1-2. Inoñnaga ni kaat Minson mi baôma 8:27-31, 35-38, kii i bi tinde ngomin Étiôpia i sôblana?

BAA u nsômbôl kôs sôble inyu yila nnigil Kristô? Ngandak bôt i bi yoñ makidik ma inyule ba ngwés Yéhôva, ba bak maséé inyu mam a mbôñôl bo. Di wan ndémbél i ngomin yada i i bé sélél kiñemuda i loñ Étiôpia.

² I man Étiôpia nu a bi sôblana kunda yada ngéda a bi tibil nok Bitilna. (Añ Minson mi baôma 8:27-31, 35-38.) Kii i bi tinde nye i yoñ makidik ma? A bé gwés Bañga i Djob; jon a bé añ pes kaat i Yésaya i ngii kak yé. Ngéda Filipô a bi kwel ni nye, hala a bi tinde i mut nu i ti Yésu mayéga inyu mam a bi boñ inyu yé. Ndi inyuki i ngomin i i bi ke i Yérusalem? Inyule a bé gwés Yéhôva. Kii i nyis bés hala? A bé lôl i bégés Yéhôva i Yérusalem. I nene le mut nu a bi tjôô base yé inyu adba ni mpom litén u u bé bégés bañga Djob. Gwéha inyu Yéhôva yon i bi tinde ki nye i yoñ makidik i kôs sôble, ni i yila nnigil Kristô.​—Matéô 28:19.

3. Kii i nla kéñ mut i sôblana? (Béñge minkéñék mi matila le: “ Umbe ntén hisi u yé?”)

³ Gwéha inyu Yéhôva i nla tinde we i sôblana. Ndi gwéha i nla ki kéñ we i yoñ makidik ma. Lelaa? Di wan ndék dihéga. I nla pam le u ngwés bôt boñ ba lihaa ni mawanda moñ ba ba ta bé maliga ngandak. U nkon woñi le ba ga oo we ibale u nsôblana.  (Matéô 10:37) Tole u ngwés ngim mam Yéhôva a ñoo, inyu boñ le u nwas mo, njee bo njee. (Tjémbi 97:10) I nla ki ba le u bi néñél lihaa li li nyoñ ngaba i mangand ma kwéha base. Bebek u ngi gwéhék ngim mam i i gwé maada ni mangand ma. Inyu hala nyen i nla bane we nledek jam i nwas bilem bi bi nlémél bé Yéhôva. (1 Korintô 10:20, 21) U nlama badba le: “Kii tole njee me nlôôha gwés?”

4. Kii i yé jam li bisu bisu li li nla tinde bés i sôblana?

⁴ Ngandak mam i nlémél we, i nkônha ki we maséé. Kiki hihéga, bebek ilole u mbôdôl nigil ni Mbôgi Yéhôva, u bé gwés Bibel. Bebek u bé gwés yak Yésu. Nano nu u nigil ni Mbôgi Yéhôva, bebek u ngwés u ntégbaha ngéda ni bo. Ndi i gwés i mam mana i nkola bé inyu ti wemede nkikip ni i kôs sôble. Jam li bisu l’a tinde we i sôblana li yé gwéha yoñ inyu Yéhôva Djob. Ibale u ngwés Yéhôva iloo mam momasôna, w’a nwas bé le jam jo ki jo, to mut nye ki nye a kéñ we i gwélél nye. Ha ngéda i, gwéha inyu Yéhôva yon y’a tinde we i sôblana, i hôla yak we i téñbe ni nye.

5. Mambe mambadga di ga wan?

⁵ Yésu a kal le di nlama gwés Yéhôva ni ñem wés wonsôna, ni niñ yés yosôna, ni mahoñol més momasôna, yak ni ngui yés yosôna. (Markô 12:30) Kii i nla hôla we i gwés Yéhôva ni i ti nye lipém i nya i? Ibale di ñôt pék mu gwéha Yéhôva a ñunda bés, yak bés di ga gwés nye. (1 Yôhanes 4:19) Mambe mahoñol ni maboñok mape di ga bana i ngéda di mbôdôl gwés Yéhôva? *

6. Inoñnaga ni kaat Rôma 1:20, imbe njel u nla gwélél inyu yi Yéhôva?

⁶ Kôôge Yéhôva bebee ni njel bihégél. (Añ Rôma 1:20; Masoola 4:11) I béñge binuga ni bibebela i nhôla bés i soñda mu pék i Yéhôva. Hoñol kiki Yéhôva a bi hek nyuu yoñ i nya i mbuma ñañ. (Tjémbi 139:14) Hoñol ki i ngui yosôna hiañgaa hi hi yé ndik hiôdôt hiada mu didun di didun di tjôdôt Yéhôva a bi hek, hi gwé. * (Yésaya 40:26) Kiki u mba u mboñ hala, w’a kônde ti Yéhôva lipém. Ndi i yi le Yéhôva a gwé pék ni ngui, i yé ndik jam jada li li nlédés maada més ni nye. Inyu boñ le di ngwés Yéhôva ngandak, di nlama yéñ manjel i kônde yi nye.

