1. Inoñnaga ni kaat i Matéô 24:9, inyuki hala a nhélés bé bés mu kiki nkoñ ’isi u ñoo bés?

YÉHÔVA a bi hek bés le di gwés bôt yak le bôt ba gwés bés. Jon i ngéda mut a ñoo bés, hala a ntééñga bés, di nla yak kon woñi. Kiki hihéga, sita Georgina nu a yé i Érôpa a nka le: “I ngéda me bééna 14 nwii, mama yem a bé oo me inyule me bé gwélél Yéhôva. Hala a bi boñ le me hoñol le me ta bé nseñ ni le me bé béba mañge.” * Mankéé wada le Danylo a ntila le: “Bisônda bi bi bép me, bi sol me, bi sômbôl yak nol me inyule me bé Mbôgi Yéhôva, hala a bi kônha me woñi, a wéha yak me nyuu.” I nya ôa i i ntééñgana ngandak, ndi hala a nhélés bé bés, inyule Yésu a kal le ba ga oo bés.​—Añ Matéô 24:9.

2-3. Inyuki ba ñoo banigil ba Yésu?

² Nkoñ ’isi u ñoo banigil ba Yésu. Inyuki? Inyule kiki Yésu, di “ta bé bôt ba nkoñ ’isi.” (Yôhanes 15:17-19) Tolakii di nsuhus bésbomede isi biane bi bôt ba binam, di ntjél bégés libadô li nyuñg, to loñge hiémbi hi loñ. Yéhôva nyetama nyen di mbégés. Di nhoñol le Djob nyen a kôli énél bôt ba binam, yom Satan ni “mbôda” yé ba mpééna. (Bibôdle 3:1-5, 15) Di nhoñol le Ane i Djob yotama yon i ga mélés mandutu ma nkoñ ’isi, ni le i ga tjé i bet ba nkolba yo. (Daniel 2:44; Masoola 19:19-21) Hala a yé nwin u nlam inyu bôt ba suhulnyuu, ndi nwin u mbe inyu bibéba bi bôt.​—Tjémbi 37:10, 11.

 ³ Ba ñoo ki bés inyule di niñ inoñnaga ni matiñ ma Bibel. Matiñ ma Djob inyu loñge ni béba ma nlôôha ba mahéñha ni ma bôt ba nkoñ ’isi. Kiki hihéga, ngandak bôt i len ini i ntehe bé malal ipôla bôlôm ni bôlôm tole bôda ni bôda kiki béba jam, ki le inyu njom i yon Yéhôva a bi tjé Sôdôm ni Gômôra! (Yuda 7) Mu kiki di noñ matiñ ma Bibel ma ma nkolba i nya mam i, ngandak bôt i nyan bés, i kalak le yak bés di nlôôha!​—1 Pétrô 4:3, 4.

4. Bimbe bilem bi nhôla bés i ngéda bôt ba ñoo bés?

⁴ Kii i nla hôla bés i hônba ôa ni bisol? Di nlama bana botñem le Yéhôva a ga hôla bés. Kiki ben, hémle i nla “lém makoñ ma hié ma mut mbe momasôna.” (Éfésô 6:16) Ndi, hémle yotama i kôli bé. Di nlama bana yak gwéha. Inyuki? Inyule gwéha “i ñunup bé.” I nihbe, i nhônba mam momasôna. (1 Korintô 13:4-7, 13) Nano di béñge lelaa gwéha inyu Yéhôva, inyu lôk kéé yés, ni inyu baoo bés i nla hôla bés i hônba ôa.

5. Lelaa gwéha i Yésu inyu Isañ i bi lédés nye?

⁵ I u ilole ba nol nye, Yésu a kal banigil bé le: “Me ngwés Tata, me mboñ mam ndik kiki Tata a bi ti me oda le me boñ.” (Yôhanes 14:31) Gwéha i Yésu inyu Yéhôva i bi ti nye ngui i hônba mandutu ma bé bem nye. Yak bés i gwéha i, i nla hôla bés i hônba mandutu.

