nano nu di mal tehe lelaa bagwélél ba Djob ba bé gwélél i buk ini le “amen,” di nla nok inyuki i buk i i yé nseñ mamélél ma masoohe. Ngéda di nkémhe hala mamélél ma masoohe més, di ñunda le i yom di nkal i ta bé njôha. Ngéda di ñemble masoohe ma mbamba, ndi ñem u tinde bés i timbhe le “amen,” to di mpahal bé, wee di neebe mam ma mpôda mukété masoohe. Di béñge ki inyuki i kal le “amen” i yé nseñ.
Di nyoñ ngaba bibégés, di bak ki péé ngéda mut numpe a nsoohe. Di mbégés ndik bé Yéhôva ni bibuk ngéda di ñemble masoohe ma mbamba, ndi yak ni libak jés. Kiki di gwé ngôñ le “amen” wés a bana mahee i mis ma Djob, di nlama yoñ bitelbene i bana libak li nwee, ni i bok mahoñol més mu jam li mpôda masoohe.
Di mbégés Djob ikété adna. Mut a nsoohe mbamba a nlama yi le likoda jolisôna li yé i emble nye. (Minson mi baôma 1:14; 12:5) Ngéda di ñat kiñ yés ni i bilôk bikéé bi bôlôm ni bi bôda bipe, hala a nkônde lédés adna yés. To di nkal “amen” ni kiñ ngii tole ikété ñem, hala a ntinde ki Yéhôva i timbhe masoohe més.
“Amen” wés a njôp ikété bibégés di nti Yéhôva
Di mbégés Yéhôva. Yéhôva a nyimbe mam momasôna di mboñ inyu bégés nye. (Lukas 21:2, 3) A ntehe yom i yé bés i ñem. Yak i ngéda di nla bé ke i likoda ndi di emblege jo ni njel nsiñga, di nla ba nkwoog nkaa le Yéhôva a nyimbe yak “amen” wés di nkal ha bésbotama. Ngéda di nkal “amen,” di mbégés Djob ntôñ ni lôk kéé yés.
I mis més “amen” wés a nla nene le a gwé bé nseñ, ndi a nlôôha ba mahee. Inoñnaga ni kaat yada i ndoñi bibuk bi Bibel, “amen” a nhôla bagwélél ba Djob i pahal “bôdôl ba gwé mu masoohe ma ntiba, i unda le ba nit mo ni ñem wap wonsôna, ni inyu unda i botñem ba gwé le Djob a’ timbhe masoohe map.” Le hiki ngéda di nkal le “amen,” hala a lémél Yéhôva.—Tjémbi 19:15.
