1. Kii mut a nlama boñ ilole a mbôdôl oñ ndap?

HÉGDA le mut a nsômbôl oñ ndap. A nyi ntén ndap a nsômbôl oñ. Baa a ga ke ndik, a somb bisélél a bôdôl maoñ ngélé yada? Heni. Ilole a mbôdôl oñ ndap, a nlama ndugi boñ ngim jam, a nlama yéñ yi i moni mi mbéda nye. Inyuki? Inyule a nlama yi too i moni a gwé mi nkola inyu mélés ndap yé. Ibale a mbôk a ôt nsoñgi bisu bi ngéda, hala a ga bane nye jam li ntomb i mélés maoñ ma ndap yé.

2. Inoñnaga ni Lukas 14:27-30, kii u nlama ndugi boñ ilole u nsôblana?

² Baa gwéha yoñ inyu Yéhôva i nti we ngôñ i kôs sôble? Ibale hala, wee u yé kiki mut a nsômbôl oñ ndap. Inyuki di nkélél hala? Béñge jam Yésu a bi kal i kaat Lukas 14:27-30. (Añ.) Yésu a bé pôdôl i mam mut a nlama boñ inyu ba nnigil. Inyu noñ nye, di nlama ba bebee i nihbe mandutu, ni i boñ bisesema. (Lukas 9:23-26; 12:51-53) Jon ilole u nsôblana u nlama tibil ôt pék mu jam li. Hala a ga boñ le u téñbe i gwélél Djob i mbus sôble yoñ.

3. Kii di ga tehe munu yigil ini?

³ Baa i yé toi nseñ i boñ bisesema inyu yila nnigil Kristô? Ñ! Sôble i nyible we njel i kôs bisai bi mbuma ñañ nano, ni dilo di nlo. Di wan le ngim mambadga i i mbéñge sôble. Ngéda w’a wan mo, ha nyen w’a la timbhe ini mbadga le: “Baa me yé bebee i sôblana?”

4. (a) Kii i yé i ti wemede nkikip? (b) Ngéda kaat Matéô 16:24 i nkal le mut a ‘nlama ha bé niñ inyu nyemede,’ hala a nkobla le kii?

⁴ Kii i yé i ti wemede nkikip? Ilole u nsôblana, u nlama ti wemede nkikip yak Djob. Inyu ti wemede nkikip, u nlama yible Yéhôva ñem woñ ikété masoohe, u kal nye le w’a gwélél niñ yoñ yosôna ibôdôl ha ngéda i, inyu boñ sômbôl yé. I pot maliga, ngeñ u nti wemede nkikip yak Djob, u ‘nlama ha bé niñ inyu wemede.’ (Añ Matéô 16:24.) Inyule ha ngéda i, di niñil inyu Yéhôva. Kinje nsima! (Rôma 14:8) U nkal nye ikété masoohe le, ibôdôl ha linut li, sômbôl yoñ bé yon w’a bii bisu, ndi sômbôl yé. Hala a nkobla le, i ngéda u nti wemede nkikip, wee u nkégél Yéhôva likak. Yéhôva a nyégsa bé bés i bôñôl nye i nya mbônga i. Ndi ibale di mbôn nye ngim jam, ngôñ yé i yé le di yônôs mbônga wés.​—Tjémbi 116:12, 14.

5. Mambe maada ma yé ipôla i ti wemede nkikip ni kôs sôble?

⁵ Mambe maada ma yé ipôla i ti wemede nkikip ni i kôs sôble? Ngéda u nti wemede nkikip, u yé ndigi we ni Yéhôva. Ki le u nsôblana bisu bi ngandak bôt; libim li ngéda, hala a mbôña makoda makeñi, tole makoda ma ndôn. Ngeñ u nsôblana, u nyis bôt bape le u bi ti wemede nkikip inyu gwélél Yéhôva. * Jon sôble i nyis bôt bape le u ngwés Yéhôva, Djob joñ, ni ñem woñ wonsôna, ni nom yoñ yosôna, ni ngui yoñ yosôna, ni le u nyoñ makidik i gwélél nye i boga ni boga.​—Markô 12:30.