7. Inyu boñ le di gwés Yéhôva ngandak, kii di nlama hémle?

⁷ U nlama ba nkwoog nkaa le Yéhôva a ntôñ toi we. Baa hala a nlédél we i neebe le Nhek ngii ni hisi a nyi we, ni le a ntôñ we? Ibale hala, bigda le Yéhôva a “ta bé haa ni hiki wada wés.” (Minson mi baôma 17:26-28) A “nwan miñem nwominsôna,” a mbôn ki we le, kiki David a kal Salômô: “Ibale u nyéñ nye, w’a léba nye.” (1 Miñañ 28:9) Ñ, ibale u nigil  Bibel nano, hala a yé ndik inyule Yéhôva nyemede a nkal: “Me bi ôt we i meeni.” (Yérémia 31:3, NWT.) Kiki u nke ni bisu i ti Yéhôva mayéga inyu mam a mbôñôl we, hala nyen w’a kônde gwés nye.

8. Lelaa u nla ti Yéhôva mayéga inyu gwéha yé?

⁸ Njel yada di nla gwélél inyu ti Yéhôva mayéga inyu gwéha yé i yé le di soohe nye. Kiki u mba u nkal nye i mam ma ntééñga we, u tinak nye mayéga inyu mam momasôna a mbôñôl we, hala nyen w’a yila liwanda jé. Maada moñ ni Yéhôva m’a let mu kiki u mba u ntehe nye a ntimhe masoohe moñ. (Tjémbi 116:1) U ga pééna ha bé le a nyi we. Ndi inyu kôôge Yéhôva bebee, u nlama tibil yi mahoñol mé. U nlama ki yi kii a nsômbôl le u boñ. U nla bé yi i mam mana momasôna, ibale u nigil bé Bañga yé le Bibel.

9. Lelaa u nla unda le u ngwés Bibel?

⁹ Yoñ Bañga i Nyambe le Bibel kiki likébla. Ndik Bibel yotama yon i mpot maliga inyu Yéhôva ni inyu mam a nsômbôl mbôñôl bôt ba binam. Inyu unda le u ngwés Bañga i Djob, u nlama añ yo hiki kel, u bôñha yigil yoñ, u gwélél ki mam u nigil. (Tjémbi 119:97, 99; Yôhanes 17:17) Baa u gwé ngim ntjega u u nhôla we i añ Bibel? Baa u mpam toi i noñ wo, kayéle hilo to hiada hi ntagbe bé we ngi añ yo?

10. Limbe jam li tôbôtôbô li nlébna ndik ikété Bibel?

¹⁰ Ndik ikété Bibel nyen di nla léba mbôgi i bôt ba bi tehe Yésu. Yotama yon i ntoñol ni maliga i mam Yésu a bi bôñôl we. Kiki u mba u nigil i mam Yésu a bi pot, ni ma a bi boñ, w’a bana ngôñ i yila liwanda jé.

11. Lelaa u nla pam i gwés Yéhôva?

¹¹ Gwés Yésu, ndi w’a kônde gwés Yéhôva. Inyuki di nkal hala? Inyule  Yésu a bi kôna bilem bi Isañ i nya i yôni. (Yôhanes 14:9) Jon, kiki w’a ke ni bisu i yi Yésu, hala nyen w’a kônde yi mahoñol ma Yéhôva, u yila ki liwanda jé. Kiki hihéga, hoñol i ngôô Yésu a bi unda i bet bôt bape ba bé yan, kiki bo diyeyeba, ni bakokon. Hoñol ki maéba malam a nti we, ni lelaa niñ yoñ i nlama ngéda u nha mo bisélél.​—Matéô 5:1-11; 7:24-27.

12. Ibale u nyi Yésu, hala a nla tinde we i boñ kii?

¹² Ibale u ntibil ôt pék mu sesema Yésu a bi ti inyu boñ le bibéba gwés bi nwéhlana, hala a yé le a tinde we i gwés nye ngandak. (Matéô 20:28) Ngéda u nok le Yésu a bi neebe ti niñ yé inyu yoñ, hala a nla tinde we i tam bibéba gwoñ inyu boñ le Yéhôva a nwéhél we. (Minson mi baôma 3:19, 20; 1 Yôhanes 1:9) Kiki w’a ke ni bisu i gwés Yéhôva bo Yésu, hala nyen w’a bana ngôñ i kodba ni i bet yak bo, ba ngwés bo.