6. Inoñnaga ni kaat Rôma 5:3-5, lelaa bagwélél ba Yéhôva ba ntehe ôa i nkoñ ’isi?

⁶ Gwéha inyu Nyambe yon i mbéna hôla bagwélél ba Yéhôva i hônba ngolba. Kiki hihéga, i ngéda ntôñ bakéés bakeñi u bi ti baôma oda le ba nwaa téé likalô, gwéha inyu Djob i bi tinde bo i “nôgôl Nyambe kiki ñane, iloo bôt.” (Minson mi baôma 5:29; 1 Yôhanes 5:3) I nya gwéha ikeñi i, i nlédés ngandak lôk kéé, i ngomin a ntééñga i len ini inyu hémle yap. Iloole hala a tômbôs bo, ba ntehe hala kiki nsima i hônba ôa i nkoñ ’isi.​—Minson mi baôma 5:41; Añ Rôma 5:3-5.

7. Lelaa di nlama tehe bôt bés ba lihaa ba ba nkolba bés?

⁷ Bebek le lihaa joñ jon li nlôôha kolba we. I ngéda mut a mbôdôl nigil maliga, ngim bôt ikété bôt bé ba lihaa i nla hoñol le a nyôm. Bape ba nla hoñol le a nkônd njék. (Hégha ni Markô 3:21.) Ba nla yak bôdôl tééñga nye. I nya maboñok mabe i, i nlama bé hélés bés. Yésu a kal le: “Baoo ba mut b’a ba yaga bôt ba ndap yé lihaa.” (Matéô 10:36) Ñ, to ibale bôt bés ba lihaa ba ntehe lelaa bés, di yoñ bañ bo kiki baoo bés. Ndi kiki gwéha yés inyu Yéhôva i nkeñep, hala nyen gwéha yés inyu bôt yok i nañ. (Matéô 22:37-39) Ndi, di nlama bé bôk mambén ma Djob to matiñ mé ndik inyule di ngwés lémél ngim mut.

8-9. Kii i bi hôla sita yada i ke ni bisu i gwélél Yéhôva tolakii a bé boma ngolba ikeñi?

⁸ Georgina nu di mbôk mpôdôl, a bi téñbe ni maliga tolakii nyañ a bé kolba nye. Georgina a nkal le: “Me ni mama yem di bi bôdôl nigil Bibel ntôñ ni Mbôgi Yéhôva. Ndi sôñ isamal i mbus, i ngéda me bi bôdôl ke makoda, mama yem a tonbana me. Me bi léba le a bééna maada ni batjañgbene maliga, inyule a bé gwélél mahoñol map i ngéda di  bé kwel. A bé sol me, a nimblak me tjôñ, a bébék me, i bé i pam yak le a lep bikaat gwem. I ngéda me bi bolna 15 nwii, me sôblana. Inyu boñ le me waa gwélél Yéhôva, mama yem a bi ep me i homa ba ntééda boñge bôda ba ba yé ndok, bahogi ikété yap ba bé ôt hibañga, ba bé kand yak bikuu. I nlôôha ba ndutu i hônba ngolba i ngéda i nlôl ni mut a lam-ga gwés we, a tééda ki we.”

⁹ Lelaa Georgina a bi boñ? A nkal le: “I ngéda mama yem a bi bôdôl tééñga me, me bé me ma tip mal añ Bibel yosôna. Hala a bi kwés me nkaa le me yé maliga, a hôla ki me i kôôge bebee ni Yéhôva. Me bé béna soohe nye, a emblege me. I ngéda me bé nyoo i ndap ba ntééda boñge bôda ba ba yé ndok, sita yada i bé naña me i mbai yé inyu boñ le di niglak Bibel ntôñ, di boñôk ki nyiña. Mu ngéda i yosôna, bilôk bikéé bi bôda ni bi bôlôm bi bé lédés me i ngéda me bé ke i ndap Ane. Me bi yila i mis map kiki mut wap lihaa. Me bi tehe yaga le Yéhôva a gwé ngui iloo baoo bés bobasôna.”

10. Di yé nkwoog nkaa ni kii?

¹⁰ Ñôma Paul a tila le yom yo ki yo i nla bé “bagal bés ni gwéha Nyambe i i yé i Kristô Yésu Nwet wés.” (Rôma 8:38, 39) To ibale di mboma ngim ndutu i len ini, di nyi le Yéhôva a ga tjôô bé bés, a ga lédés bés. Kiki di ntehe munu hihéga hi Georgina, Yéhôva a ngwélél yak lôk kéé i bôda ni i bôlôm inyu hôla bés.