6-7. Inoñnaga ni 1 Pétrô 3:18-22, mambe mam ima ma ñunda le sôble i yé nseñ?

⁶ Baa sôble i yé toi nseñ? Béñge le bini bibuk bi mpémél i kaat 1 Pétrô 3:18-22. (Añ.) Kiki nkuu u bé yimbne i hémle i Nôa, hala nyen sôble yoñ i yé yimbne le u nti niñ yoñ nkikip inyu gwélél Yéhôva. Ndi baa sôble i yé toi nseñ? Ntiik. Pétrô a bi toñol i jam li. Pok, sôble yon i yé i “tohol bé.” Sôble i nla tohol bés ibale di gwé maboñok ma ma ñunda le di nhémle Yésu, di hémlege ki le a bi wo inyu yés, a tuge i ngii, ni ki le a yé nano “i woo walôm u Nyambe.”

⁷ Iba sôble i nti bés “loñge kiññem.” Ngeñ di nti niñ yés nkikip, di sôblana ki, ibôdôl ha ngéda i, di mbana maada ma tôbôtôbô ni Nyambe. Kiki di ntam bibéba gwés, di hémlege sesema i Yésu, Djob a nwéhél bibéba gwés. Jon di gwé loñge kiññem.

8. Kii i nlama tinde we i sôblana?

⁸ Kii i nlama tinde we i sôblana? Yigil yoñ i Bibel i nhôla we i yi Yéhôva, mam a ngwés ni ma a ñoo. I mam u bi nigil inyu yé, ma bi lôôha tihba we, ma tinde ki we i gwés nye ngandak. Gwéha i, yon i nlama ba jam li bisu li li ntinde we i sôblana.

9. Kiki kaat Matéô 28:19, 20 i nkal, i sôblana i jôl li Tata, li Man ni li mbuu mpubi wee kii?

⁹ Jam lipe li li ntinde we i sôblana li yé maliga u nléba mu i yigil yoñ i Bibel, u hémle ki. Béñge i jam Yésu a bi pot ngeñ a bi kal le ba yilha bôt banigil. (Añ Matéô 28:19, 20.)  Inoñnaga ni bibañga gwé, bôt ba nlama sôblana “i jôl li Tata, li Man, ni li mbuu mpubi.” Kii hala a nsômbôl kal? Di nlama hémle kii yosôna Bibel i nkal inyu Yéhôva; Man wé Yésu; ni mbuu mpubi. Biniigana bi bi gwé ngui ngandak, bi nla héñha niñ yoñ. (Lôk Héber 4:12) Di pôdôl le ngim mam mu.

10-11. Kii u bi nigil inyu Tata, u hémle ki?

¹⁰ Hoñol ki ngéda u bi bôdôl yi Tata wés: U bi nigil le “jôl jé le Yéhôva,” le a “yé nungingii ngii ’isi hiosôna,” ni le nyetama nyen a yé ‘bañga Nyambe.’ (Tjémbi 83:19; Yésaya 37:16) A yé Nhek wés, ‘tohi i nlôl i nyeni.’ (Tjémbi 3:9; 36:10) A bi yoñ bitelbene inyu pémés bés i mok mi béba ni nyemb, a nti ki bés botñem i niñ boga. (Yôhanes 17:3) Ngéda u nti wemede nkikip, u sôblana ki, u nyila Mbôgi Yéhôva. (Yésaya 43:10-12) Ha ngéda i, u njôp lihaa likeñi li bagwélél ba Djob i nkoñ ’isi wonsôna, li li yé maséé i sébla ni jôl jé, ni i hôla bôt bape i yi i jôl li.​—Tjémbi 86:12.

¹¹ Kinje nsima i nok i jam Bibel i nkal inyu Tata wés! Ibale u nhémle biniigana bi, hala a ga tinde we i ti wemede nkikip, ni i sôblana.

12-13. Mambe mam u ma nigil inyu Man Nyambe, u hémle ki?