13. Kii Yéhôva a nti we?

¹³ Gwés i bet ba ngwés Yéhôva. I yé le i pam le, minlômbi nwoñ mi mawanda ni bôt boñ ba lihaa ba ba ta bé maliga, ba unup inyule u ngwés yila Mbôgi Yéhôva. Ba nla yak kolba we. Ndi, Yéhôva a’ ti we lihaa lipe. Ibale u nyén bebee ni lihaa li, lôk kéé i bôda ni i bôlôm y’a gwés we, i nit ki we. (Markô 10:29, 30; Lôk Héber 10:24, 25) I mbus ngéda, bôt boñ ba lihaa ba yé le ba kahal gwélél Yéhôva, ba nôgôl ki nye.​—1 Pétrô 2:12.

14. Inoñnaga ni kaat 1 Yôhanes 5:3, lelaa u ntehe mambén ma Yéhôva?

¹⁴ Diihe matiñ ma Yéhôva, u noñ ki mo. Ilole u mbôdôl nigil Bibel, bebek u bé niñ kiki u ngwés, ndi nano u ntehe le mambén ma Yéhôva ma yé malam. (Tjémbi 1:1-3; añ 1 Yôhanes 5:3.) Hoñol maéba Nyambe a nti balôm, bôda, bagwal, ni boñge. (Éfésô 5:22–6:4) Ibôdôl nu u noñ maéba ma, baa lihaa joñ li yé maséé? Ibôdôl nu u noñ mambén ma Yéhôva inyu jam li mawanda, baa bilem gwoñ bi nhéñha? Baa u yé maséé nano iloo i ngéda bisu? (Bingéngén 13:20; 1 Korintô 15:33) I nla ba le u nôgda toi le mambén ma, ma yé nseñ.

15. Kii u nla boñ ibale u nyi bé lelaa u nla bii matiñ ma Bibel bisélél?

¹⁵ Ngim mangéda, i nla pam le u yi bé lelaa u nla bii matiñ ma Bibel u nigil bisélél. Jon ntôñ u Yéhôva u mpémés bikaat bi bi nla hôla we i yi bagal jam lilam ni jam libe. (Lôk Héber 5:13, 14) Mu kiki u mba u nigil bikaat bi, u ga tehe le bi yé nseñ, bi kôli ki, hala a yé le a tinde we i jôp i ntôñ u Yéhôva.

16. Lelaa Yéhôva a ntjek bagwélél bé?

¹⁶ Gwés ntôñ u Yéhôva, u nit ki wo. Yéhôva a nkot bagwélél bé ikété makoda; Man wé Yésu nyen a ñane momasôna. (Éfésô 1:22; 5:23) Yésu a bi téé ndék bôt inyu éga nson wé. A bi sébél bo le “nkol u maliga ni u pék,” ba njôha bé ni nson wap i jés bagwélél ba Djob, ni i tat bo i pes mbuu. (Matéô 24:45-47) Njel yada nkol u u ngwélél inyu yônôs nson wé i yé le, u nyoñ bitelbene le ba téé mimañ inyu tat bés. (Yésaya 32:1, 2; Lôk Héber 13:17; 1 Pétrô  5:2, 3) Mimañ mi yé bebee i boñ bisesema inyu hôgbaha we, ni i hôla we i kôôge Yéhôva bebee. Ndi ikété mam momasôna ba mbôñôl we, jada li li nlôôha nseñ li yé le, ba nhôla we i niiga bôt bape sômbôl i Yéhôva.​—Éfésô 4:11-13.

17. Inoñnaga ni kaat Rôma 10:10, 13, 14, inyuki di nlama hôla bôt bape i yi Yéhôva?

¹⁷ Hôla bôt bape i gwés Yéhôva. Yésu a bi kal banigil bé le ba hôla bôt bape i yi Yéhôva. (Matéô 28:19, 20) U yé le u sal nson u, ndik inyule ba nkal we le u sal wo. Ndi kiki gwéha yoñ inyu Yéhôva y’a ke ni bisu i keñep, u yé le u nôgda nlélém jam kiki Pétrô bo Yôhanes ba ba kal le: “Di nla bé waa pot i mam di bi tehe, di nok ki.” (Minson mi baôma 4:20) Mam ma ntina maséé kiki i hôla mut i yi Yéhôva ma ntôl bé. Hégda maséé ñañal ñañ nlam le Filipô, a bi nôgda ngéda a bi hôla man Étiôpia i yi maliga, ni i sôblana! Ngéda u nigle Filipô, mu kii u noñ i oda i Yésu ini le di añal ñañ nlam, u ñunda le u nsômbôl yila Mbôgi Yéhôva. (Añ Rôma 10:10, 13, 14.) Ha ngéda i, u yé le u bat kiki man Étiôpia le: “Kii i nkéñ me njel i kôhna sôble?”​—Minson mi baôma 8:36.

18. Kii di ga tehe mu yigil i noñ?

¹⁸ Makidik i kôs sôble ma yé makidik ma nlôôha nseñ i niñ yoñ. Kiki sôble i ta bé njôha, u nlama tibil ôt pék mu jam li. Kii u nlama yi inyu jam li sôble? Kii u nlama boñ ilole u nkôs sôble, ni i mbus sôble yoñ? Di ga timbhe mambadga ma mu yigil i noñ.