11. Lelaa gwéha Yésu a mpôdôl i kaat Yôhanes 15:12, 13, i bi hôla banigil bé? Ti hihéga.

¹¹ I u u nsôk ilole a nwo, Yésu a bi hôñlaha banigil bé le ba nlama gwéhna. (Añ Yôhanes 15:12, 13.) A bé yi le i gwéha ikeñi i i bé lama hôla bo i tééda adna, ni i hônba ôa i nkoñ ’isi. Di yoñ hihéga hi likoda li Tésalônika. Ibôdôl yaga i ngéda li bi tééba, lôk kéé i bi boma ngolba. Ndi bilôk bikéé bi bôlôm ni bi bôda bi bi ti ndémbél ilam i ndéñbe ni i gwéha. (1 Tésalônika 1:3, 6, 7) Paul a bi ti bo makénd le ba kee ni bisu i gwéhna “i nya i yôni.” (1 Tésalônika 4:9, 10) Gwéha i bi tinde bo i hôyôs  nduña ikeñi i lôk kéé yap i i bé bomb, ni nit bo. (1 Tésalônika 5:14) Ba bi noñ maéba ma Paul, kayéle i ngéda a bé tilna bo i kaat yé i yônôs iba bebee le nwii wada mbus, a kal bo le: “Gwéha i hiki wada nan i keñep inyu nuu numpe.” (2 Tésalônika 1:3-5) Gwéha i bi hôla bo i hônba njiiha ni ndééñga.

12. I ngéda gwét bi bi bôô, lelaa lôk kéé i loñ yada i bi unda le i bé gwéhna?

¹² Di yoñ hihéga hi Danylo nu di mbôk sima bo nwaa. I ngéda gwét bi bi bol i tison yap, ba bi waa bé ke makoda to téé likalô, ba bé kapna yak i ndék bijek ba bééna ni lôk kéé yap i bôda ni i bôlôm. Kel yada bisônda bi bi jôp i ndap Danylo ni mangaa. Danylo a nkal le: “Ba bi kal me le me pam i base i Mbôgi Yéhôva. I ngéda me bi tjél ba bép me, ba kal le ba ñôm me ngaa, ba bi leñ, me nok hikoñgo hi ntagbe me i ngii ño. Ilole ba nke, ba bi bôñe me le i ngéda b’a témb, ba nlalna nwaa wem ni ngui. Ndi bilôk bikéé bi bi pala ha me mashin, ba ep me i tison ipe. Kekikel m’a hôya bé gwéha i lôk kéé yem. I ngéda di bi bol nyoo i tison i, lôk kéé i bi ti bés bijek, i hôla ki me i léba bôlô ni ndap! Hala a bi boñ le yak bés di bi sôk hôla lôk kéé ipe i i bé ke gwét ngwéé.” I ndémbél i yosôna i ñunda le gwéha i lôk kéé i nla hôla bés i hônba ôa.

13. Lelaa mbuu mpubi u nhôla bés i ke ni bisu i gwélél Yéhôva to i ngéda bôt ba ñoo bés?

¹³ Yésu a kal banigil bé le ba gwés baoo bap. (Matéô 5:44, 45) Baa hala a yé bun? Heni! Ndi hala a nla bôña ni mahôla ma mbuu mpubi. Ikété litam li mbuu di gwé gwéha, di gwé yak wongut, loñgeñem, ñem nlam, ni hôtnyuu. (Galatia 5:22, 23) Bilem bi bi nhôla bés i hônba ôa. Ngandak bôt i i bé kolba bés i bi héñha inyule sobiina wap, man wap tole mut wap libôk nu a yé kristen a gwé bilem bilam. Ngandak ikété yap i bi yila lôk kéé yés i gwéha. Jon ibale hala a nlédél we i gwés bôt ba ba ñoo we inyule u ngwélél Yéhôva, soohe  Djob le a ti we mbuu mpubi wé. (Lukas 11:13) Ba nkwoog nkaa le, i ngéda u noñ manjel ma Djob hiki ngéda, w’a nkôs bisai.​—Bingéngén 3:5-7.

14-15. Lelaa kaat Rôma 12:17-21, i bi hôla Yasmeen i unda nlô wé gwéha tolakii a bé tééñga nye ngandak?

¹⁴ Di yoñ hihéga hi Yasmeen. I ngéda a bi yila Mbôgi Yéhôva, nlô wé a bi hoñol le a nyôm, a yéñ yak tinde nye i waa gwélél Djob. A bé sol nye, a tindge yak bôt bap ba lihaa, baéga base ni mut makañ wada i tééñga nye. A bi ôm yak nye nsohi le a nsômbôl bagal lihaa jé. Nlô wé a bé lo yak i ndap Ane inyu sol bilôk bikéé! I mam ma momasôna ma bé boñ le Yasmeen a ee.