¹² U bi nôgda lelaa ngéda u bi nigil maliga mana inyu Man Nyambe? Yésu a yé bôt ba nyônhe iba ikété ngiinda yosôna. A bi ti niñ yé sesema inyu yés. Ibale di ñunda ni maboñok més le di nhémle toi i sesema i, bibéba gwés bi nwéhlana, di nyila ki mawanda ma Djob, ni ki le, di gwé botñem i niñ i boga. (Yôhanes 3:16) Yésu a yé Prisi yés ikeñi. A yé bebee i hôla bés i kôs bisai bi nlôl mu sesema yé, ni i bana maada malam ni Djob. (Lôk Héber 4:15; 7:24, 25) Nyen a yé Kiñe Yéhôva a’ gwélél inyu pubus jôl jé, inyu mélés béba ni inyu kôp bés bisai bi bi nom i boga ni boga i Paradis. (Matéô 6:9, 10; Masoola 11:15) Yésu a yéne bés ndémbél ilam. (1 Pétrô 2:21) A bi unda hala ngeñ a bi ti niñ yé nkikip inyu boñ sômbôl i Djob.​—Yôhanes 4:34.

¹³ Ngéda u nhémle biniigana bi Bibel inyu Yésu, ha nyen u mpam i gwés nye. I gwéha i y’a tinde we i gwélél niñ yoñ inyu boñ sômbôl i Djob kiki Yésu. Sôk i nsôk, u ga bana ngôñ i ti Yéhôva niñ yoñ sesema, ni i sôblana.

14-15. Bimbe biniigana inyu mbuu mpubi u bi kôs, u hémle ki?

¹⁴ Kii u bi nôgda ngéda u bi nigil i mam mana inyu mbuu mpubi? U bi nigil le u ta bé ngim mut, ndi u yé ngim ngui. Yéhôva a bi ti bôt ba binam mbuu mpubi wé inyu boñ le ba tila Bibel, u nhôla ki bés i nok i mam di ñañ mu, ni i ha mo bisélél. (Yôhanes 14:26; 2 Pétrô 1:21) Yéhôva a ngwélél mbuu mpubi wé inyu ti bés “lipémba li li nloo li mut binam.” (2 Korintô 4:7) Mbuu mpubi u nti bés ngui i añal ñañ nlam, i kolba manoodana ni i hônba mandutu, u nhôla ki bés ngeñ di nimis makénd. U nhôla bés i bana bilem bilam bi “litam li mbuu.” (Galatia 5:22) Ba bobasôna ba mbat Djob mbuu  mpubi ni ñem wap wonsôna, a nti bo wo yañga.​—Lukas 11:13.

¹⁵ Kinje maséé bagwélél ba Yéhôva ba nôgda i yi le mbuu mpubi u nla hôla bo i gwélél nye! Ngéda u neebe biniigana bi Bibel inyu mbuu mpubi, hala a ntinde we i ti wemede nkikip ni i sôblana.

16. Kii di ma tehe munu yigil ini?

¹⁶ Makidik u nyoñ i ti wemede nkikip ni i sôblana ma nlôôha nseñ. Kiki di mbôk di tehe, di nlama ba bebee i neebe mandutu momasôna ni bisesema makidik ma ma nlona. Ndi bisai di ga kôs bi mbuma ñañ. Sôble i nla hôla bés i kôs tohi, i nti ki bés loñge kiññem. Jam li bisu li nlama tinde we i sôblana i yé gwéha yoñ inyu Yéhôva Nyambe. U nlama ki hémle mam momasôna u bi nigil inyu Tata, Man, ni mbuu mpubi. Ni i mam momasôna di nkwélél munu yigil ini, u nhoñol lelaa: “Baa me yé bebee i sôblana?”