¹⁵ I ngéda Yasmeen a bé a bol i ndap Ane, lôk kéé i bé i hôgbaha nye, i lédhak nye. Mimañ mi bi ti nye makénd i noñ maéba ma yé i kaat Rôma 12:17-21. (Añ.) Yasmeen a nkal le: “Hala a bé bé bun. Ndi me bé bat Yéhôva le a hôla me, me boñok ki biliya bi ngui le i yom me ñañ i Bibel me bii yo bisélél. Jon to i ngéda nlô wem a bé hoo kishin mahindi ni ntjeñ, me bé sas yo. I ngéda a bé sol me, me bé timbhe ni minyaô. I ngéda a bé kon, me bé tééda nye.”

16-17. Kii ndémbél i Yasmeen i niiga we?

¹⁶ Gwéha i Yasmeen ipañ nlô wé i bi lona nye ngandak bisai. A nkal le: “Nlô wem a bi kahal bôdôl me ñem iloo hihéga, a yik le me gwé lem i pot maliga. A bi bôdôl yoñ ngéda i emble me i ngéda di nkwel mam ma base, a bé boñ yak biliya le nsañ u ba ikété ndap. I len ini, a nti yak me makénd i ke makoda. Nano me ni nlô wem di nôgla loñge, ndap i yé toi nwee. Masoohe mem ma yé le nlô wem a neebe maliga, di kahal sélél Yéhôva ntôñ.”

¹⁷ Ndémbél i Yasmeen i ñunda le gwéha “i nihbe mam momasôna, . . . i mbôdôl mam momasôna ñem, i nhônba mam momasôna.” (1 Korintô 13:4, 7) Ôa i nla tééñga ngandak, i babaa yak bés, ndi gwéha i nla yémbél yo. I nyoña bôt. I nkônha yak Yéhôva maséé. To ibale bôt ba nke ni bisu i oo bés, di nla ba maséé. Lelaa?

18. Inyuki di nla ba maséé to ibale ba ñoo bés?

¹⁸ Yésu a kal le: “Maséé ni bé hiki ngéda bôt ba ñoo bé.” (Lukas 6:22) Mut to wada a ngwés bé i ngéda ba ñoo nye. Di ngwés bé to le ba tééñga bés letee ni nyemb inyu unda le di yé bôt ba hémle. Ndi inyuki di yé ni maséé i ngéda ba ñoo bés? Di tehe manjom maa. Pog, i ngéda di nhônba ôa, di nlémél Yéhôva. (1 Pétrô 4:13, 14) Iba, hala a mboñ le hémle yés i kônde let. (1 Pétrô 1:7) Aa, di ga bana nsima i niñ i boga ni boga.​—Rôma 2:6, 7.

19. Inyuki baôma ba bé maséé i ngéda ba bi bép bo?

¹⁹ Ndék ngéda i mbus bitugne bi Yésu, baôma ba bi nôgda maséé a bi pôdôl bo. I ngéda ba bi bép bo, ba kal bo le ba waa téé likalô, ba bé maséé. Inyuki? “Inyule ba bi éña kiki bôt ba kôli kôhna wonyuu inyu jôl li [Yésu].” (Minson mi baôma 5:40-42) Ba bé gwés Malét wap ngandak, iloo i woñi ba bé nôgda. Ba bi unda i gwéha i, mu kiki ba bé añal ñañ nlam “ibabé waa.” Ngandak lôk kéé yés i len ini i nke ni bisu i gwélél Yéhôva tolakii i mboma mandutu. Ba nyi le Yéhôva a ga hôya bé nson wap, ni i gwéha ba bi unda inyu jôl jé.​—Lôk Héber 6:10.

20. Kii di ga tehe i yigil i noñ?

²⁰ Ntel ngéda wonsôna nkoñ ’isi unu w’a nom, b’a ke ndik ni bisu i oo bés. (Yôhanes 15:19) Ndi, di nlama bé kon woñi. Kiki di ga tehe i yigil i noñ, Yéhôva “a’ lédés . . . a sôñ ki” bagwélél bé. (2 Tésalônika 3:3) Jon di kee ni bisu i gwés Yéhôva, i gwés lôk kéé yés i bôda ni i bôlôm, ni i gwés i bôt ba ñoo bés. Ibale di noñ maéba mana, di ga tééda adna yés, di bana hémle i ngui, di ti ki Yéhôva lipém. Di ga unda ki le gwéha i nloo ôa ngui.