17. Mambe mam mut a nlama boñ ilole a nsôblana?

¹⁷ Ibale u nôgda le u yé bebee i kôs sôble, wee u ma boñ ngim mam inyu bana maada malam ni Yéhôva. * Yigil yoñ i Bibel i nhôla we i tibil yi Yéhôva bo Yésu. Nano u gwé toi hémle. (Lôk Héber 11:6) U yé nkwoog nkaa le mimbônga mi Yéhôva nwominsôna mi ga yon, u nhémle ki le sesema i Yésu i nla héya we i mok mi béba ni nyemb. U bi tam bibéba gwoñ; u bat ki Yéhôva nwéhél. U bi héñha bilem gwoñ, u nwas mam mabe, u kahal niñ inoñnaga ni sômbôl i Nyambe. (Minson mi baôma 3:19) U nyamnda ni ngôñ i añle bôt bape i mam u nigil. Jon, mimañ mi bi ti we kunde i yila ntéé likalô nu ngi sôblana, u bôdôl pam likalô ni lôk kéé i likoda. (Matéô 24:14) Yéhôva a yé maséé inyu mam malam u bi boñ. Ñ, u nkônha toi nye maséé.​—Bingéngén 27:11.

18. Kii ipe u nlama boñ ilole u nsôblana?

¹⁸ Ilole u nsôblana, u ngi gwé ngim mam i boñ. Kiki di ntehe, u nlama ti wemede nkikip inyu gwélél Djob. Kwélés nye ikété masoohe, boñ hala ni ñem woñ wonsôna, bôn nye le u ga tégbaha niñ yoñ yosôna i boñ sômbôl yé. (1 Pétrô 4:2) Mbus, kal nkot juu li mimañ le u nsômbôl sôblana. A ga yoñ bitelbene le mimañ mi kwel ni we. U kon bañ mimañ mi woñi. Ni nyina loñge, ba ngwés yak we. Ba ga bat we mambadga mu mam u ma  nigil. Ngôñ yap i yé le ba yi too u ntibil nok i mam u nigil, ni le u nyi toi makidik u yé yoñ. Ibale ba ntehe le u nla sôblana, ba ga yis we le, w’a sôblana likoda li makiiña tole li ndôn li li nlo.

19-20. Kii u nlama boñ i mbus sôble yoñ, lelaa u nla pam i boñ hala?

¹⁹ Ngéda w’a sôblana, kii u nlama boñ? * U hôya bañ le, i ngéda u nti wemede nkikip, u mbôn Yéhôva le w’a gwélél nye niñ yoñ yosôna, ngôñ yé i yé le u yônôs mbônga woñ. Jon i mbus sôble yoñ u nlama ke ni bisu i niñ inoñnaga ni mbônga woñ. Lelaa u nla pam i boñ hala?

²⁰ U ke bañ haa ni lôk kéé i likoda joñ. Kiki u nsôblana, u njôp i ntôñ u “lôk kéé wonsôna.” (1 Pétrô 2:17) Lôk kéé i bôda ni i bôlôm i yé kiki lihaa joñ. Ibale u nke makoda hiki ngéda, ni ga yila mawanda. Añ Bibel hiki kel, u soñda ki yo. (Tjémbi 1:1, 2) Ngéda u ñañ ngim pes Bibel, yoñ ngéda i ôt pék mu. Ha nyen bibuk bi, bi ga tihba we. U “waa bañ to soohe.” (Matéô 26:41) Kiki u mba u nsoohe Yéhôva ni ñem woñ wonsôna, hala nyen w’a kônde kôôge nye bebee. Kee “ni bisu i yéñ ndugi Ane.” (Matéô 6:33) U mboñ hala ngéda nson likalô won u yé jam li bisu i niñ yoñ. Ibale u nke likalô hiki ngéda, hémle yoñ y’a let, u yé ki le u hôla bôt bape i bana botñem i niñ boga.​—1 Timôtéô 4:16.   

21. Bimbe bisai w’a kôs ngéda u nsôblana?

²¹ Ibale u nti wemede nkikip, u kôs ki sôble, wee u nyoñ makidik ma nloo makidik momasôna. I yé mbale le, u nlama boñ bisesema. Ndi baa bisesema bi bi yé yañga? Balôñe! Mandutu momasôna u mboma munu bôô nkoñ ’isi ini, ma ‘nom ndik ndék ngéda, ma hoyok ki.’ (2 Korintô 4:17) Ndi sôble y’a yible we njel i bana niñ ilam ibôdôl nano, ni “bañga niñ” i dilo di nlo. (1 Timôtéô 6:19) Jo ni jon, tibil ôt pék, u soohe ki inyu timbhe i mbadga ini le: “Baa me yé bebee i sôblana?”